Pia minop talak arye, Allah elda diksukumnye, dipkoprob el tonok ulul bukni, sik minop talak ulamik Israel nang ara, elti, moubuka kum bikamik. El yupu moubuka kum taleamika ati, el ap sik ap, epdanuka neika kum ulamik. Atonun ton, el Allah ap, ninye ap elana ati, pil dona deiyok nang, imam-imam nang ton pia kum ulamika ati, sikce kum perelamik. Tonda, Allah arye, ‘Aning ara wininamlume, aning ara kum wininamlume nyapdeiamuk yupu moubuka kum tenelamikce, talebuka bita kum ulamik. Ati, anggun apu yapu ara, talye-talyeuk ulamik.
Hosea 4:6 - Eipomek6 Na Allah arye, wipdeiamse ninye, na mapu koprop Israel ninye ara, wenebuka opnamne deiyok ara, ani. Sikce na Allah wininye ning ap, na nyasinye yupu ap, na si ap kel bikna kum atia. Israel ninye arye nati, walwal tuba unyaka deiyok ara, sik iman-imam nang atia. Anggunda, na si erenyak aik pum tam, pil dona deiyok nang ululum bukni, anggunce, na wininye ning nirya kel bikna ati, ‘Aning ara, nun like’ tenen, ‘Like,’ tenebuka ululuma ati, sik Israel ninye elisinyakce, ‘Nabi nang arye, malye winilyak touk, nun babye malyeuk wininamabe’ tenen, sik babye malyeuk wininyake. Ati ara, narye anggun imam-iman nang nirya ati, ‘Sikda, na si eren aik pum tam, pil dona deiyok nang dipkoprob kum unyake,’ tenesinirye, anggunti akunum bataknamsine. အခန်းကိုကြည့်ပါ။ |
Hosea 4:6
54 ပူးပေါင်းရင်းမြစ်များ
Bukni, anang ara, Allah arye nyalul yupu batakikirye, moubuka kum kekebikcopura, Allah arye lo areplyeba, yu nang arye yanuka, yu weik parang ya arye, anang obikiba, adiparyuk dipnamake. Atalak aryuk dibikcopura, sikda bicoe. Ara, sik arye, kel weik bikna kumce, tupa wal-waluk unmakca ani, dipnamaka atia.
Na ni Allah, narye an ap, an yupu ap ati, ‘Aning ara, pia telebuk ulule’ tenen, pia pataniliba, teninauk ununa anya arye, malye wininyak ninye nirya arye, an yupu yanikirye, malye winin ninguk talibuka, wininyaka anya arye, aninye ati, na yu ara, na damak uku buk dilamle touk, unulule. Ara, talye ati kume. Deiyok ara, Allah ance nyapdeiamsulum yupu ara, na oldan ninye nirya, moubuka kum tenekirye, talye luba kinauk wininyaka ati nyapne.
Atonun, malye winin ning talina kumce, pia teleb winin ninguk wininyak nang ati, Allah ance tamubuka, sik anang ati, pia teleb winin ninguk kililyame. Bukni, yata nang do nirya, sikce talye-talye yupu nyabuka, kanye tenina deice arye, malye winin ning talibuka, duknubikirye, malye unyak nang ara, ance kel weik bikina deice arye, sikti, yu tenebuka, ikin ning arepmince, wenelyame.
Tonda, malye ning nirya batakuka, diksukum un ninguk talibuka unyak ninye arye, nyanyak yupu peterebikiba, yuk nang arye kekebicopura, ayupu kekece ninye nirya ara, telebuk unamake. Sik nyanyak yupu deice arye, ninye pia weik teleb kililanyake. Bukni, ‘Teleb un ning ara ani, malye un ning ara ani’ tenen, moubuka kum tenebikirye, talye walwal uk unyak ninye ara, moubuka tenina kumce, malye ninguk winipre banyaka anya arye, sik bidamanguk, akunum olilanyaka ati, dipnamake.
