Isa si pia kum erelamuk bukni, el li koproba Allah el siuk erelamuk touk, Yosafat babye Allah el siuk erelamukce, Allah atibuk, Yata winipnamne do?’ tenen, asilelamukce, morolamuk. Atouk, Allah arye, “Aning ara wininamlume, aning ara pia kum wininamlume,” nyapdeiamuk yupu talebuka ulamuk. Tonda, el tuba kam ulamukce pil dolamuk talak ara, Israel tam mutuku noutam ulamik nang arye, malye-malye weik ulamik ning ton, aning atouk kum ulamuk.
Hosea 4:15 - Eipomek15 Nyabukce ayupu ton nyabuk. Se, Israel ninye arye, malye-malye weik wininyaka ara, anggun Yehuda tam ululum ninye arye, aning eibuka, kum kel biknamlume. Winipmanto ara, sal arye sik min arye domice kilapu batakikirye, talye yoltalamak kilapu dekikirye, neika malamak touk, sik Israel ninye arye, sik ni na Allah ati, batakaninyake. Bukni, anggun Yudea tam ululum ninye arye, ‘Nun babye atonun, malye winin ninguk talibuka unamap’ tenen, Israel ninye winilamak touk, kum wininamlulume. Sik Israel nang kan-kan arye, ton nang arye, “Allah el si erena ati, teleb ubuka arin ning arenamabe,” nyabuka, talye yupu nyaplobikirye, Gilgal mutuku ap, Betel-Awen mutuku ap banyak bukni, dipkoprob ara, nati si kum ereninyake. Dipkoprop malye wininyaka ara, anang arye, ‘Isa si erenamap’ tenen, amutuku duknulbanyaka anya arye, anggun Yehuda tam ululum ninye ap, amalye winin nang ap, amutuku ara bitinye, Gilgal mutuku ap, Betel-Awen mutuku ap, mutuku deice neika welebana meme nyapsine. Tonda, anggun malye weik winilulum ninye arye, ‘Yuk nang arye, dib tenepnamsiyak’ tenen, “Allah Yahweh dipkoprob kam pia aunamle touk, nunce dib yupu nyapsiyabe,” nyalamak ning ara, anggun nirya arye tonap, ayupu kum nyanamnululume. Israel ninye tilila yupu nyabuka, malye wininyaka atonun, ‘Anggun Yehuda tam ululum ninye babye, malye winipmunyak’ tenen, nyapsine. Ati, sik aninye wininyak touk, anggun Yehuda tam ninye atonunuk, kum wininamlulume. Allah arye Yehuda tam ninye ati, nyabuk. အခန်းကိုကြည့်ပါ။ |
Hosea 4:15
28 ပူးပေါင်းရင်းမြစ်များ
Aning kum bukni, Raja Yehoram birye, talye ning isa si erena ati, Yehuda mutuku noutam bukni, mutuku kon deice arye, isa si eren aik weik tonun dolamuk. Winilamukba, sik Yerusalem mutuku ulamik nang nirya babye, Allah ati batakuka, malye weik winilamik. Aning atonun ton, sik Yehuda mutuku noutam ulamik nang nirya babye, Allah arye nyalamuk yupu yanilamikce, Allah ati batakuka, malyeuk winilamik. Aning nirya ara, Yehoram el deiyok atia.
Allah arye nyabuk. Anggunda, anggun apu koproba, Yakub birye deiamsukba, dadeipdanin yangalulumce, ululum ninyeo, anggunda moubuka kekepnamlulume. Yakub birye deiamuk nang ati, narye, ‘Sik si ara, Israel yala nang nyapsina anya arye, ninye arye nyanamsiyake. Tonda, minop talak ara, anggun pununanye Yudah birye deiamukba, dadeipdanin yangalamlum nang ululume. Anggunce, nyalin yupu nyaplum talak ara, ‘Nun ni Allah Yahweh, el si deice arye nyapsiyabe,’ nyanamlume. Tonda, ikin upsiliba, ‘Nun ni Allah arye melipnamsilʼ tenen, anggun Israel nang arye, na si erenululume. Aning nirya winibuka nyalulum bukni, dipkoprob ning ara, anggun kanye deice arye, diba tenebuka kum nyalulume. Talye yupu atonun nyabuka, si bambol deice aryuk, nyaltakalulume. Dipkoprop diksukum ubuka, teleb deice arye, kum nyaltaklulume.
