Esra 10:2 - Eipomek

² Wininmek talak ara, Elam yala nang, el si Yehiel bukni, el mi Sekanya birye, Esra biti nyabuk. “Nunda aunmab mutuku noutam ulamik nang arye, deiamik kilapu dobuka donyaba deice arye, akunuma nun ni Allah ati, batakuburye, el dam akunum malye kilinyabe. Dipkoprop aning akunum wininyaba ara, nun Israel nang ara, lo ton tuba aupnamsila ati, nun malye ning batakibirye, nun ni Allah, el dam tamubuka yatibye.

Esra 10:2 ပူးပေါင်းရင်းမြစ်များ

Esra 10:26

Tonda, Elam yala nang arye deiamik nang, sik si ara, ani. Ara, Matanya ap, Zakaria ap, Yehiel ap, Abdi ap, Yeremot tonda Elia ap babye, aning atonun arebik.

Esra 2:31

Sik apu koproba, el si ton Elam, elce deiamukba, dadeipdanin yangalamik nang, el yala nang ara, seribu dua ratus lima puluh empat (1.254) nang yayik.

Esra 2:7

Tonda, Elam elce deiamukba, dadeipdanin yangalamika ani, sikce deiamik nang, el yala nang ara, seribu dua ratus lima puluh empat (1.254) nang ulamik.

Esra 8:7

Tonda, Elam birye deiamukba, dadeipdanin yangalamik nang arye deibiknye, Atalye elce deiamuk mi, Yesaya ap, tonda, el yala nang ap, 70 nang neika yanuka ulamik.

Esra 9:1

Sik Israel nang arye, Allah arena ati, aning nirya akunum winibuka, seng abikopura, Israel mutuku noutam taleamik ninye deiyok-deiyok nang arye, na Esra dam yayik. Yayikopura, ayupu nyapnike. “Naio, nun Israel yala nang, talye daunyab nang ap, tonda imam-imam nang ap, tonda Lewi yala nang ap ara, nun nirya arye, malye upmabe. Ara, nun dana-dana tam unyak nang ara, Yahudi yala nang kum bukni, talye yuk yala nang, sikce talye-talye luparabuka malye wininyake. Allah arye, ‘Aning ara, na pia like, aning ara, pia kum wininamlume. Ara meme,’ nyapdeiamsuk ning bukni, nun ap, anang ap, yuk-yuk mutuku kum unyaba ati, sikce malye wininyak ning ara, nun babye, aning ton akunum wininyabe. Nun mutuku dana-dana tam wininyak nang ara, ani. Ara, Amon yala nang ap, Moab yala nang ap, Mesir mutuku nang ap, Kanaan noutam minop talak dipdongobuka wini talak tuba unyak nang ap, Het yala nang ap, Feris yala nang ap, Yebusi yala nang ap, tonda Amori yala nang ap ati nyababe. Sik amutuku nang arye, malye pil dopra unyak touk, nun babye apiluk talibuka donyabe,” nyabik.

Esra 9:2

Aninguk kum bukni, nun Israel yala nang arye, nun dana-dana tam unyak nang, Yahudi yala kum nang bukni, nunce sik mutuku kilapu dolamupu. Atonun, sik yuk mutuku kilapu dobuka, nun mapu koproba ati, areamupuba, dolamik. Aning nirya winilamupu deice arye, Allah Yahweh, el mapu nun Israel nang, el ‘Naʼ tenen nang ap, sik yuk mutuku nang, malye unyak nang ap, ansinibuka unyabe. Winibupa deice arye, malye kililalamupu. Tonda, amalye uning minop deiyok bikik nang ara, nun Israel ninye deiyok-deiyok nang arye, deiyok kibuburye, sik talye Israel nang babye eibikce, sik babye, amalye ning winilamupu. Ati, nun nirya arye, Allah nyapdeipsuk yupu moubuka kum talibupe. Aning akunum batakuburye, yuk malye bisik akunum banmabe,” sik deiyok nang arye, na Esra ati, nyapnike.

Nehemia 13:27

Aning nirya ara, anggun akunum Luba kipmalum do? Dipkoprop anggun ilil kumce, mandip kanye bobuka, malye wininmaluma ara, Allah ati bisimunce, malye winilulume. Ara, anggunce yuk bai tam kilapu ak donmalumce, malye wininamlum ning ara, nun kekena like! Allah arye, ‘Winina meme’ nyapdeiamsuk yupu yaniptaplum ning ara, pia malye wininmalume,” nyabuka wenepse.

Nehemia 3:29

Asukum ara, ninye si Imer el mi Zadok birye, acang keil poka el aik dam arye, dukdongobuka domuk. Abinuka dopnin balamuka ani sukdongamukak ara, yuknye ton el si Sekhanya, el mi Semaya birye, dukdongobuka dopnin balamuk. Semaya bira, keting yangan tam botopdeiamik bisik bublan dam, kalikina deiyoknye ulamuk.

Nehemia 7:12

Elam birye deibukba dadeipdanin balamik ninye yupa weik 1254 deiamuk nang ara, Yerusalem mutuku tamubuka yayik.

Nehemia 7:34

Elam birye deibuk yuk ninye nirya ara yupa weik (1254) nang ara Yerusalem mutuku tamubuka yayik.

Keluaran 34:12

“Amutuku bimunyopura, ‘Sik amutuku noutamak unyak nang ap melilanamabe’ tenen, ‘Winipnamsiabe, winipnamsululume’ nyabuka nyalin yupu ton, kum nyapdanamlulume. Deiyok ara, winipmunyopura, anang arye malye-malye winilamaka atonun, ‘Anggun babye atonun winipmunyak’ tenen, nyapsine,” Allah arye nyabuk.

Amsal 28:13

Yata ninye do nirya, ‘Nun malye ulamupu ning, yuk nang arye kel biksicak’ tenen, sik malye winilamice ning kum batakikirye, tuba malye winin ninguk dungnubuka ulamice ninye ara, aminyan talak teleb kum upnin banamake. Bukni yata ninye do nirya, sik malye ulamice ning nirya ati, ‘Na malye winipse ning ara ani,’ nyabuka, laka arye laka nyabikirye, amalye un ning bataklamaka ninye ara, Allah arye sik malye unyak ning ati, aninye adiparyuk wenebuka oplomtu bukni, bico teneplirye, sik malye unyak ning nirya kum kipdeiplirye, aninye ati melibuka teleb ulinamle.

Yakobus 2:9

Bukni, anggunce yuk nang ati, urasin dipdebuka, kanye bokeipmunyopura, adeice arye malye ululume. Ara Allah arye, ‘Wininamlulume, aning ara kum wininamlulume,’ nyapsuk yupu mem yupu deice arye, “Winina meme,” nyapdeipsuka ati, ayupu yaniptapmunyopura, ara Allah arye nyapdeiamuk yupu yaniltan nang ululume.