Tonda Asyur mutuku ninye deiyoknye birye, yin talina deiyoknye biti nyalinmoba, nyapdeipmasil yupu nirya ara, Allah el si Yahweh arye, kekenmal do, kum do? Allah ara kam pia ulamlanye ulul bukni, Asyur mutuku weik deiyoknye birye, Allah elti, pia malye yupu nyabuka nalinmoke. Aning ara, Allah akunum kekepmalce bikmal do? Na kanye ara, ance el si erebuka el piluk dolyam Allah arye, amalye yupu kekeptopura, ‘Dipkoprop Asyur mutuku talibuka deiyoknye biti wenepnamlarya,’ tenepne. Na walwal bukni, Allah elda kele. Ati ara, ‘Allah el si Yahweh arye, wenen ning el nong deice deipnamimile. Tonda anye birye, bisibuka opsilyopura, Allah ati moronamsulum’ tenen, nyapkine. Tonda, opsiliba, mitik anun tuba kam unamak nang ati, ‘Allah arye, anang meliptue’ tenen, Nun ni Allah ati moropnamsulume. “Nun ni koproba Hizkia birye ayupu nyapdeipmalba, nunce nyapkiyabe,” nyabik.
Esra 9:8 - Eipomek8 Bukni wini talak ara, nun ni Allah Yahweh, dipkoprob nun malye winin ning ati, adiparyuk opnamsutum bukni, an kanye aryuk, nunti, bico tenepsimince, teleb kibuka melipmasilame. Winipmasulumce, nun tam nang ton kanye imunak Babel mutuku ulamik talak ikin weik ulamika ani, ninye weik deiamik bukni, ance nun tam nang mitik tonun lobuka lyepropmasilamce, asukum boyanmasilamba, wini talak ara teleb kanye bobuka, nunti kintinip deipsulum mutuku yanuka unmabe. Amutuku ara ancuk wipdeiamsuluma ati, amutuku nirya ara an na tenen ning, pia telebuk ulule. Asukumuk an si erenamkiyabe. Winipsuluma deice arye, winipmanto ara nun asing kuna uk ulamsuk bukni, wini talak ara, akunum teleb kipdeipsulumba, nun asing arye dirina elinyabe. အခန်းကိုကြည့်ပါ။ |
Esra 9:8
36 ပူးပေါင်းရင်းမြစ်များ
Yuk mutuku nang arye, obuka sirya daksikce, sik mutuku bobinamsikce, ikin pil dilamsikba, tapu koun nang atonun unyap bukni, an si uk tuba erekinyaba ati, anda, nun ni Allah usilyama ati, ance pia kum bataksulume. Aning kum bukni, sik Persia tam ninye deiyok nang Raja-Raja arye dilamsik talak arye, ance nunti weik tonun bico tenelamsulumce melilamsulumba, sik Persia mutuku ninye deiyok Raja nang ton eibuka bikamike. Ance sik talima noutam pil doplumba, sikce lo arepsikce, lopdeipsikopura, amutuku tamubuka yanmabe. Ayanmaba deiyok ara, Allah anti si eren aik minop talak ulubuka atu buklomik ning ara, tuba tonap lipsisikuka donmabe. Winipmanto ara, ninye arye weik asik dopbikirye, ‘Nun mal olan nang yanuka wekikirye opsikcak’ tenen, anyaik dana-dana tam nirya cang keil poka antanapdongobuka dolamak touk, ance akunum Yehuda tam nirya ap, weik asik Yerusalem mutuku unmap nang nirya ap ati, akunum kalikuka melisilyame.
Ati ara na ni, nara an amu tam pil donunye birye, anti moropkin yupu ara, kekepnilyame. Tonda an mapu arye an si ati, pia kanye deibuka ukirye, ‘Elda pia mambule,’ nyabuka, an si erenyak ninye arye, sikce ton morokinyake. Sik moronyak ning babye, kekeplyame na nio. Na nio, aning nirya ara, na moropkin yupu kekepmince, ‘Arup sum ara, bico tenebuka melipnutume’ tenen, moropkine na nio. Ara, melipsiminya deice arye, ninye deiyoknye Raja, el dam binuka yupu nyapnyopura, ‘Elce kanye deipnuturye, kekepnutopura, telebe nyapnutue’ tenen, moropkine na nio,” Nehemia birye, Allah ati nyabuka morobuk. Aning nirya moropse talak ara, narye weik deiyoknye Raja Artahsasta, el mek makau boyangana deiyoknye ulamse. Nehemia birye nyabuk.
