Hosea 12:6 - Eipomek6 Allah arye, Yakub biti nyabuk yupu ara, ani. “Nara Allah, na si koproba ara, Yahweh unune. Nara, aning nirya talibuka, deice tam erebuka, Pia Mikip Weiknye unune. Nara, im deice unyak yin talin malaikat nirya ara, sik deiyoknye unune. Na si koproba ara, Allah Yahweh unune. အခန်းကိုကြည့်ပါ။ |
Hosea 12:6
39 ပူးပေါင်းရင်းမြစ်များ
Ara, nun ikin unyaba ati, ance nunti dipdebuka melipsilyame na nio. Nun nirya arye, ‘'Nun ni Allah, elcuk melinamsil’ tenen, an atibuk patapsilyeba, anti morokinyabe. Winipmanto ara, bona talin nang, sik amu tam talye pil donyak nang arye, ‘Na deiyoknye birye, yata yupu nyapnamasil do?’ tenen, el dam dinauk unyak touk, nunce an dam dina ap, kekena ap unyabe. Diba winipmanto ara, talye pil dolamlye kil arye, el deiyok kil dam yanuka, ‘Yata yupu nyapnunil do?’ tenen, ebuka dina ap, kekena ap, ulye touk, nun babye, an dam yanuka kekenauk unamabe. Aning ati ara, nun urasin erebibirye, ‘'Nun ni Allah, el si Yahweh ara, dan sukum ulul do? Dan talak yalirye, teleb yupu nyapsilirye, melibuka lyepnamsil do?’ tenebuka unyabe. Tonda, anti dipdebuka kekenauk unyabe na nio. Ara, nunda malye wininyak nang unyap bukni, Allah arye aning namin kipsilirye, el kanye aryuk bico tenepsilirye, teleb kibuka melinamsil talak ara, min kum yanmalye talak nirya ara, nunce el dam yanuka, dinauk unamabe.
Ati ara, malye wininyak ninye nirya, sikce pil dopra bakce talak arye, ‘Aning winipnamabe,’ tenelamik touk, nong akunum uplyopura, anggun diba tenelulum ninye arye, ‘Se, yata deiyok ati, sik tenenyak ning, nong upliba dolonyak do?’ tenen, malye kanye bobuka, kum unamlulume. Sik malye nang arye, ‘Malye winin ninguk talibuka unamabe,’ tenebikirye, yupu sisikinyak ning, akunum winibikcopura, anggun diba tenelulum ninye arye, ‘Se,’ tenen, malye kanye kum bonamlume. Aning kum wininamlum bukni, anggunce tuba diba tenemunce, ‘Allah ara, dan talak yanuka melipnamsil do?’ tenen, kanye talima lamapdongobuka arye, amu tamuk umunce, kintinibuka dinauk unamlume. Ulamunya ani, dipkoprob Allah el tenebuk sum, akunum uplyopura, el tenebuk touk, nong upnamle. Anggun diba tenelulum ninye arye, ‘Allah arye minopce melipsutuba, telebuk uptibye,’ tenena kume. ‘Allah el tenebuk talakuk, teleb kipdeipnamsile’ tenen, teleb kanye bobuka, unamlume.
Nyabukopura, ayupu tonap nyabuk. Musa, anda Israel nang dam biminyopura, nyapnamlyame. “Nun ni Allah, el si ara Yahweh arye, na dopreipnukba, anggun dam yane. Nun apu yapu nang, Abraham ap, Isak ap, Yakub ap, kalikuka meliamukba, el si erelamik Allah ara, na dam yayukce nyapnuke. ‘Israel ninye dam bilyame,’ nyapdeipnuk.” Allah arye nyabukopura, ayupu ton nyabuk. “Kume, na si Yahweh nyapmakina ara, na siuka. Nati ara, asi uk tenebuka nyanamnululume, yuk si ton kume. Ati, dadeipdanin banamlum talak nirya ara, asi uk tenebuka erepnin banamniake.” Allah arye, Musa biti nyabuk.
