Esra 3:1 - Eipomek

¹ Ura, Israel ninye Babel mutuku noutamak arye batakuka, sik mutuku koproba Yudea mutuku tam tamubuka biyikopura, Israel ninye sik yuk-yuk ulamik mutuku tamubuka biyikce, aik dobuka daulamik. Winilamika ani, wala tekbarye akunum ubukopura, awala uk tanggal satu akunum ubukopura, sik nirya bulubuka nikak, Yerusalem mutuku binuka wekikce, “Wini talak ara, Allah el si erenamabe,” nyabik.

Esra 3:1 ပူးပေါင်းရင်းမြစ်များ

Nehemia 7:72

Aning atonun, sik talye daulamik Israel ninye arye dekna weik ning, el si emas bulubuka 168 kilogram emas arebik. Tonda, dekna weik ning el si perak ara, 140 kilogram arebik. Tonda, sik imam nang melina ati, ‘Sik imam anyaik pum tam pil donamak talak ongonamak’ tenen, kemeja baju 67 arebik.

Nehemia 7:73

Sik imam nang, Allah el si eren aik koprop pil dona deiyok nang ap, sik Lewi yala ninye ap, Allah Yahweh el aik bisik bublan dam kalikna nang ap, tonda Allah yupu mot sena deiyok ninye ap, Allah el aik pum tam pil dona deiyok nang, sik pil melibuka dolamik ninye ap, Israel nang ayala-ayala nirya daulamik ninye ap, Yehuda mutuku noutam tamubuka yayikopura, sik min arye ulamik mutuku uk, yanuka yuk-yuk ulamik.

Nehemia 8:1

Yerusalem mutuku noutam ara, mek kwelbalamik bublan dam bukni, weik lo uamukce, dalalamuk sukumuk Israel ninye nirya bulubik. Bulubukabikce, sikce Esra biti nyabik. “Naio, Allah el si Yahweh arye, nun Israel ninye ati, ‘Aning ara wininamlume, aning ara ton kum wininamlume,’ nyapdeipsuk yupu, kekenamaba ati, Allah arye nyapdeiamukba, Musa birye sekeiamsuk buku, Mem Yupu buku boyamince, yinipnamsilame,” nyabik. Esra bira, Allah nyalamuk yupu lak nyana ap, peterena ap deiyoknye ulamuk.

Nehemia 8:14

Allah el si Yahweh arye, ‘Aning ara wininamlume, aning ara ton kum wininamlume,’ nyabuka, Israel ninye ati nyalamukba, Musa birye sekiamuk buku ara, Esra birye yininmokba kekebik. Abuku uamuk yupu noutam arye, aning ton kel bikik. Ara, abuku noutam, ayupu uamuk. Allah arye nyabuk. “Tek barye wala akunum uplyopura, Israel nang nirya arye, mitik bai tam doltakne aik dopna arye, tekbarye wala noutam nirya ara, bai tam doltakne aik pum bisikuk unamake. Ara, kwalya kwalinamlum talak noutam arye anyaik unamlume,” nyabuk. Ayupu ara, abuku noutamak sekeiamuk ning ara, Esra birye eibuka yinibukba, kekebuka kel bikik.

Imamat 16:29

Allah arye Musa biti nyabuk. Wini talak anyapnusin yupu nirya ara, pia, adiparyuk wininamlulume. Apil nirya kum bataknamlulume. Ara, wala tekbarye ning, awala noutam like tagu barye sum (tanggal 10) deice arye outam sum, akunum uplyopura, anggun kanye nimalyap asa ubuka, Allah el amu tam umunce, din dina kum, pil babye ton dona kume. Awininamlum ning ara, anggun Israel ninye koproba babye, anggun dam tikilyangan nang babye, sik yuk mutuku ninye bukni, anggun neika umunye nang babye, anggun nirya ati nyapsine,” Allah arye nyabuk.

Imamat 23:24

“Ance Israel ninye nirya ati, nyapnamlyame. Allah arye nyapsile. Tek barye wala noutamak bukni, like tonok ning ara, tanggal satu ara, weik sum kipdeipnamlulume. Asum ara, anggun Israel ninye nirya, pil tonok babye, pia kum donamlulume, dikdik sebuka na siuk erenamnulume. Asum ara, anggunce, ‘Kume, asum ara, weik mambul sum ati, nun nirya bulubuka, Allah el si erenamabe’ tenen, pia wininamlulume. Tonda, asum deiyok kouna ati, pong-pong ana, el si terompet dobuka, weik arye nyapnamlulume. Ara, kili sal nirya kekebikirye, ‘E dikdik sen sum akunum deiyok kipla, tenepnamak’ tenen, nyapsine.

