Sik Amori ninye arye, malye pia weik wininyak bukni, sikti lo areamse talak ara, aning min kum upmala ati, tonap tuba malyeuk wininamake. keting tamun yupa weik, 400 tahun akunum uplyopura, ance deipminyeba, dadeipdanin banamak mapu ara, wini talak aunmalam mutuku tamubuka yakirye unamake. Allah arye, Abram biti nyalin yupu nyabuk.
Esra 9:1 - Eipomek1 Sik Israel nang arye, Allah arena ati, aning nirya akunum winibuka, seng abikopura, Israel mutuku noutam taleamik ninye deiyok-deiyok nang arye, na Esra dam yayik. Yayikopura, ayupu nyapnike. “Naio, nun Israel yala nang, talye daunyab nang ap, tonda imam-imam nang ap, tonda Lewi yala nang ap ara, nun nirya arye, malye upmabe. Ara, nun dana-dana tam unyak nang ara, Yahudi yala nang kum bukni, talye yuk yala nang, sikce talye-talye luparabuka malye wininyake. Allah arye, ‘Aning ara, na pia like, aning ara, pia kum wininamlume. Ara meme,’ nyapdeiamsuk ning bukni, nun ap, anang ap, yuk-yuk mutuku kum unyaba ati, sikce malye wininyak ning ara, nun babye, aning ton akunum wininyabe. Nun mutuku dana-dana tam wininyak nang ara, ani. Ara, Amon yala nang ap, Moab yala nang ap, Mesir mutuku nang ap, Kanaan noutam minop talak dipdongobuka wini talak tuba unyak nang ap, Het yala nang ap, Feris yala nang ap, Yebusi yala nang ap, tonda Amori yala nang ap ati nyababe. Sik amutuku nang arye, malye pil dopra unyak touk, nun babye apiluk talibuka donyabe,” nyabik. အခန်းကိုကြည့်ပါ။ |
Esra 9:1
37 ပူးပေါင်းရင်းမြစ်များ
Ura Raja Salomo bira weik kel bikna ap, weik bona talinanye kina ap ulamuk bukni, malye ton weik winilamuk ning ara, ton aubuk. Ara, mince Salomo birye Firaun el kilmu dobuk. Bukni, atalak ara Raja Salomo birye yuk-yuk buru tam kilapu ton, pia kanye tenelamukce, ‘Akilapu ton doptinye,’ tenelamuk. Allah arye, ‘Yuk mutuku kilapu dona meme,’ nyapdeiamuk bukni, aning nirya kekena kumce, batakukabukce, yuk mutuku kilapu pia weik dolamuk. Ara, Moab yala kilapu ap, Amon yala kilapu ap, Edom yala kilapu ap, Sidon mutuku kilapu ap, Het, yala kilapu ap, ayala-ayala kilapu ati weik kanye pia tenelamukce dololamuk.
Raja Manasye el winilamuk ning ap, pil dolamuk ning ap nirya ara, Allah Yahweh el dam malye weik ulamukba, Allah arye, ‘Aning ara, na like,’ tenelamuk. Ara, Israel nang Mesir mutuku arye batakuka, Kanaan mutuku weknuyik ati, Kanaan mutuku ulamik nang ati, Allah Yahweh arye, ‘Yuk mutuku binamak,’ tenebuka ati, yakuka dopkwetebukba biyik bukni, sik amutuku nang arye, malye ulamik ninguk, binuka dukdongobuka, aninguk talebuka ulamuk.
Tonda, Salomo birye dan mutuku do nirya, amutuku-amutuku noutam ulamik ninye ati, “Narye arena kumce, na pil talye dopnululume, nyapnyeura, apiluk donamlume,” nyabuka nyalamukba, el patalamuk touk, weik ikin pil dilamukak, apil dolamik mutuku ninye ara ani. Ara, Amori tam ulamik ninye ap, Het tam ulamik ninye ap, Feris tam ulamik ninye ap, Hewi tam ulamik ninye ap, Yebus tam ulamik ninye ap, anang-anang nirya ara, Salomo el pil ati, talye pil dolamik. Ara, minop talak Israel mutuku noutam, aninye yala yuk-yuk daulamik bukni, sik Israel nang arye, Kanaan tam nirya malye kibuka obik talak ara, aninye obuka sirya kum dakik. Sik aninye ara, ton tam nang ara tuba kam ulamik ati ara, Raja Salomo aryuk pil dilamuk ak, aninye ara dengna ton dolona kumce, el pil talyeuk dolamik. Sik ayala ninye ara, Kanaan arye deiamukak deipdanin yangalamik ninye ulamikbuk, sik Israel ninye, amutuku biyikce, amutuku ulamik ninye nirya binuka obikce, ton tuba batakamik nang kam ulamik ninye ati, weik ikin pil dilamukak dolamik. Sik aninye ara wini talak babye, sik Israel ninye sik pil melibuka don nang unyake.
