Hosea 2:20 - Eipomek20 Na Allah arye anggunti, na kil atonun dopsinirye, tuba melinamsine. Winisiniba, anggunce na Allah Yahweh ati, dipkoprob teleb kibuka, na ap, na wininye ning ap, moubuka kel bikinamlume.” Allah arye, Israel ninye ati nyabuk. အခန်းကိုကြည့်ပါ။ |
Hosea 2:20
31 ပူးပေါင်းရင်းမြစ်များ
Mutuku-mutuku nirya unyak ninye ati, ‘Teleb ninye ani, malye ninye ani,’ nyabuka, Allah arye yupu lipsisikuka bokolinamsile. Tonda, ninye mutuku-mutuku nirya arye, ‘Olanamap’ tenen, yupu deice nyapdeipdakirye, wililalamak ning ati, elce yupu lipsisikuka bokolinamsile. ‘Ninye opnuyap’ tenen, yo tace lubuka, si ketelinyak ning ap, sik parang ya ap, kapak ya ap ara, dopdobikirye, uku dongobikiba, uku diplirye, mitang uplyopura, tuku palin ning memena ati, tekinamake. Wininamak talak ara, mutuku-mutuku nirya unamak ninye arye, tonap kum olanamake. Ton tam nang arye, ton tam nang ati, ‘Olbinuyap’ tenen, ya dobuka kum olbanamake. Tonda, ninye olbana ati, peterelalamak ning ara, tonap tamubuka, kum wininamake.
Narye anggunti, tuba tamubuka telebuk kipdeipsikcopura, yuk nang arye, anggunti ara, ‘Sik Israel nang ara, Allah arye akunum batakukce, luba kibuke,’ nyabuka, sik si ati, si kum nyanamake. Tonda, aning atonun, anggun ululum mutuku nirya ati ara, yuk mutuku unyak nang arye, ‘Se sik Israel nang ulamik mutuku nirya ara, Allah arye akunum batakukba, asik oldem uamuk mutuku, pia malye mutuku dem ulule,’ nyabuka, tuba kum nyapnamake. Aning tuba kum nyanamak bukni, na Allah arye anggunti, aning ara nyapnamsine. ‘Anggun anang ati ara, tuba bico tenenirye, sikti, weik tonun kanye deilinuna anya arye, anggun si ara, ‘Hepsiba,’ nyabuka, si sinamsiyake. Tonda, anggun ululum tam mutuku-mutuku nirya ati ara, winiryuk si, ‘Beulaʼ nyabuka, si sinamsiyake. Ara, ‘Ninye domuk kil ati, weik tonun bico,’ tenelirye, akil dololamle touk, anggun mutuku ati, ‘Nara, weik tonun kanye delinune,’ tenen ati, asi sinamsiyake. Ara, na Allah arye anggun ap, anggun mutuku nirya ap ati, kanye deipnirye, tuba teninamsina ati, nyapsine.
Narye sikti, kanye talima winiryuk ning arepninyeba, sikce na Allah ati, ‘E, nun ni Allah, elda dipkoprob Yahweh, el ukaʼ tenen, moubuka biknamake. Winibikceura, sikda na mapu koproba unamake. Tonda, nara sik ni koproba Allah unamne. Winipyeba, sik malye wininyak ning nirya, batakikcak arye, sik kanye talima nirya ara, dobuka, na deiceuk deibikirye, na siuk erenamniake.
Ati ara, na mapu koproba Israel nango, anggun ilil una meme! Na amu tam pil donanye Yakub birye, deiamukba, dadeipdanin yangalamlum nang babye, anggun ilil asa una kumce, ‘Yata wiriptibye do?’ pia kum tenenamlume. Anggun ap, anggunce deiamlumba, dadeipdanin banyak nang ap, anggun mapsilip ap, anggun tam nang nirya ap ara, na Allah arye lyepdopnamsine. Ara, anggun mal olan nang arye opsikce, bobinuka, pia pere sukum deiamsikba, daululumak arye lyepdopnamsine. Winipsilyeba, anggun apu koproba, Yakub birye deiamukba, dadeipdanin yangalamlum nang ara, melibuka lyepropsinya deice arye, anggun tamubuka yamunyakarye, anggunti arepsise mutuku uk yanuka, pia telebuk unamlume. Aminyan talak ara, tonap ilil kum unamsil bukni, telebuk unamlume. Yuk-yuk mutuku nang nirya babye, anggunti, malye kum kipdeipnamsiake.
