Esra 7:5 - Eipomek5 Buhki el li koproba si ara, Abisua. Abisua el li koproba si ara, Pineas. Pineas el li koproba si ara, Eleasar. Eleasar el li koproba si ara, Harun. Harun elda, Allah el si eren aik pum tam pil melibuka don nang, sik weik deiyoknye ulamuk. Anang nirya ara, Esra el apu yapu nang ulamik. အခန်းကိုကြည့်ပါ။ |
Esra 7:5
25 ပူးပေါင်းရင်းမြစ်များ
Tonda, sik imam-imam nang, sik weik deiyoknye, el si Amarya ara, anggun deice tam deiyoknye unamsile. Yata winin ning do nirya, Allah Yahweh el dam yupu lipsisikuka bokolinalamlum ning nirya ara, anye birye melinamsile. Aning atouk, amutuku taleamuk deiyoknye, Raja biti aning nirya ara, Yehuda yala nang, sik deiyoknye Zebaja, elce anggun deiyoknye uplirye, melinamsile. Zebaja el li bira, Ismael ulamuk. Tonda, sik Lewi yala nang arye, sik deice tam kina ati, sik deiyok nang atonun unamsiyake. Sikce talipsikcak arye, ‘Aning ara winipnulume nyan yupu ara nyanamsiake. Ati ara, narye sik yupu bokolina deiyok nang wibuka deipmasin nang nirya ara, Ilil una kumce, anggunce kanye talima eren deice, mikip weik arye apil talebuka unamlume. Teleb kibuka umunyeura, aning winibikce nang ati, Allah Yahweh ara, anggun ap neika unamlume. Elce anggun kanye talima noutam arye melinamsile.” Yosafat birye, sik Yudea tam yupu lipsisikuka bokolina deiyok nang ati nyabuk.
Kusta suse telibuk ati, imam Asarya ap, sik yuk imam nang ap, sikce el awinibuk ning ati eibikce, weik min lopman kum suse, el si ara kusta, el asok deice ubuk ati, sik anang nirya arye Uzia biti, “Se, aning wamlye nang ara, anyaik pum tam malye kilinyaka ati, anyaik ara pia kum wektinge. Ati, anda Allah si eren aik pum tam arye minpola bai tam bilyame!” nyabik. Nyabikura, el adiparyuk bai tam biyuk. Weik min lopman kum suse, ilil weik suse el asok deice dilul ning deiyok ara, Allah Yahweh arye el wenena ati, el nong deice ikin ning deibuk. Ara, el bikna atia. Ati ara, el babye, ‘Se anyaik pum tam kum unamne,’ tenebukce, minpola anyaik batakuka bai biyuk.
Ura, Allah el si Yahweh arye Israel ninye ati bico tenelamukce, melilamuk. Minop talak ara, Allah arye Musa biti, ‘Wininamlulume, aning ara ton kum wininamlume,’ nyapdeiamukba, Musa birye sekeiamuk. Musa birye sekeiamuk yupu nirya ara, Esra weik kel bikamuk anya arye, Allah yupu peterena deiyoknye ulamuk. Elda Persia mutuku bukni, provinsi Babel mutuku ulamuka ani, Yerusalem mutuku tuba tamubuka yayuk. Allah el si Yahweh arye, el mikip weik Esra biti arebukce weik arye meliamukba, pia telebnye ulamuka anya arye, Persia ninye deiyoknye Raja Artahsasta birye, Esra morolamuk ning nirya urtalya arelamuk.
Harun birye deibuknye, el si Eleasar. Eleasar birye domuk kil ara, sal mapu Putiel birye deibuk mi ara, kil dobuk. Eleasar ap, Putiel yala kil ap, tonoknye deiprik. Anye el si ara, Pihehas ulamuk. Ura, asukum arye deice tam ara, Lewi yala nang arye deibikba, dadeipdanin, yangalamik nang ara, sik si akunum sekdeipne.
Nyabukura, Musa birye, Harun ap, Harun el mapu bitinye ara, Eleasar ap, Itamar ap, sik nirya ati, ayupu nyabuk. “Din ning, roti kwaning dana deiyok ning, el si ara, gandum do, tepung do, Allah Yahweh ati, yanuka arepmace ning ton, mitik tonun tuba aupmalye ning ara, anggun imam-imam nang aryuk dobuka dinamlume. Ara, kam ning kum bukni, roti kwaning dana deiyok ning, Israel nang arye, Allah ati arelamak ning ara, uku dongopnalum bukni, tuba aupnamle ning ara, angguncuk dinamlume. Tonda, atepung do, gandum do, yakong do, aning dopropmunyopura, roti kwaning nena deiyok ning, el si ragi tabakna kum ning ton, aninguk dinamlume. Aroti kwaning akunum dabuka, kintinip deipmunyopura, akambing ato ning obuka, uku dongona ati, mesba kintinibuka deibikak, balye tamuk bindeibuka dinamlume. “Adin ning ara, Allah el ning koproba, pia lek ninguk ulula ati, talyeuk binuka dina meme. Mesba damuk binuka, dina telebe,” nyapsine.
