Raja Hizkia birye nyapdeibukba, el amu tam pil don nang arye, surat akunum sekuka kintinip deibikceura, ‘Asurat bobinamakʼ tenen, ninye wipdeibikba, “Sikce asekeibab surat bobuka, Yehuda mutuku unyak nang ap, Israel mutuku unyak nang nirya ap, sik unyakak nirya bobuka, laka nyalbilulume,” nyabik. Asurat noutam sekeibuk yupu ara ani. Israel nango! Asyur mutuku nang arye, anggunti malye kebuka, pera mutuku bobinuka taleamsikba, Allah arye akunum lyepropsukba, apera mutuku arye batakuka, yanganmalum nang nirya ara, wini talak anggun apu yapu, Abraham ap, Isak ap, Yakub ap, sik nirya arye, si erelamik Allah Yahweh, el damuk tamubuka yamunyeba, elce anggunti melipnamsile.
Ester 3:13 - Eipomek13 Tonda, Haman birye, yuk surat ton sekukabukce, dopreibuk. Asekuka dopreibuk surat yupu ara, ani. “Raja Ahasyweros talilul mutuku noutamak nirya ara, wininamabe. Wala 12 ning tanggal 13 kunum kiplyopura, Yahudi yala ninye nirya ara, tonok ton kum bataknamlulume. Wisi ninye ap, kam nang ap, tonda kilapu nirya ap, mapu nirya ap ara, tonok talak aniryuk, obuka sirya daknamlume. Winibibirye, sik aninye arye talinyak ning nirya ara, dalubuka dopropnamabe,” nyabuka sekeibuk. Ara, Haman birye, asurat sekuka amutuku noutamak nirya dopkwetebukba, sik mambul weik nang nirya doprobik. အခန်းကိုကြည့်ပါ။ |
Ester 3:13
14 ပူးပေါင်းရင်းမြစ်များ
Nyabukce, ayupu tonap dukdongobuka nyabuk. “Na ni Rajao, an ap neika yupu nyalalulum nang arye, an talilyam mutuku noutamak unyak, na yala ninye nirya ati ara, tonok weik deiyoknye birye, ‘Aninye nirya ara opnuyap,’ tenebukce, moropkukba, opnamsiake. Anye birye, ‘Aninye deknirye, obuka sirya daknamne,’ nyabuka moropkukba, ‘Telebe,’ ur nyaplum ati, winira amutuku ninye arye nun yala ninye ati, obuka sirya danamsiake. Winipmanto ara, yuk nang arye, na yala ninye nirya ati, ‘Aninye nirya dekibirye, nun ikin pil talye diamuk pil donamsiake. Winibuka nun amu tamuk unamake,’ tenebuka deksitinga babye, teleb uka. Winipsitingopura, na yala kilapu ap, na yala ninye ap arye, sik ikin pil talyeuk doptibye. Tonda, narye na ni Raja ati, talye mangkau asa ulamtibye. Winibuka uptibyeopura, nun deiyoknye Raja, narye an unalamak ton yanuka kum dulyakitinye. Bukni, tonok weik deiyoknye birye, na yala ninye nirya ati utenelule. ‘Nunce tenebibye sum ara, aninye nirya obibirye, sirya dakuka kum kipdeipnamabe,’ tenesulule na nio.” Ratu Ester birye, Raja Ahasyweros biti laka nyabuk.
“Telebe, na deiyoknye Rajao, ance, ‘Telebe’ tenepnimince, kanye deipminyopura, ‘Ester birye nyapnil yupu ara, teleb anya arye, winipnamne,’ tenepniminyopura, pia malinye Haman birye nyabuk yupu sekdongopnulyame. Ara, Hamedata el mi Haman birye, ‘Persia mutuku noutamak bukni, provinsi noutamak nirya unyak Yahudi yala ninye nirya, obuka sirya daknirye, kum kipdeipnamabe’ tenen, sekdeibuk surat ara, ance yupu sekdongopnulyame. Winina ati ara, ance surat ton sekmince, dopkwetepminyopura, aning nirya kum danamle. Yahudi yala ninye nirya kum opnamsiake.
Wala dua belas ning (12), wala si Adar, tanggal 13 akunum ubukba, Persia mutuku ninye deiyoknye Raja Ahasyweros birye, sik Yahudi yala ninye nirya ati, nyapdeiamuk sum ‘Akunum upmala,’ nyabik. Asum ara, Persia mutuku noutamak ulamik ninye, yala yuk-yuk nirya ara, Haman birye malye yupu nyabuka deice arye, ‘Yahudi yala ninye nirya obuka, sirya daknamabe,’ tenelamik bukni, kum winipmanto ubuk. Sik Yahudi yala ulamik ninye nirya arye, sik mal olan ninye ayala-ayala nirya ap, dana-dana tam arye yayik ninye nirya ap, adiparyuk obuka dakik.