Bukni, wini talak Allah Yahweh arye anggunti, nyapnamasil yupu ara, moubuka kekepnamlume! Ara, anggun Yehuda mutuku noutam ulamlum bukni, amutuku batakuka, Mesir mutuku yanuka, tuba asukum ululum nang ati nyapsine. Na Allah Yahweh arye, na pia mikip weik unilye si deice arye, nyalin yupu nyapsine. Se, anggun Israel yala nang, Yehuda mutuku ulamlum nang bukni, wini talak ara Mesir mutuku akunum ululum nang ara, wini talak arye dipdongobuka, do upnamle talak nirya ara, anggun si bambol arye, na pia teleb si ton, pia kum nyanamlume. Ara anggunce, ‘Nyalin yupu nyapnuyapʼ tenepmunye talak ara, na si deice arye, nyalin yupu ton kum nyanamlume. Anggunce, ‘Allah Yahweh dipkoprob kam pia ulula atonun, winipnamne,’ nyapdeiamuk yupu tonap pia kum nyanamlume.
Ura na bikse. Sik Yerusalem mutuku unyak nang arye, nyanyake. “Kume, pia dipkoprob nyababe. Nun ni Allah Yahweh, dipkoprob tuba kam ulul touk, nunce dipkoprob nyababe. Elce nyasilye yupu, moubuka talibibirye, diksukumuk wininamabe,” nyabuka, talye si bambol deice arye nyanyak bukni, sikce talye yupu aryuk nyanyake. Na kele, sikce nyace touk, pia kum wininyaka ati, tilila yupu uk nyanyake. Allah Yahweh arye, na biti, nabi Yeremia biti nyapnuk.
Ura, anggun tuba malye-malye ululum Israel yala nang ara, moubuka kekepnululume! Nara Allah Yahweh, aning-aning nirya talibuka, deice tam erebuka Pia Mikip Weik Deiyoknye ununye birye nyapsine. Se, anggun Israel mutuku noutam tuba malye winilulum nango, anggun kanye aryuk. Ara, anggunce tenepmunye touk, ‘Malye-malye winina ap, isa si erena ap, tuba wininamabe,’ teneplum ning ara, dauplye. Anggunda, talye luba kibuka dukdongobuka, aninguk wininamlume! Bukni, na yupu batakmunce, tonap kum kekepmunyeura, tuba-tuba na si yanimunce, na mapu koproba kum unamluma ati, na si tuba malye kum kipdeipnamnulume. Tonda, anggunce isa si erena ati, kam ning obuka, arelyangalalum ning ap, isa si erena ati, patung memebuka delilamlum ning ap arye, ‘Naʼ tenen nang kum unamluma ati, na pia teleb lek si ati, tuba malye-malye nyabuka, malye kum kipdeipnamnulume. Aminyan talak ara, narye anggunti wenebuka opnamsine atia.
Tonda, sik Israel yala nang bukni, Samaria mutuku noutam unyak nang ara, isa si erena ati, mutuku si Bet-Awen mutuku noutam arye, isa si erena ati, sapi basam urasin atonun ning memepdeiamikce, asukumuk aning si erenyake. Aisa mer si erebikirye, ‘Se, nun ni koproba aniʼ tenen, yok sirim talinauk unyake. Aisa nirya ati, sikce ilil upliba, yok sirim taliplirye, yupu weik tonun ngaluka engenyake. Ara, minop talak ara, ‘Nun isa si eren ning, sapi basam urasin atonun memebuka deiamupu ning ara, pia teleb ulamuk bukni, wini talak ara, malye upmasile. Se, yata ati do?’ tenen, weik tonun engenamake. Ara, sik amutuku noutam unyak nang ap, sik malye winin ning talibuka, imam pil donyak nang ap, weik tonun engenamake. Imam nang ara, Allah ati batakuka, isa si eren piluk donyaka ati, sikda sal arye, sik domice kilapu batakuka, talye yolan kilapu dolonyak nang atonun unyake. Engenamaka deiyok ara, ani. Sikce, ‘Se, minop talak ara, nun isa si erena ati memebuka deibupu ning ara, ‘Urasin pia telebe, aning ara mambule,’ tenelamupu bukni, wini talak ara, asapi basam atonun memebuka deibupu ning ara, urasin malyeuk ulule. Aning nirya kum kipdeipnamle ati, bico upliba, engenauk unamake.
