Ura, Allah el si eren aik dopnamika ati, Yerusalem mutuku tamubuka biyikopura, daulamika ani, keting tamun bitinye noutamak bukni, wala bitinye akunum ubuk. Akunum biyikopura, Yerusalem mutuku Allah si eren aik tuba tamubuka dopnuyik talak ara, Sealtiel el mi Zerubabel ap, Yosadak el mi Yesua ap, sik kwit capu nang nirya ap, ton yuk nang nirya ap, Yerusalem mutuku biyikce, anyaik dona ati, pil deiyok koubik. Ura, anang noutamak ara, Allah el aik pum pil melibuka dona deiyok nang ulamik. Tonda, sik melin nang, Lewi yala nang ap, Yerusalem biyik. Anang nirya ara, minop talak arye sik Babel mutuku nang arye, Israel ninye obikce, anang nirya bobuka, Babel mutuku bobinmikba, keting tamun weika arye daulamika ani, wini talak ara Babel mutuku batakuka, Yerusalem mutuku tuba tamubuka biyik. Allah el si Yahweh, el aik pum pil melibuka dona deiyok nang arye, ‘Anyaik don pil yupu bokna deiyok nang ubikirye, pil melildanamak’ tenen, Lewi yala nang wipdeibik. Sikce wipdeibik nang ara, keting tamun dua puluh tahun deice tam ulamik nanguk wibik. Akunum wipdeibikba, anang arye Allah el si Yahweh, el si eren aik pil dolamik talak ara, deiyok nang kibuka, ‘Pil teleb kibuka donyak do?’ tenen, dipra balamik.
Esra 4:24 - Eipomek24 Israel nang arye, apil batakikopura, Allah si eren aik lipsisikuka pil dona babye, adiparyuk batakik. Ara, minop talak yuk mutuku yu nang arye, ulubuka sice bultaklamik ning ara, tuba lipsisikuka pil dona kum wamik. Keting tamun ouku weik, talye daulamika ani, aminyan talak ara, Persia mutuku ninye deiyoknye, Raja Artasasta dibukba, el punubuknye, el si ara Raja Darius, ninye deiyoknye kibuka tikukce, Persia mutuku nirya taleamuka ani, keting tamun bitinye akunum ubukopura, Raja Darius birye, “Telebe, Yerusalem mutuku tuba tonap lipsisikuka dolbinamlume,” nyabukopura, sik Israel yala nang arye, Allah si eren aik tuba tonap deiyok koubikce, lipsisikuka pil tonap dolamik. အခန်းကိုကြည့်ပါ။ |
Esra 4:24
19 ပူးပေါင်းရင်းမြစ်များ
Nyabukopura, asurat dobuka, Efrat mek dara tam binuka arebikopura, ninye deiyoknye, el si ara Gubenur Rehum ap, el Sekretaris pil donanye, Simsai ap, sik kwitcapu nirya ap, akunum kekebikopura, adiparyuk sikce Yerusalem weik asik dam bikbik abuka biyik. Yerusalem mutuku noutam ulamik Israel yala nang ati, ayupu laka nyabik. “Persia mutuku talelul ninye deiyoknye, Raja Artasasta, el si deice arye nyapsiabe. Anggun adiparyuk, anyaik lipsisikuka pil dona bataklulume!” Ayupu nyabuka, weik tonun nyabikopura, Israel yala nang arye, ‘Seʼ tenen, Yerusalem mutuku noutam domik asik lipsisikuka donmek pil ara, adiparyuk batakik.
Tonda, Persia mutuku ninye deiyoknye, el si Kores birye, amutuku nirya taleamuk talak noutamak ara, sik Yerusalem mutuku dana-dana tam ulamik nang, yuk yala nang arye, ‘Israel ninye, sik yupu sektibiba, apil ara, lik uplyopura, bataktinge,’ tenelamikce, ninye ton uang yo bok arebukba doprobikce, ‘Israel ninye arye, anyaik pil donmaka ara, bataktinge,’ tenepmaba anya arye, anggunce tenepce, malye yupu nyapmunba, “Israel ninye mangkau arye talye kekebikirye, aninguk winibikcopura, apil sirya kum dakmanto upnamake,” nyapdeibikba, anang arye, malye yupu nyalbalamik. Winilamika ani, tuba winilamik bukni, Raja Kores dibukba, el pil dolamuk ning ati, punubuknye, el si Darius birye, Persia mutuku talalyamuk. Atalak noutamak nirya winilamik.
Yerusalem dana-dana mutuku tam ulamik nang, yuk yala nang arye, malye kanye bobikce, Persia mutuku weik deiyoknye, Raja Artasasta biti, surat sekdeibikba, anye birye Israel ninye ak, ‘Anyaik melibuka don pil bataklulume,’ nyapdeibukba, batakik. Bukni, talye daulamika ani, yuknye el pununa ati, Darius tikukce, Persia mutuku taleamukba, keting tamun bitinye akunum ubukura, Allah el yupu laka nyana deiyok nang, Hagai ap, Zakaria ap arye, sik Israel ninye ati, “Israel ninye talibuka melisulul Allah, el si deice arye nyapname,” nyabuka, yupu weik nyalamrikba, Israel ninye kekebikce, tonap anyaik pil deiyok koubuka dopnin balamik. Ara, Yehuda tam ap, Yerusalem mutuku noutamak ap, ulamik nang ati nyabik. Tonda, Hagai ara, ninye si Ido, el tam nang arye deiamiknye.