Narye anggunti, “Aning ara malye winipmalame,” nyabuka, wenepsise ning ara, kum kekenululume. Narye, anggunti, “Aning ara, malye umunye ning ara batakso,” nyabuka wenelamse ning, akunum kekepnutum toura, narye anggunti bico tenebuka, pia weik kel kiamsa deice arye, na kanye talima pum tam tenenun ning nirya laka nyapsitinyeba, akunum bikamtume. Bukni, na nyasinye yupu nirya ara, pia kum kekenululume.
Dipkoprop winin ning ap, diksukum ubuka ninye yupu lipsisikuka bokolina ap ara, teleb kibuka ubibyopura, Allah Yahweh kanye delisulule. Awinina ati ara, pia weik arye kanye delisulule. Bukni, ninye arye, ‘Nun malye unyap ning namin kipnamsil’ tenen, kam ning obuka uku danyaka deice arye, mitik tonun aryuk kanye delisulule. Allah arye, ‘Aning ara pia weik mambule,’ tenesulula ara, diksukum unauka.
Nyabukce, ayupu ton dukdongobuka nyabuk. “Anggun malye winimunye ning ati, kanye imun weik ning yanamsil bukni, na Allah Yahweh arye anggunti, tuba tenesununa ara, ‘Aninye ara bicoe, na kanye aniryuk melibuka lyepsitinye,’ tuba tenesunune. Na Allah arye tenelamsinya ani, ‘Atalak winipnamne,’ tenyamse talak akunum kiplyopura, bico tenepsinirye, melibuka lyepnamsine. Winipnamsitinya ara, talye ati kume. Deiyok ara, Na Allah Yahweh, pia diksukumuk ununye birye nyapsine. Ati, yata ninye do nirya, ‘Allah el dem arye melibuka lyepnamsil’ tenen, diba tenebuka dinauk unyak ninye ara, narye teleb kipdeipnamsine. Winipsinyopura, telebuk unamlume.” Allah arye nyapdeibukba, nabi Yesaya birye sekeipsuke.
Na Allah arye nyapsine. Se anggun Israel ninye ara, ‘Naʼ tenen, ninye tenesenun bukni, anggunda na yupu bisibuka malye weik winipmunce, nati yaninululume. Bukni, wini talak ara tamubuka na dam anyuk yanululume, nyapsine. Narye anggun Israel ninye ati pia bico tenesununa ati, ‘Na dam tamubuka yanululume,’ nyapsine.
Bukni, yatanye do, yata kil do, ninye nirya sik ni koproba Allah Yahweh atibuk, ‘Allah aniryuk melinamsil’ tenen, el uk talibuka unyak ninye ara, diba tenebicopura, narye arepneba, sikda winiryuk mikip dopropnamake. Winiryuk mikip doprobice ninye ara bip maka pol mikip deice arye lakuka erebuka balamle touk, kanam asa aniryuk unamake. Sikda mikip kum daliba, bikbik abuka banamake. Sikce bisik banyak talak ara, sik mikip kum upliba, kisok kum birbir apnamle. Mikip aryuk, talye lukparabuka banamake. Ati ilil una meme. Na Allah Yahweh ati, diba tenenamnulume. Allah arye Israel ninye nirya ati nyabuk.
Na Allah arye anggun Israel ninye ati nyapsine. Anggunce nati, ‘Elce melipnamsil’ tenen, din dina kumce si tebuka umunce, teleb winipmunyopura, aning ara, mitik teleb bukni, dipkoprob pia teleb unamlum tenepse ning ara atia. Mikip nang arye yuk talye nang ati, deiyok kum wamlibuk, yu ubikirye tapu koubuka delinyak ninye ara, ‘Anang ati bico tenepmunce anang loltakanamlum’ tenen nyapsise. Tonda aninye ara deiyok kum wamliba, rantai tapu arye tapu koubuka, wenena aik dongonyak ninye ati, ‘Anang ati bico tenepmunce, loltakanamlum’ tenen, nyapsise. Tonda mutuku-mutuku nirya talibuka unyak weik deiyok nang arye, sik amu tam nang nong deice ikin ning delinyak ning ara, kum danaipmunce, aninye ati lobuka melipnamlulume. Winipmunyopura, na Allah arye anggunti kanye delinamsine. Talye kanye deibuka, din dina kumce si tebuka una ara kume.
