Hosea 13:9 - Eipomek

⁹ Winipnamsina ati ara, anggun Israel ninye nirya ara, moubuka tenenamlulume. Se, Israel ninye ara, narye anggun nirya yanuka opnamsin talak ara, yata nang arye ton, anggunti yanuka melipnamsiyak do? Kume, yuk ninye arye anggunti, kum melipsitinge. Wenebuka opnamsina ara, talye ati kume. Deiyok ara, narye anggunti, weik arye melilamsise bukni, anggunce nati yanipnulumce, batakanululuma ati, narye opnamsine.

Hosea 13:9 ပူးပေါင်းရင်းမြစ်များ

2 Tawarikh 28:23

Elce malye weik winilamuk ning ara, ani. Ahas el tenebuka ara, ‘Siria mutuku noutam bukni, pia mambul weik asik, el si ara, Damsyik, amutuku unyak nang arye, sik si erenyak isa mikip deice arye, malye kipnika ati, narye aisa ati, domba basam ato ning obuka arepnirye, el si erepnya deice arye, sik anang meliplyeba, mal olan ning atouk, na babye aning winipnyeba, melipnamnile,’ tenebuk. Utenebuk bukni, dipkoprob ning ara, Siria mutuku nang, sik si erelamik ninguk, Ahas birye, si erebuka deice arye, el ap, Yehuda mutuku noutam ulamik ninye nirya ap, tonda Israel tam ulamik ninye nirya ap, Allah arye kanye imun weik ning arelamukba, doprobikce, ikin asa ulamik.

Mazmur 146:5

Bukni, yata nang do nirya, sikce nun apu Yakub ton, kalikuka melilamuk Allah ati, ‘Nara elcuk, nati melibuka lyepnamnileʼ tenenyak nang ara, Allah arye aninye ati, kilinamle. Aning atouk, yata nang do nirya, sikce Allah Yahweh ati, ‘Eluk na si erenun Allah ulula ati, elcuk kalikuka lyepropnamnile,’ tenenyak ninye ara, Yahweh arye aninye ati, teleb kilinamle.

Mazmur 33:20

Ati ara, nun nirya arye, ‘Nun ni Allah Yahweh arye, melibuka lyelonamsil talak ara, dan talak arye yanuka lyepdopnamsil do?’ tenen, kintinibuka, dinauk unamabe. Winipmanto ara, ninye arye mal olalbalamak talak ara, ‘Yuk nang mal dobikiba, opsilyak’ tenen, kelapye dobuka lelipdakirye, olbalamaka atonun, nun ni koproba Allah arye, nunti melibuka lyesulule.

Mazmur 46:1

Mot nyana ati deiyoknye bira, Daud deiyok kipnaba, sik Korah mutuku deipkirikdop nang nirya ara, Allah ati mot nyabuka, si erelamik.

Amsal 6:32

Ninye ton sik kayapu domikce kilapu ap, neika malamice nang ara, pia walwal ninye unyak touk unyake. Yatanye birye do nirya, sikce yuk nang domikce kilapu neika mabice nang ara, sikce, sik bidamnye ati, ititildanyake.

Amsal 8:36

Bukni, yatanye do nirya, ‘Kel pia weik kina deiyok ning, na walwal’ tenen, na ap kum epdanimnyopura, elce el mining nong ati, malye kililalule. Aning atonun, nara pia weik kel bikna deiyok ning ati, ‘Aning ara na like’ tenen, nati batakaninyak ninye nirya ara, dipkoprob dipna deiyok ning atibuk, kanye delinyake. Aning atibuk, kanye delinyak ninye ara, ‘Dibina deiyok ning doproptibye’ tenen, patalibuk sik bidamnye arye, kintinilinyake. Kel weik kina deiyok ning arena deiyoknye birye, ninye tukwak ninye nirya ati nyabuk.

Yesaya 3:11

Bukni, sikce malye ninguk, talibuka winilamice nang ara, nyapnamlulume! “Anggunda bico, anggun wenena ati, ikin ning ton dopropnamlume. Anggunce yuk nang ati, ikin ning delilalum touk, anggun babye, ikin ning anggun dam yalyopura, dopropnamlume. Tonda, anggunce malye-malye pil dolamlum touk, anggun dam ara, ikin pia ning yanuka, anggun nong deice deipsilyeura, doropnamlume,” nyabuka wenepnamlyame.