Wininmek talak ara, Elam yala nang, el si Yehiel bukni, el mi Sekanya birye, Esra biti nyabuk. “Nunda aunmab mutuku noutam ulamik nang arye, deiamik kilapu dobuka donyaba deice arye, akunuma nun ni Allah ati, batakuburye, el dam akunum malye kilinyabe. Dipkoprop aning akunum wininyaba ara, nun Israel nang ara, lo ton tuba aupnamsila ati, nun malye ning batakibirye, nun ni Allah, el dam tamubuka yatibye.
Tonda, ayupu noutam arye, yupu ton nyabuk. “Talye kum nyapsine. ‘Sik aryuk binamabe,’ tenena meme. Yatanye do nirya, like winilye sum arye Yerusalem mutuku bulubuka yangana ati, lo arepmabiba, asukum kum yanamak nang ara, sik ulamle ning ap, sik tuku ap, sikce talilamikce ning yuk-yuk ning nirya ap ara, alubuka dopropnamabe. Tonda, sik anang ati ara, ‘Anggunda, Yerusalem mutuku noutam ara, pia kum unamlume. Nun Israel yala nang unamabak arye, yakdonokipyopura anggun ap, neika pia kum unamabe,’ nyapdeipnamsiabe. Aning ara, nun Israel yala nang ati, deiyok talibuka, ninye deiyok kibuka unyap nang arye, ‘Akunuma, winipnamabe,’ nyapdeibupu touk wininamabe.” Esra birye nyapdeibukba, anyasik yupu bobinuka laka nyalbanmekba, aulamik nang nirya kekebik.
Atalak narye dinmasiba, Yahudi yala nang weik arye yuk mutuku Asdod mutuku kilapu ap, Amon mutuku kilapu ap, Moab mutuku kilapu ap, dolalamikba eipse. Allah arye, “Yuk mutuku kilapu ton bobuka kum dolanamlume. Israel yala kilapu uk dolanamlume,” nyapdeiamsuk bukni, yuk mutuku kilapu uk dolamika ak eipse.
Winibukopura, Sanbalat ap, Tobia ap, sik Arab nang ap, Amon mutuku nang ap, Asdod mutuku nang nirya arye, kekenmekba, yuk nang arye, “Yerusalem asik keil poka ara teleb kibuka donmake, tonda keil poka kin-kin uamuk ning nirya ara, lipsisikuka memeldongonmake,” nyabikba, anang kekebikce, pia yu kanye weik bobik.
Atalak ara, Israel yala ninye arye, ‘Nun malye ulamupu ning lak kibuka nyanamabe’ tenen, yuk mutuku yala nang ap, ansinibuka kum unmek. Yuk mutuku nang ara, bokuka wiliprobik. Atalak ara, Israel ninye nirya tikikce, sik malye winilamik ning ati, lak nyanmek. Tonda, sik apu yapu malye winilamik ning ap ati, lak kibuka laka lenmek.
Allah Yahweh arye, anggun apu yapu punun nang ati, “Kanaan mutuku ara, Het yala nang ap, Amori yala nang ap, Kanaan yala nang ap, tonda Yebus yala nang ap, sik nirya unyak mutuku uk, dipkoprob arepnamsine,” nyabuka, nyalin yupu deice arye nyapdeiamsuke. Amutuku noutam ara aning-aning nirya weik aubuk mutuku ati, ara, mong mek ap, sapi basam moum yung ap, tonda, pia teleb mirin tuku ap, aning-aning nirya weik aubuk mutuku ati, “Pia teleb mutuku ara, dipkoprob arepnamsine,” nyabuka, nyalin yupu deice arye nyapdeiamsuke. Ati amutuku noutam akunum bimunyopura, aketing tamun, aketing tamun nirya, wala si Abib wala akunum uplyopura, tanggal satu sum ara anggunce, ‘Nunda Mesir mutuku ulamube bukni, Allah Yahweh arye boyanamsuk ati, atalak ara, nun weik mambul sum anyeʼ tenen, weik kwalina kwalipmunce, Allah Yahweh el siuk erenamlume.
