Hosea 2:14 - Eipomek

¹⁴ Allah arye nyabuk. Israel ninye ara, anggun malye winimunya ati, wenebuka opnamsin bukni, aning akunum winipnirye, dipkoprob aminyan talak ara, narye Israel ninye bobuka, ninye kum unyakak, pata mutuku bobisinirye, anggunti kanye talima, teleb kilin yupu nyapnamsine.

Hosea 2:14 ပူးပေါင်းရင်းမြစ်များ

Kejadian 34:3

Ubula dobuka neika maprik bukni, akil ati kanye deibukba, Yakub el kilmu Dina biti, kanye deibukce, akil ati nimalya arye, teleb yupu nyapdeibuk.

Ayub 36:16

Ati, an malye winilamlumce, imun kanye bobuka, ikin weik ulamlum bukni, Allah arye kanye lon yupu nyapkuk deice arye, ila tamubuka teleb sukum deipkuke. Winipmanto ara, pia teleb mutuku, pala weik ululba, ikin kumak ulamle touk, teleb sukum deipkukce, din ning yala-yala nirya areamkukba, an din ning delinak ara, weik tonun langdilamukba, aning nirya talibuka dilamlume.

Kidung Agung 1:4

Na dopnamnilamnye bira, anda pia sik arye una kum bukni, ance na taruk minop talipnimince, an ap, na ap, minopce bikbik abuka, an maminye aik binuka, neika unamaname. Ura, na ninye deiyoknye birye, na dobuka, el man aik akunum bobinuka deipmanile. Se, na dopnamnilamnye bira, ance pia teleb kibuka, bico tenenilyama ati, nun neika unimnye talak ara, pia teleb kanye bobuka unamaname. Kanye walwalan anggur mek dilamak nang arye, aning dibikcopura, kanye deibuka unyak bukni, an ap, na ap, neika upnimnyopura, nun bitinye ara, dipkoprob pia pin-pin kanye bobuka, unamname. Anda, weik tonun bico tenenilyama ati, yuk wel kilapu nirya arye, aning tenebikcopura, sikce, ‘Se, elda dipkoprob pia telebnye ulule,’ tenekinyake.

Yesaya 30:18

Nyabukce, ayupu ton dukdongobuka nyabuk. “Anggun malye winimunye ning ati, kanye imun weik ning yanamsil bukni, na Allah Yahweh arye anggunti, tuba tenesununa ara, ‘Aninye ara bicoe, na kanye aniryuk melibuka lyepsitinye,’ tuba tenesunune. Na Allah arye tenelamsinya ani, ‘Atalak winipnamne,’ tenyamse talak akunum kiplyopura, bico tenepsinirye, melibuka lyepnamsine. Winipnamsitinya ara, talye ati kume. Deiyok ara, Na Allah Yahweh, pia diksukumuk ununye birye nyapsine. Ati, yata ninye do nirya, ‘Allah el dem arye melibuka lyepnamsil’ tenen, diba tenebuka dinauk unyak ninye ara, narye teleb kipdeipnamsine. Winipsinyopura, telebuk unamlume.” Allah arye nyapdeibukba, nabi Yesaya birye sekeipsuke.

Yesaya 5:5

Anggur duk malye ninguk moulamnuka ati, winipnamak ning ara, nyapnusine. Ara, anggur wa wiamsak dana-dana tam nirya, keil poka dobuka denepse ning ara, dakuka uluplonamne. Winipnyopura, anggur wa malye upnamle. Keil poka dobuka denepse ning ara, dakuka daluplopnyopura, yuk malye nang wekikirye, amutuku nirya yanuka yanipnamake. Winibuka yanibikirye, uku sice kiplopnamake.

Yeremia 16:14

Allah arye ayupu akunum nyabukce, ayupu ton dukgobuka nyabuk. Ati ara, na Allah Yahweh arye, ayupu nyapdeipsine. Pia dipkoprop, nyapsine. Aminyan talak ara, na tenepse talak akunum kiplyopura, yuk mutuku nang arye, anggun Israel yala nang ati, nyalamik ning ara, batakdopnamake. Min talak ara, sik Israel yala nang ati, nyalamik. ‘Kume, Allah Yahweh, kam pia ululnye bira, el mapu koproba Israel nang ara, Mesir mutuku noutam ikin weik ulamik buk, lobuka lyepdobukce, anang dobuka boyanamukce, tonap teleb kipdeibuk,” nyalamik. Winibuka nyalamik bukni, aminyan talak ara, ayupu tonap pia kum nyanamake.

