Ara, emas ap, perak ap, yuk ning ayala-ayala ning yupa nirya ara, lima ribu empat ratus (5.400) ning nirya nukukabikce, sik Yehuda yala ninye deiyoknye Sesbazar biti arebuk. Winibukopura, minop talak Israel ninye obuka sirya dakikce, sik mutuku noutam arye alubuka doprobikce, Persia mutuku tam bukni, provinsi Babel mutuku bobinamikba, sik amu tam ulamik nang nirya, atalak Babel mutuku batakuka, sik mutuku koprop Yudea mutuku tam bukni, Yerusalem weik mutuku tuba tamubuka biyik. Sik biyik talak ara, aning-aning nirya libuka bobiyik.
Esra 2:2 - Eipomek2 Sik anang ap neika yayika deiyok nang ara ani. Ara, Zerubabel ap, Yesua ap, Nehemia ap, Seraya ap, Reelaya ap, Mordekai ap, Bilsan ap, Mispar ap, Bigwai ap, Rehum ap, Baana ap neika yayik. Tonda, ayayik nang, Israel yala nang nirya, sik si sekika ara ani. အခန်းကိုကြည့်ပါ။ |
Esra 2:2
24 ပူးပေါင်းရင်းမြစ်များ
Ati ara, Persia mutuku ninye deiyoknye Kores birye nyapdeibukba, aning nirya dobukabukce, amutuku noutamak Raja taleamuk ning nirya, aning si seklamukce, Bendahara atonun kalikuka pil dolamuknye, el si Mitredat arebikba, elce aning nirya nukuka dobukabukce, Yehuda yala nang sik deiyoknye el si Sesbazar biti arebuk.
Minop talak ara, Babel mutuku talibuka ulamuka deiyoknye, el si Raja Nebukadnesar ap, el yin talin nang ap arye, Yehuda mutuku noutam weik asik dobuka ulamik ninye obuka malye kibukabikce, Yehuda tam nang weik tonun bobinuka, sik mutuku wenen aik dongobuka deiamikba, sik daulamik. Babel mutuku uk daulamikani, sik Israel nang arye mapu deiamikba, dadeipdanin yangalamika ani, keting tamun weik akunum ubukopura, anang arye deiamik nang ton, Babel mutuku batakuka, Yehuda tam tamubuka yayik. Winibikopura, sik mutuku koproba Yerusalem ap, Yehuda mutuku noutam bukni, yuk-yuk asik ton yanuka ulamik. Ara, sik apu yapu yuk-yuk asik dobuka ulamikak uk, tamubuka yana wekik.
Ati ara, akunum deiyok koupnuyika ati, Yosadak el mi Yesua bira, Allah el aik pum tam pil melibuka dona deiyoknye ulamuka anya arye, el ap, el kwit capu nang ap, tonda Sealtiel el mi Zerubabel ap, el kwit capu nang nirya ap, sik nirya arye pil deiyok koubik. Sik minopce dobik pil ara, Israel ninye ati bico tenebuka pia meliamuk Allah, el si erena ati, keil yangapdeibik. Aning deiyok ara, ‘Allah ati si erebibyeba, nun malye winin ning namin kipnamsil’ tenen, kam ning obuka, akeil pala kibuka yangeiamik deice, uku sekuka dongonamikak ati kintinibikce, ila tamubuka dobik. Akeil pala kibuka yangapdeibik ning ap, akeil yangeibik deice uku sekuka kam ning obuka dongobik ning ap ara, minop talak Allah el pil dolamuknye Musa birye, “Allah el si erebuka arena ati, keil pala yangeipmunce, el arin ning aning, aning arenamlulume. Tonda, Allah el arena ati, winibuka-winibuka arenamlulume,” nyabuka sekeiamsukce, el buku noutamak deiamuk touk winibik.
Nyabuka morobik bukni, Allah el aik pum tam pil melibuka dona deiyoknye, Yesua ap, Zerubabel ap, tonda Israel ninye ayala-yala nirya deiyok nang ap arye, tamubuka nyabik. “Kume, anggun ap melibuka anyaik neika kum pil donamabe. Nun ni koproba Allah, el si eren aik dona ara, anggun kum melipsutume. Nun ni koproba Allah, el si Yahweh ara, nun Israel ninye ati, pia kalikuka melisulula anya arye, nun bidamnye aryuk, el si eren aik donamabe. Anggun ap kume. Persia mutuku weik deiyoknye Raja Kores birye, minop talak, ‘Pil dadolbilulume,’ nyapdeipsuk touk, apil donamabe,” nyabik.
