Ester birye tamubuka laka nyabuk yupu ara ani. “Ara amutuku ninye deiyoknye, Raja Ahasyweros birye, ninye nirya ap, kilapu ap ati, ‘Yanululume,’ nyabuka yukuna kumce, talye lukparabuka, nun ninye deiyoknye el dam kum binmanto. Yata ninye do nirya, ‘Raja dam binuyap’ tenen, el aik dam yana wekikiba, adiparyuk el yin talen nang arye, aninye wibuka oltakanauk unamake. Aning ara, ‘Wininamabe,’ nyabuka, surat sekikce, peraturan akunum min arye winibik. Nyabuka peraturan akunum deibik ati, nara talye lukparabuka, Raja Ahasyweros dam kum bitinye. Bukni, ninye deiyoknye Raja Ahasyweros birye, el emas kama deice arye deiplinye binyuk, el dam yatue. Raja arye, el emas kama arye, el dam yalyenye deiptopura, anye adiparyuk kum oplopnamake. Bukni, Raja Ahasyweros birye nati, ‘Na dam yalyame,’ nyabuka, min kum yukupmanile. El dam binmasi talak arye dipdongobuka, like 30 deice arye asukumuk tuba talye unmana. Raja arye kum yukupnilyopura, el dam talye lukparabuka kum bitinye,” nyabuk. Ara, Ratu Ester birye, ‘Hata, ayupu dobuka, Mordekai dam laka nyalbinule’ tenen, nyabuk.
Ester 6:4 - Eipomek4 Nyabikba, adiparyuk ninye deiyoknye Raja arye tamubuka asipdeyuk. “Yata nang do, na amu tam unyakce pil doninyak deiyok nang ara, wini talak na aik dam anyuk yatanye ton aunmal do?” nyabuka asipdeyuk. Raja Ahasyweros birye, ayupu nyabuk talak aryuk, el amu tam deiyoknye Haman birye, Raja aik dam yayuk. Ara, talye ati kume. Haman birye, ‘Mordekai optinye’ tenen, ‘Weik ninye deiyoknye Raja, el aik weknirye, moropnyopura, ‘Telebe,’ nyapnutopura, anye Mordekai tomobukapnirye, ninye on ning, tapu arye el ngang dam kerekibirye, yo deice kirikuka dopkwetebibyopura, opnamabe,’ tenebuka ati, Raja aik dam tikilyanmok. Yayukura, Raja birye, “Yatanye na dam yanmal do?” nyabuka asipdeyuk. အခန်းကိုကြည့်ပါ။ |
Ester 6:4
12 ပူးပေါင်းရင်းမြစ်များ
Ester like winilye deice arye, din si tebuka, Allah moronauk ulamuka ani, akunum winibukopura, adiparyuk sik Persia mutuku weik deiyok kilapu, Ratu kilapu ongolamak baju ongopmokce, ninye deiyoknye Raja Ahasyweros aik pum bukni, Raja bulamuk aik, bisik bublan dam binuka tikmok. Ara, ‘Ninye deiyoknye Raja Ahasyweros, el weik bun ning deice buklirye dipdenunil’ tenen, binuka tikmok.
Nyabukura, el kil Seres ap, el kwit capu nirya ap arye, ayupu sikce kekebuka nyabik. “Nun tenepmap ning ara, ance nyapminba, ninye arye cang yo toubukabikirye, boyanunyake. ‘Ayo el cang ara 22 meter takubuka boyalulume,’ nyapminba, bobuka yanunyake. Winibicopura, ambusum pia beren tam talak koproba aniryuk ninye deiyoknye Raja ati, ‘Mordekai bira yo ikuka kitipdongop nirya, im dup deipnamabe. El ngang dam tapu arye kerekibirye, el nong dopkwetebibyopura, ngang yok cepliba dipnamle,’ nyabuka, moronulyame. Raja birye, ‘Telebe,’ nyapliba, anye Mordekai akunum obicopura, akunuma, talye kanye bobuka unamlame. Tonda, Ratu Ester birye kintinipnamkil kwalya dilbinmaninye talak arye, an talima namin kipnamakile,” nyabik. Nyabikba, Haman kekebukce, ‘Ayupu nyapnulum ning ara, telebe. Na tenepman touk nyabaka’ tenen, kanye deibuk. ‘Mordekai adiparyuk opnuyap’ tenen, el pil melin nang ati, “Wini talak minopce weik cang yo toulbilulume. Ninye on ning babye bopnululume,” nyabuk.