Yeremia 2:2

“Ayupu nyapdeipkin ning ara, Yeremia ance Yerusalem mutuku unyak ninye, sik kekena ak binuka nyapnulyame. Ara, nyapnulyame. Se, sik Israel ninye ati, Allah Yahweh arye nyapsile. Anggunda minop talak kam ulalum talak ara, ‘Nun ni Allah, elda mambul weik anya arye, el amu tamuk unamabe’ tenen, moubuka tenelamnulumce, pia weik kanye deibuka, na si ati erelamnulum ning ara, tuba tenesunune. Tonda, kam nang kil dopnuce talak taruk murubikiba kanye delilamak touk, anggunce nati atonun tenelamnulume. Tonda, Mesir mutuku batakuka, anggun mek ap, mok ap kum ati, ninye kum ulamik mutuku noutam balalum talak ara, na balamse bisikuk, anggun babye nati melibuka dobolbalamnulume. Amutuku ara ninye arye wa wibuka yala ning kum koupmanto mutuku anya arye, narye meliamsisiba, anggun nirya na menekuka balamse bisikuk, melibuka dobolbalamnulume. ‘Minop talak winibuka anggunce nati melilamnulum ning ara, pia tuba tenesunune,’ Allah arye nyapmasile,” nyapnulyame. Allah arye na Yeremia biti nyapnuke.

Yeremia 45:4

Nyabukopura, ayupu ton dukdongobuka nyabuk. “Bukni, anda Baruko! Na Allah Yahweh arye nyapkin yupu ara, moubuka kekepnulyame. Na Allah arye, Yehuda mutuku noutam arye, domse ning yuk-yuk nirya ara, akunum deiyok koubuka dakaltakanmane. Winipmanto ara, na Allah Yahweh arye, amutuku noutam arye, akunum kouamse ning nirya ara, webuka batakanune. Ara, Yudea mutuku noutam pil domse ning nirya ara, amutuku sirya, im sirya nirya ara, sice buklopnamne.

Yehezkiel 20:10

‘Na ti biknamniyakʼ tenen, sik Israel nang lyepropsirye, Mesir mutuku noutam arye boyanuka, ninye ap, mek ap, kum sukum, pata weik lu mutuku, el si padang pasir bobinamse.

Yehezkiel 20:33

Nara Allah pia kam tuba ununye birye, nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, narye anggun wenena ati, na mikip weik taruk ara, na yu upmanilye deice arye, anggun Israel nang ati, moubuka talipsinirye, anggun deiyoknye unamsine. Ninye deiyok talipnirye, anggun deice tam Raja unamsine. Anggunda, na amu tamuk ulamunce, na yupu uk kekenamlume.

Hosea 2:3

Anggun malye weik winimunye ning nirya, kum batakmunyopura, na Allah arye, anggun baju ongomunye ning nirya kwiripsiniba, winiryuk deiamsik talak, urdem nong banang ulamlum touk unamlume. Tonda, ninye bin tonoknye ton, mek pia kum arye, tuku nirya kel-kel alulul mutuku noutam uliba, mek patalye deice arye, imun kanye bobuka diplamle atonun, narye anggunti, bataksinirye, anggun nong deice ikin ning weik deipsinyopura, dipkoprob imun kanye bobuka, unamlume.

