“Malye wininyak nang weik arye onamak bukni, na Allah arye, Israel ninye yupa ara tujuh ribu nang, ‘Naʼ tenen, nang ati, moubuka deipnamne. Anang ara dipkoprob kum opnamake. Anang ara talye nang kume nyapne. Aninye ara na nyapse yupu kekebuka nimalye arye ukirye, isa si Bahal ati el si kum erenyake. Tonda Bahal el si erena ati, kutam tuku dib dongobuka kum bunyake. Sikce el urasin atonun memepdeibik ning ara, sik ton kum mutulamik. Ati ara, narye sikti, lyepnamne. Sikda Bahal isa si kum erenyak ninye ati nyapne,” Allah arye nyabuk.
Hosea 13:2 - Eipomek2 Sik Efraim yala ninye arye, aning tuba wininyake. Wini talak babye, tuba malye-malyeuk wininyake. Ara, sik Efraim yala ninye arye, sik taruk deice arye, dekna weik ning, el si ara perak dobuka, sik tenebice ning kintinibuka deibikirye, “Nun ni bira ani,” nyabuka, si erebikirye, kam ulul ning obuka, uku dongonyake. Winibuka unyakba, yuk mutuku ninye arye, sik Efraim yala ninye wininyak ning eibikirye, ‘Se, aninye ara, talye ning ati, “Nun ni koprop ani,” nyabuka, si erebikirye, sapi basam urasin atonun ning, puturubuka deibikirye, aning si erena ati, mutunyake. Tonda, sik isa si erenyak ning arena ati, sikce yuk ning obukabikirye, aisa si erena ati, arelbanyake,’ tenenamake. အခန်းကိုကြည့်ပါ။ |
Hosea 13:2
33 ပူးပေါင်းရင်းမြစ်များ
Sikce anang ati nyabik. “Wenena ati tomobuka boyanmalum nang ara, amutuku boyangana kume! Anang bataklulume! Winipmunyopura, nunce Allah Yahweh, el dam akunum malye winipnuyabe. Tonda, nun malye winibupe ning ara, akunum weik kipsuk ati, tabakna meme. ‘Ara ikin ning pia weik dopropnamapʼ tenen ati, nyababe. Anggunce aning winipmaluma deice arye, ikin ning tonap tabakuka nun deice yanmalba dopropmabe,” nyabuka, yupu arebik.
Bukni, el li koproba Raja Manasye bira, malye weik ulamuk bukni, ton talak ara, namin kanye bobuka, amu tam kibukce, ila tamubuka, Allah Yahweh dam yayukce, diksukumuk ulamuk. Manasye bira, aning winyamuk bukni, Amon bira, aning kum winibuk. El kanye amu tam kum kibukce, elda pia malye weik tuba ulamuk. Amon bira, el malye ning weik arye, ton tabakuka winilamuk.
Aning atonun, anggunce Allah el Mi koproba ati, “Nun ni,” nyabuka, el amu tam umunce, el dam yok sirim talibuka, yana kinamlulume. Wininamluma deiyok ara, ‘Allah el si Yahweh arye wenebuka kum opnamsil’ tenen, wininamlulume. Tonda, ‘Mangkau arye Allah el yu nun deice deipsilyak’ tenen, moubuka wininamlulume. ‘Allah el Mi koproba arye, lyepnamsil’ tenen, el dam unyak ninye nirya ara, sik unamak ning nirya ara, telebuk unamle.
