Efesus 5:2 - Eipomek2 Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume. အခန်းကိုကြည့်ပါ။ |
Efesus 5:2
54 ပူးပေါင်းရင်းမြစ်များ
Dipkoprop ara, Yesus Kristus wanwanun yo deice obika deice arye, Yesus arye na malye ulamse ning ati punupnuk anya arye, winipmanto ara na ap, Yesus ap dukdongobuka opnikba, dipse. Ara, Yesus dibuka deice arye, na babye dipna atonun winipsa ati nyapsine. Winipmanto ara, Kristus ap dukdongobuka opnika ati, wini talak ara, na babye yuk kum unun bukni, Kristus ara na talima noutamak ulule. Na ap, Yesus ap talima dukdongobuka unyame. Ati, ninye nong atonun ubuka tuba ununye talak nirya ara, Allah el Mi Kopropa Yesus ati diba tenenuna deice aryuk kam unune. Allah el Mi Kopropa arye nati bico tenepnukce, na pununa ati, el bidamang el nonguk aribukba, yu nang arye obikba, nati dibuke.
Ateleb winin ning nirya ara, mitik mambul ulul bukni, weik mambul wininamlum ning ara, nyapnusine. Ara, aning nirya teleb-teleb winimunye talak nirya ara, anggunce yuk ninye ati, pia bico tenebuka, talima arepdamunce, melilanauk wininamlulume. Ateleb winin ning nirya aupsilyopura, bico tenebuka melilanauk winimunyopura, anggun talima teleb ubuka dukdongopsilirye, nong tonok atonun kilisiliba, teleb ubuka neika unamlulume.
Tonda, nun ap, Kristus ap, talima dukdongobuka ubirye, el yupu peterebibya deice arye, Allah arye kanye delisulule. Allah arye tong teleb ning kekeplirye, kanye deililul touk, Kristus arye, nun dib tenenyap ninye dobuka el Li Koprop Allah ati ariliba, Allah arye nunti kanye delisulule. Bukni, Yesus el teleb yupu peterenyaba deice arye, daunyak ninye kekenyak bukni, sik kanye yuk-yuk tenenyake. Ton ninye ara, kam unamake. Ton ninye ara, dipnamake.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.
Anyapmasin ning nirya wininamlulum bukni, weik mambul ning ara, winira nyapnusine. Anggun nirya arye, yuk diba tenena ninye nirya ati, pia dipkoprop talima arepdamunce, bico tenebuka melilanauk unamlulume. Yuk nang ati pia bico tenebuka melipmunyopura, sik anang malye wininyak ning ati ara, talye luba kibuka mangkau kipnamlulume. Yuk nang ati pia bico tenebuka, kum melipmunyopura, sikce malye updeipsikce ning ati, tuba tenenauk unamlulume.
Aning ara talye ati kum nyapsine. Deiyok ara ani. Nun Deiyoknye Yesus arye nun nirya ati, bico tenelamsukce, weik arye melyamsuk touk, ‘Nun babye atonun wininamap’ tenen, nyapsine. Ara, anggun kele, nun Deiyoknye Yesus, el kanye aniryuk bico tenenyamsukce, melipsuka deice arye, teleb kipdeipsuke. Elda im deice pia weik sisinanye ulamuk bukni, nun melina ati ara, talye bona utotowa talina kum nang atonun dayukce, tukwak mutuku yayuk. Winibuka ulamuk ning ababye, deiyok aupmale. Ara, el talye bona utotoa talina kum nang atonun dayukce, pil dopsuka deice arye, ‘Sik tukwak ninye ara, bona utotowa talina kum ninye atonun unyak bukni, narye aninye lyepnyopura, sikda bona weik talilamak ninye atonun unamake,’ tenebuka wipsuke.
Ara talye ning ati kume. ‘Bico tenebuka melina ara, pia dib dipkoprop ning dan ning do?’ tenena ati, Yesus arye el winilamuk ning tenepnululume. Bico tenepsukce, ‘Sik kum dipnamake’ tenen, nunti dibukce, lyepsuk. Aning ati ara, nun babye utenenamabe. ‘Nun winipsilye ning nirya ap, nun wininyap ning nirya ap deice arye, nunce yuk nang ati, bico tenebuka melilanauk unamabe. Aning-aning nirya babye, nun na tenen tenena kumce, yuk nang ati melilanauk unamabe. Nunce yuk nang ati, melilamibya deice arye, nun dibibya babye, opsica babye, telebe uka,’ tenepnamabe.