Mika 1:7

Tonda, amutuku noutam umunce, talye ning ati, ninye taruk deice arye, puturubuka memepdeipmunce, kam kum ulul ning bukni, anggunce, ‘Aning ara, weik mambul ning’ tenen, “Nun ni koproba,” nyabuka, aning ati, si erelulum ning nirya ara, kum kipdeipnamne. Atalye ning si erenyakce, talibuka unyak ning nirya ap, tonda talye-talye yolanyak ninye nirya ap ara, obuka atu kiplopnirye, uku dongopniba, dibuka atu buklopnamle. Atonun, sikce dekna weik deklamik ning nirya ara, ‘Pia aunamsil’ tenen, ‘Naʼ tenen, moubuka, aik pum tam delilamik ning nirya ara, aning babye daklopnirye, aning nirya dobuka, uku dongopniba, uku arye diplirye, kum danamle. Winipnamna deiyok ara, ani. Sik dekna weik ning, dokola delilamik ning nirya ap, tonda, “Nun ni koproba,” nyabuka, si erenyak ning nirya ap ara, yo bok weik tonun, dekamikce delilamik. Ayo bok ara, talye-talye yolamak kilapu dekuka yolalamikce, deklamika deice arye, dololamik. Ati, adekna weik ning nirya ara, dobukapnirye, yuk mutuku ninye ak arepneba, amutuku ninye babye, adekna weik ning dopdobikirye, talye-talye yolamak kilapu ati, arenamake. Allah arye, nabi Mika biti, lak nyapdeibukba sekamuk.

Mika 4:10

Se, anggun Yerusalem mutuku ululum ninye, malye-malye weik winilamluma deice arye, mi bomice kilapu arye, ikin kanye bobuka, ngalukuka ulamak atonun, anggun babye akunum winilulume. Talye ati, engebuka kum ngalukululume. Wini talak ara, anggun umunye mutuku arye batakuka, pata mutuku binuka, tia talak ati, unamlume. Unmamunya ani, Babel mutuku ninye arye anggunti, malye kipsikirye, anggun nirya tapu koubuka, adiparyuk Babel mutuku bobinamsiyake. Bobinuka dadeiamsikiba, daulamunye bukni, aminyan talak ara, na anggun ni koproba, Allah Yahweh arye, apera mutuku dabinuka ulamunye buk, anoutamak narye lyebuka dopropnamsine. Ara, anggun mal olan ninye noutam arye, lobuka bataksinirye, lyepropnamsina ati, nyapsine.

Yohanes 12:32

Bukni, nara, tuku deice tam erepdeipnilyopura, narye ninye mutuku-mutuku nirya ati, yukupnibuk, ninye weik arye na tam kilonamniyake. Aninye ara lyepnirye, na mapu kipdeipnamsine.” Yesus arye nyabuk.

Yohanes 6:44

Yata nang do nirya, na dopdeipnuknye, na Ni Koprop Allah arye anang ati, ‘Yesus dib tenepnamak’ tenen, sik kanye talima kum tamupdeiplyopura, nati dib kum tenepnitinge. Allah arye wipdeiamuk ninye nirya, sirya talak ara, narye kam bukdeipnirye ereipnamne.

Wahyu 12:14

‘Akil tomopnune’ tenen, bik-bik abuka biyukba, Allah arye akil ati, weik Bib maka pol atonun bitinye arebuk. Allah arye akil ati maka pol aribuka deiyok ara, ‘Akil el kalikna ati, mok ap, ninye ap, kum ulul mutuku noutamak kintinipdeiamsak mutuku lakuka bituba, anoutamak ara keting tamun winilye ap, tonok keting tamun noutamak ap, deice unamle,’ tenebuk. Allah arye, akil kalikuka melinamna deice arye, ‘Isa Mutuku Dongonye arye kum optue,’ tenebukce, Allah arye akil ati, Bib maka pol atonun bitinye aribuk.

Wahyu 12:6

Allah arye, ‘Akil kalikuka melipnamne,’ tenyamukce, mok ap, ninye ap, pia kum ulul mutuku noutamak ara, akil arye, ‘Allah arye kwepdeiyamuk sukumuk binun’ tenen, akil arye asukum bik-bik abuka biyuk. Akil bik-bik abuka biyukce, duknupmokba, Allah arye like yupa weik keting tamun winilye ap, tonda noutam ning tonap, (1.260 sum) noutamak arye, akil ati kalikuka melilamuk.

Hakim-Hakim 19:3

Binuka daulamuka ani, el domuknye, aLewi yalanye aminyan yayuk. Ura, elce akil yukupnirye, ‘Na aik boyanamneʼ tenen, biyuk. Abiyuk talak ara, elce ninye tonok, el pil melinanye ap, bobiyuk. Tonda, keledai basam bitinye ap bobiyuk. Amutuku noutam akunum biyukopura, akil arye bobuka, el li aik dam bobiyuk. Bobiyukopura, akil el li birye anye akunum eibuk. Eibukura, el li adiparyuk anye biti, kanye deibukce, talibuka kibuk.