Yakub birye deibukba, dadeipdanin balamika ani, deibik ninye nirya ara, Allah el si Yahweh arye, ‘Sik malye wininyak ning ara na like’ tenen, balye tamubuka, akunum batakmasile. Bukni, ‘Nun ni Allah Yahweh, dan talak tamubuka melipnamsil do?’ tenen, diba tenebuka, dinauk unamne. Nara, ‘Allah elcuk melipsutu’ tenen, Allah atibuk, diba tenebuka, el dam anyuk banamne. ‘Yuk ning arye, ton melipnutue,’ tenebuka, kum unamne,” nabi Yesaya birye, nyabuk.
Se, Raja Yoyakimo kekeplyame! Raja an unak, teleb kibuka dona ati, Libanon mutuku yo weik boyanamuburye, teleb weik aik doplum bukni, adeice arye ance, ‘E, nara Raja telebnye ununa,’ teneplum do? Kume, an aik teleb yo aupmatua babye, adeice arye, teleb kum kipdeiptume. Kume, anda bita tenipdelyame! An ni koproba Yosia babye, teleb din ning ap, mek ap, dilamuk bukni, el ning ara, yuk nang ati, teleb kilamukce, diksukumuk winilamuk. Tonda, Allah arye, ‘Aning ara, wininamlume. Aning ara, pia kum wininamlume,’ nyapdeibuk touk, aninguk talibuka winilamuk. Winilamuka ati, elda telebuk ulamuk. Bukni anda pia malye Raja tiklume.
Ati ara, na Allah Yahweh, aning nirya talibuka, deice tam Pia Mikip Weik Erena Deiyoknye uninye birye, ‘Winipnamne,’ tenepnye touk, wininuna anya arye, narye nyapsine. Se, anggun Israel yala ninye nirya ati, narye yupu bokdeipsinirye, wenepnamsine. Narye dipdesinirye, anggun malye winilamunye ning aupmasilye touk, wenepnamsine. Diksukumuk winilamunye ning aupmasilye touk, teleb kipdeipnamsine. Yatanye do, yata kil do nirya, anggun winilamunye touk, yupu bokeipnamsine. Anggunda, ‘Se nun malye wininyap ning deice arye wenepsilirye, opsilyak’ tenen, anggun malye winilulum ning nirya ara, batakmunce, aminyan tamubuka, yuk teleb bisikuk binamlulume. Winipmanto ning ara, keil yan dum duklirye, opsilyopura, kote saklamak atonun, anggun malye winilulum ning dekna ati, ‘Wenepsinirye, opsinyak’ tenen, nyapsine.
Winipmanto ara, ninye arye, teleb yala koubikiba, daulamlya ani, aminyan talak, pia teleb ning paplirye, nong teleb yongobuka lilamak touk, na Allah arye, anggun Israel yala nang ati nyapsine. Se, anggun Israel nango! Anggun wa wibuka kouna atonun, winiryuk diksukum un ninguk, upnin banamlume. Tonda, yala delina atonun, anggunce na ap, yuk nang ap ati, batakna pia kumce, pia bico tenepmunce, melinauk wininamlume. Na deice anggun kanye talima deipnamnulume! Tonda, ninye arye, wa tuku wena kumce, talye batakikirye, dauamlya ani, oketing tamun arye, uku seknarye wa wibuka koulamak touk, anggunce teleb winin ning kum winilamlum ning ara, tuba teleb winin ning winipnin banamlume. Aning nirya ara, talye ati kum nyapsine. Deiyok ara, anggunce, ‘Nun ni Allah arye, teleb kipdeipnamsilʼ tenen, na dam tamubuka yanululume. Winipmunce, nati kanye deipnumunce, diksukum winin ninguk winimunyopura, na Allah arye anggunti, teleb kipdeipnamsine. Ara, weik mok ceplirye, tukwak sakliba, aning-aning teleb kibuka palamle touk, narye anggunti, teleb kipdeipsinyopura, anggunda telebuk unamlume. Ati, anggunce nati enamnulum talak ara, akunum dam uple.