Nuh birye, Allah el si erena ati, aning nirya uku dongobukba, uku dinmokce, nintong teleb ning welebukba, Allah el si Yahweh kekebukce, “Telebe,” tenebuk. Utenebukce, Allah el talima pum arye aning ton tenebuk. “Ura, wini talak arye, dipdongobuka doryanganamle talak noutamak nirya ara, ninye tukwak ninye ati, tukwak mutuku tonap ikin ning deibuka, malye kum updeipnamne. Ninye tukwak ninye nirya ara, winiryuk deibikce talak arye, dipdongobuka, sik kam unamak talak noutamak nirya ara, sik kanye tenenamak ning ap, sik talima patalamle ning nirya ap ara, pia malye unamle bukni, tukwak mutuku ara, tamubuka tonap malye kum kipdeipnamne. Tukwak mutuku nirya ati, tonap tamubuka kum supnamne. Tonda, tukwak mutuku kam ulye ning ayala-yala nirya, obuka kum daneipman touk, yuk talak ara, tup tamubuka tonap kum winipnamne.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
Sik tukwak ninye bukni, Allah arena ati, deiyok nang arye, tuba-tuba arilbalamak touk, Kristus arye aning kum winibuk. Kristus ara, anang arye tuba-tuba arenauk, winilamak touk, el babye atonun winiptopura, like tonok talak deice aryuk, el bidamang nong dobuka, Allah ati kum areamtue. Aning kum bukni, weika arye tonap, im deice wekelbalamtue. Ara, Allah arye aning-aning nirya kwepdeibuk talak arye dipdongobuka, anoutam talak nirya ara, ila tuba tonap, weika arye im deice wekelbalamturye, Allah ati areamtue. Bukni, wini talak ara, sirya talak dam akunum ubukba, Kristus ara, like tonok talak deice arye akunum yayuke. Kristus yayuka deiyok ara ani. Ara, el bidamang, el nong kopropa dobuka, Allah ati akunum aribuka deice arye, nun punupsuke. Malye nang arye elti, obika deice arye, ninye malye wininyak ning nirya ara, akunum kum kipdeipsukce, nun punupsuke.
Sik minop talak pil dolamik ning ara, mitik mambul pil, nong bol deice ning uk, mitik teleb winilamik bukni, Kristus el bidamang ining deice arye, nun kanye talima dipkoprop teleb kilisilya ara, mambul weik ulule. Kristus ara, pia diksukumuk ulamukba, Allah El Dib Kanye, pia aunamlanye bira, el mikip melyamuka deice arye, Yesus arye Allah ati, el bidamang el nong kopropa arepdayuk. Nun kanye talima noutamak, malye ning usilya deice arye, malye winibirye dibinyabe. Ati, Kristus el ining deice arye, nun kanye talima noutamak malye ning dipsuka deiyok ara ani. Ara, ‘Tukwak ninye arye, Pia Kam Una Deiyoknye Allah, el amu tam ubikirye, el pil donamak’ tenen, pil dopsuke.
Yesus elce, ‘Ninye mutuku-mutuku nirya sik malye unyak ning kum daneipnirye, dekuka lyepnamne’ tenen, elce el nonguk arepsukbuk obik. Ara, nun malye winin ning ati, talye oplopsutu bukni, Yesus arye nun pununa ati dipsuke. Allah arye, ‘Teleb talak ara, atalakuk,’ tenyamuk touk winibuk. Allah arye, ‘Ninye nirya lyeptinye’ tenen, patalamuka ara, awinibuka deice arye akunum lak kipdeipsuke.
Aning kum bukni, kanye teniltona kumce, kanye talima arepsiliba, Allah el dipkoprop yupu peterelanamabe. Bico tenepdabirye, dib yupu uk nyabuka peterelanamabe. Winibuka ulamibya ani, Kristus ap, kanye talima dukdongobuka ulamibya ani, nun talima wisipsilya deice arye, nun wininamap ning nirya ara, telebuk unamsile. Kristus ara, Nun Deiyoknye diksukum winilye touk, nun babye neiktoto wininamabe. Winipmanto ati ara, elda nun nong kisok atonunye usulule. Nunda, el nong atonun unyabe. Ati elce tenesilye touk, aninguk wininamabe.