Sik yuk mutuku nang arye, Israel nang ati olyangalamik bukni, ance sikti, pia bico tenelalumce, kum bataklamlume. Ance, ‘Anang ara, pia malye nang anya arye, adiparyuk oplopnamne,’ tenelamtum bukni, sikti, pia kum bataklamlumba, yuk mutuku nang arye obuka, sirya kum dakamik. Nun ni Allah, anda dipkoprob ninye ati pia bico tenepsimince, tuba wini talak babye melisilyame. Nun malye winilamap touk, kum wenebuka osilyame. Mitik tonunuk wenesilyame.
Se na nio, yata barye wala ton kunum uplyeura, na talima pum tam aryuk, ‘Yata wiriptinye deice arye, na ikin unilye ning ati, kum daneipnutum do? Aning winiptinye do, kum do?’ tenen, naryuk teniltonauk unamne do? Ara, beren tam talak arye dipdongobuka, keting noutam nirya ara, ikin kanye bopnirye, na kanye pum noutam arye, pia engenauk unamne do?
Se, na ni Allah Yahweho, narye pia pi dobuka, antibuk an si pia erekunune. Ati, ance na ikin unulul ning nirya ara, eipnimince, na moropkinye touk, ‘Ance yanuka melipnutum’ tenen, moropkine na nio. Nara ikin weik unulula ati, ance mikip arepnutuma deice arye, ‘Tuba teleb kibuka uptinyopura, kum dipnamne’ tenen, moropkine. Ance nati, luba kum kipnamnilam’ tenen, moropkine na nio.
Na kele, pia ikin uniliba, imun kanye bobuka, unye talak babye, ance nati kalekuka melinilyame. Melinilyama deice arye, na mal olan nang arye, yu weik upliba, ‘Anye nun lik ati, opnuyabe,’ tenepnitinga babye, sikce kum opnamniake. Deiyok ara ani. Allah an sirik tam mikip weik ukulul taruk arye, lopdeipnimince, lyelonilyame. Ati, na mal olan nang arye, kum opnitinge.
Nara, ‘Na ni Allah Yahweh arye, pia melinamnil’ tenen, Allah ati morolamse bukni, elce na morolamse ning nirya, kekebuka areamnuke. Na ikin ning weik ulamnukba, imun kanye bobuka, winilamse ning nirya ara, elce lopdeipnuke. Winipnukba, na ilil ulamnuk ning nirya ara, akunum kum kipdeipnukba, teleb kanye bobuka ulamse.
Bona utotoa talina kum ninye ara, sik deice tam talibuka ukirye, ikin ning bobuka, sik bona utotoa talina kum ninye, sik nong deice delinyak ninye deiyok nang ap, nirya arye, sik tenebice ninguk wininyake. Ara, abitinye yala ninye ati, Allah el si Yahweh arye, sik asing lapdeiplirye, el dirina arepliba, sik asing arye aning nirya elinyake.
Weik kel kina deiyok ning, kel bikamikce nang arye, nyanyak yupu ara, pia telebuk ulule. Winipmanto ara, domba basam weina deiyok nang arye, pia tace kama bobikirye, sik domba basam ati, ‘Teleb bisikuk binuyak’ tenen, mitik ton yakuka tonokak kipnin bakibuk, teleb bisik balamak touk, sikce nyasinyak yupu babye, teleb kibuka delisinyake. Ara, sik nyasinyak yupu deice arye, ‘Dipkoprop bisik ani,’ tenen, kel kinyabe. Winipmanto ara, kat yo deice, pakudakuka deiamikba, tace belyamlya arye, yakakibuk, uk diplyopura, tenepmalye bisik balamle touk, sik weik kel nang arye, nyasinyak yupu uk kekebibirye, teleb bisikuk banyabe. Anya arye, anyasinyak yupu nirya ara, Allah elce nyalisilye touk, nyabuka peteresinyake. Ati, anye bira nun nirya ati, teleb bisik peterena deiyoknye ati ara, nun domba basam weina deiyoknye atonun usilirye, nunti, teleb yupu nyalisulule.