Allah el si Yahweh arye, nabi Hosea biti laka nyabukba, Hosea birye sekuk. Se, anggun Israel ninye ara, Allah Yahweh arye nyalisilye ninguk, moubuka kekepnululume. Nun amutuku ninye malye wininyap ning ara, Allah elcuk kel bikisilirye, nyasulule. Allah arye nyapdeibuk yupu ara, nun ton moubuka kum kekenyaba ati ara, kum dobolbanyaba ati, Allah el winilye ning kum bikinyabe. Tuba walwal ninyeuk unyabe. Tonda, nunce yuk nang ap, teleb kibuka neika kum unyabe. Bico kum tenelamyap deice arye, amutuku unyap ninye ara, nun min arye domupu kilapu ara, deiyok kum uamuk bukni, nun talye kanye bobuka, akilapu batakibirye, yuk kilapu dolonyabe. Tonda, Allah ap, el winilul ning ap ati, moubuka kum bikinyabe.
Allah Yahweh arye, “Yehuda tam unyak ninye, weik arye wenepnamne,” nyabuk bukni, ayupu nyabuk talak ara, nyabuk. “Anggun malye winilulum ning nirya, batakmumce, anggun kanye talima nirya, na deiceuk deipmunce, ‘Se nunda malye winilamupu ninye’ tenen, din dina kum arye, si tebuka umunce, nati ngalukuka engepnumunce, moropnumunyopura, kekepsinirye, lyepropnamsine,” nyabuk. Nyabukce ayupu ton nyabuk.
“Anggunce, ‘Se, nun malye wininyap ning dekna ati, nun ni Allah arye wenepnamsil do?’ tenen, anggun baju bol deice ning, kwiribuka batakalulum ning ara, bataknamlulume. Talye bol deice ning kum bukni, anggun talima pum tam, malye tenemunye ning nirya batakmumce, ikin kanye bobuka, engepmunce, tamubuka anggun ni koproba Allah Yahweh, na dam anyuk yalulume. Ara, ‘Allah elce nun malye winibibye ning ati, adiparyuk kum opnamsil’ tenen, yanululume. Ara, urdem ati kum nyapsine. Nara, ninye malye wininyak ning ati, adiparyuk minopce wenepnirye, kum onune. Dipkoprop anggun malye winina dekna ati, adiparyuk wenebuka oplopsitinye bukni, ‘Sikce tamubuka, na dam yanamak do, kum do?’ tenen, disunune. Nara ninye ati kanye talima areniliba, bico tenen, nimalyap arye, anggunti disinirye, kalikuka tuba-tuba melisunune. Winisununa ati, anggun malye ululum ning batakmunyopura, ‘Narye aninye ati wenebuka opnamsine,’ tenepse ning ara, tuba ton batakname.” Allah arye nyabuk. Ayupu nyabukba, nabi Yoel arye nyabuk.
Aning nirya ara, talye kum nyapsine. Mutuku-mutuku nirya ap, kumanya nirya ap ara, Allah elcuk kwepdeibuke. Tonda, na Allah Yahweh arye, ‘Winipnamne,’ teninun ning nirya ara, talye tukwak ninye ati, laka nyalisunune. Tonda keting noutam babye, lukunyan babye, na Allah aryuk kintinibuka delinune. Winibuka unirye, tukwak mutuku noutamak, weik mutuku deice yanipdongobuka, banune. Na si ara, Allah Yahweh unune. Nara, im deice yin talin ninye nirya talibuka unune. Nara aning-aning nirya talibuka deice tam Pia Mikip Weiknye unune. Allah arye, sik Israel ninye ati nyabuk.
