Esra 4:21 - Eipomek

²¹ Anggunce asurat deice arye nyapdeipmanulum yupu ara, dipkoprob nyapdeipmanulume. Ati ara, na Raja Artasasta birye, anggunti, mikip yupu deice arye nyapsine. Anggun Efrat mek kin bukni, otam keting kumulban tam umunye ninye deiyok nang arye, surat ton sekuka, wini talak sik Yerusalem mutuku unyak nang dam dopkwetepnamlume. Asurat noutam arye, ayupu weik tonun nyapdeipnamlume. Ara, ‘Sik Israel yala nang arye, Yerusalem mutuku weik asik domikak ap, amutuku cang keil poka deibuka domikcak ap, lipsisikuka donmalum pil nirya ara, adiparyuk bataklulume! Yerusalem mutuku weik asik nirya ara, anggunce lipsisikuka kum dopnamlume. Aning ara, adiparyuk bataklulume! Naryuk, Raja Artasasta birye, ‘Telebe wini talak anyaik tuba lipsisikuka doptume,’ nyaptinyopura, telebe apil doptume. Bukni, aning min kum nyapsinyopura, anggunce apil dipkoprob pia kum donamlume.’ Nyabuka, surat sekuka dopkwetepnamlume.

Esra 4:21 ပူးပေါင်းရင်းမြစ်များ

Esra 4:20

Nun kele. Minop talak ara, Yerusalem mutuku ap, amutuku dana-dana mutuku ap ara, yuk-yuk dana-dana tam ninye deiyok nang yangalamikce, amutuku ninye nirya obuka, amutuku nirya ap, amutuku noutam tuba ulamik nang ap, taleamik. Raja nang ara, mikip pia weik ulamika ati, weik balamuk mek, el si ara, Efrat mek bukni, otam keting kumulban tam mutuku nirya ara, weik tonun taleamik. Sikce amutuku im sirya, mutuku sirya nirya talilamika ati, amutuku noutam ulamik nang nirya arye, pajak yo bok, yuk-yuk ning nirya bululamikce, sik ninye deiyok Raja nanguk arelamik.

Esra 4:22

Tonda, narye akunum nyapdeipmasin yupu ara, adiparyuk winipnamlume. Anggunce, ‘Yo, aminyan talakuk ayupu laka nyalbinamabe,’ tenena pia kume. Adiparyuk, ayupu bobuka, minopce laka nyalbinamlume. Yata ning ati, talye tunim abuka, daulamepya ani, na talenun mutuku noutam ara, sik aninye arye, talye luparabuka malye kipdeipnamak do? Kume aning ara, kum winipmanto nyapne. Ati, na si deice arye, ayupu laka nyalbinamlume. Nyabuka ninye deiyoknye Raja Artasasta birye, ayupu nyabuka, surat deice arye nyabuka dopkwetebuk. Nyabukopura, asurat dobuka, Efrat mek dara tam binuka arebikopura, ninye deiyoknye, el si ara, Gubenur Rehum ap, el Sekretaris pil donanye, Simsai ap, sik kwitcapu nirya ap, akunum kekebikopura, adiparyuk sikce Yerusalem weik asik dam bikbik abuka biyik. Yerusalem mutuku noutam ulamik Israel yala nang ati, ayupu laka nyabik. “Persia mutuku talelul ninye deiyoknye, Raja Artasasta, el si deice arye nyapsiabe. Anggun adiparyuk, anyaik lipsisikuka pil dona bataklulume!” Ayupu nyabuka, weik tonun nyabikopura, Israel yala nang arye, ‘Se’ tenen, Yerusalem mutuku noutam domik asik lipsisikuka donmek pil ara, adiparyuk batakik.