Buku noutamak sekamik ning, tonoknye birye yinibukba, ninye deiyoknye Raja Ahasyweros kekebukopura, asipdeyuk. El aik melibuka ulamdik nang ati, sik ninye deiyoknye Raja birye asipdeyuk. “Anye Mordekai birye, sik malye nang tenyamdik yupu laka nyapnuka deice arye, lyepnuka ati, nunce el menenga ning ati, yatato teleb ning dobuka, Mordekai binyak arebupe do?” nyabuka asipdeyuk. Nyabukura, el pil melibuka amu tam ulamikce dolamik nang arye nyabik, “Kume, nun deiyoknye Raja, nunce anye Mordekai teleb kipdeipkuk ning ati, tonok ning babye, kum arebupe. Elda, yuk ning aning-aning nirya ton pia kum doprobuk,” nyabik.
Nyabuka asipdeyukbuk, el melin nang arye, sik ni koproba Raja ati nyabik. “Ninye si Haman bira, nun ni koproba anti ton, ‘Raja ati yupu moroptinye’ tenen, yanmalye,” nyabik. Nyabikba, sik deiyoknye Raja arye nyabuk, “Ati, Haman bira, anggunce nyapmunyeba, adiparyuk na dam yalule,” nyabukba, Haman adiparyuk bikbik abuka, ninye deiyoknye el aik wekukce, el un dam biyuk.
Winibuka lelipdongobikopura, Raja el amu tam pil dolamuknye el si Harbona birye, Raja Ahasyweros biti nyabuk. “Na deiyoknye kekepnilyame. Haman el aik dam ara, weik cang yo ikuka deibika ara, aupmale. Acang yo ara, dua puluh dua (22) meter aubuk. Ayo ara, Haman birye, ‘Mordekai biti tapu koubukapnirye diripnamne. Ayo deice anye el ngang dam tapu kirikdongobuka yo deice arye dopkwetepnirye, opnamne’ tenen, ikdeibukce, kintinibuka deiamuk. Winyamuk bukni, Haman birye, ‘Opnamne,’ tenyamuknye Mordekai bira, anti minop talak melipkuke,” nyabuk. Nyabukura, amutuku ninye deiyoknye Raja arye el mapu ati nyabuk. “Ati ara, wini talak anggunce, Haman dobukapmumce, acang yo ikuka kintinibukak uk, tapu koubuka yo deice diripkwetepmunce, anye oploplulume,” nyabuk.
Tonda, weik kel bikamikce bukni, tilila ati tilila yupu nyanyak nang ara, sikce, ‘Winipnamepe,’ tenebice talak ara, adiparyuk Allah arye, sikce tilila ati tenenyak ning ara, kel bikilirye, dololule. Adeice sik weik kel nang bukni, tilila ati malye tenepmace ning nirya ara, Allah arye kum danalilule.
Ati ara, anggunce, ‘Apil doptinye. Apil talibuka piripnamne,’ tenepmunye touk, aninguk talibuka, pia pi dobuka, anggun pil donamlum talak nirya ara, mikip weik tonun pil donamlume. Deiyok ara, aminyan talak an pil dona ati, an kanye ara pia kum unamkile. Ara akunum diamik nang unyak mutuku, el si Sheol mutuku noutam ara, ninye arye teninyak ning ap, pil dona ap, kel weik bikin ning ap, mambul un ning ati, ‘Deiyok ara aniʼ tenen, moubuka tenen ning nirya ara, ton pia kum ulule. Tonda, ninye tukwak nang nirya ap, anggun ap, aminyan talak dipmunyopura, anggun babye, otam bimunyopura, pia asukumuk unamlume.