Yesaya 3:9

Sik amutuku unyak nang arye, kanye erebuka kwalinyak deice arye, tukwak aryuk malye unyake. Sik anang nirya ara, dipkoprob laka deice arye, pia malye unyak talak ara, yuk nang ton, sik urasin eibikcopura, sik malye wininyak ning nirya bikinyake. Ara, ‘Nun malye wininyap ning duknubupe,’ tenena kumce, minop talak Sodom mutuku ulamik nang ara, lak deice noutam arye malye winilamik touk, wininyake. Ati ara, sikda bico! Ikin weik ning, sik nong deice yanamlarya! Ara, sik Yerusalem mutuku unyak nang ap, Yehuda mutuku unyak nang ap ara, sik deiceuk, kanye imun weik ning dobuka deipdayikba, ikin weik unyake.

Yeremia 2:17

Awinipmasil ning ara, urdem ati kum winipsile. Anggun kele. Anggunce, malye winimunya dekna arye, anggun dam ikin ning nirya yalaba dopropmalume. Deiyok ara, na Allah arye anggun bisik balalum talak ara, melibuka bobalamsise bukni, anggunce nati balye tam kipnulumce, bataknuluma deice arye, wini talak ikin ning anggun dam akunum yale.

Yeremia 2:19

Tonda anggun malye un ninguk, talibuka winimunya deice arye, anggun dam wenen ning yanmasile. Aikin ning anggun dam yanmasil ning ara, anggunce na Allah ati bataknuluma deice arye dopropmalume. Ati wini talak ara, ikin doproplumce, kanye imun upmasile deiyok ara, anggunce na Allah Yahweh ati, kibuka si erena kum deice arye, ikin doproplume. Na kele, anggun Israel ninye nirya arye, na Allah ati, ‘Se Allah ara nun weik deiyoknye ulula ati, malyeuk ubibyopura, weik arye wenepnamsile,’ tenena kumce, nati si erebuka, ilil kum ulule. Ayupu nirya nyapmasin ning ara, na Allah Yahweh aning-aning nirya talibuka deice tam unune. Na Allah Yahweh ara, aning-aning nirya talinirye, im deice yin talin malaikat nirya, sik weik deiyoknye kibuka ununye birye nyapsine. Allah arye nyabuk.

Yeremia 4:18

Se, Yehuda mutuku ululum nang ap, Yerusalem mutuku ululum nang ap, angguncuk malye weik ululuma deice arye, ikin dobuka, anggun dam deipdanamlume. Anggun domunye pil dolulum ning ap, tonda anggun deice ikin yalirye, anggun talima yanuka luksilyeba, uk dinamsile.

Yeremia 5:25

Na Allah arye dipkoprob nyapsine. Anggun malye ning weik talibuka winimunya deice ap, na yupu yanimunya deice ap, akintinibuka deipsise teleb ning nirya ara, talibuka deipmunce, teleb ning ton, kum dobuka dilulume. Tonda, telebuk kum winilulume.

Hosea 13:4

Allah arye nyabuk. Nara anggun ni bira, Allah Yahweh unune. Anggunda, Mesir mutuku noutam, ikin pia weik ulalum bukni, narye lyebuka, boyanamsisirye, pia telebak yanuka deipsise. Ati ara, anggunce, ‘Allah ton yuk ulule,’ tenebuka kum unamlulume. Yuk talye ning ayala-ayala nirya ati, si kum erenamlulume. Nara, anggun ni Allah ara, na tonok unirye lyesunune. Anggunce yuk talye ning ati, ‘Nun Lyena Deiyoknye aulule,’ nyabuka, pia kum nyanamlulume. Lyena Deiyoknye bira, na uka. Allah arye nyabuk.

Hosea 14:1

Nabi Hosea arye, Israel ninye ati, nyabuk. Se Israel ninyo, anggun malye winimunye ning weik upsuk ning nirya ara, batakmunce, tamubuka Allah Yahweh el damuk, tamubuka yanamlulume. Ara, “Anggun malye winimunye ning dekna ati, wenebuk opnamsile,” nyapsine.

Hosea 7:14

Tonda, sik Israel nang nirya arye, sik kanye pum tam aryuk, dipkoprob na Allah ati pia kum moroninyake. Talye sitang deice aryuk, moron yupu nyaninyake. Dipkoprob nati, sik amsuna deice mapman talak arye morolamniting bukni, nati diba tenena pia kum nang arye, weik tonun engelamak touk unyake. Atonun sikce, sik nong dila sakalakirye, “Se, gandum duk ap, anggur duk ap, arepsilyame!” nyabuka moroninyake. Wininyak bukni, narye, ‘Winipnamlume, aning ara pia kum wininamlume,’ nyapdeiamse yupu ati, yanibikirye, na Allah ati batakaninyake.

Hosea 7:15

Aning ara wininyak bukni, dipkoprob naryuk sik anang nirya ara, naryuk nepdeiamse. Winyamsirye, sik mikip kipdeiamse. Winyamse bukni, sik anang nirya arye nati, ‘Allah ati ara, wininamabe,’ nyabuka, malye yupu nyaninyake. Nyabikirye, na yupu ara, yaninauk unyake.

