Aning atonun ululnye bira, dua kum sum, keting panalyalirye, deiplye talak ara, dirina teleb ulamle atonun ulule. Tonda, anye bira mok cepliba, dola falamlebuk, aminyan keting ula donokliba, urasin teleb ulamle touk ulule. Raja birye, Allah ati ilil upliba, ninye taliplyopura, aninye ara, kanye delinyake. Ara, keting panalyalirye, keting ula deiplyopura, ninye arye kanye delinyaka atonun ulule.” Allah arye, na Daud biti nyapnuke, nyabuk. Nyabukopura, Daud birye, ayupu ton nyabuk.
Hosea 6:3 - Eipomek3 Aning winipmasila ati ara, nun nirya arye piribibirye, Allah Yahweh ati, dib tenebuka dobolbanamabe. Ara, nun ni koprop Allah ati, ‘Se, dipkoprob anda pia mambul weiknye ulyame,’ nyabuka, el tibuk, si erenamabe. Batakna kumce, Allah ati dib tenebuka dobolbalamipya ani, dipkoprob Allah arye, nun melina ati, asum-asum nirya beren tam talak keting panalyangalamle atonun, Allah arye nunti, yanuka melinamsile. Aning atonun winipmanto ara, weik dou malamlya ani, sirya talak ara, mok weik arye cepliba, tukwak mutuku nirya, teleb ulamle touk ulirye, nunti melipsilirye, teleb ulinamsile. Nabi Hosea birye nyabuk. အခန်းကိုကြည့်ပါ။ |
Hosea 6:3
36 ပူးပေါင်းရင်းမြစ်များ
Na nyalamse yupu nirya ap, na pil dolamse ning nirya ara, ‘Se, aning ara, pia mambulʼ tenen, anang nirya arye, moubuka kekelamikce, moubuka dilamnik. Sikce kanye deibuka anyalamik yupu ara, kekebuka dololamik. Winipmanto ara, sik wa win nang arye, sik wa wibuka kouamikce ning, kita obuka duk mouplye talak ara, ‘Mok ceptue,’ tenebikceba, mok celyalyopura, kanye delilamaka atonun ulamik.
Keting ap, wala ap, kurya ap nirya ara, ninye yupu nyalamak atonun, nyabuka kum laka nyasinyake. Tonda, tukwak ninye arye yupu nyanyaka ara, kum kekenyap bukni, mutuku nirya unyak ninye arye, im noutamak ulul ning nirya eibice deice arye, ‘Se, Allah el pia teleb ulul ning ara, ani’ tenen, moubuka kel bikinyake. Mutuku-mutuku unyak ninye nirya babye, im noutamak ulul ning nirya elinyaka ati ara, adeice arye, Allah el winilul ning ton, sik nirya kel bikinyake.
Keting beren tam talak ara, keting yangan tam arye kutukuka tiklirye, keting duk-dukan noutamak ara, bisik banmalya ani, sintam ara, omutuku keting wengban tam kum ulule. Winilula anya arye, el balul talak nirya ara, im sirya, mutuku sirya nirya ulul ning ara, el tin aniryuk buppu pirilule. Tonok ning babye duknuptuba, keting dirina ap, tin ap kum upnamle. Tukwak mutuku ulul ning nirya, keting sinarya elule.
Winibuka ance weik mambul pil dopminyeba, mutuku-mutuku daunyak ninye nirya arye, Allah antibuk ilil ululba, an siuk erenyakce, winilikinyake. Ara, ance sik dam ninye kum winipmanto ning winiminyeba, sik aninye nirya eibikirye, ‘Se,’ tenen, antibuk si erebuka winilikinyake. Tonda, mutuku-mutuku daunyak ninye nirya, ance weik mambul pil dopminyeba, eibikirye, Allah antibuk si erekinyake. Ara, keting yangalye tam ap, keting wekelbalye tam ap, mutuku-mutuku nirya, danoutam unyak ninye nirya arye, anti, ‘Se’ tenen, an kina ati, weik yupu nyabuka, an si erekinyake.
Elcuk aninye talinamle talak ara, winipmanto, wa wibuka kouamicak, mok ceplirye, adeice sakliba, koun ning teleb kibuka palamle ning atonun, Allah ance elti, melipminya deice arye, elce talinamle ninye nirya ara, telebuk unamake. Tonda, mok weika arye ceplirye, koun ning bok deice saklibuk, koun ning paplirye, urasin teleb kilamle touk, ance melipminya deice arye, ‘Nun Raja arye, talinamne ninye nirya ara, telebuk unamak’ tenen, moropkine.
