“Aning atonun, anda Amazia, anti nyapkine. Anda dipkoprob Edom mutuku ulamik yin talen nang nirya, akunum oplumce, amutuku nirya ati, obuka malye kiamlume. Awinyamluma anya arye, an kanye erena deice arye, maknya kintinibuka kwalinmalame. Ara, ance aning winipmalama deice arye, ‘Akunum winipmana,’ tenepmalamce, ayupu nyapmanilam do? Bukni, teleb ning ara, an yupu kum asa, an aik damuk unamlyame. Yata deiyok ati, ikin ning ton ap, an bidamnye ap, tonda ance taliplumba unyak ninye ap, anggun dam ara, kanye imun weik ning yatuba, dodopmunce, ikin weik unamlum do? Yuk mutuku ninye ati, malye yupu tuba nyapmemnya deice arye, ikin ning ton, anggun nong deice kum yanamle do? Moubuka teniplyame,” nyabuka, Yoas birye nyapdeibuk.
Habakuk 2:5 - Eipomek5 Sik kwalin kanye bobikirye, malye winin ninguk, wininyak ninye ara, ‘E, akunuma’ tenen, talye kanye bobuka unyake. Bona utotoa weik talin ninye, sik bona weik ap, yo bok weik ap, auplyopura, aning arye, sik nong babye, malye kililule. Aning atonun unyak ninye ara, pia kum wininamake. Winipmanto ara, ninye tukwak ninye nirya dibinyake. Diplamak bukni, dipna deiyok ning ara, ‘E, akunuma. Yuk nang ton. kum dipnamake,’ nyabuka, pia kum batakalongolule. Aning atouk, ninye dibicopura, ninye nong weilbalamakak ara, lo kum upnin balule. Yuk nang ton dibicopura, tuba weilbanauk unamake. Din dibikcopura, bulamle atonun, pia kum unamle. Sik Kasdim mutuku ninye ara, malye weik unyak ninye anya arye, winibica deice arye, ninye yuk yala ninye, mutuku-mutuku nirya ati, opna arye, ‘Nun amu tam unamak’ tenen, bulubuka delinyake. Obuka sirya dakikirye, batakanyak ninye ara, weik tonun tomobuka, tapu koubikirye, sik dam bobicopura, ikin ning sik nong deice deibikirye, ikin pil arukunyake. Allah arye, nabi Habakuk biti nyabuk. အခန်းကိုကြည့်ပါ။ |
Habakuk 2:5
33 ပူးပေါင်းရင်းမြစ်များ
Ton deiyok ara ani. Allah Yahweh, anda dipkoprob aning-aning nirya talibuka umince, pia deice tam, mikip weik deiyoknye ulyam bukni, ance nun tukwak mutuku noutam, ikin weik unyap nang ati, bico tenepsimince, tuba bikisilyame. Bukni, sik talima erepdakirye, maknya kintininyak nang nirya ara, yukak aryuk elilyame. Anang dam yanuka, sikti, kum melilyame.
Yu mek dinyak nang ara, kanye wangabikiba, malye weik unyaka ati ara, ayu mek el si ara bir ap, anggur ap, ton yuk yala ning nirya ap ara, weika arye dina meme. Yu mek weika arye dibikiba, sik kanye wangabica deice arye, pia weik yupu ding nyanyakce, malye ninguk talibuka unyake. Yu mek dibikiba, kwisi yung teleb ning nirya wangalamak nang ara, sik teleb kanye ton, pia kum bopmakirye, yuk nang ati yep-yep anyake. Tonda, yuk nang ati, olana uk unyake. Ati ara, ‘Yu mek dipnuyap,’ tenebikirye, malye bisikuk balamice nang ara, kel bikna ning talibuka kum unyake. Sikda, pia walwal nanguk unyake.