Ninye tonok ton, el un ning moubuka kum kel kiplirye, talye lukparabuka ululnye bira, ‘Mikip arye pil dopnun’ tenen, doptu babye, malyeuk unamle. Ara, malye winin ninguk talibuka ululnye el ulula atia. Tonda, yatanye do nirya, ‘Kume, sik arye kum unamne’ tenen, el mining kanye aniryuk, ‘Talye lukparabuka banamane,’ tenelule. Tonda, ‘Apil-apil nirya, minopce aryuk, sirya dakanamne’ tenen, balulnye bira, moubuka tenena kumnye ulula anya arye, ‘Teleb ubuka ban bisik ara ani’ tenen, kum kel kilirye, malye bisikuk balule.
Israel nango, anggun nirya kekeplulume! Na Allah arye, aning nirya winipnamsina ara, talye ati kuma. Deiyok ara, ani. Allah arye anggun nirya lyepromsuk deiyoknye bira na uka. Tonda, na Allah arye anggunti tuba melilamsirye, nara weik keil mutuku dup erebuka buklyeba, ninye arye, ‘Yu nang arye opsicakʼ tenen, akeil deice welebikirye duknulamak touk, ulamsise. Naryuk anggunti, pia melibuka kaleklamsise. Bukni anggunce nati akunum lubakipnulume. Aning ati ara, anggunce sik isa si erena ati, ‘Nun isa arye melipnamsiakʼ tenen, urasin teleb yala ning dobuka, wa wibuka koululume. Aning atonun, teleb pamlye ning taruk ton sekmunce, aning isa si erena ati tuba koululume.
Aolsukum noutam ara, mitik yo taruk nirya dilonyakba, aning sesal akunum seplyopura, akunum kouluplirye, ayo taruk ara dakalsakanamle. Daksaklyopura, yuk mutuku unyak kilapu yakirye, sik asik yoka ati, bobuka dongolbanyake. Se, sik Israel tam ulamik nang ara, ‘Aning-aning, mambul ning nirya ton kel biktibye,’ tenena kum nang anya arye, Allah sik kwepdeiamuknye bira, sikti, bico pia kum tenenamle. Tonda, sikti, tuba telebuk kum kipdeipliba, telebuk kum unamake. Sik ti batakanauk unamle.
Allah arye Israel ninye ati nyabuk. “Wini talak ara, sik deiyok nang weik tam ara, ninye kanye wangalamak mek weik tonun dinyakba, sik kanye wanganyake. Tonda, na yupu lak lena deiyok nang, sik nabi-nabi ap, na si eren aik pum tam pil dona deiyok nang imam-imam ap, sik babye, kanye wangalamak mek dinyaka deice arye, teleb arye kum teneiptinge. Kanye wangalamak mek weik tonun dinyakba, kanye wangabikiba kanye bona kumce, talye kwepdanin bakirye, keil yan dum dukdanin banyake. Winibicopura, sik kanye walwal upliba, Allah arye anang ati, ‘Lengdar deice arye nyalisilye ning ara, deiyok anye’ tenen, moubuka bita kel kum bikinyake. Tonda, ninye ati yupu moulinukce talak ara, teleb kibuka tenepmanto kum unyaka anya arye, malye-malye yupu uk nyanyake.
Malye winin ning talibuka unyaka ati, wini talak ara, mitik-mitik mapu arye, na mutuku nang nirya ati, daralongonyake. Tonda, nara Allah, ‘Naʼ tenen, mutuku nang ara, talye daunyak kilapu arye, deiyok koubikirye, anggun mutuku talepsikirye, ikin kilisinyake. Tonda, na mutuku nang ati, deiyok kibuka talinyak nang arye, sik binmanto bisik babye, walwal kilinyakba, kanye walwal kiplyeba, ‘Teleb winina ati benamap bisik ara, aniʼ tenen, kum bikinyake.