Na pil donanye malaikat arye, anggun dam tiklirye, menekuka baliba, el aminyan tam balamunya ani, yuk mutuku ninye unyak mutuku bobinamsile. Ara, sik Amori yala ninye ap, Het yala ninye ap, Feris yala ninye ap, Kanaan mutuku ninye ap, Hewi yala ninye ap, tonda Yebus yala ninye ap, sik unyak mutuku binuka weknamlum talak ara, narye, sik aninye nirya opnirye, kum daneipnamne. Winipnyopura, anggun Israel ninye arye, amutuku nirya talibuka unamlume.
“An ap, nun ap, neika kum bibyopura, yata wiribipya deice arye, yuk ninye eipsikirye, ‘E Musa ap, sik Israel ninye ap ara, Allah el kanye sik deice delilule’ tenen, kel kipsiting do? Aning atonun, na ap Israel nang ap, an ap, neika kum bibyopura, yata wiribuka yuk ninye nirya arye, ‘E sik Israel ninye ara, dipkoprob Allah el ‘Naʼ tenen, nang unyake’ tenen, kel kipsiting do? Sikce nun nirya ati, ‘Kume, anang babye talye ninye dem uka. Sikda, tukwak unyak ninye, yuk yala ninye nirya atonun unyake. Sikda ninye unyak noutamak arye, weik mambul ninye dipkoprob kum unyake. Sikda talye ninye uka,’ tenepnamsiyake.” Musa birye nyabuk.
Wini talak ara, Babel mutuku batakmumce, anggun mutuku koproba tamubuka yanamlume. Allah Yahweh el si eren aik pil don ning nirya dobuka bobinamik ning ara, tuba tamubuka boyanamlulume. Aning dobuka boyanamlum nang ara, Allah arye, ‘Aning ara, malye ning anya arye, aning talina meme,’ nyalamuk ning aning-aning nirya ara, anggun ton kum talinamlulume. Winipmunce, anggun Babel mutuku arye tamubuka Yerusalem mutuku yanumunye talak ara, anggun nong nirya mek kekuka teleb kilanamlulume.
Wininmekba, yuk nang eibikce, laka nyalbanmekba, Yehuda mutuku yuk-yuk ninye deiyok kibuka, taleamik nang nirya, sik dam binuka nyabikba, kekebikce, sik amutuku nirya ninye deiyoknye, Raja el aik dam arye batakuka, Yerusalem mutuku noutamak, Allah el si eren aik dam yayik. Yayikce, anyaik bublan el si ara, Winiryuk Bisik Bublan nyalamik bublan dam, deiyok nang bulamak deice yanuka bukik.
Tonda, ayupu ton nyapnulyame. Ara, Mesir mutuku ulamlum talak, Mesir mutuku nang winilamik ning nirya ara, anggunce elilalum ning ara, ‘Nun ton winipdenuyabeʼ tenen, kum wininamlume. Aning atonun, tonda narye, Mesir mutuku arye bobuka, anggun biti boyanuka, Kanaan mutuku boyanamsise. Ati, wini talak ara, ‘E, Kanaan mutuku nang ulamice ning ton, winipdenuyabeʼ tenen, pia kum wininamlume. Ara, Kanaan mutuku deiyok nang arye, ‘Aning ara, winina teleb uka. Aning ara, kum wininamlume,” nyabikceura, Kanaan mutuku nang kekebikirye, pia malye ning winilamikce ning ara, anggun Israel nang arye, pia kum wininamlume.
Anggun Yehuda yala ninye ap, Israel yala-yala ninye nirya ap, tonda Yerusalem mutuku noutamak ululum ninye ap, anggun nirya arye malye weik winilulume. Malye umunya deice arye, Allah Yahweh el si eren aik ati, malye ulilulume. Anyaik ara, ‘Pia mambul aik,’ tenenyap bukni, anggun malye umunya deice arye, anyaik ati pia malye ulilulume. Anggunce malye winimunya ara, ani. Ara, anggun amutuku umunye nang arye, Isa Mutuku Dongonye siuk erenyak mutuku kilapu dolalulume. Akilapu taruk mourulamunya deice arye, Allah Yahweh el si eren aik pum tam, noutamak akunum malye kililalulume. Ati Allah arye, ‘Aning ara wininamlulume, aning ara kum wininamlulume,’ nyabuka, nyalin yupu nyapdeiamuk ning ara, akunum yaniltalulume.