Tonda, Musa birye Harun ap, el mapu ap ati, asipdeyuk. “Israel nang, sik malye wininyak ning ati, ‘Allah arye bikeipsilirye, nun malnye winin ning nirya pununa ati, Allah arye kilibuka kum daneipnamsilʼ tenen, dobuka boyanmangu kambing basam ara, yata wiripnamalum do?” nyabuka asipdeyuk. Nyabuka asipdeyukba, Harun birye tamubuka nyabuk. “Kume, aning ara, Eleaser ap, Itamar ap, sikce akambing obuka, uku dongopmarunge. Uku arye akunum dibuk,” nyabuk. Nyabukopura, Musa ayupu kekebukce, yu weik ubukba, sik abitinye nang ati, wabukce nyabuk.
Atalak ara, Musa birye, Harun el mapu bitinye nang tuba kam unmarik nang ara, sik si Eleasar ap, Itamar ap, tonda Harun ap, sik nirya ati, nyabuk. “Ura, nun Israel nang arye, nun kwitcapu nang dibikiba, winilamap touk kum winipnamlume. Ara, sikda, anggun kwitcapu, adipmarak nang bitinye engena ati, winirumce, ‘Seʼ tenen, malye kanye dobuka, anggun ongomunye baju kwilikmunce, kum engennamlume. Tonda, anggun potong kona kumce, batakmunyeba, kum duk mounamsile. Anyapmasin ning ara, talye ati kum nyapsine. Deiyok ara, anggun kayapu nang arye, pia malye ning winipmarik ati, Allah arye wenebuka obuka ati, anggunce na nyapman yupu kum kekepmunyopura, anggun winilye ap, Israel nang nirya ap, nun nirya babye, adiparyuk dipnamabe. Tonda, anggunce na nyapmasin yupu kum kekepmunyopura, Allah Yahweh arye nun Israel nang nirya ati, yu tenepnamsile. Bukni, anggun yala nang ap, sik yuk Israel nang yala-yala nirya ara, sik adipmarak nang ati, ‘Seʼ tenen, malye kanye bobuka ukirye, engena ara telebe uka. Adipmarak nang ara, talye kum dipmarak bukni, Allah Yahweh arye, uku dopkwepmalba, dipmala deice arye dipmarake.
Zelafehat birye deiamuk kilapu pamubarye nirya ara, Musa ap, imam Eleasar ap, tonda Israel yala nang yuk-yuk ulamik touk, sik deiyok kibuka una ati, wipdeiamik nang ap, sik nirya bulubuka, Allah si erena ati, domik aik bublan dam wekmek sukumuk, akilapu babye asukumuk biyikce, Musa ap, Eleasar ap, sik dam tikikce nyabik.
Lewi yala nang kan-kan bukni, ‘Sik deiyok nang unamakʼ tenen, wipdeibik nang, sik deice tam weik deiyoknye bira, Eleasar ulamuk. Eleasar bira, Harun el mi ulamuk ati, Allah si eren aik pum tam, pia lek weik aik ati, pil talibuka dolamik nang ati, ‘Anang ara, pil teleb ubuka donamakʼ tenen, sik kalekina deiyoknye ulamuk.
Aning akunum arebikura, Musa ap, imam Eleasar ap, sik bitinye arye ayin talina deiyok-deiyok nang nirya, seribu nang talilamik deiyok nang ap, seratus nang talilamik deiyok nang ap arye arebik ning ara, doprikakarye Allah ap, ninye ap, ansinina ati, tia domik tenda aik domik ning noutam dobuka deiprik. Ara, aning dobuka binimnyeura, nun ni koproba Allah Yahweh arye, nun Israel yala nang nirya ati, tuba teneplisirye, pia melinamsilʼ tenen, lak kilina ati, aning bobinuka, Allah el si eren aik pum tam deiprik.