Tukwak mutuku noutamak, ninye dibinyak ninye nirya, wekelbanyak sukum ara, lo tuba aulule. Ninye kum nukmanto dibikirye, dibinyak ninye wekelbanyakak wekica babye, amutuku ara kum langdiptue. Tonda, ninye dipna deiyok ning pia aupnamle. Ninye weik dibinamaka babye, aminyan talak ninye tonap tabakuka dipnamake. Aning atonun, ninye tukwak ninye arye, ‘Se, aning doproptibirye winiptibye’ tenen, patapliba, talima uk dilamle ning ara, pia unamle. Ninye patana deiyok ning ara, ‘Akunuma asukumuk deipne,’ kum tenepmanto. Patalul ning ara, pia aunamle.
Yata nang do nirya, ‘Yo bok ton pia weik tonun doproptinyeʼ tenen, sik asing labukabikirye, epra banyak nang ara, sik yo bok weik tonun doprobikca babye, sikce, ‘E, akunuma,’ tenen, sik kanye kum delinyake. Tonda, aning atonun, bona talina atibuk motona talin nang atonun ubuka elulnye bira, Aning ara pia weik tonun taliptinyeʼ tenen, elula deice arye talilye ning ara, weik auptua babye, kanye pia kum lonamle. Aning nirya ara, talye nong kum unamle. Winipmanto ara, kumanya mikip arye peiyang-peiyang apliba, tonoknye birye, ‘Aning talipnunʼ tenen, bikbik abuka dobolbitua babye, kumanya ara kum talipmanto ati, atenen ning ap, mikip arye pil dolye ning ara, nong pia kum upnamle! Aning nirya ara, talye ning diamuka.
Min talak ara, sik amalye ninye deiyok nang arye, pia yu upnukba, yuk mutuku nang nirya ati, tuba-tuba sik deice ikin ning deibuka olamik. Tonda, aninye deiyok nang arye, mutuku sirya, im sirya nirya ulamik nang nirya ati, ‘Anang ara, nun amu tam deipnamabeʼ tenen, yu ubukba, batakna kumce, anang ati pia tuba-tuba onauk ulamik.
Se, na nabi Yesaya birye nyapsine. Na ap, nun Yehuda tam noutam unyap nang nirya ap, nun kele. Yuk-yuk mutuku nang nirya arye, “Kume, sik Moab noutam unyak nang arye kwalinyake. Tonda, sikce kanye weik arye, eren nang ukirye, yuk mutuku nang nirya ati, malye yupu nyabuka, talye yupu nalinyake. Tonda, sik Moab nang arye, sikti, ara, ‘Nunda dipkoprop, pia teleb nang unyabe. Nunce aning-aning nirya ara, pil teleb kibuka donyabe,’ nyabuka, kanye deibikirye, kwalibikirye erepdakirye, tilila yupu nyanyake. Bukni nun kele, anyanyak yupu nirya ara, talye ninguk ulule. Nyalamikba, akunum kekebuka, biklamupu bukni, sikce talye tilila yupu uk, nyanyake.
Allah arye, aning nirya winipnamla deice arye, sik kwalibuka kiminyak nang ap, tonda kanye erena deice arye, kwalinyak nang ap ara, amu tam kipdeipnamle. Kanye eren nang nirya, wibuka amu tam kipdeiplyopura, atalak ara, ninye mutuku sirya, im sirya nirya arye, yuk nang ati, si kum erenamak bukni, sik nirya arye, Allah el tibuk, “Se, mambul kibuka, pia teleb ululnye bira, el uka,’’ nyabuka, Allah el siuk erenamake.
Na lengdar mapmasirye dinmase ak, weik kwalya kwalibuka dipnamika ati, kintinipmikak eipse. Ninye asik nang ton yukupmekak, sik aik yan bukuka dinmeka ati, buna teleb amsuna deice kintinibuka deipmek. Akintinibuka deipmeka ara, yukupmek ninye asik nang yukupmek nang ara, anyaik wekuka bukmekce, din ning ap, mek ap dinmek. Ayanuka bukuka dinmek nang ara, kum kel bikmek ning bukni, talye karin arye, “Aninguk winipnululume,” nyabukak kekebik. Ara, “Sik Yin talin nang deiyok kibuka ulamik nang nirya ara, ninye olana ati aning, ‘Mal opsilyak tenen, nong leilin ning, el si perisai bopmunce, aning deice minyak mek likuka deipmunce, aning adiparyuk kintinipnulume,” nyabukak, kekepse.