Nyabuka asipdeyikce, ayupu deice wenebik bukni, Allah arye, sik Israel yala nang, sik deiyok kibuka ulamik nang ati, ‘Yuk nang arye malye kibicak’ tenen, melibuka kaliknauk ulamuka ati, sik Israel deiyok nang arye, sik Gubenur Tatenai tam nang nyabik yupu kekebik bukni, ilil una kumce, anyaik lipsisikuka pil tuba donauk ulamik. Wininmeka ani, ati ara sik dam yanuka wenepmek nang arye, Persia tam ninye deiyoknye, el si Raja Darius biti, aning nirya laka nyana ati, surat sekuka dopkwetebikce nyabik. “Kume naio, nunda Yehuda noutam Yerusalem mutuku dilbipuba, sik Israel nang arye, sik arye si erenyak Allah ati, el si erena aik tuba tonap lipsisikuka donmake. Wininmaka ati, ‘Nunda, yata wiripnamap do?’ tenen, asipkiyabe,” nyabuka, surat sekuka, Raja Darius biti dopkwetebik. Asurat dopdeibikce, sikda, ‘Kume, ninye deiyoknye Darius birye, surat ton seklirye, nun tam tamubuka, kamun dopdeipsituopda, yupu ton ap kum nyapnamyabe,’ tenebik.
Ura atalak ara, yuknye erepdeibikba, tikukce Persia mutuku tam nirya taleamuk ninye deiyoknye, el si Darius birye nyapdeibukba, minop talak Raja Kores arye yupu nyapdeibukba, sekuka deiamik buku, ‘Dan unmal do?’ tenen, provinsi Babel mutuku nang dekena weik ning, delin aik pum arye, deiamikak nirya, moubuka bita dipdenin biyik.
Ura, sikce meliamikba, Israel yala wisi-wisi nang ap, sik amu tam pil dolamik nang ap, sik nirya arye pia dukdongopbuka dopnin balamika ani, Allah el si eren aik nirya adiparyuk dobikce sirya dakik. Ara, Allah arye Israel ninye ati, “Wininamlume,” nyamuk ning ap, tonda Persia mutuku ninye deiyok nang Raja Kores ap, tonda aminyan talak Raja Darius ap, anyapce aminyan talak Raja Artasasta ap arye, sik tam nang ati, “Winibuka melinamlume,” nyapdeiamik touk, melilamik. Tonda, Allah el yupu laka nyalamrik nang, nabi Hagai ap, Ido yala nang arye deiamiknye nabi Zakaria ap arye, Allah el yupu deice arye, “Winibuka unamlulume,” nyabuka peterelamdika deice arye, sik Israel yala ninye, sik ning nirya teleb upnin balamik.
Ninye dopdeipsirye, nyapse. “Anang dam bimince, ayupu nyapnulyame. ‘Wini talak, nara weik mambul pil donuna anya arye, anggun yupu talipnamalumak ara, kum yanamane. Aning ara talye ati kum nyapne. ‘Apil batakuka yupu talinak yanyopura, pil dobuka sirya kum daknyak’ tenen, kum yanamane,’ nyabuka laka nyalbinulame,” nyapse.
Na Nehemia birye utenepse ning ara ani. Sanbalat ap, el kayapu nang ap arye utenenyake. ‘Sik Israel ninye ara, nun yupu kekebikirye, ilil weik upliba, sik mikip ara, mitang asa ubicopura, apil donyak ning ara bataknamak’ tenen, winipdese. Bukni, narye aninye ati, ilil kum tenepse. Nun ni Allah ati moropsirye nyapse. “Na ni Allah ance nati mikip arepniminba, pil teleb ubuka donamne,” nyabuka moropse.
Na kanye ara, ance min kum bikamluma ati, aning laka nyapnukine. Ara ani. Talye daunyak nang arye, sik pia malye unyak nang ati eibikirye, ‘Se Sikda telebeʼ tenen, sikti, pinpin kanye bobuka unyak ning ara, dipkoprob tia talak atibuk ulule. Tonda, ninye arye Allah ati, ‘Allah ara nun like, elce nyasulul yupu ara, yaninauk unamabe,’ tenenyakce, malye-malyeuk wininyak ninye ara, sik kanye deibuka unyak talak ara, lo mitik tonun, like tonok talak ulule. Winipmanto ara, ninye arye asing kuplam-kuplam alamak atonun ulule. Anang ara, kum winipnamaka ati nyapkine.