Allah Yahweh arye nyabuk. “Yehuda yala ninye arye mikip asa unyaka ati, sik bicoe, nyabuk. Anang ara, ‘Yata wiripnamap do?’ tenen, sik mining kanye aniryuk yupu talanyak ning ara, deiyok ton kum upnamle. Ara, narye, ‘Winipnamlulume,’ kum nyapdeipse buk, sik dem aryuk yupu talibika ati, nyapsine. Sikce tenenyak ning ara, ‘Teleb tenenyake,’ kum tenenune. Aning ara, sik dem aryuk, ‘Mesir mutuku nang arye melipsitinge,’ tenebikce, yupu talilbanyaka ara, na Dib Kanye arye, ‘Winiplulume,’ kum nyapdeibuk bukni, sikcuk yupu talilbiyike. Winibika deice arye, sik malye ning weik tonun, tabakuka winipre banyake. Min arye malye winilamik ning ara, akunum aubuk bukni, wini talak ara, tonap weik tonun tabakuka malye wininyake.”
Dipkoprop, ninye nirya arye, isa si erenyak ninye nirya ara, alye dakdanamake. Ara, talye ning kintinibuka deibikirye, “Nun ni koproba,” nyabuka si erenyak ning nirya kintinibuka delinyak nang ara, talye ninye koprop aniryuk unyake. Ati, “Anggun nirya buluplulume,” nyapmunyeba, bulubicopura, aninye nirya eibikirye, ‘Allah arye opsilyak’ tenen, pia ilil unamle. Yuk nang nirya arye aninye ati, ‘Sikda talye ning atibuk si erelamika ati, sikda talye nang uka,’ nyabuka malye nyabikiba, talye ning si erenyak nang ara, alye weik dakdanamake.
Ton nang ara, kat ning dekna weik ning, emas liamice yokuka yamuplobikirye, tonda, dekna weik ning perak yokukabikirye, ‘Aning el ikin ara, yata barye do?’ tenen, kel bikna ati, kiklilen ning, el si timbangan deice deibuka dilinyake. Winibicopura, adiparyuk, memenanye dam bobicopura, el anye birye, ninye urasin atonun kibuka memepliba, amemelulnye bira, el pil domlya dekna ati, dekna arinyake. Winibikirye, aning ati, ‘Nun ni koproba,’ nyabuka, sik nong kanupdongonuka, isa si erenyake.
Tukwak mutuku noutam yuk-yuk yala nang nirya ara, walwal unyake. Sikda, weik tonun arye kum bikinyake. Talye yo bukni, aning dobuka, ninye urasin atonun puturubuka deibikirye, ‘Nun ni koproba,’ nyabuka, si erenyak ning arye, yupu ton kum nyaptinge. Tonda, aning arye yupu nyaptinga babye, nong kum uptue. Aning arye ninye ati, ‘Aning winipnamlume. Aning ara, pia kum winipnamlume,’ nyabuka, teleb un yupu kum nyapsitinge. Talye nong dem ulula ati nyapne. Aning ara, isin yanuka, kam kum upmanto ning memenyake.
Aning ati ara, anggunda na mapu koproba, sik Israel nang ara, yata ati, asum-asum nirya, mania kanye bopmunce, malye winin ninguk, pia talibuka winilamunya ani, na dam batakuka banululum bukni, ila tamubuka, na dam pia kum yangalulum do? Anggunda, talye ning ati bukni, ‘Aninguk diba tenebuka, pia kalinamapʼ tenen, tilila yupu uk, tuba talinyake. Sikda, na Allah dam, tamubuka kum yanganyake.
Allah arye nyapdeibukba, nabi Hosea birye sekuk yupu ara, ani. Anggun Israel nang nirya ara, minop talak anggur tapu pia weik moulamle atonun ulamlume. Bukni, winibuka telebuk upnin balamik talak ara, sikce, ‘Talye ning si erenamapʼ tenen, isa si erena ap, isa arena ap ati, sikce pala keil dobuka, yangapdeiamikce, mesba-mesba weik tonun kintinip deiamik. Atonun, sik Israel nang telebuk upnin balamik touk, ‘Isa Asyera si erenamapʼ tenen, lak kin ning, el si ‘tugu berhalahʼ, cang weik yo weik tonun tonap ikukabikce, isa si erena ati moulamikce, aisa mer si erelamikce, malye weik ulamik.