Na kayapu koproba, sik Israel yala nang ara, malye weik unyaka ati ara, narye lo arepnyeura, yuk pera mutuku yu nang arye, Israel nang ati olyaceura, sik mutuku bobinuka, ikin pil arukunamake. Yuk mutuku noutam bobinamak talak ara, sik Israel nang, ‘Naʼ tenen, nang ara, aning-aning nirya, kel bikna kum nang, walwal un nang dem dobuka, yuk karin mutuku delilbinamsiake. Sik deiyok-deiyok nang nirya ara, din patana deice arye dipnamak ca! Tonda, sik amu tam talye daunyak nang ara, mek dina kumce, pia din patan deiceuk ulamikca ani, dipnamake.
Tonda, atalak noutamak ara, na si eren aik talibuka, pil dona deiyok nang, sik imam nang arye, ‘Allah ara dan tam ulul do?’ nyabuka kum asilelamike. Tonda, na Allah arye, ‘Aning wininamlulume, aning ara kum wininamlume,’ nyapdeiamsiba, mem yupu taleamikce, peterena deiyok nang babye, sikce dipkoprob nati, kel kum bikamnik. Tonda Israel ninye, sik ninye deiyok kibuka, talilamika deiyok nang arye, na dam malye ninguk ulamikce, na yupu yaniltalamnike. Tonda, dotalak wininamake ati, lak lena deiyok nang, sik nabi-nabi nang ara, na mikip arepneba, adeice arye sik lak nyana yupu kum lak nyalamik. Sikce, Isa Mutuku Dongonye si, Bahal atibuk si erelamikce, el mikip deice arye yupu nyalamik. Winilamikce, deiyok kum ning, talye ning atibuk, ‘Aning ara pia patapsile,’ tenen, talye ning atibuk dobolbalamik.
Allah Yahweh arye ayupu ton nyabuk. “Na mapu Sikda, pia walwal nang unyake. Sikda nati, kum bikininyake. Sikda amul kunukne nang atonun unyake. Sikda mitik tonun babye, ton moubuka kum bikinyakce, malye un ning weik tonun bikinyak nang unyake. Adeice arye teleb kibuka una ara, kum bikinyakce, nong kum ulule.”
Imam-imam nang arye, na mapu sik Israel nang nirya ati, peterenamake. Ara, “Aning ara, Allah el na tenen ning ati, pia teleb lek ning ulule. Bukni, aning ara, talye ulul ning ati, aning ara pia teleb lek ning kume. Talye ninguk ulul ning ara ani, pia teleb lek ning ara ani,” nyabuka peterenamake. Tonda, Allah arye, ‘Aning ap, awininyak ning ap ara, na lik ati, aning ara, pia kum talinamlume. Aning ton, pia kum dinamlume, aning ton pia kum wininamlume. Aning nirya ara, na lik ati, aning winipmunye do, talipmunye do, dipmunye do, bol pipmunye do, na dam ton pia kum yanganamlume,’ nyapdeipsuk ning nirya ara, aning ara mem ning ati, pia tenena meme. Imam nang arye, ‘Teleb ning ani, malye ning ani,’ nyabuka, lak nyabikirye, peterenamnyake.
Pia malye mutuku noutam ulamlumce, ikin weik ulamlum bukni, naryuk anggun patalamsuk touk, anggun din ning dobuka arelamsise. Arelamsiseba, aning dobuka, weik arye dilamlumba, boulamsuke. Din ning dipna arye boupsinopura, atalak arye tuba tamubuka tonap, anggun bidamnye ati, kanye deipdana arye, dipdanuka kwalipdana arye ulamlume. Kwalipna arye ulamlum talak ara, na si yaniptapnin arye, nati luba kilamnulume.