Allah el si Yahweh arye im deice yin talin nang, malaikat nirya talibuka ululnye birye kum melipmasutopura, sik yu weik nang arye, nun yala ninye nirya akunum obuka sirya dakmasitinge. Ninye mitik tonun babye ton kum bataksutue. Nun yala nang nirya, obuka sirya dakmasitingba, nunda Sodom mutuku ap, Gomora mutuku ap nirya, obuka sirya dakamuk touk, winipmasitinge. Bukni, nun ni koproba Allah Yahweh arye, ninye mitik anun ton lyepsukba, tuba unyabe.
Anggun Israel nang nirya ara, kekeplulume! Dipkoprob minop talak ara, Babel nang arye opsikce, weik ikin ning dobuka, anggun nong deice delilamsikce ati, imun weik kanye bobuka, ikin pil weik donamlum bukni, aminyan talak ara, Allah arye akunum teleb kipdeipsilyeba, kanamuk unamlume. Min talak ara, yuk mutuku nang arye, anggun Israel nang ati, anggun deice ikin pil deiamsikca ati, weik ikin kanye bobuka ulamlum bukni, aminyan talak ara, anggun ni Allah Yahweh arye, aning kum kipdeiplyeba, anggunda dikdik sebuka, telebuk unamlume.
Sikce aning nirya akunum winibikcopura, nara, Yerusalem mutuku noutam bukni, na si eren aik pum tam arye, ‘Sik si ap, sikce winilamik ning ap ara, ninye nirya tuba teninamakʼ tenen, lak bikilin ning ton deipnamne. Yuk nang nirya ara, aning eibikirye, bikikcopura, ‘Se, sik asi sekeiamuk nang ara, dipkoprob mambul teleb weik nang ulamik. Allah el mapu koproba babye, mitik mambul unyak bukni, dipkoprob anang ara, pia teleb mambul weik nang ulamik,’ tenenamake. Tonda ‘Teleb ning ara, nunce mapu ap, kilmapu ap, deiptibyeba, nun si pia tuba aupnamsil bukni, dipkoprob weik mambul ning ara, Allah arye anang, sik lak kilin ning deibuka ati, sik si pia tuba tenenamabe,’ tenebuka nyanamake. Na Allah arye, sik anang si dobuka, na aik pum tam deipniba, anggun si aupmasilyopura, tuba bikinamsine. Winibuka anggun si akunum deipnyopura, narye anggunti, kum bataknamsine, Pia ati, aupnamsile, nyapsine.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Winipnamne bukni, Israel ninye yupa mitik anun aryuk bataknyopura, sepuluh persen atonun utinga babye, aminyan talak, tuba tonap, yuk mutuku yu nang yakirye, amutuku nirya uku dongobikiba, uku dipliba, sirya daknamle. Anang babye, onauk upnamake. Sik wenena ati wininamne bukni, kwarang yo ap, kenai yo ap atonun unamake ati, ayo nirya wibikirye, yo konga dem batakikiba, aminyan talak tuba kwapu bongolamle ning atonun upnamake. Israel ninye mitik tonunuk batakniba, kam unamak ninye ara, yo sirika arye, tuba kwapu bongolamle ning atonun winipnamak ati, aminyan talak ara, tuba deiyok koubuka, telebuk upre banamake. Ara, narye wipdeipnamne yala ning atonun, unamake ati nyapne. Allah arye nyapdeibukba, na Yesaya birye kekepse.
“Naio, an asing arye elisilyame! Min talak ara, ninye weik ulamupu bukni, wini talak ara, nun mitik tonun tuba unamabe. Ati, wini talak mitik tonun tuba aunmab nang, nunce anti, moropnukabe. Ati, nunce nyapnukiab yupu ara, nun ni ance kekepsimince, an ni Allah Yahweh, an si erelyamnye biti, tenipsimince, moropsilyame.
Yehuda yala nang tuba mitik tonun unmek nang arye, “Nunda, Mesir mutuku uk, binuyabe,” nyabuka, amutuku akunum biyik nang ara, tonok nang babye, ton batakniba, kam kum unamake. Sik anang kan-kan arye tonok nang babye, Mesir mutuku batakikce, Yehuda yala nang, sik mutuku koproba kum tamubuka yanamake. Diba, sik anang weik tonun, ‘Nun mutuku tamubuka yatibye,’ tenenamak bukni, ninye weik tonun, kum yanamake. Bukni, ninye mitik tonunuk, sik mutuku tamubuka yanamake. Allah arye Yeremia biti, akunum laka nyabuk yupu ara, Yeremia birye, ayupu nyabuk.