Tonda, sik Israel yala nang bukni, Samaria mutuku noutam unyak nang ara, isa si erena ati, mutuku si Bet-Awen mutuku noutam arye, isa si erena ati, sapi basam urasin atonun ning memepdeiamikce, asukumuk aning si erenyake. Aisa mer si erebikirye, ‘Se, nun ni koproba aniʼ tenen, yok sirim talinauk unyake. Aisa nirya ati, sikce ilil upliba, yok sirim taliplirye, yupu weik tonun ngaluka engenyake. Ara, minop talak ara, ‘Nun isa si eren ning, sapi basam urasin atonun memebuka deiamupu ning ara, pia teleb ulamuk bukni, wini talak ara, malye upmasile. Se, yata ati do?’ tenen, weik tonun engenamake. Ara, sik amutuku noutam unyak nang ap, sik malye winin ning talibuka, imam pil donyak nang ap, weik tonun engenamake. Imam nang ara, Allah ati batakuka, isa si eren piluk donyaka ati, sikda sal arye, sik domice kilapu batakuka, talye yolan kilapu dolonyak nang atonun unyake. Engenamaka deiyok ara, ani. Sikce, ‘Se, minop talak ara, nun isa si erena ati memebuka deibupu ning ara, ‘Urasin pia telebe, aning ara mambule,’ tenelamupu bukni, wini talak ara, asapi basam atonun memebuka deibupu ning ara, urasin malyeuk ulule. Aning nirya kum kipdeipnamle ati, bico upliba, engenauk unamake.
‘Yukupniba, na dam yanamake,’ tenyamse bukni, tuba tamubuka tonap, ‘Na dam tamubuka yalulume,’ nyamsiba, sik amul deiceuk kekelamik bukni, nati batakalamnikce, mitik yukakuk binuka ulamik. Na dam tamubuka kum yangalamik. Na mapu koprop Israel ninye ara, ‘Isa Mutuku Dongonye si erenamap’ tenen, isa si ara Bahal dobuka, Bahal isa el si eren aik pum tam, el urasin atonun ning puturubuka memelamikce, Bahal el si ati erelamik. Winilamikce, isa el si Bahal ap, yuk-yuk talye ning ati, ‘Nun ni koproba ani,’ nyabuka, patung atonun kintinibuka delilamikce, aning si erena ati, siltong teleb ning uku dongobuka, aisa si erelamik.
Israel ninye tuba malyeuk ucopura, pera mutuku ninye arye yakirye, Israel ninye aik dobikce, unyak mutuku noutam nirya, yanuka wariknamsiyake. Wariksikirye, parang ya arye opnamsiyake. Wariksikirye, anyasik-anyasik nirya antanabuka, domik keil poka noutam bublan botopdeiamik ning nirya, kat yo ap, besi ning ap arye domik ning nirya, uluplopnamake. Winibikirye, sik Israel ninye ayala-ayala nirya arye, ‘Aminyan talak ara, wininamabe, wininamabe,’ tenelamak ning nirya, kum daneipnamake. Ara, pera mutuku yin talin nang arye, Israel ninye nirya malye kibikirye, sik amu tam deibikcopura, sik nong deice ikin ning deibikirye, sik tenenyak ninguk, pil donamake.
Wini talak ara, nun akunum kel kipmabe. Asyur mutuku yin talin nang arye, nunti kum lyepdopnamsiyake. Tonda, nun kuda basam deice bukuka batipya babye, aning arye kum lyepdatibye. Tonda, minop talak ara, nun taruk arye puturubuka deiamupu ning ati, ‘Nun ni yapu ani,’ nyabuka, talye ning ati, si erelamupu bukni, aminyan dounamle talak ara, aning tuba tonap pia kum wininamabe. Aning ara, akunum batakabe. Ara, talye ati kum nyapmabe. Nun ni Allah ancuk, mutuku-mutuku daunyak ninye nirya ap, kwaknan mapu nirya ap, bico tenesimince, melipsilyame. Ati, nun melipmantonye ton kum ulule, an tonoka.” “Nyabuka moronamlume.” Hosea birye, Israel ninye ati nyabuk.