Tonda, yuk nang arye, anti, “Anda kamnye atonun ulyama ati ara, an yupu kum kekepnukiyap ati, dauplye,” nyapkicopura, sik anang ati yupu sekenamlyame. ‘Dauplye,’ tenena kume. Aning kum bukni, an winilaminye ning, yuk nang eipkikirye, ‘Kel biknamak’ tenen, winipmantonye bira anuk unamlame. Ara, an yupu nyana ap, an winin ning nirya ap, yuk nang ati bico tenebuka melina ap, Allah ap, el yupu ap, diba tenelulum ning ap, mingne ubuka, diksukum una ap, winipminye deice arye yuk nang kel biknamkiake.
Winipsilyopura, anggun dib tenelulum deice arye, Kristus anggun kanye talima noutamak usiliba, el ap, kanye dukdongobuka unamlume. Tonda, weik yo yating tuku pum bisik bilirye, weik neplyopura, ayo lulukna kumce pia teleb tiklamle touk, Allah bico tenepsilirye, melisilye ning noutam ululuma deice arye, ‘Sik yuk nang nirya ati, bico tenebuka melilamunce, pia teleb unamlum’ tenen, Allah morosunune.
Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.
Tonda, imamnye birye, maka talibuka, el pol potong sirik ning dana-dana tam taliplirye, delonamlule. Bukni, el potong den talak ara, mitang asa arye, moubuka denamlule. Mikip arye dinmalirye, ‘Potong tuba batakna ap, dila una ap uplyak,’ tenena ati, wininamlule. Imamnye winiplyopura, maka el nong ara, adiparyuk ining ning dana ati, keil pala yangabuka kintinip deiamlumakuk, mesba deiceuk danamlule. Winipliba, el nintong teleb ning ara, Yahweh kekeplirye, kanye teleb unamle. Aning pil donamaka nirya ara, ‘Allah arye, nun malye winin ning kilipnamsilʼ tenen, uku dongobikiba, aning nirya uku diplirye, siltong teleb ning ara, Allah Yahweh el dam welepliba, kekeplirye, el kanye pia telebuk unamle.
Bukni, akam ning opmalinye biryuk, abasam el yan tup nirya ap, el deisuruk nirya ap ara, el anye biryuk, aning nirya dobukaplirye, mek likukaplirye, teleb kibuka kintinilinamlule. Winibuka aning nirya akunum pil dobuka, kintinip deiplyopura, Allah Yahweh ap, ninye ap ansilina ati, cang sapi bol arye domik doltakne tenda aik noutam pil don nang, imam-imam nang, sik deiyoknye biryuk, akintinip deipmalye ning dobuka, uku dongopliba, aning nirya, uku diplirye, siltong teleb ning ara, Allah Yahweh el dam welepliba, kekeplirye, Allah el kanye teleb unamle.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
Aning ati ara, atalak ulamik nang nirya, teleb ulina ati, kam ning obuka, ining kwebukapnarye, luptingca dobukapnarye, donoklamik. Atalak ulamuk ning nirya ara, talye winipmanto ning, kukia atonun ning ulamuk. Dipkoprop ning ara, im deiceuk ulule. Dipkoprop im deice ulul ning teleb ulina ati, arepmanto ning ara, minop talak kam ning obuka mitik teleb ning arilamik ning deice arye, teleb kum uptue. Aning kum bukni, winiryuk ning ara, pia teleb ning deice aryuk diksukum kipdeiptue.
Ura, Allah arye, “Aning ara wininamlulume, aning ara kum wininamlulume,” nyapdeibukba, Musa birye sekeiyamsuk mem yupu aupsuk bukni, nun tukwak ninye nirya, nun kanye talima pum tam malye una deiyok ning aupmasiliba, nun mikip ninye kum ati, amem yupu talibuka diksukumuk winipmanto kum unyabe. Ayupu talibuka kum dobolbitibye. Tonda, nun bidamang, kum lyepdatibye. Nun bidamang aryuk kum lyepdanmanto bukni, Allah el kanye aryuk el Mi Kopropa dopdeipsukba, ninye nong atonun kibuka yayuk. Allah el Mi Kopropa dopdeipsuk deiyok ara, ‘Ninye sik malye wininyak ning ati lyeplirye, kum daneipnamle’ tenen, dopkwetepsuk. Nun malye wininyap ning ati, talye luparabuka wenepsuturye, oplopsutu bukni, nun malye winin ning kilina ati, Allah arye Yesus arepsukba, yu nang arye obik. Kristus obikba el dibuka deice, Allah arye ninye nirya, nun malye una deiyok ning nirya wenebuka oltaka atonun upsuke. Yesus dibuka deice arye, malye una deiyok ning ara akunum malye kibuk. Yesus ati diba tenebibyopura, malye una deiyok ning arye, kum tapu koupsutue. Yesus dibuka deice arye, malye una deiyok ning akunum malye kibuka ati nyapsine.