Sik mutuku dana-dana unyak ninye ayala-ayala nang nirya arye, nyanamake. “Kume, amutuku ara, Allah el si Yahweh arye, wipdeiamuk mutuku anya arye, amutuku dilbinuyabe,” nyanamake. Tonda, “Se, Israel ninye, sik apu koproba Yakub biti, kalikuka melilamuk Allah ara, el aik amutuku deice domik ning ara, bulubuka dilbinamabe,” nyanamake. Tonda, “Nun nirya arye, Allah el aik domik mutuku deice welebipye talak ara, Allah arye, ‘Winina telebe, winina ara meme,’ tenelye ning peterenamsile. Ayupu kekebipyopura, elce nyasilye touk, talibuka diksukumuk unamabe. Elce melipsilyeba, el bisikuk dobolbanamabe,” nyanamake. Ati Allah arye, ‘Wininamlulume, aning ara, kum wininamlulume,’ nyabuka peteresilye yupu ara, Sion mutuku arye deiyok koubikirye, mutuku-mutuku nirya peterepra banamake. Allah arye nyasilye yupu ara, Yerusalem mutuku arye nyapsikiba, kekenamlulume.
Anggun ulamlum mutuku ara, malyeuk dauamlya ani, Allah arye el Dib Kanye im deice weika arye arepnamsile. Arepsiliba, mek pia una kum mutuku nirya, tuku teleb kiplirye, wa tuku pia teleb upnamle. Teleb upliba, wa wibuka koubikiba, paplirye, duk moun ning ayala-ayala nirya pabuka duk mouplirye, pia weik upnamle anya arye, talye bai mutuku palamla atonun unamle.
Ati, an unamlam mutuku selal selamle tukwak nirya ara, narye mek dikeipkiniba, mek balamlirye telebuk unamle. Tonda, selal selamle tukwak mek arepneba banamle. Na Dib Kanye ara an deice deipkiniba, ance deipminba dadeipdanin banamak ninye sik deice deipnamne. Na mikip sik deice deipniba, teleb kipdeipnamsine. Winipnya deice arye, sik un ning nirya telebuk upliba, sik aninye ara yupa pia weik upra banamake.
‘Na anggur tapu duk weik moupnamnil’ tenen, anggur tapu taruk seklopniba, kwapu youbuka, duk weik mouptu bukni, aning ara, kum seklopnamne. ‘Duk weik moupnamnil’ tenen, pinga kum deipnamne. Anggur wa ara, ‘Dauplye’ tenen, bataknamne. Anggur wa wilamse mutuku nirya ara, talye yo mutmuta ap, tace ning ap, beteklirye pabuka kwiniklyopura, anggur tapu bok ton kum eipnamake. Talye ninguk papnamle. Tonda, narye dua ap, mok ap ati, “Memepdoplulume,” nyapniba, mok ara, asukum ton kum sakuka, kum pulyanamle.
Anggun mapu amutuku unamak ninye nirya ara, na Allah Yahweh arye peterenamsine. Anggunce deipmunba, dadeipdanin banamak ninye ara, teleb kipdeipniba, sikce aning-aning nirya pil dobuka unamak ning ara, nong upnamle. Nong upliba bona weik talinamake. Na tam kinamake. Winibikca deice anggun nirya diksukumuk buka telebuk unamlume.
Narye sikti, kanye talima winiryuk ning arepninyeba, sikce na Allah ati, ‘E, nun ni Allah, elda dipkoprob Yahweh, el ukaʼ tenen, moubuka biknamake. Winibikceura, sikda na mapu koproba unamake. Tonda, nara sik ni koproba Allah unamne. Winipyeba, sik malye wininyak ning nirya, batakikcak arye, sik kanye talima nirya ara, dobuka, na deiceuk deibikirye, na siuk erenamniake.
Akunum boyasinyopura, anggun nong nirya ara, narye pia mek diksukum arye, anggun nirya mek likuka, teleb kipdeipnamsine. Winipsinyopura, anggun malye winimunce, Isa Mutuku Dongonye si erelulum ning nirya batakmumce, telebuk unamlume. Ara, narye mek diksukum busubuka, anggun nong deice purupdonoksinya deice arye, anggun talima pum tam malye winilulum ning ap, Isa Mutuku Dongonye si eremunye ning ap nirya ara, kum daneipnamsine.