Israel ninye ara, talye-talye yolamak kilapu atonun unyake. Ara, sik ‘Din ning, el si ara gandum ap, anggur mek ap, zaitun yo duk mek ap, tonda dekna pia weik ning emas ap, perak ap, pia weik arye aresululnye bira, Allah biryuk aresulule,’ pia kum teninyake. Aning moubuka kum tenenyaka deice arye, ateleb ning nirya dobuka, talye Isa Mutuku Dongonye, el si Bahal, el si erebuka kina ati, arelamik. Aisa ara, kam una kum ning bukni, ninye taruk deice arye puturubuka memepdeibikirye, talye ning Bahal ati, ‘Nun ni koproba,’ nyabuka, el siuk erebikirye, na Allah ati bataknikirye, na si pia ton kum ereninyake.
Sal arye min arye domice kilapu batakikirye, yuk talye yoltalamak kilapu neika malamak, sik Efraim yala ninye nirya arye batakaninyake. Sikda malye ninguk wininyakce, ‘Isa Mutuku Dongonye siuk erenamap’ tenen, pia pataliba malye wininyaka ati, batakdongopniba, sikda isa siuk, pia erenamake. Ati sik Israel ninye ara, melina kume. ‘Sikda dauplye’ tenen, unamlulume.
Tonda, yuk malye ning winilamik ning ara ani. Ara, na mapu, sik Israel nang ara, na sik deiyoknye unun bukni, sikce, ‘Allah arye yatanye erepdeipsilyeba, Raja kiplirye, nun talibuka unamsil do?’ tenen, nati kum asipnik bukni, aning kumce, sik ninye deiyoknye, Raja-Raja tikna ati, sik kanye aryuk, ninye wipdeiamikba, Raja-Raja kilamik. Atonun ubuka, sik amu tam, yuk ninye deiyok nang nirya tikna babye, na kel bikina kumce, sikce, ‘Nun bidamnye aryuk, wipdeipnuyabe,’ tenelamikce, adeiyok nang ton wililamik. Tonda, sik dengna weik ning, el si emas ap, perak ap dolamikce, ‘Talye isa si erenamapʼ tenen, patung berhalah memepdeiamikce, isa siuk erelamik. Wininyaka deice arye, dibinyaka ati, winipmanto ara, sik mining nang aryuk, sice buklopnarye malye kibuka, olana atonun unyake.
Se, anggun Samaria mutuku ululum nang arye, ‘Isa siuk erenamapʼ tenen, sapi basam urasin atonun ning memepdeiamlumce, aning ati si eremunya ara, narye, ‘Aning ara, pia na lik,’ tenenune. Tonda, narye anggunti, yu weik deice arye wenepnamsine. Se, atalak arye dipdongobuka, yata talak ton, anggun bidamnye aryuk, malye winin ninguk talibuka wininamlum do? Yata deiyok ati, diksukum winin ninguk talibuka, kum wininamlum do? Anggunda, teleb ubuka diksukum winin ning ati, pia kum winipmanto nanguk ululum do?
Dipkoprob nyapsine. Asapi basam urasin atonun, memebuka deiamlum ning ara, dipkoprob na Allah unye touk, pia kum ulule. Aning ara, kam ulirye, mikip pia kum ulule. Asapi basam urasin atonun patung ara, Israel tam unyak nang kan-kan arye, tonoknye el taruk arye, aning puturupdeibukce, anggun dam boyanuka arepsuke. Atalye ning ara, na Allah atonun, pia kum ulula ati, aning ara, sice buklopnamsine!
