Hosea 4:2 - Eipomek2 Tonda, nun wininyap ning ara, ani. ‘Na kwit ikin ninguk doprotu’ tenen, sulongolanauk unayabe. Tonda, tilila yupu nyana ap, ninye olana ap, ubula dona ap, nun mince domupu kilapu batakuka, yuk talye kilapu yolana ap uk, wininyabe. Tonda, nun malye kibuka, ninye oldanauk unyaba deice arye, ninye malye winin ning ara, pia weik uplirye, yuk nang sik mining ininguk dilamak touk wininyake. Olana weik unyake. အခန်းကိုကြည့်ပါ။ |
Hosea 4:2
42 ပူးပေါင်းရင်းမြစ်များ
Tukwak mutuku nirya ara, malye kipdeipnamle. Akunum winiplyopura, tukwak mutuku unyak nang nirya, amalye kipdeiplye mutuku tuku deice uk unamake. Ikin weik unamakak ara, talye ati kume. Deiyok ara, Allah arye, “Anggunda, na nyapdeipsise ning ara, ‘Aninguk pia talibuka unamlume. Aning ara, pia kum wininamlume. Tonda, teleb winin ning ara ani, malye winin ning ara ani,’ nyapdeiamse yupu ara, tukwak mutuku nang nirya arye, aning batakuka unyake. Narye, ‘Aning ara pia ati talibuka unamluma ati, tonoknye babye kum bataknamlume. Tuba talibuka upnamlume nyapdeiamse yupu ara, tukwak mutuku nang nirya arye, aning batakuka wininyake. Wininyaka deice arye sik unyak mutuku nirya ara, mining dam arye, malye kipdeipnamne.” Allah arye nyabuk.
Allah arye nyabuk. Anggunda, anggun apu koproba, Yakub birye deiamsukba, dadeipdanin yangalulumce, ululum ninyeo, anggunda moubuka kekepnamlulume. Yakub birye deiamuk nang ati, narye, ‘Sik si ara, Israel yala nang nyapsina anya arye, ninye arye nyanamsiyake. Tonda, minop talak ara, anggun pununanye Yudah birye deiamukba, dadeipdanin yangalamlum nang ululume. Anggunce, nyalin yupu nyaplum talak ara, ‘Nun ni Allah Yahweh, el si deice arye nyapsiyabe,’ nyanamlume. Tonda, ikin upsiliba, ‘Nun ni Allah arye melipnamsilʼ tenen, anggun Israel nang arye, na si erenululume. Aning nirya winibuka nyalulum bukni, dipkoprob ning ara, anggun kanye deice arye, diba tenebuka kum nyalulume. Talye yupu atonun nyabuka, si bambol deice aryuk, nyaltakalulume. Dipkoprop diksukum ubuka, teleb deice arye, kum nyaltaklulume.
Ati ara, anggun kekeplulume! Nara, Allah Yahweh, im deice unyak yin talin malaikat nirya ara, sik deiyoknye ununa ati, mikip weik ununye birye nyapsine. Israel yala nang ap, Yehuda yala nang ap, sikce na Allah ati, si ereninyak Allah arye nyapsine. Na Allah arye, na mapu koproba, sik Israel nang ap, Yehuda yala nang ap ati, kum batakse. Tonda, aminyan talak babye, pia kum bataknamsine. Tonda, Israel yala nang nirya, sik talibuka unun Allah ara, malye un ning tonok ning babye, kum uniliba, Pia Lek Telebnye unune. Dipkoprob sik anang nirya arye, akunum malye-malye weik winilamikce, sik mutuku noutam nirya ara, pia malye winin ning weik aulul bukni, aupmalya babye, Israel yala nang pia kum bataknamne. Sik malye winilamik ning ati, dengna arepnirye, akunum wenebuka opnyopura, aminyan talak tamubuka, pia teleb kipdeipnamsine.