Winipmanto ara, ninye arye, teleb yala koubikiba, daulamlya ani, aminyan talak, pia teleb ning paplirye, nong teleb yongobuka lilamak touk, na Allah arye, anggun Israel yala nang ati nyapsine. Se, anggun Israel nango! Anggun wa wibuka kouna atonun, winiryuk diksukum un ninguk, upnin banamlume. Tonda, yala delina atonun, anggunce na ap, yuk nang ap ati, batakna pia kumce, pia bico tenepmunce, melinauk wininamlume. Na deice anggun kanye talima deipnamnulume! Tonda, ninye arye, wa tuku wena kumce, talye batakikirye, dauamlya ani, oketing tamun arye, uku seknarye wa wibuka koulamak touk, anggunce teleb winin ning kum winilamlum ning ara, tuba teleb winin ning winipnin banamlume. Aning nirya ara, talye ati kum nyapsine. Deiyok ara, anggunce, ‘Nun ni Allah arye, teleb kipdeipnamsilʼ tenen, na dam tamubuka yanululume. Winipmunce, nati kanye deipnumunce, diksukum winin ninguk winimunyopura, na Allah arye anggunti, teleb kipdeipnamsine. Ara, weik mok ceplirye, tukwak sakliba, aning-aning teleb kibuka palamle touk, narye anggunti, teleb kipdeipsinyopura, anggunda telebuk unamlume. Ati, anggunce nati enamnulum talak ara, akunum dam uple.
Ati ara, aminyan talak ara, narye anggun Israel yala ninye ati, tuba tamubuka teleb kipdeipnamsine. Winipmanto ara, kel-kel alamlye tuku dauamliba, mok cepliba, mok purye sakuka poupliba, tuba ton teleb ulamle touk, narye sikti, teleb kipdeipniba, telebuk unamake. Winipnyopura, pia telebuk unamake. Winipmanto ara, mok weik cepliba, bunga keta oplibuk, teleb ulamle touk unamake. Tonda Libanon mutuku noutam kepyal yo tiklirye, yating tuku pum tam bilirye, mikip arye tiklamle atonun unamake.
Sik aninye ara, kamuk ukirye, dadeipdanin balamikiba, weik upnin banamake. Winipmanto ara, ninye arye wa wibuka koulamak ning koubikiba, paplirye, bilikuka balirye palamle touk, aninye babye yupa weik upnin banamake. Tonda, zaitun yo nyanyak duk mouplirye, nintong teleb lelamle touk unamake. Tonda Libanon mutuku kepyal yo nintong teleb lelamle touk, telebuk unamake.
Amutuku yanganamak ninye, sikce nyanamak ning ara, “Yalulume, nun nirya Sion mutuku deice welebibirye, Israel ninye, sik ni Allah Yahweh, el si eren aik dam binuyabe. Winibibiba, elce nun wininamap ning nirya ati, bisik nukunamsile. Winibuka nuksiliba, nun nirya arye, abisikuk dobolbanamabe. Aning nyapmasina deiyok ara, Allah Yahweh el yupu ara, Yerusalem mutuku noutamuk ulula ati, amutuku uk, binuka unamabe. Tonda, Allah Yahweh ara, Sion mutuku deiceuk ulirye, el mapu koproba ati, yupu moubuka peterelule. Ati, Yerusalem mutuku uk, binuka unamabe,” nyabuka nyanamake.
Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake.
Tonda aminyan talak, Israel yala ninye mitik tonun dem, sirya tuba unmace ninye ara, yuk mutuku ninye kan-kan dabinuka unamak bukni, pia mikip weik ninye unamake. Winipmanto ara, weik yu kuse el si singa kus ara, mikip pia weik ulule. Bai tam noutamak ara, yuk kam ning ton, yala weik aulul bukni, sik mikip ara mitik uka. Singa kuse ara, el mikip pia weik. Singa kuse yu weik ning arye, domba basam weklamaka kan-kan binuka weklirye, talye lukparabuka domba basam obuka diplirye, el si arye, kalibuka bataklamle touk, sik Israel ninye arye, yuk mutuku ninye kan-kan bikirye onamake. Ninye arye, yu weik singa kuse ati, yupu kum seklamak touk, yuk mutuku ninye arye, Israel ninye ati, yupu sekmanto kum unamake. Singa kus arye domba basam olamle talak, domba basam arye lyepdanmanto kum ulamak touk, atalak ara Israel ninye arye olbinamak ninye, sik bidamang ati, kum lyepdanamake.
Kwapu youbuka bongon li talak kiplyopura, anggunce Allah Yahweh ati, “Mok arepsilyame,” nyabuka moropmunyopura, Allah el si Yahweh arye, dua kunukna ning arepsiliba, kunuklirye, weik mok ceplirye, tukwak mutuku saklibuk, ninya wa wibuka koulamak ning nirya bongoplirye, bok teleb ubuka palule. Winiplyopura, Allah arye tukwak im sirya, mutuku sirya nirya, unyak ninye nirya ati, bongobuka palamle ning aning-aning nirya bokeipliba, talibikirye, teleb kanye bobuka unyake.
Bukni, anggunce nati, ‘Allah elda weik mambule,’ tenebuka, na si erenululumce, na nyapdeiamse yupu uk, moubuka talipmunce, ululum ninye nirya ati, na mikip ara, anggun deice deipsiniba, keting delilamle touk upsilyopura, teleb kipdeipsinirye, lyepnamsine. Winipsinya deice arye, anggun ikin usilye ning nirya, kum daneipnamsine. Winipmanto ara, sapi basam mi poka pum tam dongamica ani, apoka pum bisik arye kubuka, bai tam bilirye, weik kanye delilamle touk upmunce, kanye delinamlume.
