Aning nirya winibuka ati, Abraham birye, amutuku si ara, “Allah el si Yahweh arye, nun patasulul ning aresulule,” nyabuka si dobuk. Abraham birye nyapdeibuk touk, wini talak babye ninye nirya arye tuba nyanyake. Ara, “Nun ni koproba Allah, el si Yahweh, el mutuku ara, nun patasulul ning aresulule,” tuba nyanyake.
Ester 4:14 - Eipomek14 Nyabukce, ayupu tonap dukdongobuka nyabuk. “Ance yupu nyana kum, talye dingbu abuka uminyopura, nun ni Allah arye, Yahudi yala ninye lyena ati, yuk nang deice arye lyena ning arepnamsile. Bukni, Persia mutuku ninye arye an ap, an ni koproba ap, el mapsilip nirya ap ara, oplobikirye, sirya daknamake. Bukni, moubuka teneipdelyame. Nun walwal bukni, anda ninye deiyoknye, el Ratu kil akunum ulyame. Aunmalama deiyok ara, Yahudi yala ninye ikin bobuka weika arye unmak talak, sik lyena ati aunmalam do, kum do? Ati, ‘Ance yata wiribuka uptuma deice arye, Yahudi yala ninye nirya lyeptum do?’ tenen, nyapkine. Bukni, na nyapmakin touk kum umince, batakminyopura, an ap, nun Yahudi yala ninye nirya ap, oplopnamsiake.” Mordekai birye Ester biti nyabuk. အခန်းကိုကြည့်ပါ။ |
Ester 4:14
31 ပူးပေါင်းရင်းမြစ်များ
Ati ara, Allah Yahweh arye, ninye bin tonok ton wipdeibuk. Ara, Israel ninye sikti, Siria mutuku ninye deiyok kibuka taleamuknye birye, ikin ning weik, sik nong deice delilamukba, imun kanye bolamika ati, ‘Anye wipdeipnirye melipniba, elce melibuka lyepdopliba, sik nirya ara, teleb aryuk, min talak doulamik touk unamakʼ tenen, wipdeibuk. Winibukba, anye birye, Israel ninye melibukba, min talak teleb ulamik touk, tuba tonap teleb ulamik.
Akunum biyikopura, Yesaya biti nyabik. “Aning ara, ninye deiyoknye Raja Hizkia birye nyapmale,” nyabuka Yesaya biti lak nyabik. Arup ara, nun ikin kanye bobuka unmabe. Aning ara, tilila ati kume. Deiyok ara, sik Asyur mutuku nang arye, nun opnamasiyaka ati, akunum kintinipmaka dam upmala ati, nyapne. Aning ati, winipmanto ara, kilapu arye, mi delilamaka atonun uple bukni, sik mikip akunum kum daliba, mi kum deipmanto ulamak talak ara, alye weik ulamle atonun upsila ati nyapne. Ati ara, ninye arye, yuk nang ati, weik arye, wenebikiba, alye weik ulamle touk upmasila ati, arup ara, nun mikip kum nang unyaba ati, nun alye weik upsile. Tonda, pia ikin kanye bopmabe.
Yuk mutuku nang arye, obuka sirya daksikce, sik mutuku bobinamsikce, ikin pil dilamsikba, tapu koun nang atonun unyap bukni, an si uk tuba erekinyaba ati, anda, nun ni Allah usilyama ati, ance pia kum bataksulume. Aning kum bukni, sik Persia tam ninye deiyok nang Raja-Raja arye dilamsik talak arye, ance nunti weik tonun bico tenelamsulumce melilamsulumba, sik Persia mutuku ninye deiyok Raja nang ton eibuka bikamike. Ance sik talima noutam pil doplumba, sikce lo arepsikce, lopdeipsikopura, amutuku tamubuka yanmabe. Ayanmaba deiyok ara, Allah anti si eren aik minop talak ulubuka atu buklomik ning ara, tuba tonap lipsisikuka donmabe. Winipmanto ara, ninye arye weik asik dopbikirye, ‘Nun mal olan nang yanuka wekikirye opsikcak’ tenen, anyaik dana-dana tam nirya cang keil poka antanapdongobuka dolamak touk, ance akunum Yehuda tam nirya ap, weik asik Yerusalem mutuku unmap nang nirya ap ati, akunum kalikuka melisilyame.
Nyapnuk bukni, narye anye Semaya biti tamubuka nyapse. “Kume nara, ninye ati ilil upniliba, bai kum sakuka binamne. Nara anang atonun pia kum unune. Ati, Nun ni koprop Allah Yahweh el si eren aik pum tam pia kum wekuka duknupnamne. Ara, ‘Yuk nang arye na opnicak’ tenen, dipkoprob pia kum duknupnamne,” nyapse.
