Esra 1:3 - Eipomek3 Ati ara, ance talilyam mutuku noutamak unyak bukni, Allah el mapu unyak ninye nirya ati ance, ‘Telebe,’ nyabuka, ‘Anggun ni koproba Allah melipsilyeba, anggunce el si eren aik dopnamlulume,’ nyapminyopura, anang nirya arye Yehuda tam noutamak, Yerusalem mutuku binamake. Yerusalem mutuku bikirye, Allah na si eren aik dopnamake. Nara Allah, Israel yala ninye ati, bico tenebuka pia melinune. Nara Yerusalem mutuku noutamak unune. Narye ayupu nyapkina ati, ance, ‘Telebe dabilyame,’ nyapminba binamake,” Allah arye nyapnuke. အခန်းကိုကြည့်ပါ။ |
Esra 1:3
20 ပူးပေါင်းရင်းမြစ်များ
“Na ni Allah, an si Yahweh ati, an si erepkine. Na nio, Israel ninye ati pia kalikuka melisilyame. Nun deiyoknye an tonok ulyame. Im deice babye, tukwak mutuku babye, an atonunye ton pia kum ulule. Anda Allah tonoka. Anti pia tuba diba tenekinyak nang arye, yuk talye ning patana kumce, an nyalyam yupu moubuka talibikirye dobolbanyak nang ati ara, ance pia bico tenesilyame. An amu tam unyak nang ati, ‘Wininamsine,’ nyapdeiamsulum yupu ara, dipkoprob tuba winisilyame. Ati tukwak mutuku babye, im deice babye, an atonunye ton pia kum ulule.
Ura, Raja Daud birye el mi Salomo biti ayupu ton nyabuk. “An talima noutam arye tenepmince, mikip kipnulyame. Tonda, ilil tenena kumce, aning ara pil dona ap, una ap uk unamlame. Ati ara, an ilil una ap, ilil arye, ‘Se,’ tenena ap, pia kum unamkile. Deiyok ara, na ani birye, el si eremnun Allah, Yahweh, elce an ap pil melibuka dopnamkile. Ati, an ni koproba Allah Yahweh arye pia kum bataknamkile, melinamkile. Atonun, ance Allah el si eren aik ap, anyaik pil donamak ning ap, anyaik dongopnamak ning ap nirya ara, tuba kintinibuka deilinamlam talak nirya ara, Allah elcuk, melinamkile. Winipnamkila deice arye, anyaik dona ati, pil donmaminya ani, aning nirya ara, sirya daknamlyame.
Raja Kores birye ayupu nyabukce ayupu ton nyabuk. “Tonda, yata nang do nirya, olalamik talak kum diplamikce, tuba kam unyak nang ara, Allah arye wiamuk ninye ati, wini talak nun ap neika unyap buk, Yerusalem mutuku binamak nang nirya ara, sik dam ululum ninye arye melinamlulume. Ara, Israel ninye akunum sik mutuku koproba tamubuka binamaka ati, anggun Persia mutuku umunye ninye nirya talibuka ululum ning, dekna weik ning dobuka, anang ati arepnamlulume. Ara, emas ap, perak ap, ninye arye weilamak ning ap, teleb bona ap dobuka, Yerusalem binamak nang ati arepnamlulume. Tonda, Yerusalem mutuku bikirye, Allah si eren aik dobikirye, el si erena ati arenamak ning, anggun Persia nang arye, aning-aning nirya bulubuka, el wiamuk ninye ati arepnamlulume. Allah el si Yahweh arye ayupu nyapdeiamnukba, anggun na amu tam nang ati nyapsine,” Persia mutuku ninye deiyoknye, Kores birye nyabuk.