Ati ara, narye dibina deiyok ning ara, din ap, mek ap patana deice arye, tonda, ninye olana deice arye, ninye weik tonun akunum dibicopura, dibin nang sik kanye balamakakuk, binuka unamake. Asukum ara, tuku palilamakak ap, sik dibice nang kanye binamakak ara, lipdanmanto kum mutuku. Ninye dibikcopura, ninye yupa nukmanto kumce, yupa pia weik banamake. Ara, Yerusalem mutuku talibuka, ulamluma deiyok nang nirya ap, anggun mapu ap, anggunce taliplumba, anggun amu tam unyak nang ap, ninye mal olan nang ap, kanye wangalamak mek weik dinyak nang ap, kwalina kwalibuka kanye deibikirye, talye luparabuka dikirye, malye-malye unyak nang ap, narye anggun nirya ati, oplopsinyeba, dipmunyeura, tuku luknamsiake. Tuku luksiceura, akunum diamik nang biyik tamuk, anggun babye amutuku binuka unamlume.
Anggun malye ululum nang ara, Allah arye wenepnamsila ati, anggunda bico. Ara, anggunce, anggun aik akunum doplum bukni, yuk talye kankan nang arye domik ning ara, anggunce dekna ap, alubuka dolona ap arye, doproplumce, anggun ninguk weika arye, tabakuka delilulume. Atonun, anggun wa tuku akunum aubuk bukni, yuk nang arye wilamak wa tuku ton, alubuka doproplum nang ara, malye winilulume. Angguncuk, sik yuk nang talilamik ning ap, ulamik mutuku ap nirya ara, akunum doproplumba, anang yukak bendobikura, angguncuk amutuku talibuka, anggun yuk aunmamlume. Winilulum ning ara, malye weik winiplume. Allah arye nyabuk.
Ati ara, narye outam unyak nang, yuk-yuk nirya ati, “Yehuda mutuku nang olyalulume,” nyabuka, yukupnamne. Tonda, na pil dopnamnilanye bira, Babel mutuku nang, sik ninye deiyoknye, Raja Nebukadnesar biti yukupnamne. Yukupnyeba, sik nirya neika yanamake. Narye lo arepnamna deice arye, olyakirye, Yehuda mutuku unyak nang nirya ap, Yerusalem weik asik noutam ululum Israel nang ap, sik ulumik dana-dana mutuku bukni, anggun dam unyak yuk-yuk yala nang nirya ap ara, yanuka, obuka sirya daknamsiake. Narye anggun nirya ati, lakakip deipsinyeba, anggun mal olan nang arye yanuka opsikirye, sice buklopnamsiake. Winibikceba, yuk nang nirya arye aning eipnamake. Eibikirye, ‘Se, yu nang arye anang obuka sice buklopmaka ara, ilil upsile,’ tenebikirye, yok kum-kum dakanamle. Atalak arye dipdongobuka, doyanamle talak nirya ara, yuk nang nirya arye, anggunti, akutubuka nalisikceba, anggun opnamsiak nang nirya ara, alye weik dakanamlume. Aning ara, pia kume kum danamsile. Na Allah Yahweh arye aning akunum nyapmasina ati, aning nirya ara, dipkoprob nong upnamle!