Aminyan talak nirya ara, narye sikti, kanye deipnirye, teleb kipdeipnamne. Tonda, narye sikti, batakna pia kumce, ‘Amutuku noutamuk, pia teleb unamakʼ tenen, kintinip deipyeba, telebuk wininamake. Aning akunum nyapdeipsina ati, aning ara, pia kum bataknamne. Na nyasinye touk, dipkoprob pia wininamsinarya! Na kanye tenen ning ap, na talima ap deice arye, nyalin yupu arye nyapsine. Aning nirya ara, dipkoprob winipnamsine!
Aning kum bukni, yata nang do nirya, sikce ‘E, mambul weik ning ani, mambul weiknye bira ani,’ tenenamak talak ara, sikce anyapnusin ninguk tenenamake. Tonda, tukwak mutuku, talye daulye ning nirya ati, ‘Aning ara, mambule,’ pia kum tenenamlume. Aning nirya kum bukni, anggunce na Allah Yahweh ati, diba tenepnulumce, na ap, na wininye ning ap, moubuka biknamnulum nang ara, angguncuk, ‘E, mambul weik ning ara, Allah Yahweh el uka,’ tenepmunce, aning deice aryuk, kanye pia delinamlume. Ara, anggunce na Allah ati, “E, Allah arye bico tenesilirye, elce, ‘Aning ara wininamlume, winipmunyopura, narye melisinirye, pia teleb kipdeipnamsine,’ nyabuka, nyalin yupu deice arye nyapdeipsuka deice arye, teleb kibuka melisulule. Elce winilye ning nirya ara, diksukum una ap, teleb ning winin deice aryuk, ninye yupu lipsisikuka bokosilirye, tuba-tuba melisulule,” nyaptingce, na si erepnitinge. Nara Allah Yahweh arye, anggunti pia bico tenesinirye, pia kum batakasunune. Narye, anggun tukwak mutuku sirya, im sirya nirya ululum nang ati, melisinye ning nirya ara, bico tenena ap, dip yupu nyana ap, malye winin ning pia kumce, diksukum winin deice arye melisunune. Tonda, na Allah arye, ateleb winin ning nirya ap, ‘Diksukum winin ning nirya ap ara, telebe uka’ tenen, na kanye delinune. Aning ara, na si Allah Yahweh arye ayupu nyapsine, nyabuk.
Ati ara, nara pia mikip weiknye birye, sikda na amu tam mitang nang unyaka ati, na kanye aryuk, sik kalikuka melina ati, ‘Winipnamsine,’ nyabuka, nyalin yupu deice arye, anggunti teleb kipdeipnamsine. Winipnyopura, sikda olana kumce, kanye deibuka, pia teleb kibuka unamake. Ara, amutuku noutam, sikce talibuka wininamak ning nirya ati, teleb kipdeipnamne. Tonda, amutuku noutam bai tam yu unyak kam ning nirya, kum kilina atonun, narye anggun mal olan nang, dana-dana tam nirya yakuka dopkwetepnirye, kum kipdeipyopura, anggun ‘Naʼ tenen nang ara, dan mutuku do nirya, bai tam do, pata mutuku noutam do, weik asik tam do, kanye deibuka, pia telebuk unamake. Amutuku-amutuku noutam nirya babye, ilil una kumce, teleb aryuk manamake.
Narye mok arepnyopura, mok cepliba, amutuku noutam tiknamle yo, yuk-yuk ning nirya ara, duk mounauk unamle. Sikce wa wibuka kounyak ning nirya ara, pabukablirye, teleb kibuka nonguk unamle. Winiplyopura, sik anang nirya, dakeiam asa arye dakuka, ilil una kumce, teleb kanye deibuka, sik mutuku tuku noutam unamake. Winilamikca ani, na mapu koproba Israel nang, ninye arye tapu koun ati tapu, el si rantai bulukulamak touk, narye sik yuk ninye asik nang mutuku binuka deiamikiba, adiparyuk loplopniba, kanye pia deipnamake. Anggun mal olan nang obuka, sirya daknamne atia. Winapnamne deice arye, akunum winipnyopura, sik anang nirya arye nati, ‘Se, diba elda dipkoprob Allah Yahweh ululeʼ tenen, biknamniake.