Ura, Ester elda, ninye deiyoknye Raja, el aik bana ati yukubik. Ester bira, el li koproba Abihail ulamuk. Abihail bira, Mordekai el mam koproba ulamuk. Abihail dibukba, el mi Mordekai elcuk, Ester kwaknyamukce, el li koproba kiamuk. El kilmu Ester bira, erepdeibikce, Raja Ahasyweros amu tam pil donanye, Hegai Raja el kilapu aik, deiyok talibuka ulamukce, akilapu ati melibuka kaliklamukba, Raja Ahasyweros dam bana ati, Ester si nyabikba, el kintinina ati, Hegai birye, “Winipnulyame, aning bobuka bobinamlyame,” nyabuk touk, Ester kekebuk. Yuk ning ton kum morobuk. Amutuku ulamik ninye ap, Raja el aik pum tam ulamik nang ap, sik nirya arye, Ester bitibuk moubuka dilamikce, elti pia bico tenelamik.
Persia mutuku ninye deiyoknye Raja Ahasyweros, el kilapu ara, weik ulamik bukni, Raja birye Ester pia elilamukce, elti kanye weika arye delilamuk. Tonda, yuk wel kilapu nirya ati ton, pia kanye kum delilamuk. Aning ati ara, Ester biti, kanye tenelamukce, pia kanye delilamuka deice arye, ninye deiyok nang kibikirye, kalubuka ongolamak ning, el si ara mahkota dobuka, Ester el kisok deice kalupdeibuk. Ara, ‘Ester amutuku ninye deiyok kil, Ratu Ester unamle’ tenen, ninye deiyok kibikirye, talibuka ulamak ning el si ara, mahkota, Ester kisok deice kalupdeibukce, minop talak amutuku deiyok kil, Ratu Wasti pununa ati erepdeibuk.
Mordekai el weit birye deiamuk kilmu, el si ara, Hadasa ulamuk. Awel kil Hadasa, el li ap, el lin ap diamdikba, Mordekai birye, ‘Akil ara, na kilmu atonun unamle. Na aryuk, akilmu melibuka kalikinamne’ tenen, el ap neika ulamikba, Mordekai el mapu koproba, elce deiamne atonun uamuk. Hadasa bira, el urasin ap, el nong ap, pia teleb wel kil ulamuk. Akil tonok bukni, el si ton Ester nyalamik.
Ayupu laka nyalbiyukba, Mordekai birye Ester biti, tamubuka nyabuk. “Na kilmu Estero, anda moubuka tenipdelyame. Ance amutuku noutamak nirya talibuka ninye deiyoknye Raja Ahasyweros aik uk ululum bukni, anda Yahudi yala kil ulyame. Ati, ance, ‘Kume, yuk talye Yahudi ninye opnamak bukni, na tonok ara, kum opnamniake,’ tenena meme. Yuk Yahudi yala ninye opnamak talak ara, an babye oplopnamkiake. ‘El tonok ati, dauplye, daulule,’ nyabuka kum bataknamkiake.” Morkai birye Ester biti nyabuk.
Yuk mutuku ninye arye, sik mapu ap, sik kilmapu ap dobuka delilyanganamak talak ara, yuk pera mutuku, sik ninye deiyok kibuka taleamik Raja nang arye, Israel yala ninye sik mapu ati, melibuka kalikinamake. Tonda, aRaja nang sik kilapu, weik deiyok kilapu kibuka ulamik bukni, wini talak ara akilapu arye, Israel yala ninye sik mapu ati, melibuka kalikinamake. Sik yuk mutuku Raja nang ap, sik kilapu ap, sik Israel yala ninye sik amutuku tam uk unamake. Winipsikirye anggun, Israel ninye si erena ati, anggun dam yakirye kanupdongobuka si erenamsiake. Sik yuk mutuku weik deiyok ninye, mambul nang ulamik bukni, wini talak ara, talye ninye uk unamake. Anggun Israel ninye dam yakirye, anggun si erena ati, kisok kanupdongobuka tuku deice mabikiba, anggun yan deice upmalye tuku butbuta sik sitang deice palinamle. Sik ninye deiyok nang arye anggun Israel ninye ati, anggun amu tam ubikirye, si erenamsiake. Aning winipsikca deice arye, anggun Israel ninye ara kel biknamnulume. Ara, na si Allah Yahweh nati kel biknumunce, ‘Se, dipkoprob Allah el dem arye apil dopmasile,’ tenenamnulume. Tonda, ‘Allah elcuk melinamsile,’ tenen, natibuk moropnikirye, na si ereninyak ninye ara, malye kanye kum bonamake. Narye aninye ati, dipkoprob melipnamna anya arye, alye kum dakdanamake.