Tonda, Awen mutuku noutam bukni, mutuku kon deice arye, ‘Nun isa si erenamapʼ tenen, isa si eren aik dolamik ning nirya ara, Allah arye lo arepliba, mal olan nang arye, aning nirya dakuka, sice buklopnamake. Israel nang arye, isa el si berhalah, erelamik mutuku kon deice nirya ara, sice bukuka batanirye, kum kipdeipnamne. Israel nang arye, aning deice arye, malye weik winilamik. Winiplyopura, sik isa si erena ati domik ning, mesba-mesba nirya ara, tace ning ap, dola ap, maning ap, paplirye tiknamle. Winipyopura, sik anang nirya arye, weik yupu deice arye, ngalukuka mutuku kon ati yukunamake, “Se, nun kanye imun bopmaba ati, sik weik mutuku-mutuku dana-dana uamuk ning nirya ara, nun yanuka singinipsilyame,” nyabuka moronamake! Tonda, mutuku kon deice nirya ara, tobuka yamince, nun siknibuka opsilyame!” nyabuka moronamake.
Allah Yahweh arye, na nabi Hosea biti, yanuka nyapnuk. ‘Sik Efraim yala nang nirya arye, malye yupu nyana ap, talye yupu nyaltakna ap, ninye walana ap, olana ap, pia weik tonun winipdanin banyake. Winibika wininyaka ati, ‘Sikda na like,’ tenenune. Ati, sik Efraim yala nang ara, na lik ati, na dam ton, tuba kum yanganamake. Bukni, sik Yehuda yala nang ara, na ap neika tuba unyake. Narye, ‘Aning ara, wininamlume. Aning ara, pia kum wininamlume,’ nyanun yupu ara, sikce tuba talibuka wininyake. Nara Allah, malye winin ning tonok babye, pia kum wininuna ati, nara Pia Teleb Lek Deiyoknye unune. Tonda narye, ‘Winipnamneʼ nyabuka, nyalin yupu deice arye nyanirye touk, aninguk dipkoprob unune. Sik Yehuda yala nang ara, nati kum batakniyake.
Allah Yahweh arye, na nabi Hosea biti, yanuka nyapnuk. ‘Sik Israel yala nang nirya arye, malye yupu nyana ap, talye yupu nyaltakna ap, ninye walana ap, olana ap, pia weik tonun winipdanin banyake. Winibika ati, na Allah ara, Pia Teleb Lek Deiyoknye unune. Tonda narye, ‘Winipnamneʼ nyabuka, nyalin yupu deice arye nyanye touk, aninguk dipkoprob unune. Ati, sik Yehuda yala nang ara, na lik ati, na dam ton, tuba kum yanganamake.
Tonda, minop talak ara, naryuk anggun nabi-nabi nang ati yanuka, ‘Winipnamlume. Tonda ayupu nyapnamlume,’ nyabuka laka nyamse. Tonda, lengdar deice arye, lak kilin ning babye, pia weik tonun, sik nabi nang ati areyamse. Winipsa ati, wini talak babye, nabi nang dam laka nyapnyopura, sikce aminyan talak, imun weik upnamle ning yanuka laka nyapniba, sik nabi-nabi nang kekebikirye, na mapu anggun Israel nang ati, laka nyanamsiake.
Wininun bukni, tuba aning nirya, moubuka kekena kumce, Gilead mutuku noutam ara, pia malye un ning tuba talikirye, unyake. Tonda, weik asik si ara, Gilgal mutuku noutam unyak nang ara, isa si erena ati, tuba mesba deice, sapi basam obuka, boyanarye, uku dongobuka si erenyake. Winibuka tuba wininyak bukni, Gilgal mutuku noutam, pala keil dobuka, taplak deiamikce, kam ning opnarye, uku dongona ati, mesba-mesba dolamik ning nirya ara, uluplopminba, akeil ara, ninye arye wa wiamika kup-kup tam, akeil tuku deice talye deiplobikirye, tuku arye siknipdongobuka deibikiba, talye upnamle.