Aning nirya winipnye deice arye, ‘Yuk-yuk mutuku nang mutuku sirya im sirya nirya ati, na mikip weik ap, mambul pil donun ning ap, malye un ning kumce, pia teleb, lek diamuk unun ning ap, sik nirya biknamakʼ tenen, aning nirya sikti, wenepnirye, peterepnamne. Adeice arye, sikce nati, ‘Se, Allah Yahweh ara, dipkoprob eluk ululeʼ tenen, moubuka biknamniake. Ayupu nirya ara, Allah arye, nabi Yehezkiel dam yanuka nyapdeibukba, kekebukce, laka nyabuka sekuk.
Allah arye nyabuk. Nara anggun ni bira, Allah Yahweh unune. Anggunda, Mesir mutuku noutam, ikin pia weik ulalum bukni, narye lyebuka, boyanamsisirye, pia telebak yanuka deipsise. Ati ara, anggunce, ‘Allah ton yuk ulule,’ tenebuka kum unamlulume. Yuk talye ning ayala-ayala nirya ati, si kum erenamlulume. Nara, anggun ni Allah ara, na tonok unirye lyesunune. Anggunce yuk talye ning ati, ‘Nun Lyena Deiyoknye aulule,’ nyabuka, pia kum nyanamlulume. Lyena Deiyoknye bira, na uka. Allah arye nyabuk.
Na arye anggun dopropsinirye, pia ati, na kil atonun kipdeipnamsine. Ara, narye anggunti, dipkoprob kil dolamak atonun, kipnamsina deice arye, diksukum winin ninguk kipdeipsinyopura, telebuk unamlume. Tonda, narye teleb kipdeipsiniba, ninye nirya arye, yuk nang nirya ati, diksukum yupu uk nyabikirye, dipkoprob yupu uk, bokolilanamake. Tilila yupu ap, minina yupu ap ara, kum danamle. Tonda, na Allah arye, anggun Israel ninye ati, pia bico tenepsinirye, tuba-tuba melinamsine. Aning nirya ara, pia kum kum danamle. Pia ati, telebuk unamlulume.
Ati anggun moubuka tenenamlulume. Dipkoprop na pataniliba teninun ning ara, ani. ‘Sikce yuk nang nirya ati, bico tenebikirye, teleb ubuka melinamake’ tenen, patanulule. Tonda, ‘Sik nirya arye, na Allah ati, na si erepnikirye, pia si erenamniyak’ tenen patanulule. ‘Winiptinge’ tenen, weik arye patanilye ning ara, aning uka. Bukni, anggunce aning nirya kum winipmunyopura, na arena ati, kam ulul ning dobuka deipmunce, arepmunba, sik imam nang arye, uku dalyanganyake. Tonda, ‘Nun malye winin ning, kum daneipsuturye, namin kipsilyopura, nunti talye mangkau kibuka opsutu bukni, nun pununa ati, kam ulul ning dobuka arepnuyabe’ tenen, kam ulul ning obuka arepmunyeba, sik imam-imam nang arye, arelyanganinyake. Bukni, ‘Aning-aning nirya ara, weik mambul kume,’ tenenune. Anggunce yuk ninye ati, bico tenebuka melilulumce, nati si erebuka, na si erepnumunyopura, narye anggunti, kanye deipsitinirye, ‘Aning ara, weik mambule,’ tenepsitinye. Bukni, aning kum winilulume. Allah arye, sik Israel ninye ati, nyabuk.
Aning-aning nirya ati, pia teleb kibuka melipsinya deice arye, anggun gandum wa wibuka kounamlum ning nirya, pia weik tonun palirye, nong ubuka wisiplyeura, mouplirye, lipmunce, gandum duk dakna ati, yo kwarya arye daknamlum pil, min kum sirya dakmunyopura, anggun anggur tapu duk weik tonun mounamle. Weik tonun melibuka kalikinamsina deice arye, wa wibuka min koupnin balamun buk, minop wisiplirye, duk dakan talak kinamle. Tonda, anggur tapu duk wisipliba, dadakmunce, anggur duk min dakuka, kum purupmamunye talak aryuk, tuba tonap gandum duk ton kounamlume. Gandum duk yuma minop wisiplirye, lin talak upliba, linamlume. Aning atonun, minop wisipliba dakanamlum talak aryuk, anggun anggur tapu duk babye, minop wisipnin banamle. Ati, wa wibuka yala kounyak talak babye, duk moun talak babye, wa ning nirya lin talak babye, ouku una kumce, minop wisinin banamsile. Apia teleb kilinamsil deice arye, anggun mutuku noutam ara, din ning pia weik usilirye, weik tonun dipmunce, bounamsile. Tonda, narye melibuka kalekisinya deice arye, anggun mal olan nang, yuk mutuku yu nang ara, anggun dam kum yanganamake. Anggun mutuku noutam ara, mal olana kum aryuk, kanye deibuka, pia telebuk unamlume.