Maleaki 1:12

Bukni, anggun Israel ninye arye nati malye kipdeipnulume. Ara, na si eren ati, kintiniplumce aning-aning nirya, malye ninguk dobuka delilyangalulumak, ara, ‘Allah Yahweh el si erenak pia mambul kume,’ teneluluma deice arye, malye winiplume. Tonda, anggunce malye tenelulum din ninguk dobuka, nati arelyangamumnya deice arye, ‘Allah el arena ati, keil lelebuka yangeibupe ning babye, mambule kume,’ tenelulumce, malye ululume.

Maleaki 1:13

Anggunce nyamunye yupu ara ani. ‘Se, nunce aning nirya dobuka, arelyangalamububa, lik usulule. Allah Yahweh ati, el si erena ap, el amu tam una ap, el yupu moubuka kekena ap ara, ikin usulula ati ara, nun walwale,’ nyalulume. Tonda, narye anggunti, ‘Wininamlulume, aning ara kum wininamlulume. Malye ning ani, teleb ning ani,’ nyapdeiamsise yupu ati, anggunce, ‘Kume, aning ara, ikin asa aniryuk kekebuka dobolbanyaba anya arye, nun like,’ tenemunce, ayupu nirya batakalulume. Na Allah Yahweh, aning-aning nirya talibuka, im deice yin talin malaikat, sik deiyoknye birye nyapsine. Narye nyapsine, anggun ton teneipdelulume. Anggunce, na arena ati, nong bol malye kam un ning bobuka, arelyanganumunye ning ara, teleb do, malye do? Ara, kam ulul ning ubula dolomunye ning ap, yok kwalilamle ning ap, uk dilamle ning ap bobuka, nati arelyanganululume. Winimunye bukni, anggunce tenemunya ara, ‘Aning ara, Allah Yahweh arye dolosululce, kanye deipnamsile,’ tenelulum do? Na Allah Yahweh arye nyapsine. Anggun malye winilulum ning kilina ati, ato malye kam un ning doproptinirye, anggun malye winimunye ning namin kibuka, lyepropsitinye do? Kume, ara kum winipmanto.

Maleaki 1:9

Aning bobuka, yangamunye ning ara, anggunce na arena deiyok nang, imam-imam nang ati, ‘Wini talak ara nun malye wininyap ning lyena ati, boyanmap ning deice arye, Allah moropsumunba, nun malye wininyap ning kilibuka lyepsilirye, namin kipnamsil,’ nyabuka, weik yupu arye nyaptumba, na Allah ati moropnitinga babye, na Allah arye kekebuka kum lyepropnamsine. Anggunce malye ninguk bobuka, na dam boyanganululumce, arenululuma ati ara, yata deiyok ati kanye deipsitinye do? Kume, anggunce malyeuk ululuma anya arye, kanye kum deipnamsine.

Ulangan 33:26

Nyabukopura, ayupu ton nyabuk. Israel ninye ati kalikuka melilul Allah ara, el atonunye ton, pia kum ulule. El tonoka. Sik yuk yala ninye yuk-yuk Isa Mutuku Dongonye si erenyak ning ara, talye ninguk. Israel yala ninye, sik si erenyak Allah, elda pia teleb, mikip weiknye ulule. Sik ni koproba Allah arye, ‘Israel ninye melipnamne’ tenen, im ap, dua ap, deice arye, yanuka melisulule.

Ulangan 33:29

Ati ara, anggun Israel ninye ara, anggunda pia telebuk unamlume. Allah arye, pia teleb kipdeipnamsile. Allah el si Yahweh arye, anggun Israel ninye ati, lyepdeipsukce, wiamsuk bukni, yuk mutuku unyak ninye ati, aning atonun, sikti, ton kum wipdeiamuk. Allah arye, anggunti melisulule. Yin talin nang arye, ‘Mal arye opsicak’ tenen, ting kiniklamik touk, Allah arye anggunti, moubuka kalikisulule. Ninye arye, pia teleb parang ya bobikirye, kalikilalamak touk, Allah arye anggunti, kalikuka melipsilirye, anggun mal olan nang ati, obuka sirya daknamle. Winilula ati, el melipsilyopura, anggun mal olan nang dam bimunyopura, anang arye, ilil weik upliba, kanulongonamake. Winibikirye, ‘Se, nun ona kume, bico tenepsululume,’ nyabuka moropnamake. Anang nirya obuka, sirya dakmunce, sik nong deice yaniptapnamlume. Tonda, sik Isa Mutuku Dongonye, el si erena ati, mutuku deice delilamak ning nirya ara, daklopmunye deice, yanibuka banamlume.