Winipnyopura, ninye pia weik dipnamak bukni, Yerusalem mutuku noutam arye, Israel yala nang ap, kilapu ap, mapu ap ara, mitik tonun lyepdeipnamne. Ara, anggun Babel mutuku noutam ululum nang arye, min talak akunum deiamlum mapu ap, kilmapu ati nyapsine. Atalak ara, anggun mapu mitik tonun akunum lyepdeipsinyeba, Babel mutuku dam yakceura, anggun amutuku akunum ulamlum nang arye, moubuka dipdemunce, aning ara, biknamlume. Ara, Yerusalem mutuku noutam unyak nang arye, malye weik wininyak ning, akunum bikmunyopura, anggunce, ‘Se, wini talak nun akunum bikabe. Allah arye anang ati, yu ubukba wenebukce, imun kanye, sik deice delilamuk nang, weik akunum mereukuka obuke,’ tenemunce, biknamlume. Wini talak anggunce, ‘Se, yata deiyok ati, nun ni Allah arye, nun tam nang weik tonun wenebuka obuk do?’ tenepmaluma ara, atalak aryuk bataknamlume.
Winipsilyopura, like bitinye sum do, winilye sum do, mabipyopura, adiparyuk nipdopsilirye, teleb upnamsile. Allah arye, teleb kibuka kwetepsilyopura, elcuk nunti, teleb kilinamsile. Like winilye sum deice arye, pia teleb kipdeipsiliba, nunda el dam ton, tuba tamubuka tonap unamabe. Ara, elcuk, nun malye wininyap ning nirya, kum daneipsiliba, tuba tonap el damuk unamabe.
Habakuk birye nyabuk. “Se, na ni Allah, ninye weik arye, an si ap, ance weik mambul pil dolamlum ning ap ara, nyalamikba, na akunum kekelamse. Tonda, an Allah Yahweh arye, weik mambul pil, minop talak dolalum ning ara, kekepse ati, ilil unulule. Aning nirya ara, keting tamun, keting tamun nirya weik, mambul pil dolamlum ati, ‘Wini talak babye, aning tuba lak kibuka, pil dopsutum’ tenen, moropkine na nio. Wini talak ara, nun Israel ninye, pia malye weik winilamupu ati, ance yu kanye bosimince, wenenamsilam bukni, wini talak noutamak ara, pia tuba bico ukilye ning ara, luba kina kume. Nun malye winina ati, adiparyuk obuka, sirya daksutum bukni, ‘Nun ti bico tenebuka melinamsilam’ tenen, moropkine na nio.” Habakuk birye, Allah Yahweh ati, nyabuka morobuk.
Teleb winin ninguk wininamluma deiyok ara, ani. Ara, narye alek mutuku obinuka unamak nang ara, na Allah arye, sikda tonok kanye kipdeipnyeba, talima lamapdongobuka, amutuku noutamuk binuka, telebuk unamake. Amutuku noutam binuka unamak talak ara, sik aninye nirya arye, ‘Se, nun ni Allah Yahweh, elce, melibuka lyepnamsilarya. El si deiceuk, teleb unamabe,’ tenenamniake. Sik atouk nang ara, omutuku binuka unamake.
Sik Yehuda tam unyak nang kan-kan, narye amutuku deiyok kibuka talinamlanye tonok wipdeipnamne. Tonda, ninye deiyok kibuka yuk-yuk talinamak nang ap, tonda yin talin nang, sik deiyok nang ap nirya ara, narye wipdeipniba, sikce ‘Naʼ tenen, ninye nirya ati, talinamake. Winipmanto ara, keil aik dona kel nang arye, ‘Teleb aik dopnamap’ tenen, pia weik keil dobuka, abilinga dukulongona amu tam iklamak touk winipsinirye, teleb kipdeipnamsine. Tonda, baju bol doltakna aik, tenda dolamak talak ara, baju sirya dana-dana darana ati, yo ikuka dolamak touk, winipnamsine. Tonda, ninye olban talak mikip weik yin singibuka kintinilamak touk, winipnamsine. Yehuda yala nang noutamak arye, konop nang wipdeipnirye, anggun ninye deiyok kina ati, wipdeipnamne nang ara, pia teleb nanguk wipdeipnamne.