Zefanya 3:9

Bukni, aning nirya wenen ning, akunum areplyopura, narye sik tukwak noutam unyak nang nirya ati, kanye tamubuka deipnyopura, sikce na Allah atibuk, moronamniake. Tonda, sikce malye nyanyak yupu nirya ara, kum kipdeipnamne. Winipnyopura, ninye im sirya, mutuku sirya ati, teleb nyan yupu dem, sik kanye pum tam deipnyopura, teleb yupu uk nyanamake. Winipnamna deiyok ara, sik tonok kanye deice aryuk, na Allah Yahweh ati, na siuk erenamniaka ati, wininamne. Sik nirya arye, nati, ‘Se Allah ancuk melibuka lyepropnamsilame,’ nyabuka, moronamniake. Tonda, sik tonok kanye talima deice arye, ‘Kume, nun ni Allah atibuk, el piluk donamabe,’ nyanamake. Yuk talye isa ati, ton kum si erenamake. Aning kum bukni, tukwak mutuku nang nirya ara, narye nyapnye ninguk, moubuka talibikirye, na siuk erenamniake.

Rasul 2:46

Winilamik akarye, asum-asum nirya, Yahudi yala nang, sik malye winilamik ning dekna ati, Allah arilbalamik aik dam bulubuka wekelbalamik. Tonda, sik anyaik-anyaik nirya bulubuka weklamik akarye, din ning bokuka, kanye deilildalamik akarye, din neikauk dilamik. Tonda kanye kum wililamikce, talye neik kanyeuk bobuka ansinibuka ulamik.

Rasul 4:32

Amutuku dib tenebik nang ara, sik kanye talima imun ulamuk ning ap, sik kanye tenelamik ning ap, neika ansinibuka, sik talima dukdongobuka ulamik. Tonoknye babye ton, el talyamne ning ati, ‘Ara pia na dokola,’ kum tenelamik. Aning pia kum tenelamik bukni, sik talyamik ning nirya melibuka talye arildalamik.

1 Korintus 1:10

Ara, Yesus dib teneluluma ati, nun du weit atonun ululum nango, anggun sal babye, kilapu babye kekepnululume. Nun Weik Deiyoknye Yesus Kristus arye, nati deiyok arepnukbuk, el si deice arye, ‘Wininamlum’ tenen, morona atonun ayupu nyapnusine. Anggun nirya, anggun kanye tenena ara, tonok ninguk talibuka, kanye deibuka neika unamlulume. ‘Wininalum’ tenen, nyapdeipnamasin yupu ara, deiyok ani. Ara, anggun yuk-yuk ululum bukni, anggun tenelulum ning ap, anggunce, ‘Wininamap’ tenen, pil donamlum ning ap, ansinibuka utibirye, tonok ninguk talibuka ulamtumopura, ‘Kanye wililana kum aryuk, teleb kibuka neika unamlume’ tenen, nyapmasine. Ati “Tonok kanye bobuka telebuk unamlulume,” nyapsine.

Ulangan 16:16

Tonda, sik Israel nang nirya ara, Allah Yahweh ati, si erebuka kinamnyake. Ara, Allah elce, ‘Aning ara, wininamakeʼ tenen, kintinip deiamlyakuk, tonok keting tamun noutam bukni, like winilye deice arye, sik Israel nang nirya ara, keting tamun 20 tahun deice, akunum nemik nang, bulubuka yakirye, el si erepnamnyake. Allah el si erena ati, bulupnamak talak ara, ani. Ara, Kaplin Kwalina Kwalin talak ap, wa wibuka kouamikce ning nirya ati, kwalya kwalipnamak talak ap, tonda yo arye bai tam aik dobikirye, Bai Aik Kwalya kwalinamak talak ap, aning like winilye deice arye bulubikirye, Allah el si erenamnyake. Atalak ara, amutuku unyak nang nirya ara, talye ati kum yangnamak bukni, Allah ati aren ning ara, yuk-yuk boyanuka arelyanganamake.

Hakim-Hakim 20:1

Lewi yalanye birye, el ubula domuk kil dibukba, el nong sekdoba bulubuka, Israel nang ulamik mutuku nirya, dopdeibukba eibik. Ati ara, sik Israel yala nang nirya ap, eitam (arah selatan) ulamik kilisala ap, utamna dabu mutuku, (arah utara) Dan mutuku noutam arye dipdongobuka, tonda keting panalyangan tam (arah timur) Gilead mutuku ulamik kilisala babye, bulubuka yayik. Ara, ‘Se, anye birye pia malye winibuk ning dekna ati, yata winipnamap do?’ tenen, tonda, Yupu talipnamabe,’ tenebikce bulubik. Sik Israel nang yala-yala nirya, neika ansinibuka, tonok kina ati, Mizpa mutuku noutam bukni, Allah Yahweh el si erelamikak bulubuka wekelyayik.