Bukni, pia teleb ning ara, diksukum teleb ubuka winin ninguk talibuka unamlume. Na patapnil ning ara, weik mek mikip arye balamle atonun, teleb winin ninguk, diksukumuk winimumnyeura, kanye delinamsine. Tonda, mek lilun talyeuk balamle atonun, anggunce tilila yupu nyana kumce, ‘Malye winipmalinye bira, malye winipmale,’ nyabuka, yupu bokolinamlulume. Teleb wininmalinye biti ara, ‘Teleb wininmale,’ nyabuka, yupu lipsisikuka bokolinmalulume. Winipmunya deice arye, telebuk ubuka, pil donamlume. Aning ara, batakana kum bukni, mek lia bukuka balamle atonun unamlulume. Winipmunyopura, narye anggunti, kanye delinamsine. Na Allah arye nyapsine.
Kume, aning-aning nirya, akunum winiptibya babye, adeice arye, pia kum lyepnamsile. Bukni, nun ni Allah Yahweh arye, nun tukwak mutuku unyap ninye nirya ati tenesilya ara, ‘Na kanye delina ati ara, wininamake,’ tenesulule. Utenesilya ati, el minop talak akunum laka nyapdeiamsuk ara, ani. Yata ninye do nirya, pia diksukum teleb kibuka unyakce, yuk ninye nirya ati, bico tenelakirye, kanye talima, amu tam nimalyap asa kanye deibuka, telebuk unamake. Wininyakce, Allah el amu tamuk unyakce, kanye talima erena kumce, Allah ap, kanye talima dukdongobuka, neika ubicopura, Allah arye aninye ati, kanye delinamle. Aning ara, ‘Wininamake,’ tenesulule.
Sik malye-malye wininyak ninye nirya ara, wininamak bukni, na nabi Mika binyuk ara, aning kum wininamne. Nun ni koproba Allah Yahweh, el tibuk, dib tenenuna ati, ‘Elcuk melibuka lyelonamnile’ tenen, el tibuk dib tenebuka kintinip deibuka dinamne. Winipnirye, Allahuk pia moronamne. Moropnyopura, kekeplirye, lyelonamnile.
Lengdar deice arye eiplum ning ara, ‘Dan talak arye winipnamle do?’ tenen, kalikmince dinamlame. Anggunce, ‘Min winina kumce, yata ati sik upmal do?’ tenen, kum unamlyame. Narye, ‘Aminyan doyanamle talak ara, winipnamle,’ nyapkise ning ara, tilila kum nyapmakine. Narye, ‘Atalak winipnamle,’ tenelamse touk, akunum uplyopura, dipkoprob nong lak upnamlarya. Sik kum upnamle ati, moubuka dinmamunce, kalikuka dinamlume.
Ati ara, anggun amutuku ululum nang ara, narye anggun dam, yanuka nyapnamsin sum ati, moubuka dinamlulume! Deiyok ara, narye anggun malye weik winilulum ning ati, tukwak arye laka nyananye unamsina ati, anggunce, ‘Se, Allah ara, dan talak arye, nun malye wininyap ning ati, yanuka laka nyaplirye, wenepnamsil do?’ tenen, moubuka dinauk unamlume. Aning ara, talye ati kum nyapsine. Deiyok ara, ani. Ara, narye tukwak nang mutuku sirya, im sirya nirya ukirye, ninye ayala-yala nirya ara, sik malye winin ning ati, yu weik arye wenepnamsine. Winapnamne ati, ninye deiyok kibuka, talinyak mutuku nirya ap, weik nang ap, narye akunum bulupdeipsinyopura, anggunti wenepnamsine. Tonda, anggun malye winin ning ati, na yu teninun ning ara, weik uku buk dilamle atonun unulula ati, aning nirya ara, anggun deice deipnyopura, tukwak mutuku im sirya, mutuku sirya nirya, unyak nang ara, uku arye dibuka, sirya daklamle touk, winipsilirye, obuka, sice buklopnamsina atia.