Persia mutuku taleamuknye, el si Raja Artahasta, yuk nang arye ton, surat bitinye ton sekuka dopkwetebikba, anye birye doprobuk. Asurat noutam ara, “Yerusalem mutuku noutam, weik asik lipsisikuka donmaka ara, nun lik,” nyabuka malye nyabik. Asurat sekika, deiyok nang si ara, ani. Ara, Gubenur Rehum ap, el Sekretaris Provinsi deiyoknye Simsai ap, sik kwitcapu ap, amutuku yupu bokolina deiyok nang, hakim-hakim ap, Pemerintah Persia tam deiyok nang ap, tonok kanye bobuka asurat sekik. Adeiyok nang ara, Erek mutuku ap, Babel mutuku ap, Susan mutuku ap, amutuku noutam nirya ara, Elam tam ulamika deiyok nang arye, tonok kanye bobuka asurat neika sekikce, Raja Artasasta dam dopkwetebik.
Ayupu nyaprikba, ninye si Sealtiel el mi Zerubabel ap, tonda Yosadak el mi Yesua ap arye, anyaik dona ati, deiyok kouna deiyok nang kiprikba, Allah el si eren aik, Yerusalem mutuku noutamak, pil tuba tamubuka dopnin balamik. Tonda, Allah el yupu lak nyana deiyok nang arye ton, melibuka pil dopnin balamik.
Esra birye nyabuk. “Anang nirya ara, sik Babel mutuku binuka daulamika ani, bataksikba, nun mutuku tamubuka, Yerusalem tamubuka yanamupu nang ara, sik ninye deiyok kibuka, tonok kibuka taleamik nang ap, tonda amutuku binuka ulamikce, deiamikba, dadeipdanin balamik yala nang ap, na Esra ap, neika tamubuka yapu. Babel mutuku batakuka, Yerusalem mutuku tamubuka yapu talak ara, Babel mutuku nirya taleamuk ninye deiyoknye, el si Artasasta ulamuk. Elce Babel mutuku taleamukce, ulamuk talakuk yapu. Yerusalem mutuku noutam yapu nang bukni, ton nang sik si ara, ani.
Tuba ulamika ati, Gubenur Nehemia ap, tonda Zerubabel ap, ulamdik talak babye, sik Israel ninye nirya arye, asum-asum nirya sik taleamik ning noutam bokuka, sik Allah mot sen nang ap, Yerusalem mutuku dana-dana domik poka bublan domika, abublan dam kalikin nang ap ati, aning-aning nirya boyanuka arelamik. Aning atonun, sik Lewi yala nang patan ning melina ati, sik Israel ninye arye, sik taleamik ning noutam bokuka, arelyangalamik. Akunum arepnopura, sik Lewi yala nang arye, aning bokukapna arye, Harun birye deiamukba, dadeipdanin yangalamik nang ati arelamik. Ara, Allah el si eren aik pum pil dona deiyok nang, sik melina ati arelamik. Apil-apil nirya ara, Allah arye, “Aning ara wininamlume, aning ara kum wininamlume,” nyapdeiamuk touk winilamik.
Allah Yahweh arye, “Na si eren aik uluplobik ning ara, tuba tamubuka dopnululume,” nyapdeibuk talak ara, Raja Darius birye, ninye deiyoknye kibuka, Persia mutuku ulamik ninye nirya taleamuk talak ara, keting tamun like bitinye kibuk. Aketing tamun deice aryuk, wala ara nakub wala kibuk. Awala deice keting noutam tonok, tanggal 1 kibuk sum ara ani. Asum ara, Allah Yahweh arye, Yehuda mutuku ulamik ninye noutam arye, Gubenur kibuka taleamuknye, el si ara Sealtiel, el mi Zerubabel ap, tonda, Allah el si eren aik noutam talibuka, pil dona deiyok nang, sik imam-imam weik deiyoknye kibuka ulamukce, taleamuknye, el si ara Yosadak, el mi Yosua ap ati, “Sik dam nyalbinulyame,” nyabuka, nabi Hagai dam yanuka nyapdeibuk.
Ara, Allah el yupu laka nyana deiyoknye, nabi Hagai dam yanuka, nyabuk yupu nirya ara, Hagai birye Zerubabel ap, Yosua ap, tonda Israel yala ninye, Babel mutuku wenenak delilbinamika ani, tamubuka yayik ninye nirya ap ati, Allah Yahweh arye, nabi Hagai dam nyabukba, nabi Hagai birye binuka, laka nyabuk yupu, sik nirya arye kekebik. Kekebikce, Allah ati ilil ubukba, ayupu uk, moubuka taleamikce, pia ulamik.