Bukni, dan ninye do nirya, ‘Israel ninye optibye,’ tenen, ninye on ning kintinibikirye, olyasiting bukni, kum winipmanto upnamake. Aning atonun, dan nang do nirya, anggun Israel ninye ati, ‘Malye kum winipmakibuk malye yupu sik deice nyapnuyabe,’ tenepnamsiyak nang ara, urdemuk unamake. Sikce nyanamsiak yupu ara, talye urdemuk nyanmatinga babye, nong kum upnamle. Tonda ayupu nyanamsiyaka deice arye malye kum kipdeipsitinge. Narye melipsiniba, anggun Israel nang arye amalye yupu talamak nang ati, yupu sekmunyeba, yupu kum asa unamake. Nara Allah Yahweh arye anggun Israel ninye ati nyapsine. Arup nyapmasin yupu nirya ara, na amu tam unamlum nang melipsiniba, dolonamlulume. Yuk ninye arye anggunti, malye yupu nyanamsiak bukni, na Allah arye anggunti pia melipsiniba, teleb upmunyopura, yuk mutuku ninye nirya arye, kel biknamake. Ara, ‘Se, Israel ninye ara, dipkoprob Allah el ‘Naʼ tenen, ninye unyake,’ tenen, kel biknamake. Narye dekna arin ning ara, pia teleb una deiyok ning arepsiniba, telebuk unamlume. Allah arye Israel ninye ati nyabuk.
Aning ara, talye ati kum nyapsin bukni, deiyok ara, naryuk anggunti yanuka lyepropsinirye, anggun ap neika unamabe. Narye anggun wenena ati, yuk-yuk mutuku noutam yakuka, dopkwetcamsise mutuku nang nirya ara, wenebuka opnyopura, sice buklopnamnarya! Bukni, anggunda, na mapu koproba ara, ‘Naʼ tenen nang ululuma ati, tuba tonap yakuka donoknyeba, yuk-yuk mutuku noutam, kum binuka unamlume. Anggunda, pia ati amutuku uk unamlume. Winipnamsin bukni, anggunce minop talak malye-malye weik winilamlum ning ati ara, dipkoprob wenepsinirye, deken ning arepnamsine. Dipkoprop anggun malye winilamlum ning ara, talye Luba kum kipnamne. Amalye winilamlum ning ati, ‘Daupmalye,’ kum nyaptinye. Aning kum bukni, anggun malye winilamlum touk, anggun deken ning ton, wenebuka arepnamsine. Bukni, winibuka wenepsinirye, tamubuka teleb kipdeipnamsine. Narye anggun Israel nang ati, kume kum daneipnamsine. Ayupu ara, na Allah Yahweh arye akunum nyapdeipsine.
Ati ara, se na mapuo, anggun apu koproba, Yakub birye deiamukba, dadeipdanin yangalamika ani, wini talak unmalum Israel nang ara, na amu tam ululum ati ara, anggun ilil una meme. Nara, anggun dam yanirye, anggun ati lyepdopnamsine. Minop talak anggun wenena ati, narye anggunda yakuka donoksiseba, yuk-yuk mutuku nang arye, sik unyak mutuku bobinamsikba, daulamlum bukni, anggun olana ati ninye, sik yuk-yuk mutuku ulamice buk, narye anang nirya obuka, kum kipdeipnamne. Winipnamne bukni, dipkoprob nyapsine. Anggunce, malye winin ninguk talibuka, malye-malye weik winilamlum ning ati, narye, ‘Daupmalye, aning ara, talye lubakibuka namin kipnamsine,’ kum nyaptinye. Ati, aminyan talak, anggun malye-malye ning winilamlum touk, anggun dengna ati wenepnamsine. Bukni, anggun nirya ara, obuka sice buklobuka, min kume kum daneipnamsine. Aning kum bukni, aminyan doupnamle talak ara, tonap teleb kipdeipnamsinca! Anoutam talak, anggunti obuka bobinamsik yala nang nirya ara, aminyan talak narye opnirye, kum kipdeipnamne. Bukni, anggun Israel nang ara, pia kum bataknamsine. Na ap, anggun ap, neika pia unamaba ati, aminyan talak ara, pia teleb kipdeipsiniba, telebuk unamlume. Na Allah Yahweh arye, ayupu nirya akunum nyapmasina ati, aning nirya ara, dipkoprob nong upnamlarya, nyapsine.” Allah arye nyabuk.