Ati dipkoprob nyapsine. Anggun wini talak ululum nang atouk, minop talak babye, anggun ni yapu arye, Allah nyapdeiamuk ning, pia kum kekelamik atouk, anggun Ruben yala nang ap, Kat yala nang ap, anggun babye kum kekelamlume. Adeice arye, malye kiplumce Allah el yupu yaniplumakarye, pia malye weik kiplume. Ati anggun babye, anggun ni yapu malye ulamik atonun anggun babye wininulume. Adeice arye Allah Yahweh, el yu ara mitik tonun aubuk bukni, wini talak ara el yu ara weik tonun tonap upliba, anggun Israel nang deice ikin ning weik tuba-tuba upmasile.
Elia birye nyabukura, Allah arye tamubuka Elia biti nyabuk yupu ton, na yupu kekenmanulum ninye tuba tenepmalum do, kum do? Ayupu ara, ani. ‘Elia ance, “Nabi-nabi nirya oplopmake,” nyabuka engenmalam bukni, na dipkoprop nyapkine. Israel ninye ton yupa weik 7.000 nang, na tenen ati, bulubukapsirye, moubuka deipmanbuk, wini talak tuba kam unmake. Aning ara, isa el si Bahal ati, ‘Nun ni kopropa’ tenen, gutam tuku dipdongobuka, el si kum erenyake. Allah arye nyabuk.’ (1 Raja-Raja 19:18)
Bukni, na kayapo. Anggunce, anggun malye umunye ning nirya ati, batakmunyopura, Allah arye namin kipsilirye, kum wenepnamsile. Bukni, anggun ilil pia kum kanye dobuka, anggun kanye talima kat upliba, anggun malye ning kum batakmunyopura, malye ninguk tuba winimunya deice arye, Allah weika arye tonap tabakuka wenepnamsile. Tuba-tuba malye winimunya deice arye, anggun bidamang arye anggun bidamang ati, malye ulilalulume. Ninye arye sik mambul ning ati, ‘Tonap weik unamsil’ tenen, dokola delilamak touk, anggun malye-malye winiluluma deice arye, anggun bidamang arye, anggun bidamang nong deice ikin ning weik delilanmalume. Allah tenyamuk talak akunum uplyopura, lakak aniryuk ninye nirya ati, lipsisikuka yupu bokeipsilirye, wenepnamsile. Wini talak ara, anggun tuba malye winilulum ninye ati, weik arye wenepnamsile. Anggun malye winin ning batakna kumce, talima kat kibuka, ‘Malye wininupyap tenena kum deice arye, malye umunya ati ara, Allah weik arye wenepnamsile.
Atalak noutam nirya ara, malye wininyak nang ap, tilila yupu tenepce arye, nyalamak nang ap, malye akunum wininyak bukni, weik arye tonap, tabakuka pia malye wininyake. Sikce yuk nang ati, ‘Tilila ning ati diba tenepnamak’ tenen, tilila yupu talye tenepce arye nyanyake. Aning atonun yuk nang arye aninye ati, tilila yupu nyakibuk, aninye diba tenenamake.
‘Ninye deiyoknye, Raja unamle’ tenen, Samuel birye Saul biti, wipdeibuk. Tonda, atalak sik Israel ninye ulamik touk, Samuel birye, zaitun yo duk, mek teleb cang makau arye, libuka deiamika dobukabukce, Saul kisok deice dikeibukce, Saul biti, taruk talibukce, ‘Telebe, akunum teleb kipdeipkine,’ nyabukce, amutuku nang ulamik touk, Saul mutubuk. Samuel winibukce nyabuk. “Allah el si Yahweh arye, Israel ninye, sik ninye deiyoknye kina ati, akunum wipdeiamkuke. Ance Israel ninye ati, sik ninye deiyoknye, Raja kipmince, talipnamlyame. Aning ati ara, aminyak mek an kisok deice dikeipmakina ara, Allah arye bikilina ati, narye an kisok deice dikeipmakine,” nyabuk.
ကြော်ငြာတွေ