Anggun unamlum mutuku nirya ara, narye melibuka kaleksiniba, pia telebuk unamlume. Amutuku noutam, pia teleb kibuka umunce, talye mangkau asa manamlume. ‘Se, yata ning arye do, yata mutuku nang arye, yanuka opnusiak do?’ tenen, ilil pia kum unamsile. Tonda, yuk talye bai tam yu ulamlye kam ning ara, ninye opmanto kum ulye ning nirya ara, bai basam do, yu kwatima do, yu weik kuse harimau do, aning nirya ara, anggun mutuku noutam arye dopropnirye, kum kipdeipniba, anggun dam kum olyanamsile. Aning atonun, naryuk melibuka kaleksiniba, yuk mutuku yu nang nirya arye, parang ya donogobikirye, ‘Sik Israel nang opnuyapʼ tenen, anggun mutuku noutam kum olyanganamsiake. Narye kaleksiniba, mal olan nang ton pia kum olyanamsiake.
Mutuku-mutuku nirya daunyak ninye, sik wininyak ning ati, Allah aryuk yupu bokeipnamle. Ara, pia weik mutuku ati, negara nyanyak sukum unyakce, mikip weik unyak ninye ap, pera mutuku yuk-yuk daunyak ninye nirya ap, dam mutuku unyak ninye nirya ap ati, yupu bokeipnamle. Tonda atalak ara, mal olanyak ninye nirya arye, sik mal olan ati talinyak ning, aning-aning nirya dobuka deibikirye, urdem darapdongobuka, teleb kanye bobikirye unamake. Sik mal olan ati, talilamik yin ap, parang ya ap, besi tace ning ap nirya dopdobikirye, uku dongobikiba, uku buppu arye mitang kiplyopura, wa win ning ap, yo duk dakna ning ap, kintinibuka delinamake. Deiyok ara, atalak ara, ninye im sirya, mutuku sirya nirya arye, ‘Mal olan ati, weik kel kina deiyok ning ara, nun like. Aning tonap kum kel kinamabe’ tenen, unamake. Ati, sik olana ati, kintinilinyak ning nirya ara, kum kipdeipnamake.
Allah arye nyabuk, “Epraim yala yin talin nang arye, ninye olanmace talak bukikirye, balamle kuda basam arye, libuka tuku deice balamak ning, mal olalbalamak kereta ap, kuda basam ap nirya ara, na Allah arye kum kipdeipnamne. Tonda, Yerusalem mutuku nang balye deice bukuka, banyak kuda basam nirya babye, kum kipdeipnamne. Tonda, ninye olana ati, bolamak yin nirya ara, yuk ninye on ning, ayala-ayala nirya ap, cebuka atu atonun kiplopnirye, kum kipdeipnamne. Aning ara talye ati kum nyapsine. Ara, Israel ninye anggun ninye deiyoknye, na Allah arye, anggun nirya ati, talye kanye bobuka, teleb unamlum talak arepnamsina ati, nyapsine. Ara, ‘Anggun ap, mutuku-mutuku nirya daunyak ninye ap, tonok kanye bobuka, dukdongobuka unamlum’ tenen, ayupu nyanamsine. Otam deibuk laut mekwen ap, atam deibuk laut mekwen ap, anoutam dipdongobuka unyak ninye nirya ara, na Allah aryuk talinamne. Tonda, Efrat mek dam arye dipdongobuka, mutuku sirya, dana-dana nirya, naryuk talinamne.”