Musa birye sik yala yuk-yuk ulamik touk, ton yala yuk, ton yala yuk bukni, “Sik yala noutam arye, seribu (1.000) nang wibuka kintinipnamlume,” nyabukba, winibik. Ara, “Sik Israel nang yala-yala yuk aululum touk, seribu nang wibuka deipnulyame,” nyabukba kintinibik. Sik Midian nang olbana ati ara, imamnye, Eliazar el mi Pineas ap, neika mal olalbana ati kintinibik. Atalak ara, Pineas arye Allah el pia teleb, kurun aik pum tam deiamik ning ap, tonda, ‘Yuk mutuku mal olan nang olyanuyak nyana ati, bung-bung nyan ning, el si terompet ap talibuk. Atalibuk ning ara, olalban talak bikilina ati ara, talibukce kintinibuk.
Ura, yatanye, el kanye aryuk, ‘Narye Allah ap, ninye ap ansinilina pil deiyoknye unamne,’ tenepturye, apil talye luparabuka doptu do? Kume, aning kum wininyake. Aning ara, kum winipmanto ati, Allah arye, ‘Harun biti apil donamle’ tenen, Harun yukubukce wipdeibukba, pil dolamuk touk, Allah arye tenelye nanguk, yukuplyopura, anang arye apil talibuka donyake.
Asekuk laka nyan yupu noutam ara, Kanaan mutuku noutam bukni, sik Israel ninye arye, binuka doprobikce, sik mutuku koproba, kibuka ulamik ning ati sekupe. Amutuku-amutuku bokuka arebika deiyok nang ara, imam Eliazar ap, ninye si Nun, elce deiamuk mi Yosua ap, tonda Israel nang yala yuk-yuk, talibuka ulamik deiyok-deiyok nang ap, sik nirya arye, amutuku tuku nirya bokuka arebikura, sik Israel yala nang weik tonun doprobikce, sik mutuku koproba kibuka ulamik. Amutuku arebik ning nirya ara, Kanaan mutuku noutam bukni, Yordan mek otam uamukba, keting kumulban tam mutuku anyak arebik.
Sik Israel nang kitinibikopura, ananguk, sik Israel yala nang arye, imam Eleasar, elce deiamuk mi, el si Pineas, elce yupu bobuka, sik Ruben yala nang ap, Gad yala nang ap, tonda Manasye yala nang, dan tam nang ati, ‘Pinehas birye, sik dam nyalbinamalʼ tenen, el mapu koproba, sik Israel nang arye, kintinip deibik. Sik ayala nang ara, Yordan mek duman bukni, keting panalyangan tam, ‘Gilead mutuku aunmek sukumak bilirye, lake nyapnamleʼ tenen, wipdeibik.
Kekebikopura, Eleasar el deiamuk mi, imam Pineas birye, Yordan mek koubuka, otam keting panalyangan tam ulamik nang, sik Ruben yala nang ap, Gad yala nang ap, tonda Manasye yala nang bukni, dana tam nang ap ati nyabuk. “Wini talak ara, nunce akunum kel bikupe. Allah ara, nun dam usulule. Nun nirya ara, el ap neika unyaba ati, elce nun mal ton kum pipsutue. Ara, nun kayapu nang, anggunce Allah ap, el yupu ap ati, kum yanipmalumce, malye kum kipmalume. Anggunda, amesba dobuka deipmaluma ara, ‘Allah arye wenebuka opnamasilʼ tenen, ilil upmasu bukni, winira nun bikmabe. Anggunda, nun kayapu nang arye, ayupu laka nyapmasuluma deice arye, nun Israel yala nang nirya ati, lyelon ning atonun akunum winipmasulume,” nyabuk.
Ati, sik Israel yala nang nirya arye, Allah Yahweh ati, “Se na nie, nun yata winipmap do?” nyabuka, asipdeyikce morobik. Tonda, sikce asipdeyik yupu ara, “Allah Yahweh, nunda ton ap adiparyuk nun kayapu nang, sik Benyamin yala nang ati mal olalbinamap do, kum do? Akumopura, nunce, ‘Mal olalbana ara daupmalye! ‘Tonap kum olanamabe,’ nyapnuyap do, kum do? Na nie, ance nyapsiminyeba kekenuyabe,” nyabuka, asipdeyikce morobik. Nyabuka asipdeyikba, Allah Yahweh arye tamubuka nyabuk. “Kume, anggunda adiparyuk sik Benyamin yala anang ati, ambusum olalbinamalume! Winipmunyeba, ambusum ara, narye anggunti na mikip arepsinyeura, obuka sirya dakna deiyok ning arisinyeba, dipkoprob anggunce Benyamin yala nang ati, obuka sirya daknamalume,” nyabuk.
ကြော်ငြာတွေ