Aning nirya winipnamna deiyok ara, urdem ati kum winipnamne. Ara, asum-asum nirya, kam kum ulul ning, Isa Mutuku Dongonye el si Bahal atibuk, “Nun ni koprop,” nyabuka, el si erebikirye, siltong teleb ning boyakirye, uku dongobuka, el siuk eremunya ati, wenepnamsine. Tonda, amul potokuka dongolamak ning, el si ara, anting-anting ap, tonda karaklamak ning kalung ap nirya dobuka, ‘Nun tenenyap nang arye, urasin teleb kilapu tenenamsiyak’ tenen, ‘Nun tenenyap nang dan tam do?’ tenen, pia elbanyaka ati, Israel ninye wenepnamsine. Isa Mutuku Dongonye, el si Bahal, el siuk erebikirye, na Allah ati, batakaninyak dekna ati, na Allah Yahweh arye wenebuka opnamsine. Allah arye nyabukba, nabi Hosea kekebukce sekuk.
Allah el si Yahweh arye, nabi Hosea biti laka nyabukba, Hosea birye sekuk. Se, anggun Israel ninye ara, Allah Yahweh arye nyalisilye ninguk, moubuka kekepnululume. Nun amutuku ninye malye wininyap ning ara, Allah elcuk kel bikisilirye, nyasulule. Allah arye nyapdeibuk yupu ara, nun ton moubuka kum kekenyaba ati ara, kum dobolbanyaba ati, Allah el winilye ning kum bikinyabe. Tuba walwal ninyeuk unyabe. Tonda, nunce yuk nang ap, teleb kibuka neika kum unyabe. Bico kum tenelamyap deice arye, amutuku unyap ninye ara, nun min arye domupu kilapu ara, deiyok kum uamuk bukni, nun talye kanye bobuka, akilapu batakibirye, yuk kilapu dolonyabe. Tonda, Allah ap, el winilul ning ap ati, moubuka kum bikinyabe.
Tonda na mapu koprop, sikce talye yo ati asinyake. ‘Se, nun ni yata wiripnamap do?’ nyabuka asilenyake. Tonda, sik taruk arye, puturubuka delinyak ning, talye yo uk ulul bukni, ayo ati, “Se, nun ni, aminyan talak ara, yatato ning nun dam yanuka winipnamsil do? Nunce yata wiripnamap do?” nyabuka asilenyake. Israel ninye nirya arye, talye Isa Mutuku Dongonye si erena ati, ‘Se, nun ni ani’ tenen, pia pataliba teninyaka deice arye, pia walwal ninye winilamak touk, winipnin banyake. Winipmanto ning ara, ‘Yo bok dopropnamap’ tenen, talye-talye yolanyak kilapu arye, sik akanye yapu ati, bataklamaka touk, Israel ninye arye, na Allah ara, sik ni koproba unun bukni, sikce nati, akunum batakaninyake.
Sik yamal kilapu talye yolamak nang ap, sik kilmapu talye yolamak nang nirya ati, na Allah arye, anggun nirya ati, wini talak aryuk kum wenebuka opnamsin bukni, aminyan talak ara dipkoprob wenepnamsine. Tonda, sik yamal kilapu babye, sik min arye domice nang, sik akanye yapu nirya batakuka, talye yuk nang ap yolanyake. Winibuka malye ubicopura, na Allah arye anggun nirya ati, kum wenepnamsin. Sik malye winin ning ati, weik arye wenepsitinye bukni, akilapu nirya, sik akanye yapu babye, amalye winin ning atonun wininyake. Ara, sik babye yuk mutuku ara, talye yolamak kilapu ap elanyake. Sik akanye yapu babye, isa si erenyak aik dam unyakce, yolalamak kilapu ap, neika manyake. Narye anggunti, wini talak aryuk kum wenebuka opnamsin bukni, anggun nirya ara, moubuka teninamlulume. Se, anggun Israel ninye nirya ara, ‘Anggunce nun like, Allah arye winilul ning ap, el ap el yupu ap ara, moubuka kum biknamabe’ tenen, nati batakanululumce, pia walwal ninye dem ululume. Winiluluma ati ara, anggun bidamnye arye, anggun bidamang ati, malye kililalulume. Aminyan talak ara, narye anggun wenebuka opnamsine. Ati anggunda bicoe nyapsine. Allah arye, Israel ninye ati nyabuk.