Hamedata el mi Haman birye deibuk mapu ara, sepuluh (10) deiamuk nang nirya ara, sik Yahudi yala ninye nirya ati, ‘Nun like. Yahudi yala ninye nirya ara, obuka sirya daknamabe,’ tenelamik. Haman elce deiamuk mapu, sik 10 nang tomobikce, tapu kouamik bukni, sik Yahudi yala nang ara, ‘Haman el mapu 10 nang arye talilamik ning nirya ara, nun kum dopropnuyabe. Sik ning nun like,’ tenelamika ati, aning tonok ning babye, pia ton kum doprobik.
Atalak noutamak ara, sik Yahudi yala ninye nirya arye, sik mal olan dam yayik ninye nirya ara, akunum obuka dakik. Yahudi yala nang arye bobuka, ya yu ning ap, si tace ning ap deice arye, sik yuk mutuku ninye ayala-ayala nirya, ‘Yahudi yala ninye nun like,’ tenelamik ninye nirya ati, obuka sirya dakik. Winibik ning ara, sik mal olan nang ati, sik Yahudi yala ninye arye, ‘Nun mal olan ninye ati, wininamabe,’ tenelamik touk winibik. Winibikce, aninye nirya obuka, sirya dakik.
Na Ayub, na kam tuba unamne talak ara, sik winina kumce, pia minop winipnin balamlya ani, akunum sirya dakalongonauk ulule. Winipmanto ara, minopce bikbik abuka balamnanye atonun ulule. Aning atonun, na kam unun talak nirya ara, teleb ning ton na dam ton kum yanganulule. Na kam unye talak lo ara, akunum minopce sirya daknin balule.
Na kayapu Israel nang ara, sikce na nyamse yupu kum kekenyakce, narye, ‘Teleb winin ning ara ani,’ nyanun yupu nirya babye, yaniltakanyaka ati, Asyur mutuku nang dopdeipsinyeba, Israel tam nang olbinamake. Israel nang arye, malye weik unyakba, na yu weik upnuka ati, narye sik Asyur mutuku nang ati, “Sik Israel nang ara, adiparyuk olbinulumume,” nyabuka, sik Asyur mutuku nang dopdeipsiniba, na mapu koproba Israel nang ati, obuka sirya daknamake. Tonda, sik anang obikirye, sik talinyak bona ara, binuka dalubuka dopropnamake. Sik Asyur mutuku nang arye, na mapu koproba Israel nang ara, talye bisikak buta yanilongolamuk touk kibuka, obuka yanipnamake.” Allah arye nyabuk.
Winipnamaka ati, ‘Seʼ tenen, yupu boyangan nang ton wipdeipyopura, yanganamak nang nirya ara, aminyan tam arye dukdongobuka, duknupdongobuka yakirye, Babel mutuku noutam talibuka ulul ninye deiyoknye biti, yanuka nyanamake. Ara, “Se, na nio, an mutuku noutam nirya ara, anggun mal olan nang arye, akunum dana-dana tam nirya olyakirye, an talilyam asik nirya ara, akunum obuka, sirya daknamake,” nyabuka, laka nyapnamkiake.
Aninguk tenebuka wininamluluma deiyok ara, ani. Ara, yata nang do nirya, yuk nang arye sikti, malye ubiceura, bico tenebuka luba kina kum arye, malye ubuka wenebmace nang ara, Allah arye anang sik malye winin ning ati, talye luba kinamle do? Kume, Allah arye awenebice nang ati, sikce yuk nang ati wenena yupu nyalamak touk, bico tenebuka luba kina kum arye, tamubuka weik arye wenebuka opnamle. Bukni, yuk nang arye, sik malye upsikiba, bico tenebuka lubkinyak nang ati ara, Allah el babye anang ati, bico tenebuka, lupakilongonamle anya arye, weik arye kum wenepnamle.
Ati wini talak ara, anggun nirya bimunce, ‘Bico,’ tenena kum diparyuk, Amalek ninye nirya opnamlulume. Tonda, sik talibik ning nirya ara, tonok ning babye, ton kum bataknamlulume. Aning nirya obuka, sirya daknamlulume. Sal ap, kilapu ap mapu ap, kilmapu ap, moum din mapu, aling pum lin mapu ap opnamlulume. Tonda, Amalek nang, sik sapi ap, domba ap, unta basam ap, keledai basam ap, nirya obuka, sirya daknamalulume,’ Allah arye nyapmakile,” Samuel birye nyabuk.
Aninguk kum bukni, tonda Doeg birye, nyapdeibukba, el ap el mapsilip ap arye, Nob mutuku ulamik ninye nirya babye, obik. Ara, Allah, el si eren aik pil don nang ton, ulamik bukni, anang tenilena kumce, anang ap, sik kilapu ap, sik mapu kilmapu ap, milo mapu kilmapu ap, sik weilamik ning domba basam ap, sapi ap, keledai basam ap, aning-aning nirya, obuka sirya dakik.
ကြော်ငြာတွေ