Na Allah arye anggunti, teleb kipdeipsinyopura, winipmanto ara, sik amutuku nang nirya arye ansinibuka, teleb yala ning nemalyap arye, doknin banamlume. Winipmunyeura, anggun anggur tapu duk nirya ara, duk mounauk upnamle. Atonun, amutuku wa tuku noutam ara, anggunce kouamunye ning nirya nonguk unamle. Tonda, winiplyeba amutuku noutam nirya ara, mok weik ceplirye, pia weik tonun saknamle. Ateleb ning nirya ara, narye arepsinya deice arye, anggun tuba amutuku noutam kam unamlum ninye arye, aning-aning nirya ara, arepsinyeba, dobuka talipmunce, kanye deibuka telebuk unamlume.
Tonda, na Allah Yahweh, aning-aning talibuka, Pia Mikip Weik Deiyoknye ununye birye, na kele. Wini talak ara, anggun Yerusalem mutuku tuba kam unamlum nang ara, na nyapmasin yupu ati, ‘Dip do, kum do? Aning nirya ara, dipkoprob winiplyeba eipnamap do? Aning ara, pia kum winipmanto ninguk, nyapmasil do?’ tenen, kanye teniltonauk upsilyeba, ilil unamsile. Bukni, moubuka kekepnululume! Nara Allah Yahweh, im deice yin talen malaikat nirya ara, sik weik deiyoknye ununa ati, na mikip ara, pia weik unulula ati, narye, ‘Wininamne,’ tenenun ning ara, kum winipmanto upnutu do? Kume, na tenyamse ning nirya ara, winipnamnarya! Dipkoprob anyapmasin yupu nirya ara, nong lak upliba, eipnamlumca!
Ura, yuknye, Allah el yupu laka nyalamuknye, nabi Yesaya birye Israel ninye ati, ayupu sekamuk. ‘Laut mekwen kup-kup arye, keil wenenga pia weik uliba ninye arye wibuka, nukmanto kum ulamak touk, Israel ninye arye delilamikba, dadeipdanin yangalamik mapu ara, yupa weik unyak bukni, aninye noutamak, Allah arye ninye mitik tonunuk wibuka lyepnamle.
Malye winin ning ati, ‘Nun like’ tenen, malye kilamice ninye ati ara, pia teleb kipdeipniba, mikip weik ubikirye, darabuka unamake. Ara, na ni el si erena aik, weik arye domik aik ara, el ayukumna yo pia darabuka, kat asa tiklamle touk, aninye sik kanye talima nirya mikip kipniba, pia darabuka kat asa, telebuk unamake. Allah el ulya im deice ara, bikirye batakuka kum binamake. El ap pia neika unamake. Anggunce malye winin ning ati, malye kibuka bisinamlum ninye ati ara, narye winiryuk si winilye si nyabuka, anggun asok deice sekeipnamsine. Tonok ning ara, na ni Allah el si ap, bitinye ning el unamlak Yerusalem Winiryuk mutuku si ap, winilye ning ara, na si winiryuk si ap, anggun asok deice sekeipnamsine. Allah arye weik asik el si ara Yerusalem Winiryuk mutuku kintinipsilirye, im deice arye dopkwetepliba, yanamle.
Sik yuk nang ara, ilil ati wininmek bukni, Yonatan bira, el li Saul birye, el yin talen nang ati, “Anggun nirya ara, din dina pia meme. Arup ara, dina kum dipnamlume. Din diplinye bira, akunum supmane,” nyapmok yupu ara, kum kekepmok. Yonatan bira, ayupu kum kekekmoka arye, aning tenena kumce, Yonatan minopce el bobanmok kama ara, dobuka, akama kum-kum arye, mong mek noutam lukdogobukba, mong mek sakanmok dam, deipdongobuk. Winibukopura, Yonatan adiparyuk, among mek dobukce dibuk. Dobuka dibuk talak ara, el nong mikip weik tabakukce, pia teleb ubuk.
Nyabukura, Yonatan birye tamubuka nyabuk, “Dipkoprop na ni elce, akunum nun mutuku noutam nirya ati, ikin ning, nun nong deice deipmasuk deice arye, malye kipdeipmasile. Wini talak ara, na unmana urasin ara, bikmalume. Min ara, na babye mitang upmanu bukni, mong mek mitik tonun dobuka, dipman talak ara, mikip tabakmanilce, teleb unmane,” nyabuk.