Winipmanto ara, mek pu dobuka, mek tuba-tuba panabuka balamle touk, Yerusalem mutuku unyak nang arye, malye kibuka, malye winin ninguk, tuba wininyake. Sik amutuku unyak nang ara, pia malye kibuka malye yupu uk nyanyak ning ara, na Allah arye, akunum kekenune. Tonda, sik amutuku unyak nang, pia malye kibuka, yupu uk nyanyak ning ara, narye kekenune. Tonda, sikce, malye kibuka, aning-aning nirya, oplobikce ning ara, akunum elinune. Tonda, dan tam mutuku do, sik unyakak nirya ara, dila ulul ning ap, uk dilul ning ap nirya ara, na akunum elinune. Allah arye, Yerusalem mutuku nang, sik mal olan nang ati, nyapdeibuk.
Utenelamik bukni, Allah elcuk lo arebukba, aning ara, dipkoprob akunum winibuk. Allah arye amutuku nirya, sirya dakuk ning deiyok ara, ani. Ara, sik imam-imam nang ap, Allah yupu laka nyalamik nang, sik nabi-nabi nang ap, sik pia malye weik ulamik deice arye winibuk. Sik amambul pil talibuka ulamik nang arye, malye kum winipman ning bukni, diksukum teleb winin nang ton, Yerusalem asik noutam arye, talye lupabuka olamika atia. Sik ateleb nang, sik ining balamuka ning ati, Allah arye amutuku sirya obuka dakukba, akanye imun ning nirya ara, winibuk.
Bukni, anggun Israel nang ara, aning atonun kum winilulume. Anggunda, malye un ninguk winimunce, talye ninguk nong kilalulume. Tonda, diksukum una kum ninguk, malye ninguk winilulume. Tonda, ninye yupu bokolin talak ara, anggunce tilila yupu uk nyalulumba, malye kum winipmace nang dobuka wenelulume. Tonda, talye yupu deice arye, ‘Winipnamabe,’ nyalulum bukni, aning kum winilulumba, aminyan talak ara, ikin ning ton, anggun dam yangalule. Winipmanto ara, ninye arye malye yala koubikiba, aminyan talak, duk moupliba dakuka, malye ninguk dilamak touk, anggun babye aning atonun winilulume. Na Allah arye, tonap nyapnusine. Se, anggun Israel mutuku ululum nango! Amalye weik winilulum ning deiyok ara, ani. Anggunce, ‘Kume, nunda mikip weik nang unyabe. Nun ninye on ning, el si kereta perang ara, pia weik tonun ulule. Nun kel weik bikamik yin talin nang ara, weik unyaka ati, yuk nang arye, kum yanuka opsitinge,’ nyabuka, kwalinauk ulamlume.
Sik anang arye winibuka talye yupu nyabuka nyaltakanyake. Tonda, sikce talye yupu nyanyaka deice arye, yuk mutuku nang ap, ‘Kume, neika melibuka kalikilanauk unamabe. Tonda yuk nang ati, ‘Sik ap, nun ap, teleb kibuka, neika ubipyopura, aning ton, aning ton, teleb kibuka neika unamtibye,’ nyabuka, nyalin yupu deice arye nyanyake. Bukni, aning nirya ara, tilila yupu aryuk nyanyake. Talye yupu uk nyanyaka ati, ton nang arye, ton tam nang ati, yupu deice arye walana ap, olana ap, kilanauk pia weik tonun unyake. Wininyaka ati, ninye yupu bokolina deiyok nang dam tuba-tuba banyake. Winipmanto ara, yala ninguk tuku palibuka, koubikiba paplirye, talye tiklamle ning ap, tace ning ap weik ulamle touk ulule. Deiyok ara, sikce talye yupu deice aryuk nyanyaka atia.
Allah Yahweh arye, na nabi Hosea biti, yanuka nyapnuk. ‘Sik Efraim yala nang nirya arye, malye yupu nyana ap, talye yupu nyaltakna ap, ninye walana ap, olana ap, pia weik tonun winipdanin banyake. Winibika wininyaka ati, ‘Sikda na like,’ tenenune. Ati, sik Efraim yala nang ara, na lik ati, na dam ton, tuba kum yanganamake. Bukni, sik Yehuda yala nang ara, na ap neika tuba unyake. Narye, ‘Aning ara, wininamlume. Aning ara, pia kum wininamlume,’ nyanun yupu ara, sikce tuba talibuka wininyake. Nara Allah, malye winin ning tonok babye, pia kum wininuna ati, nara Pia Teleb Lek Deiyoknye unune. Tonda narye, ‘Winipnamneʼ nyabuka, nyalin yupu deice arye nyanirye touk, aninguk dipkoprob unune. Sik Yehuda yala nang ara, nati kum batakniyake.