Ati ara, ance sik Israel yala nang ati, nyapnalyame. Nara, im deice unyak yin talen malaikat, sik deiyoknye unirye, anggunti nyapsine. Anggunda, malye weik winilulum bukni, wini talak ara, narye anggunti nyapsine. Ara, anggun adiparyuk tamubuka, im deice unyak yin talen malaikat, sik weik deiyoknye, na Allah dam yanamlume. Winipmunyopura, na babye, im deice unyak yin talen malaikat, sik deiyoknye unirye, na babye, sik dam tamubuka binirye unamne.
Na Allah Yahweh ara, im deice yin talen malaikat nirya sik talepsirye, sik deiyoknye unune. Minop talak ara, narye ayupu akunum nyapdeiamsise. Ara, “Anggun nirya arye, anggun tam nang nirya ati, dipkoprob diksukum kibuka yupu bokdeipdanamlume. Tonda, anggunce anggun kayapu nang ap, anggun tam unyak nang ap ati, pia namin arye bico tenelamunce, kanye delilanamlulume. Adiparyuk yu ubuka wenelana kume,” nyapdeiamsise.
Tuba tonap telebuk kipdeipnamsina ati ara, wini talak arye dipdongobuka, dounamle talak ara, ‘Anggunce aning ara, wininamlume. Aning ara, pia kum wininamlume,’ nyapdeipsin yupu ani. Ara, anggunce anggun kwitcapu ati, dipkoprob diksukum yupu dem nyalanamlume. Winipmunce, anggunce ninye yupu, bokolin talak ara, anggun weik asik wekna ati, bisik bublan dam bulubuka, wekenamlum talak nirya ara, diksukum yupu dem, nyalanamlume. Aning ara, akunuma,’ nyabuka, yupu sirya nyapnalum ning ara, pia dipkoprob ninguk nyalanamlume. Tonda, ‘Nun ap, nun kayapu nang ap, tonok kanye tenebuka, dukdongobuka, teleb kibuka, neika unamapʼ tenyamupu nyapmunce, ninye yupu bokolinamlume. Talya yupu walana, pia meme.
Nyabikura, Peterus arye tamubuka nyabuk. “Anggun nirya ara, anggun malye winilulum ning ap, kanye malye tenelulum ning ap, ‘Allah arye namin kipsilirye, kum daneipnamsil’ tenen, anggun malye ning nirya batakmunyak arye, donga tamubuka, Allah el tam kipropmunyeura, nunda Yesus el si deice aryuk mek dongopnamsiape. Winibibyeura, Allah arye nun bico ati, talye arisulul Dib Kanye ara, arepsilyeura, dopropnalume.
Ara, minopce Damsyik mutuku ulamik ninye ap, anyapce Yerusalem mutuku ulamik ninye ap, Yudea tam nang ap, tonda Yahudi Yala kum ninye ap ati, ayupu peterelamse. “Anggun nirya anggun malye ululum ning batakuka, anggun kanye yuk punupmunce, balye tamubuka, Allah el tamuk kipdopnamlulume. Anggun kanye tenena winiryuk ning punupmaluma atonun, yuk talak babye, anggun winin ning nirya pia funguk unamlume. Ara, yata nang do, nirya eipsikirye, ‘Sik malye ulamik ning nirya akunum batakika ati, wini talak nirya ara, diksukumuk unmak ani,’ tenepsikirye, kel kipnamsinyak ati, ayupu nyapne.” Ayupu nyapsirye peterelamse.
Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake.
Aninguk tenebuka wininamluluma deiyok ara, ani. Ara, yata nang do nirya, yuk nang arye sikti, malye ubiceura, bico tenebuka luba kina kum arye, malye ubuka wenebmace nang ara, Allah arye anang sik malye winin ning ati, talye luba kinamle do? Kume, Allah arye awenebice nang ati, sikce yuk nang ati wenena yupu nyalamak touk, bico tenebuka luba kina kum arye, tamubuka weik arye wenebuka opnamle. Bukni, yuk nang arye, sik malye upsikiba, bico tenebuka lubkinyak nang ati ara, Allah el babye anang ati, bico tenebuka, lupakilongonamle anya arye, weik arye kum wenepnamle.
ကြော်ငြာတွေ