Tonda na mapu koprop, sikce talye yo ati asinyake. ‘Se, nun ni yata wiripnamap do?’ nyabuka asilenyake. Tonda, sik taruk arye, puturubuka delinyak ning, talye yo uk ulul bukni, ayo ati, “Se, nun ni, aminyan talak ara, yatato ning nun dam yanuka winipnamsil do? Nunce yata wiripnamap do?” nyabuka asilenyake. Israel ninye nirya arye, talye Isa Mutuku Dongonye si erena ati, ‘Se, nun ni ani’ tenen, pia pataliba teninyaka deice arye, pia walwal ninye winilamak touk, winipnin banyake. Winipmanto ning ara, ‘Yo bok dopropnamap’ tenen, talye-talye yolanyak kilapu arye, sik akanye yapu ati, bataklamaka touk, Israel ninye arye, na Allah ara, sik ni koproba unun bukni, sikce nati, akunum batakaninyake.
Na Allah arye nyapsine. “Israel ninye ap, Yehuda tam unyak ninye ap arye, ‘Se, weik ikin ning upnamsile’ tenen, kel bikikirye, ‘Ilil unamak’ tenen, Gibea mutuku noutam ap, Rama mutuku noutam ap, yim domba yang arye bung-bung ana kintinip deibik ning dobuka, yupu weik arye pong-pong anamlume. Tonda, Bet-Awen mutuku arye, ‘Se, opnamsil ning yanule,’ nyabikirye, ngalukunamake. Ngalukikirye, sik Benyamin yala ninye ara, ‘Se, yata ning yanuka opnusil do?’ tenen, sik ilil weik upliba, ‘Dan tam arye yanuka opnusil do?’ tenen, anggunce aminyan tam moubuka, donga karikuka dinamlulume.
Hosea birye nyabukba, Allah Yahweh arye tamubuka nyabuk. “Kume, Israel nang arye, malye winin ning talibuka, malye weik winilamikce, tuba wininyak ning nirya ara, Gilgal mutuku arye, deiya koubike. Aning winibika deice arye, atalak ara, narye sik anang ati, ‘Na lik, upnile,’ tenenlamse ninye nirya ara, deiyok kouamse. Deiyok ara, sik malye winin ning nirya winipnin yangalamika atia. Ati, sik anang nirya ara, na mutuku arye, yakuka dopkwetepniba, yuk mutuku uk binamake. Narye sik anang ati, ton bico kum tenenamne. Tonda, sik ninye deiyok nang nirya arye, mandipna kanye bobuka, narye nyapdeipse yupu nirya ap, na ap ara, yaninauk unyake. Ati anang nirya ara, kanye kum delinamsine. Tonda, anggunti bicoe tenepsinirye, anggun ton pia kum talinamsine.
Allah Yahweh arye, sik Israel ninye ati nyabuk. Na mapu Israel nang, anggunda ilil una kumce, anggun nirya Betel mutuku bimunce, na si erena ati, kam ning obuka, arelyanganamlume. Aning atouk, Gilgal mutuku bimunce, na si erena ati, yuk ning ton arelyanganamlume. Anggunda, malye ninguk talibuka, tup-tupa wininmalumce, na si erenululume. Ati, kam ning obuka, arelyanganululum ning ara, nong bol deice atonun ning winilulume. Malyeuk winiluluma anya arye, na si ara, dipkoprob kum erenululume. Betel mutuku babye, Gilgal mutuku babye, lukunyan talak nirya, kam ning obuka yamunce, arelulume. Tonda, ining ninguk kum bukni, anggun wa wibuka koulalum ning bokuka, ton tam ning ara, like winilye sum ton, akunum uplyopura, tup-tupa nati, aning arelyanganululume. Bukni, anggunce malye wininmamunye diparyuk, aning-aning nirya arenululuma anya arye, dipkoprob ara, anggunce kam ning ap, wa wibuka koulalum ning ap, arenululuma deice arye, malye ning weik tonap, tabakuka wininmalume.
Anggunce yuk talye ning ap, Isa Mutuku Dongonye si ap erena ati, Betel mutuku bana kume. Tonda, Gilgal mutuku si erenyak isa ati, ‘Sik si erebibirye, melipsiting do?’ tenen, Gilgal mutuku kum elbinamlulume. Atonun tonda, ‘Bersyeba mutuku bibirye, sik isa si erenamap’ tenen, bana kume. Aning ara, talye ati kum nyapsine. Sik Gilgal mutuku asik dobuka, unyak ninye nirya ara, sik wenena ati, narye lo arepneba, yuk mutuku yu nang arye, Gilgal mutuku unyak ninye obisibikirye, tapu koubikirye, sik mutuku bobinamake. Tonda, sik Betel mutuku unyak ninye babye, sik wenena ati, kum kipdeipniba, ton kum upnamake. ‘Wininamap,’ tenenyak ning nirya ara, dipkoprob nong kum upnamle.