Asipdeyikbuk, Yesus arye tamubuka nyabuk. Allah arye ninye weike lyeplirye, sik kanye talima talinamle nyasunun yupu ara, Allah arye nyapdeiamnuk touk, na mapu anggunti yupu nong laka nyasunune. Bukni, yuk talya ninye ati ara, na yupu dib tenebuka, moubuka kum kekenyaka ati, aninye ati domon yupu arye, nong bola deiceuk nyanune.
Nun ni Allah arye ninye nirya ati, minpola wenebuka kum osulul bukni, kanye talima areplyeura, bico tenebuka melisululnye anya arye, nun malye ning nirya kum kipsilirye, lyepnamsile. Berentam talak keting deiplirye, kuna ak dirina ulamle atonun nun ni Allah arye nun lyenanye, im deice arye dopkweteplibuk, nun dam yanamsile.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
Yata ninye do nirya, sikce, ‘Allah tenenyamsukce, el yupu deice nyasilye touk, aninguk talibuka unamabe,’ tenebikirye dipkoprop ubicopura, kel biknamak ning nyapnusine. Na Yesus arye, na kanye aryuk peterenun do? Na Ni Koprop Allah arye nyanilye yupu uk peterenun do? Ayupu dobolbanyak ninyeuk kel biknamakca,” Yesus arye nyabuk.
Berea mutuku ninye ara, sik Tesalonika ninye mitik teleb ulamika atonun kum ulamik. Sik Berea mutuku ninye ara, Pia telebuk ulamik. Sik talima kintinibuka deililamikce, Paulus arye laka peterebuk yupu teleb kibuka kekelamik. Pia kanye deibuka kekelamikce, ‘Paulus nyanmasil yupu ara, pia dipkoprop do, kum do?’ tenelamikce, asum-asum nirya sik Allah yupu buku doprobik akarye wibuka deililamik.
Na peterepnusin yupu ara, weik melinamsila anya arye, mok purwu saklamla atonun upnamsile. Tonda, kurye dei saklirye, maning deice palilamla atonun upnamsile. Tonda, winiryuk koupmakce maning tuku deice, mok purwu saklamla atonun upnamsile. Tonda, na peterepnusin yupu ara, winipnamsile. Winipmanto ara, din yala kouamikiba, mok weika arye cepliba, aning bongoplirye, pabuka duk teleb moulamle touk, na peterepnusin yupu ara, melinamsile.
Amambul yupu ton nyapnusine. Nunce Allah ati, winiryuk diba tenebupu talak ara, kanye bokoltona kum arye, mikip arye diba tenebupu touk, tuba-tuba diba tenepra balamibya ani, dorsirya talak babye, batakna kum arye, Allah eluk moubuka talibibirye, tuba diba tenenamabe. Winibuka winibibyopura, wini talak babye, aminyan talak babye, Kristus ap, talima dukdongobuka neika unamabe. Bukni, kanye boktopsilyeba, Allah ati batakipyopura, Yesus Kristus ap, neika kum unamabe.
Aninguk kum bukni, tonda, Allah el yupu laka nyalamik nang, nabi nang arye sekeiyamik yupu, pia dipkoprop yupu ara, akunum upmasile. Ayupu ara, ninye arye kunuknak banukce talak, weisa ubikibuk, dirina uplibuk, bita dikirye balamak touk, usulule. Allah el yupu, laka nyalamik nang arye seklamik yupu ara, dirina atouk usulule ati, anggunce ayupu moubuka kekenamlulume. Allah ati, moubuka min kum kel kiplum bikamlum talak noutamak ap, Yesus Kristus tukwak mutuku, tamubuka min kum yanaplye talak noutam ap, sik seklamik yupu moubuka kekenamlulume. Aning upnamsil talak ara, beren tam talak kipnamalya ati, tulik bisik yalamle talak ap, ulul kurya tikilyangalamle talak ap, dirina uplibuk, ‘Aning nirya, lakak dinuyabe,’ tenelamap touk, upnamsile.
“Na Yesus arye, na im deice pil dona nang, malaikat dobuka an dam dopkwetepmakina ara, ‘Ayupu nirya laka nyapkikiba, ance nati diba tenenyak ninye nirya, laka nyalbinalam’ tenen, amalaikat dopdeipmakine. Minop talak ulamuknye Raja Daud birye deibukba, dadeipdanin yangalamika ani, deibik mi, weik mambul mi ara, na uka. Na si ati, ‘Berentam Talak Panabuka Tikilamla Kurya,’ nyaninyake.”
ကြော်ငြာတွေ