Aning ara, yata yin talin nang arye do nirya, Babel mutuku nang, sik ona ati, mal don nang kintinipmunce, Babel mutuku nang ati, mal pibinamlume. Sik ona ati, nyapnamlume. “Babel mutuku nang tonoknye ton, pia kum bai sakuka binamlume. ‘Winibikcakʼ tenen, adiparyuk, Babel mutuku nirya antanap dongopmunce, wariknamlume. Ara, sik Babel mutuku nang nirya arye, mandipna kanye bobuka, maknya kintinilamikce, na Allah ati, ‘El nyalul yupu ara, pia kum kekenamabe. El ti yaniltaknauk wininamabe,’ nyabuka, malye kilininyake. Babel mutuku nang arye, malye-malye weik winilamik touk, narye ikin ning boyanuka, anggun dam wenepnamsine. Ayupu ara, Israel nang, sikce si ereninyaknye, anggun ni koproba Allah Yahweh unune. Nara, malye un ning, pia kum upmanilba, pia teleb, lek dem ununye birye, nara Allah arye nyapsine. Israel yala nang, anggun ni koproba Allah arye nyapsine.
Atalak ara sik pia din patanamle. Ati, narye sik dipnamak ati, weik kwalya ton kintinibuka delilbinamne. Winipnamne ning dibikceura, sik adiparyuk yu mek dibikiba, kanye wangalamak touk winipnamake. Tonda, sik kisok nirya ara, biribiri anmalya ati, mana dem unamake. Mapmaca ani, aminyan talak tonap kum bunamake. Na Allah Yahweh arye, ayupu akunum nyapmasina ati, dipkoprob nong upnamlarya!
Wininyak bukni, pia malye wininyak nang bukni, sik tenebice talak aryuk, ikan on ning, mek pum bisik dongobuka yunyake. Tonda, weik aling atonun ning, el si jala, mekwen pum bal el si ikan, yangabuka dolona ati, el si jala dobuka, mekwen pum bisik dopkwetebikiba, dauamlya ani, mekwen pum ikan weklyopura, aminyan aning talibuka doprobikirye, ikan weik wekmaliba, dolonyake. Winibiceura, kanye delinyake. Winilamak touk, sik Kasdim nang arye, nun Israel ninye weik arye tomobuka osinyakce, kanye delinyake.
Nyabukce, ayupu ton nyabuk. “Naio, sik Kasdim ninye ara, pia malye-malye weik wininyak ninye anya arye, mekwen pum ikan ona deiyok nang arye, mekwen pum ikan weik tomobikirye, aling atonun ning pum tam arye dobuka obikirye, dibuka sirya daklamak atonun, sik Kasdim nang arye, yuk mutuku yala nang weik arye tonap, tuba olyanganamsiyake. Ara, bico tenena kumce, yu weik upliba, ninye nirya obuka, sirya dakanyake. Wininyaka atonun, sikce nun Yehuda tam ninye ati, atonun obuka pia, sirya dakdongopnamsiyaka ati, na nio, ance ‘Aning awaplye’ tenen, batakanamsilam do?” Nabi Habakuk birye, Allah ati nyabuk.
Habakuk ance, sik Kasdim mutuku ninye ati, moubuka dimince, tenipnamlyame. Sikda, sik kanye talima erebikirye, ‘Nuncuk nun bidamnye arye, teleb ulilanamabe,’ tenenyake. Sik kanye talima pung unyak ninye kum unyake. Bukni, kanye talima noutam dib tenebuka, moupropnamak ninye ara, nati dib tenekirye, diksukum ninguk wininamake. Ara, sikce na Allah ati, ‘Elcuk nunti kalikuka melinamsile’ tenen, dib tenenyak deice arye unyake.
Nunce anggunti peterena deice arye, nyapsupu touk, anoutam talak nirya arye, anggunce yuk nang ati, “Anggunda yata ati aning wininmalum do? Winipnamlulum, winipnamlulum,” nyabuka nyalina kume. ‘Nun bidamnye taruk aniryuk pil dobibirye, kanye lamabuka ubibirye, kanye deibuka, nimalye arye unamap’ tenen, pia pi dobuka wininamlulume.
ကြော်ငြာတွေ