Allah arye, Yehuda tam ninye talina ati, deiyok kibuka taleamuk deiyoknye, Gubenur Zerubabel, el kanye talima noutamak, pil dobukba, adiparyuk, ‘Winipnamne’ tenen, kanye talima erebukce, kil-kil ubukba, pil dolamuk. Atonun tonda, Allah el si eren aik noutam talibuka, pil don nang, sik weik deiyoknye, el si ara Sealtiel, el mi Yosua, el kanye talima noutam pil dobuk. Tonda, Israel yala ninye, Babel mutuku wenenak delilbinamika ani, batakikura, tamubuka yayik ninye babye, sik kanye talima noutamak pil dobuk. Winibuka ati, sik anang nirya tabakuka, tonok kanye bobuka ulamikce, sik ni koproba Allah Yahweh, el si eren aik lipsisikuka dona ati, yanuka bulubuka, pil neika dolamik. Ara, aning-aning nirya, talibuka deice tam ulirye, im deice yin talibuka unyak malaikat nirya, sik weik deiyoknye Allah, aninye nirya arye, ‘Allah el si eren aik, tamubuka dopnuyap’ tenen, bulubuka yayik. Anyaik lilsisikna ati, pil dolamik.
Allah arye, nabi Hagai biti, nyabuk. “Ance ninye si Sealtiel birye deibuknye, el si ara, Zerubabel biti, yupu nyalbinulyame. Anye bira, Gubenur kibuka, Yehuda mutuku unyak ninye taleamuknye Zerubabel ap, tonda Yosadak deibuknye, el si Yosua ap, nyalbinulyame. Yosua bira, na Allah si eren aik pum tam talibuka, pil donyak nang, sik weik deiyoknye, imam Yosua biti nyapkine. Tonda, Babel mutuku arye batakuka, Yerusalem mutuku dam yangalamikce, tuba kam unyak Israel yala ninye nirya ap, wekuka kekenamakcak, ayupu ara, binuka nyapnulyame.” Allah arye, nabi Hagai biti nyapdeibuk.
Allah arye ayanuka nyapdeibuk yupu ara, ani. “Hagai ance, Yehuda mutuku noutam talibuka ulul ninye deiyoknye, Gubenur Zerubabel biti, el dam laka nyalbinulyame. Allah arye, im deice tam ulul ning ap, tukwak mutuku noutam ulul ning ap, mutuku-mutuku nirya ara, yupu nyapdeipliba luluknamle. Ati, ‘Sike upnamle’ tenena kume. Narye, ‘Aning nirya luluknamle,’ tenepse talak, akunum dam uplyopura, adiparyuk luluknamle, nyabuk.
Ati, na Allah Yahweh arye nyapsine. “An Zerubabel ap, Yosadak birye deibuknye, imam Yosua ap, amutuku noutam tuba kam ululum Israel yala ninye nirya ap ara, ‘Se, yatato wiripnamap do?’ tenen, imun kanye bona kume. Na mapu koprop, Israel ninye nirya ara, sik kanye nirya tenen ning ap, kanye talima ap, mikip kilinamlyame. Anggun nirya arye, ‘Nun ni koprop Allah, el si eren aik punubuka dopnamap’ tenen, pia pi deibuka, donamlume. Ara, talye ati kum nyapsine. Deiyok ara, apil donamlum talak nirya ara, narye anggunti, pia kalikuka melinamsile. Talinye birye, kum nyapsine. Nara Yahweh, aning-aning nirya deice tam talibuka, im deice yin talin malaikat, sik weik deiyoknye birye nyapsine. Ati, anyapsin yupu ara, dipkoprob aminyan talak ara, nong upnamle.
Yuk lak kin ning ton, winibukba eipse ning ara, ani. Ara, Allah arye lak kibuka, na Zakaria dam deipnuka ara, imam nang, sik weik deiyoknye, el si Yosua bira, Allah Yahweh el im deice pil donanye malaikat, el urasin tam tikmokbuk, eipse. Tonda, imam deiyoknye, Yosua tikmoka, el sirik tam ara, isa mer, sik deiyoknye Isa Mutuku Dongonye tikmok. Ara, elce imam deiyoknye Yosua biti, ‘El malye uamuk ning ara, ani, ani,’ nyapnirye, ‘Yukunaman’ tenen, el Yosua dam sirik tam, neika tikmarikba, eipse.
ကြော်ငြာတွေ