Nyabuka morobik bukni, Allah el aik pum tam pil melibuka dona deiyoknye, Yesua ap, Zerubabel ap, tonda Israel ninye ayala-yala nirya deiyok nang ap arye, tamubuka nyabik. “Kume, anggun ap melibuka anyaik neika kum pil donamabe. Nun ni koproba Allah, el si eren aik dona ara, anggun kum melipsutume. Nun ni koproba Allah, el si Yahweh ara, nun Israel ninye ati, pia kalikuka melisulula anya arye, nun bidamnye aryuk, el si eren aik donamabe. Anggun ap kume. Persia mutuku weik deiyoknye Raja Kores birye, minop talak, ‘Pil dadolbilulume,’ nyapdeipsuk touk, apil donamabe,” nyabik.
Ikinuk daulamika ani, bukni, aminyan talak yuk ninye deiyoknye, el si Raja Kores, deiyok talibukce, Babel mutuku nirya talyamuk talak, keting tamun tonok noutam ara, Raja Kores birye, ‘Telebe, anggun Israel yala nang arye, Allah si erelamlum aik ara, tuba lipsisikuka dona ati, anggun mutuku tamubuka betume,’ nyapdeipsukba, amutuku yanuka, apil donmabe.”
Winilamikba, Efrates mek atam ubuka, otam keteng wekelbalamle tam talilamuk deiyoknye, Gubenur Tatenai ap, el amu tam bukni, yuk weiknye el si Syetar-Boznai ap, tonda yuk deiyok-deiyok nang ap arye, malye kanye bobikce, Yerusalem tam yayikopura, ‘Yata deiyoknye birye, ‘Telebe,’ nyapdeiamsuk yupu deice arye, anyaik lipsisikuka don pil donmalum do?’ nyabuka asibukce wenebik.
Nyabukce, ayupu ton nyabuk. Anggun anyapmasin nang nirya ara, Israel ninye Allah el si eren aik dopnamakak ton, pia kum dililbanamlulume. Israel nang ati, ikin ning sik nong deice delina meme. Yehuda yala nang sik Gubenur birye deiyok koubuka, Israel ninye sik deiyok nang nirya arye, Allah el si eren aik tuba tamubuka dopnamake. Minop talak anyaik dolamik sukumuk, tuba tamubuka dopnamake.
Na ni Allah, narye moropkin ning ara, ani. Ance sik anang ati, wenebuka opminyeura, sik nirya ara, alye weik daknamake. Tonda, ance arepminyeura, ‘Sik kanye boktopyeba, kanye teniltonauk unamake’ tenen, moropkine na nio. Allah ance anang opminyeba, akunum dibikceura, aminyan talak yuk-yuk mutuku nang nirya arye, anang nirya ati, ‘Sikda daupye, sikda malye nang ulamik,’ tenenamake. Utenena ati moropkine na nio.
“Se, Nun ni Allah Yahweh, anda aning-aning nirya deice tam erebuka umince, pia mikip weiknye uminye birye, im deice yin talin malaikat nirya ara, sik deiyoknye ulyame. Nun Israel nang nirya ara, Allah an mapu ubirye, an siuk erekinyabe. Tonda, na nie, anda Peti Perjanjian bublan deice malaikat urasin atonun ning, el si Kerub, bitinye puturubuka deibubak, deice tam ara, bukmince tuba asukumuk ulyame. Nun ni Allah, an tonok aryuk erebuka uminyeba, atukwak mutuku ninye deiyok kibuka talinyak nang nirya ara, an amu tamuk unyake. Allah ance im ap, tukwak ap wepdeiplumce talilyame. Mutuku sirya im sirya nirya talinyaka deiyok nang ara, an amu tamuk unyake. An tonok ulyame.
Anggunda Babel mutuku ninye deiyoknye Kores biti, ‘Se, elda weik mambulnye,’ tenelulum bukni, elda na amu tamuk ulule. Ati, narye Babel mutuku ninye deiyoknye, el si ara Raja Kores wipdeipsirye nyapse. Winipmanto ara, domba weina deiyoknye ulamle touk, narye nyapniba, Kores birye na mapu Israel ninye talibuka unamle. Aning ara na tenepse touk apiluk donamnile. Narye el kanye talima tamuplyopura, Raja Kores birye, ‘Yerusalem mutuku asik nirya ara, tuba tonap lipsisikuka dopnamlume,’ nyapdeipnamle. Tonda na Allah, na si eren aik ati, ‘Anyaik ayukumna ati keil deibuka domik ning ara, tuba tonap punubuka dopnamlume,’ nyapdeipnamle. Ayupu nyaplyopura, apil donamake.