Allah morobukopura, el yupu kekenmek nang ati ayupu ton nyabuk. Na ni Allah arye, ‘Na mi Yesus, aning-aning nirya talibuka deiyoknye unamle’ tenen, akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel biktinge. Allah el Mi Koprop kanye talima ulye ning ara, Allah elcuk kel bikilulue. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el talima noutamak ulye ning ara, tukwak ninye ton kum bukni, nauk ara, el Mi Koprop arye kel bikinune. Tonda, ‘Narye peterenunba, na ni ulye ning kel kipnamak’ tenen, wibuka deipse nanguk, na ni Allah arye pataplyeba, tenelul ning kel biktinge.
Allah morobukopura, el yupu kekenmek nang ati, ayupu ton nyabuk. “Aning-aning nirya ara, na ni Allah arye akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel kiptinge. Allah el Mi Koprop kanye talima ulul ning ara, Allah elcuk kel kilule. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el kanye talima noutamak tenelul ning ara, nara, el Mi Koprop arye kel bikinune. Bukni, yuk nang ton kum biktinge. Tonda, ‘Narye laka nyabuka peterenyeura, na ni kel kipnamak’ tenen, wibuka deipse nanguk, na ni Allah arye tenelul ning kel biktinge.” Yesus arye nyabuk.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
Anggunce Allah ati dipkoprop kum kel kilulumce, el ap talima dukdongobuka kum ululum bukni, nara Allah dipkoprop kelnye unune. Nun neika unyame. Narye, “Allah na walwale, min kum kel kipne,” nyaptinya babye, ayupu dipkoprop kum uptu. Ayupu nyapnyopura, anggunda tilila yupu nyaninye ulalum tonun uptinye. Bukni, ayupu kum nyanamne. Allah ara na dipkoprop bikinune. El yupu nirya talibuka pia diksukumuk unune.
Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.
Anyapmasin yupu uk kume. Tonda, teleb-teleb kibuka winilamse ning weik aupnuk bukni, Yesus dib tenepnirye, ‘Na deiyoknye Yesus Kristus ap, dukdongobuka unaname,’ akunum tenepne ning ati ara, ‘Mince arye tenelamse ning nirya ara, malye ning atouk, dauplye,’ tenenune. Ara, ‘Na Deiyoknye Yesus Kristus ap, talima dukdongobuka una ara, pia mambule,’ ati nyapsine. Minop talak ara, na diksukum ulamse deice arye, ‘Aning deice arye, teleb updeipnamnile,’ tenelamse bukni, wini talak na kanye ara, ‘Aning nirya ara, mal-malya, sukulonga donoklamak atonun ning ulule,’ tenenune. Tonda, ‘Lyun ning atonun ning ulule,’ tenenune. Winibukap tenenuna deiyok ara, ‘Weik mambul ning ara, Kristus eluk talibuka, el ap, talima dukdongobuka unaname’ tenen, nyapne.
Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.
‘Apil donamle’ tenen, wipdeipnuka ati, apiluk donuna ati ara, yuk ninye arye, ‘Nun lik’ tenen, ikin ning weika arye, na nong deice delininyak ati ara, na kanye mambul kanye bobuka, ikin unulule. Bukni, ikin ning na nong deice upnilya babye, narye, ‘Se’ tenen, alye kum dakanune. Ura, talye ati kume. Deiyok ara, ani. Na kanye teniltona pia kum aniryuk, na diba tenyamsinye bira, na kele. Narye Allah ati, ‘Pia moubuka kalikinamnel’ tenen, el deiceuk deiamse ning nirya ara, min kum kum datue. Wini talak arye dipdongobuka, Yesus tamubuka el yanamle talak bukni, anoutam talak nirya ara, Allah arye moubuka kaliknilirye, dinamnile. Na Paulus arye nyapne.
Minop talak ara, na yupu kel kiyamik nang arye, ayupu kum kel kiyamik nang ati, peterelamik bukni, wini talak ara, tonoknye birye, el aik dam ululnye biti, “Allah ap talima dukdongobuka neika una ati, winipnulyam, winipnulyam,” nyabuka, tuba-tuba kum peterenamle. Aning atonun, tonoknye birye, el weit kopropa ati, “Allah ap, talima dukdongobuka neika una ati, winipnulyam, winipnulyam,” nyabuka, kum peterenamle. Kume, narye na yupu dobuka, anggun kanye talima noutamak dongopnamsina ati, weik mambul nang babye, pia mambul kum nang babye, anggun nirya ap, na ap talima dukdongobuka neika unamabe. Atalak ara, na mapu nirya kel kipra banamaka ati, sik kum peterelanamake.
Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.
ကြော်ငြာတွေ