Yakub birye deiamukba, dadeipdanin balamik nang ara, Mesir mutuku binuka ulamik. Daulamika ani, Allah Yahweh arye, nabi tonok, el si Musa dopdeiamukba, Israel nang melibuka bobana ati, sik Israel nang, Mesir mutuku noutam binuka, Mesir mutuku arye batakuka tamubikce, sik mutuku koproba yanamik. Tonda, atalak ara, sik Israel nang moubuka kalikina ati, nabi Musa kintinip deibukce, wipdeiamukba, Israel nang kalekuka melilamuk.
Aning atonun, mutuku si Sitim mutuku noutam babye, malye winilamlumba, Israel ninye babye, malye winilamike. Winipmanto ara, ninye arye, ‘Nun oldan nang mangkau asa yakirye, apum bisik wekelbiceura, opnamabe’ tenen, weik tuku pum palilamak touk winilulume. Aning winimunya deice arye, anggun nirya arye, malye weik winimunya dekna ati, na Allah arye anggun nirya ati, wenebuka opnamsine.”
Ubula don nang arye, ninye banyak bisik lilunak duknubikirye, ‘Yatanye do, mangkau kanye bobuka yalyopura, anye obuka, el bona ubula dopropnuyapʼ tenen, winilamak touk, Gilead mutuku noutam unyak imam nang babye, atonun wininyake. Sikda ubula dona weik unyake. Ninye asik domik ning, pia mambul mutuku, Sikem mutuku banyak bisik noutam arye, ninye obikiba, dibinyake. Tonda sikce, ubula dona ap, malye weik winin ning, yuk ning ap ara, tenina deice arye amalye winin ning, weik tonun wininyake.
Allah Yahweh arye, sik Israel nang ati nyabuk. Ara, na mapu sik Israel nang ati, ‘Ikin ulamikbuk, wini talak ara, tuba pia teleb kipdeipnamne,’ tenepse bukni, akunum ‘Winipnamne,’ tenepse talak ara, sik iknapye tam (arah selatan) unyak Israel nang, Efraim yala nang ap, tonda sik dabu tam (arah utara) unyak Israel nang ap, weik asik si ara, Samaria mutuku unyak nang ap ara, pia malyeuk winilamik bukni, duknulamik ning ara, akunum lak kibukba bikse. Ati ara, na pia elinun ning ara, sik malye winin ning ara ani. Ara, sikda talye yupu nyanyake. Wininyak touk ton, yuk nang, sik bisik noutam bakibuk, anang arye, sik bona ubula dolonyake.
Allah arye ayupu akunum nyabukopura, ayupu ton dukgobuka nyabuk. Sik Israel nang nirya arye, malye weik wininyak ning arye, sik mutuku ninye deiyoknye Raja bira, eiplirye kanye delilule. Tonda amutuku noutam nirya, Raja amu tam deiyok-deiyok nang arye, amalye ulamikce ning eibikirye, sik babye, ‘Moubuka wininyakʼ tenen, kanye deibuka, teleb unyake.
Sik Israel nang nirya ara, talyeuk unyakce, yolanauk unyake. Sik anang nirya ara, batakna kumce, tuba-tuba malyeuk unyake. Winipmanto ara, sik wininyakce teninyak ning ara, ninye uku sekikirye, ‘Uku buppu weik tonun diliba, roti kwaning dapnamanʼ tenen, roti bun ning kintiniplirye, uku sekliba, uku weik tonun dilamle touk, sik anang ara, atonun wililule. Auku ara, tuba weik arye dilamle. Mitikto kum kipnin balule.