Narye anti nyapnukin yupu ara, dipkoprob nong upnamle ninguk nyapnukine. Ara, ani. Yuk-yuk arye yanuka, deiyok kibuka, Persia mutuku talinamak bukni, winilye Raja ap arye, Persia mutuku talibikirye, Raja kibuka unamake. Sik yuk-yuk bukni, winilye nang arye, Persia mutuku talibuka daulamikca ani, aminyan ara, Raja dumunye ton tiklirye, anang punuplyopura, Persia mutuku uk talipnamle. Min yuma talak, Persia mutuku talinamaka deiyok nang, sik winilye Raja nang ara, mitik bona talin nang unamak bukni, el adumunye Raja bira, bona weik talinanye unamle. Anye el talinamle ning, pia weik uplya deice arye, aminyan talak ara, mikip ton ap upliba, elce, ‘Winipnamabe,’ nyapnamle yupu deice arye, deiyok kiplyeba, yuk mutuku nang, dana-dana tam unyak nang weik tonun, el yupu kekebikirye, sik ap, el ap, Yunani mutuku talipnamle Raja ati, obuka sirya daknamake.
Anyapkin ning ara, ance sekmince, moubuka kel biknamlyame. Allah arye nyapliba, deiyok nang arye, ‘Yerusalem mutuku noutamak, Allah el si eren aik, tamubuka teleb kibuka dopnamak,’ nyapdeibice talak arye, deiyok koubuka, anyapce nukikirye, Allah arye wipdeipliba, anggun talipnamsil weik deiyoknye ton yanamle talak ara, anoutam talak ara, tekbarye, tujuh kali tujuh (49) talak kipnamle. Winilamica ani, atalak akunum uplyopura, Allah arye wipdeipnamle ninye deiyoknye yanuka talipnamsile. Winiplirye, tonap tabakuka, lo arepnamsil ning ara, enam puluh dua kali tujuh (62 x 7) talak ton (434) kipnamle. Atalak ara, tujuh kali enam puluh dua (62 x 7), ara (434) talak noutamak ara, Yerusalem mutuku aik ap, amutuku bana ati bisik nirya ap, Yerusalem mutuku ongomkanim abuka, dana-dana tam nirya, mek sekuka palipnamak ning ap, aning nirya pil dobikirye, moulinamake. Aning nirya domikirye, moupdeipnamak bukni, apil donamak talak noutamak nirya ara, weik imun kanye deice arye unamake.
Allah Yahweh arye, “Na si eren aik uluplobik ning ara, tuba tamubuka dopnululume,” nyapdeibuk talak ara, Raja Darius birye, ninye deiyoknye kibuka, Persia mutuku ulamik ninye nirya taleamuk talak ara, keting tamun like bitinye kibuk. Aketing tamun deice aryuk, wala ara nakub wala kibuk. Awala deice keting noutam tonok, tanggal 1 kibuk sum ara ani. Asum ara, Allah Yahweh arye, Yehuda mutuku ulamik ninye noutam arye, Gubenur kibuka taleamuknye, el si ara Sealtiel, el mi Zerubabel ap, tonda, Allah el si eren aik noutam talibuka, pil dona deiyok nang, sik imam-imam weik deiyoknye kibuka ulamukce, taleamuknye, el si ara Yosadak, el mi Yosua ap ati, “Sik dam nyalbinulyame,” nyabuka, nabi Hagai dam yanuka nyapdeibuk.
Nabi Hagai birye, sik imam nang ati, nyabuk. Allah Yahweh arye nunti nyapdeipsuk yupu ara, ani. Anggunda, ‘Allah arye aminyan talak wininamle noutam ara, teleb upnamsil do, malye ulinamsil do?’ tenen, na kiklildena ati, umunce, dinauk unamnulume. Minop talak ara, na Allah Yahweh, na si eren aik, ‘Dopnuyap’ tenen, tonok keil babye bobuka, anyaik min kum domik talak, ikin wamsuk ning ati, tuba tamubuka tonap tenipdenamlulume.
Ati asum ara, tanggal dua puluh empat (24), wala ara toupne wala, Raja Darius birye, keting tamun ara, bitinye talepmasil talak arye, diprongobuka, doupnin banamle noutam ara, moubuka tenenamlulume. Ara, na si erena ati dopnamik talak, ayukumna ara, akunum ikuka sirya dakdongoplum talak ara, tuba tamubuka tonap tenenamlulume. Minop talak arye diprongobuka, wini talak noutam ara, kanye imun ning weik ulamsuka ani, tuba usulula anya arye, kanye moubuka tenenamlulume. ‘Yata deiyok ning ati, ikin weik ulamsuk do?’ tenen, moubuka unamlume.
Persia mutuku talibuka ulamuk ninye deiyoknye Raja Darius, atam mutuku taleamuk talak bukni, keting tamun bitinye, wala ara, pinbarye (8) deice ara, Allah Yahweh arye, na Zakaria dam yanuka, ayupu nyapnuke. Ara, na apu Ido, elce deiamuknye, Berekhya, elda na ni koproba arye deipnuknye, nabi Zakaria, Allah arye, nati nyapnuke.