Israel ninye ara, na amutuku dup binuka welebuka weik keil deice tikna arye dinmanabuk, sik Israel ninye ounmakbuk eipne. Narye eipman ning ara, sik Israel ninye ara, sik yuk unyake. Yuk mutuku ninye ap ansinibuka neika kum unyake. Israel ninye sik kanye ara, ‘Nunda pia yuk ninye unyaba anya arye, im sirya, mutuku sirya nirya talye unyak ninye atonun kum unyabe,’ tenenyaka ati, sik yuk unyake. Aning nirya eipmane.
Nyabuka ati, atalak ara, Musa ap, sik yuk Israel nang nirya ap, Allah Yahweh el ap, ninye ap eldana ati, tonda el si erena ap ati, tenda arye doltakan aik domik ning, anyaik bublan dam tikilyayikce, engebik. Aengemik talak ara, Israelnye tonok ton, ‘Aning ara mambul kume,’ tenebukce, amutuku kilapu tonok, ara Midian mutuku kilapu talibukce, Musa ap, Israel nang ap, malye kanye bobuka, engenmekakuk boyayuk. Ara, Allah el si erena ati, domik doltakan aik bublan dam boyayuk.
Ura, anggun ni koproba Allah Yahweh arye, anggunti, kintinip deiamsuk mutuku, Kanaan mutuku arepsiliba, dopropmunce, amutuku noutamak binuka unamlum talak nirya ara, sik amutuku noutamak unyak ninye arye, malye winin ninguk talibuka, wininyak touk, anggunce pia kum wininamlulume. Ara, sik amutuku ninye, min arye talibuka malye-malye winilamikce ning, eipmunce, aning ati, ‘Se, sik amutuku unyak ninye arye, malye winilamice ning, nun babye aning ton kel kiptibye’ tenena ara, pia meme. Na Allah ati dib kum tenenyak ninye arye, talye ning puturubuka deibikirye, amalye mem ninguk, talibuka winilamice ning ara, tonda yuk malye mem ning winilamice ning ara, anggun Israel ninye arye, ton binuka talibuka, pia kum wininamlulume. Aning ara, pia meme nyapsine.
Ati ara, sik amutuku nang arye deibikiba, deipnamak nang, anang arye deipnamak nang ton, doyanamle keting tamun, ninye dika winilye ning kiplirye, anyubuka dotalak deipnamak nang ara, sikda Israel nang arye, Allah Yahweh el si erena ati, el dam yanganamak talak ara, sik anang babye, ansinibuka yanganamnyake. Aning ara, pia tuba wininamlume.
Musa birye, Israel ninye ati nyabuk. “Allah arye, ‘Teleb mutuku arepnamsine,’ nyapdeiamuk touk, melipsilyopura, amutuku binuka unamlulume. Amutuku bimunyopura, amutuku noutamak unyak nang, anggun mal olan nang nirya eipnamlume. Bukni, Allah el melipsilya deice arye, aninye ati, obuka sirya dakmunce, aninye ati yakmunyeba, yuk mutuku bindopnamake. Aninye ara, yala yuk-yuk, tekbarye unyake. Anggun Israel ninye, anggun mikip ara, mitik tonune. Atekbarye yala nang ara, sik mikip weik nang unyake. Atekbarye yala nang, sik si ara ani. Het yala nang ap, Girgasi yala nang ap, Amori yala nang ap, Kanaan yala nang ap, Feris yala nang ap, Hewi yala nang ap, Yebus yala nang ap nirya ara, anggun Israel nang arye binuka opmunce, amutuku noutamak arye, yaknamlulume.”
Aning ara, talye ati kum nyapsine. Winipmanto ara, anggun Israel nang arye, Allah nyapdeiamsuk yupu yanipmunyak arye, ‘Kanaan mutuku tuba unamak nang ap, neika kum unamlume,’ nyabuk ning ara, anggunce diba kum teneplum arye, amutuku nang ap, neika umunce, sik kilapu ton dopropmunyeura, aning ara, pia malye ning nyapsine. Aning atouk, sik Kanaan mutuku tuba unamak nang, sik sal arye, anggun Israel nang arye, deipnalum kilmapu dobikirye, neika ukceura, aning babye, pia malye ning nyapsine. Anggun ap, neika ansinibuka umunye ning ara, Anggunce, Kanaan mutuku kilapu ninye ap, dobuka unamabeʼ tenen ning ati, nyapsine.
ကြော်ငြာတွေ