Anggunda, teleb arye diksukumuk ubuka winitum bukni, sikce diksukum kanye tenibuka, pil donyak nang ati, ‘Nun like’ tenen, yu weik usulule. Atonun, teleb winina babye, ‘Nun like’ tenen, batakalulume. Utenemuyopura, pia malye pil talibuka dolulume. Adeice arye winipmanto ara, na mapu koproba, Israel yala ninye nirya ati, anggunce kam tuba unmacebuk, anggun bol deice ning nirya kolulume. Atonun, sik yok deice ulamle bol nirya koplobuka, tup likuka dololulume.
Anggun Israel ninye nirya, talibuka umunye ninye weik deiyok nang ap, Yakub birye deibukba, dadeipdanin yangalamik ani, wini talak amutuku noutam weik deiyok nang kibuka ululum ninye, anggun nirya ara, narye nyapsine yupu uk, moubuka kekeplulume. Ara, sikce teleb kibuka diksukum winin ning, aupmalebuk batakalulumce, kirikuka malye un ninguk winimunya ati, laka nyapsine.
Allah arye nyasulule. Anggun malye ning weik winilulum ninye nirya ara, anggun ululum aik pum noutam ara, tilila yupu nyaluluma deice arye, ubula dololulum bonauk, bululyalulume. Winipmanto ara, anggun din ning el si ara, gandum ap, yakong ap, libuka yuk ninye dekna ati, tilila yupu deice arye, “E, aning ara, winibuka arepnusilyame,” nyabuka, tilila yupu nyabuka, yo bok weik tonun dololulum ning nirya ara, na kum elisunun do? Tilila yupu nyaluluma deice arye, bon-bona weik tonun, duknubuka delilulum ning ara, ‘Luba kipnamle,’ tenenululum do? Kume, narye aninye wininyak ning nirya ati, yu kanye bonune. Ati, sik anang ara, narye wenebuka opnamsine.
Aning ara, talye kum nyapne. Ayupu nong ara, ani. Minop talak ulamik ninye nirya ara, Allah arye nyapdeiamuk ninguk, diba tenelamikce, talibuka diksukumuk ulamik bukni, wini talak ara, aninye atonun, tonoknye babye kum ululume. Diksukum unyak ninye ara, akunum kum dayike. Ati, wini talak ara, diksukum winin ninye nirya ara, pia kum anya arye, el kwit birye el kwit biti, ‘Yata winiptinya deice arye optinye do?’ tenen, wena tapu webuka kaliklamak touk, winililanyake. Adeice arye amutuku noutam ara, malye winin ning akunum panaple.
Se, Yerusalem weik asik domik noutam unyak nang ara, mandipna ukirye, sik ni Allah Yahweh ati, ‘Elda mambul kume,’ tenebikce, Allah ati batakamik touk, tuba wininyake. Tonda, Allah arye nyalul yupu ara, pia kum kekenyake. Tonda, sikce pia malye winin ninguk talibuka, unyaka deice arye, malye kililanyaka ati, Allah dam ton kum yatinge. Aninguk kum bukni, sik Yerusalem mutuku unyak nang arye, Allah ati, tuba diba kum tenenyake. Tonda, ‘Allah arye, yata yupu nyapnusil do?’ tenen, el dam yanuka, moubuka kum kekenyake. Sik Yerusalem mutuku talibuka, deiyok kinyak nang arye, sik mutuku nang ati, ikin ning delinyake.