Sik malye-malye weik ulamik nang arye, kanye talima mitang arye ukirye, ‘Se, nun dipkoprob malye winilamupu,’ tenebikirye, nati moropnikcopura, narye ton tamubuka tenenamsine. Ara, na Allah arye, “Winibuka unamlulume. Winipmunyopura, narye ton anggun melina ati, aning wininamsine,” nyabuka, nyalin yupu nyapdeiamsirye, “Winipnamsine,” nyapdeiamse ning ara, tuba tenenamsine. Ara, anggun apu yapu, sik si Abraham ap, Isak ap, Yakub ap ati, nyapdeiamse nyalin yupu ati nyapsine. Tonda, na Allah arye, “Anyapsin mutuku arepnamsine,” nyapdeiamse mutuku ara, tuba tenenamnarya. Kanye talima mitang asa ubikirye, nati teleb kibuka, moropnikcopura, narye arenamsise mutuku nirya, anggun wenena ati, malye kipdeipse mutuku nirya ara, tonap tenepnirye, teleb kipdeipnamnarya.
Peterus anda, dib teneplumce, wini talak ara, ‘Anda Allah el Mi Koprop Kristus unamlame’ nyapmanilama anya arye, pia bulamle keil atonun ulyame. Ninye arye tuku palibuka mutuku yangan keil deice, aik ayukumna ikuka dolamak touk, yata nang do nirya, an nyapmanilam atonun diba tenebikceopura, Allah el mapu kipdeipniba, sik kanye talima ap, kanya ap, mikip unamake. Mikip weik kibuka ukirye, weik upnin banamake. Nati, dib tenepnikirye, na mapu weik upnin banamak ning ara, dipna deiyok isa mer ap, sik deiyoknye Isa Mutuku Dongonye ap arye, na mapu ati kum bisipnamake.
Sirya talak ikin wininamle talak ara, ikin ning weik arye deipnyopura, ‘Tukwak ninye nirya dibicak’ tenen, Allah arye ikin ning deipnamle talak ara, lo mitik anun aryuk arepnamle. Ninye nirya dibicak ati, Allah arye, ‘Aninye ara, na mapu unamake,’ tenebukce, wibuka deiyamuk ninye ara, ‘Ikin unamle talak weik upliba, ninye nirya dibicak’ tenen, Allah arye, ‘Ikin ning winipnamle talak ara, lo mitik anun aryuk arepnamne,’ akunum tenyamuke.
Allah el si Yahweh arye, el mapu sik malye ning ati, yupu lipsisikuka, wenenamle bukni, sik mikip kum daliba, anang akunum kum danin bacopura, ila tuba tonap, bico tenepnamle. El mapu, yuk nang amu tam unyakce, talye piluk donyak nang babye, ura, sik bidamang kanye aryuk, pil donyak nang babye, kum dacopura, Allah eiplirye, bico tenepnamle. Bico teneplirye, el amu tam unyak nang, Israel ninye ati, tuba tonap, kanye namin upliba, bico teneplirye, lyepnamle.
Winibuk ning, Pilistin nang binuka eibikce, “Awinipmal ning ara, yatanye birye winipmasil do?” nyabik. Nyabik bukni, yuk nang arye nyabik. “Kume Timna mutukunye birye, el kil dobuka Simson arebuk. Akil dobuknye, Simson birye winipmasile. Deiyok ara, tilila ati kume, el doprobuk kil ara, el li koproba arye el kilmu dalubuka, yuknye, Timna mutukunye arepmokba, Simson yu upmal ati aning winipmasile,” nyabik. Nyabikopura, Pilistin nang kekebikce, adiparyuk biyikce, akil ap, akil el li koproba ap, sik aik ap nirya, uku dongobikba uku dibuka sirya dakukba, sik dibik.
Anggun ni koproba Allah, el si Yahweh arye, minop talak anggun Israel ninye ati, akunum wipdeiamsukce, ‘Anang ara, ‘Naʼ tenen, ninye,’ akunum nyamsukce, tenesilya atia. Ati ara, anggun ni koproba, Yahweh arye, pia kum bataknamsile. El si pia weik mambul si ulula anya arye, ‘Yuk yala nang arye, na si malye kipnicak’ tenen, elce pia kum bataknamsile.
ကြော်ငြာတွေ