Tonda, yuk asik ara, ninye weik arye akunum dibicopura, anggun tamnye ton yalirye, sik adipmace nang weina ati, sik nong bobalye talak ara, winipnamle. ‘Anyasik pum tam, ninye tonok ton tuba kam unmal do, kum do?’ tenen, anye el balye tam arye nyabuka asipdenamle. “Anyaik pum tam ara, tonoknye ton kam unmalamce, dungnupmalam do?” nyabuka asipdenamle. Asipdelibuk, tonoknye birye, “Na tonok kam unmane,” nyaplyopura, dipmace nang weina deiyoknye birye, nyapnamle. “Yuk ninye ton, an kam unmalama atonun unmak do? An tonok do?” nyabuka asipdenamle. Ayupu nyapliba, anyaik kam unmalinye birye kekeplirye, “Kume, na tonoka. Tonda, Allah Yahweh, el si ton pia kum nyanalyame. Yupu mitik tonun arye nyapminba, Allah arye kekepkilyopura, tuba tamubuka yalirye, nun babye opsilyake. Ati tunim abuka unalyame,” nyapnamle.
Na Allah arye, Israel ninye ati, wenenamsin talak ara, sik Samaria mutuku noutam unyak ninye arye, Isa Mutuku Dongonye, el si ara Asima, si erenyak ninye nirya dipnamake. Tonda, Bersyeba mutuku unyak ninye ap, Dan yala ninye mutuku unyak ninye ap arye, Isa Mutuku Dongonye si erebikirye, ‘Nun ni koproba, dipkoprob kam ulye touk, unamabe,’ nyabuka, Isa Mutuku Dongonye si erenyak nang nirya ara, tukwak sakuka pulbanamake. Narye anang nirya obuka, sirya dakniba, dipnamake. Aoplopniba, sakuka pulbinamak ninye ara, tuba tonap tamubuka, kam kum buknamake.” Allah arye, Amos biti nyapdeibukba, laka nyabuk.
Malye yo arye, malye yo duk moulamle atonun, sik malye wininyak ninye, sik talima kunukna deice arye, nong kum upnamle ning, malye ninguk wininyake. Sik wininyak ning nirya ati ara, pia memepdopmunce, aning kum wininamlulume. Talye kanye bobuka, aninye ap, ansinibuka una kum bukni, sik malye wininyak ning ati, laka deice arye, yupu nyapmunce, batakanamlulume. Ara, yuk nang nirya ara, moubuka kel kiptingce, ‘Amalye winin ning bataknamak’ tenen, anggunce, “Kume, sik malye winin ninye ara, kunuknak atonun malye wininyak ning ara ani-ani,” nyabuka, laka arye, laka nyapmunce, yupu sekelongonamlulume.
Atalak ara, Allah el si Yahweh arye, Yosua biti nyabuk. “Mesir mutuku noutamak arye diprongobuka, malye winipnin yangalamlum ning nirya ara, arup arye akunum kiliplopsine. Ati ara, aunmek mutuku si ara, Gilgal mutuku nyabuka, si dobikce, wini talak babye, tuba nyanyake.” (Sik yupu deice ara, Gilgal yupu lelim kekebikcopura, yuk yupu ton, kilina nyanyak yupu ton tenenyaka ati, asi Gilgal nyabuka, si dobik.)
Daulamuka ani, aminyan talak aryuk, ninye si Yosua bira, Yeriko mutuku arye, Ai mutuku dilbana ati, ninye ton nukukabukce, wipdeibuk. Ai mutuku dilbana ati ara, tonok mutuku keting yangan tam, Betel mutuku dam, otam mutuku si Bet-Awen mutuku dilbiyik. Ara, Yosua birye, anang wipdeibukce, nyabuk. “'Ai mutuku unyak nang, obuka sirya daknamapʼ tenen, Ai mutuku ulul ning nirya, dilbimunce biknululume,” nyabukopura, anang wibuka deibukce, apil arukukba, biyik. Sik Ai mutuku dilbiyik nang ara, amutuku noutam ulamik nang ap, wilamik ning nirya ap ati, dilbiyikce bikik. Sik anang arye, pil arukamuk ning, akunum dobuka sirya dakikce, tamubuka, Yosua dam yayik.
ကြော်ငြာတွေ