Sik malye winin ning weik wininyaka deice arye, ‘Nunda tamubuka, Allah Yahweh an dam yanuyabe,’ nyabuka, yanuka kum moropnitinge. Yanuka moropnitinga babye, na kum kekenamsine. Deiyok ara, sik dam ara, malye kanye bon ninguk ulya deice arye, ‘Allah batakibirye, isa si eren ninguk, talibuka si erenamabe,’ tenena deiyok ning, sik talima noutam ulula ati, sikce na Allah Yahweh wininye ning ap, na si ap, tonda na yupu ap ati, tenebuka kum bikinyake. Allah arye nyabuk.
Ati anggun moubuka tenenamlulume. Dipkoprop na pataniliba teninun ning ara, ani. ‘Sikce yuk nang nirya ati, bico tenebikirye, teleb ubuka melinamake’ tenen, patanulule. Tonda, ‘Sik nirya arye, na Allah ati, na si erepnikirye, pia si erenamniyak’ tenen patanulule. ‘Winiptinge’ tenen, weik arye patanilye ning ara, aning uka. Bukni, anggunce aning nirya kum winipmunyopura, na arena ati, kam ulul ning dobuka deipmunce, arepmunba, sik imam nang arye, uku dalyanganyake. Tonda, ‘Nun malye winin ning, kum daneipsuturye, namin kipsilyopura, nunti talye mangkau kibuka opsutu bukni, nun pununa ati, kam ulul ning dobuka arepnuyabe’ tenen, kam ulul ning obuka arepmunyeba, sik imam-imam nang arye, arelyanganinyake. Bukni, ‘Aning-aning nirya ara, weik mambul kume,’ tenenune. Anggunce yuk ninye ati, bico tenebuka melilulumce, nati si erebuka, na si erepnumunyopura, narye anggunti, kanye deipsitinirye, ‘Aning ara, weik mambule,’ tenepsitinye. Bukni, aning kum winilulume. Allah arye, sik Israel ninye ati, nyabuk.
Israel mutuku noutam unyak nang bukni, Efraim birye deiamukba, dadeipdanin yangalamik nang, sik dabu tam (arah utara) unyak Israel yala nang nirya arye, ‘Yata mutuku nang arye melipsiting do?’ tenen, otam binapna, atam yanamana kinyak nang unyake. Ara, mitik maka el si merpati maka arye, ‘Dan binuyap do?’ tenen, kanye tenina kumce, talye lukparabuka lakuka, otam lakuka binapna, atam lakuka yanamana kilamle touk, sik Israel nang babye atonun kiltonyake. Wininyaka ara, walwal arye unyake. Dipkoprob aning atouk, ‘Yu nang arye yanuka opsicakʼ tenen, anggunce Mesir mutuku nang ati, ‘Se nun kayapu, anggunda yanuka melipsululume,’ nyabuka morolamike. Atonun ton, Asyur mutuku unyak nang ati, binuka ‘Se nun kayapu, anggunda yanuka melipsululume,’ nyabuka morolamik. Winibuka morolamik bukni, sik yuk mutuku nang arye, kum melilamike.
Aning wininyaka deice arye, sik Israel yala nang arye, pia moubuka kum teninyake. Ara, sik ap, yuk mutuku nang ap, ansinibuka neika talye unyaka deice arye, sik mikip una deiyok ning nirya ara, wanganyake. Sikda pia wisi dakiba, mikip ara, mitikto diamuk unyakce, wisi nang ulamak touk akunum unyak bukni, sikce aning moubuka tenina kumce, kum bikinyake. Ati ara, sik ap, sik mutuku ap, malyeuk upnin balye bukni, aning ara moubuka kum teninyake.