Nyapmasiba, amalaikat elce tamubuka, nati nyapnuke. “Aseken ning ap, koupdongamuk buku noutam sekamuk ning ara, amutuku noutam nirya winipnamle ning ati, sekuk. Ara, amutuku malye unyak nang nirya ati, malye yupu nyabuka, sulongon yupu, Allah elcuk sekuka deiamuk. Ayupu ara, talye ati kum ulule. Tonok kwalin tam yupu ton, sekuka deiamuk ning ara, dan mutuku do nirya, Allah el ‘Naʼ tenen, mutuku noutam unyak nang arye, ubula donyak nang ara, Allah elcuk, anang obuka, kum kipdeipnamle. Amutuku noutam ara, pia kum unamake. Aseken ning sirik tam ara, ayupu sekdeibuk. Aning atouk ara, dan mutuku do nirya, Allah el ‘Naʼ tenen mutuku noutam unyak nang arye, ninye yupu bokolin talak ara, sikce tilila yupu nyanyak nang ara, ‘Allah el si deice arye, dip yupu uk, nyapsine,’ nyanyak bukni, sik tenina deice arye, tilila yupu uk, nyanyake. Allah elcuk, anang obuka, kum kipdeipnamle. Amutuku noutam ara, pia kum unamake. Aning-aning nirya ara, abuku deice sekeiamuk ning aulye touk, dipkoprob winipnamle.
Na Allah Yahweh ara, im deice yin talen malaikat nirya sik talepsirye, sik deiyoknye unune. Minop talak ara, narye ayupu akunum nyapdeiamsise. Ara, “Anggun nirya arye, anggun tam nang nirya ati, dipkoprob diksukum kibuka yupu bokdeipdanamlume. Tonda, anggunce anggun kayapu nang ap, anggun tam unyak nang ap ati, pia namin arye bico tenelamunce, kanye delilanamlulume. Adiparyuk yu ubuka wenelana kume,” nyapdeiamsise.
Wininamluma ati, yata nang do nirya, sik diksukum ulamik bukni, oltakalamik nang nirya ara, Habel anyapce opnin yangalamika ani, wini talak Berakia el mi Zakaria, anggun apu yapu arye, Allah arena ati delilamika dam obiknye ap, anang nirya sik ining ara, anggun wini talak ululum nang, anggun taruk deice upnamsile.
Allah el yupu laka nyalamik nang, nabi-nabi nang ulamik talak ara, anggun apu yapu arye tonok babye ton, sik nong deice ikin ning kum delilamik do? Kume nabi-nabi nang ati ara, ikin weik ning sik nong deice delilamlume. Tonda, Allah el yupu laka nyalamik nang arye, “Diksukum ululnye yanamle,” nyabuka, laka nyalilamik nang ababye, anggun apu yapu arye onauk ulamik. Ara, wini talak ara, anye binyuk Diksukumuk Ululnye Yesus ati, minyuma akunum oplume.
Tonda, anggun ni koproba Allah, na Yahweh ara, deiyok ton kum upmalibuk, na si talye-talye pia kum sisinamninyake. Deiyok ara, nara anggun ni Allah Yahweh ununa ati nyapne. Yatanye do nirya, na si talye-talye, na si sisipnilinye bira, elda dipkoprob pia malye ning upmalul anya arye, narye anye biti, wenebuka opnamne. Ato nang ara, kum bataknamne bukni, anggun wenena ati, ikin ning anggun nong deice uk delinamsine.
Sik Yahudi ninye ara, wininyake. Sikda nun Weik Deiyoknye Yesus ap, Allah el yupu laka nyana nang, nabi nang ap olamik. Tonda, nunti, sik mutuku noutamak arye wenebuka dopkwetepsike. Anang ara, malye winilamikibuk, Allah arye sikti, lik ulule. Tonda, yuk mutuku nang nirya ati ara, yakanyakce, oldan nang atonun unyake.
Akil dipdesirye, kel bikse. Akil ara, diba tenen nang pia weik olamukba sik ining balamuka kwebuka dilamukba adeice arye, kanye deibukce, el kanye wangamuk. Ara, ninye arye kanye wangan mek weika arye dinyakba, sik kanye wangabikirye, teleb kanye bona kumce, malye winin ning talye luparabuka winilamak touk, akil ton winipmokba, eipse. Akil arye ninye olamuka ara, talye nang kum bukni, akil arye nyamukba, yu nang arye, Allah wiamukba, elti, diba tenelamikce, Yesus el yupu dobuka peterelamik ninye ati olamik. Yesus el yupu kekelamik ninye pia weik olamika ati, akil ara kanye deibuka ulamuka deice arye, el kanye wangamuk. Winibukba, epsirye, na kanye pia lukdase.
ကြော်ငြာတွေ