Sik pia walwal nang arye, wininyak bukni, dipkoprob Allah, el si Yahweh ulule. Elda kam una deiyoknye ulule. Allah el tonok ara, kam pia ulule. El Allah Yahweh ara, aning-aning talibuka, pia ati, Ninye Deiyoknye Raja unamle. El ap, elce talilul ning nirya ap, pia kume, kum danamle. Pia aupnamle. Tonda, Allah elce, tukwak mutuku ap, tukwak nang ap ati, yu uplyeura, tukwak mutuku nirya ara, weik arye onamle. Tonda, Allah elce, tukwak mutuku unyak nang nirya ati, yu upturye, wenepsutu ura, tukwak mutuku unyak nang nirya ara, darapdongobuka uptinga babye, kum upnamake.
Arebikopura, ninye deiyoknye Raja arye, Daniel biti nyabuk. “Dipkoprop nyapne. Ance si erelyam Allah ara, elda aning-aning nirya deice tam ulirye, aning nirya talilule. Elda Allah tonok ulule. Elcuk ninye deiyok nang nirya talilulba, sikda el amu tam unyake. Allah el tonok duknun ning nirya, laka kilina deiyoknye ulule. Elda, anti laka kibuka nyapdeipmakuk touk, ance akunum laka nyapmanilame.” Nebukadnesar birye, Daniel biti nyabuk.
Tonda, ayupu ton nyabuk. “Na taleamsiseba, ninye mutuku-mutuku nirya ululum nang ati, nyapsine. Nun nirya arye, Daniel birye si erelye Allah uka, el si erebibirye unamabe. Elda Kam Una Deiyoknye, pia tuba ulula ati, pia aunamle. Winiplirye, elcuk talisiliba unamabe. Tonda, Allah arye talipnamsil ning ara, pia kum kum danamle. Deiyok ara, Allah ara, mikip weiknye ulula ati, elda kum kum danamle.”
Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.
Allah arye Israel nang ati aning teleb yupu nyabuk. “Anggun malye ululum ning ati, Allah deresilya ara, nun malye winin ning Yesus elcuk namin kipdeipsilya deice arye, nun ap, Allah ap, neika teleb kibuka unamabe. Yesus Kristus arye nun ap, Allah ap, ati teleb kibuka ansinilisulule, Yesus Kristus ara, aning-aning nirya talilul deiyoknye bira, eluk ulule.”
Ati ara, kel kiplulume. Yuk mutuku nang arye, si erenyak ning ara, mikip kum ning bukni, nun ni koproba Allah mikipnye, weik mutuku yangan keil atonun ulule. Sik talye si erenyak ning atonun kume. Israel ninye, sik mal olan nang babye, aning nyanyake. ‘Kume, Allah el si Yahweh ara, dipkoprob mikip weiknye, el atonunye, yuk ton kum ulule,’ nyanyake.
Narye akunum nyapkise touk, pia teninamlyame. Ara, an adiparyuk, dib tenebuka, ilil pia kum aryuk, mikip arye unamlyame. Ilil una meme. Pia kanye lamapdongobuka unamlyame. Tonda, ikin upkiliba, ‘Se, na tuba kum winiptinye’ tenen, kanye mitang upkiliba, kanye talima lik una kume. Anggun binamlum mutuku nirya ara, nara Yahweh, anggun ni Allah, na si Yahweh arye melipsinirye, pia kalikinamsina ati, anggun ilil una ap, lik tenena ap, meme. Allah arye, Yosua biti nyabuk.
ကြော်ငြာတွေ