Allah Yahweh arye, nabi Hosea biti, ayupu nyabuk. Ara, lelim weik pong-pong an ning, el si terompet, ‘Ninye arye alelim kekebikirye, se tenen, moubuka kekenamakʼ tenen, lelim laka nyabuk! Deiyok ara, na Allah Yahweh arye, lo arepniba, na mapu Israel nang ati, yuk mutuku yu nang arye, olyanganamaka ati nyapne. Winipmanto ara, ayam obuka dilamle maka lakuka balirye, el din ati elyangalamle touk, narye imun kanye bon ning kintinipsa ati, Israel nang deice deipnamnarya! Aning winipnamna deiyok ara, narye, ‘Anggunce winibuka umunyeba, narye aning-aning ton melibuka wininamsine,’ nyabuka, nyalin yupu deice arye, nyapdeiamse yupu bataknike. Tonda, narye, ‘Aning ara, wininamlume. Aning ara, pia kum wininamlume,’ nyapdeiamse yupu ara, ‘Naʼ tenen nang arye, moubuka kum taleamikce, malye winin ninguk, tuba-tuba wininyake.
Tonda, na Allah aryuk anggun Israel nang peterena ati, “Aning ara, wininamlume, aning ara, pia kum wininamlume. Teleb winin ning ara ani, malye winin ning ara ani,” nyabuka, peteren ning weik tonun sekuka, arepsise ning aupmalya babye, anggun anang nirya arye, “Kume, ayupu ara, talye yupu ulule. Aning nirya ara, ‘Deiyok ani,’ tenen, moubuka kum biktibye, ati aning ara nun lik,” nyabuka, yaniltanyake.
Winipnamna deiyok ton, ani. Pia ouku weikto talak ara, sik Israel yala nang nirya arye, sik kwepdeiamuka deiyoknye biti, tenina kumce, akunum luba kipnarye, malyeuk unyake. Winibuka ukirye, sik unaka ati, pia teleb weik aik dokirye, anyaik noutamuk kanye deibuka unyake. Tonda, aning atonun, sik Yehuda mutuku noutam unyak nang arye, ‘Nun mal olan nang arye yanuka opsicakʼ tenen, kat weik keil arye deibuka, pia mikip weik asik donyake. Bukni, winilamika babye, narye uku dopkwetepnyopura, aweik asik ap, kat keil arye domik aik ap, urasin pia teleb istana aik domik ning nirya ara, uku buk arye dibuka, sirya daknamle. Tonda, sik unyak mutuku noutam dauamlye ning nirya babye, adopkwetepnamne uku arye diplirye, sirya daknamle. Na Allah arye nyapne.
Allah arye el mapu ati, kanye deiplirye, tuba bicoe kum tenepnamle. Deiyok ara, Allah elce nyalul yupu nirya ara, pia moubuka kum kekelamika atia. Aning winilamika ati, na si erenun Allah, elce sikti, bataknamle. Elce Israel nang akunum bataklyopura, sik anang nirya arye, tonok sukum una kumce, mutuku sirya, im sirya nirya ati, epra banauk unamake. Nabi Hosea birye nyabuk.
Ati, na mapu anggunti nyapsine. Anggunce sik Farisi nang ati, tenena kume, sik dauplye. Sik Farisi nang ara, bisik peterena deiyok nang atonun unyak bukni, dipkoprop ara asing kun nang atonun unyake. Tonok asing kunanye birye, yuk asing kunanye biti, ‘Narye an taruk talibuka teleb bisik bobinukine,’ nyaplirye, bobuka banmaliba, bisik noutamak weik pum wamlyak barikirye, sik bitinye nang kote sakarurake. Sik Farisi nang ara, na mapu koprop kum unyake. Sik Farisi nang ara, asing kun nang atonun unyak nang ati, dauplye, nyapsine,” Yesus arye el mapu 12 nang ati nyabuk.
ကြော်ငြာတွေ