Na Allah Yahweh arye nyapsine. Anggunce malye tuba winimunyeura, ‘Nun ni koprop Allah, el si erenamabe’ tenen, weik sum nirya kintinilimunye ning ara, na eilisinirye yu unulule. Aning nirya ara, na like. Tonda anggunce, ‘Kume, Allah si erena ati, mambul sum ani,’ nyabuka, ninye weik arye bulumunye sum nirya ati ara, na dukmanto unune.
Wininamnimak bukni, aopmalye basam el yan tup ap, deisuruk deice palilamle meta ap ara, el anye biryuk, dobukaplirye, mek likukaplirye, teleb kibuka kintinilinamlule. Apil dobuka kintiniplyopura, Allah ap, ninye ap, ansililina ati, sapi bol arye domik doltakne tenda aik noutam pil donyak nang, sik imam nang aryuk, akintinip deipmalye ning dobuka, keil pala taplakuka yangabuka kintinip deibik sukumuk binuka, uku dongopliba, aning nirya uku diplirye, siltong teleb ning ara, Allah Yahweh dam welepliba, kekeplirye, el kanye teleb unamle. Aning ara, Israel nang arye, ‘Nun malye wininyap ning nirya, Allah arye namin kipnamsil’ tenen, kam ning obuka, nong nirya boyanuka, uku dongonamak ning ara, Allah elti, aning arebikiba, elcuk kanye delinamle.
Minop talak sik Yahudi yala ninye arye, ‘Kaplina ati Kwalina dipnamap’ tenen, minop kintinipmek roti nena deiyok ning nirya bai tam dopkwetebikce, nena kum roti winiryuk ning dabuka dibik touk, wininamlulume. Ayupu el nong noutamak ning ara, anggun dib teneplum ninye noutamak arye, malye winin ning nirya wibuka dopkwetepmunce, diksukum ninyeuk umunyopura, Yesus ap talima dukdongobuka telebuk unamlume. Winibuka unamluma deiyok ara, ani. Ara, sik Yahudi yala ninye, ‘Nun malye winin ning Allah arye, kum kipdaneipnamsil’ tenen, Kaplina ati Kwalina ati, domba basam opnarye, Allah ati arilamik touk, nun Kaplina ati Kwalina domba atonunye, Yesus Kristus akunum obikbuk, nun malye wininyap ning pununa ati dibuka deice arye, nun malye winin ning akunum kum kipdeipsuke. Elce akunum teleb kibuka deipsuka ati, anggunda, nena kum roti, winiryuk roti atonun, diksukum ninye umunye ning ara, kum tenepmalum bukni, Allah el kanye ara, ‘Akunum diksukum unyake,’ nyapdeipsukce, telebe tenesulule.
Im deice arye yayuk roti kwaning, kam una deiyoknye bira, ara na uka. Akwaning nyapmasina ara, dobuka diplinye bira, nong dipmalya babye, pia kam unamle. Domon yupu deice arye, kwaning nyapmasina ara, na nong atia. ‘Ninye mutuku-mutuku nirya lyepnebuk, kam unamak’ tenen, na nong arepsine.” Yesus arye nyabuk.
Aning-aning nirya ara, Allah ap, ninye ap ansinilina ati, sapi basam bol arye domik doltakne tenda aik pum tam, pil talibuka dona deiyok nang, sik imam-imam bukni, atalak pil donmalinye biryuk, aning nirya doproplirye, pala keil yangabuka kintinip deibikak, aning bobilirye, binuka uku dongopnulule. Winibuka uku dongopliba, atup ap, meta ap, kop ap ara, uku diplirye, siltong teleb ning ara, weleplirya ati, Allah Yahweh kekeplirye, el kanye teleb unamle. Luba kina meme. Akam ning noutam wamlye meta ap, deisuruk dam palilamle kop nirya ara, Allah elti, arenamlule. Aning nirya ara, Allah Yahweh, el ninguk ulula atia.
Ayim domba basam kalipmace ning nirya ara, ance na Allah si erena ati, kam ning obuka, uku dongona ati, keil pala tablakuka, yangabuka kintinibuka deipnulumakuk, el si mesba, adeice binuka deipnulyame. Abinuka deipminyeura, an adiparyuk dobuka, uku uk dongonamlyame. Winipminyeba, uku diplirye, siltong teleb ninguk welepliba, na Allah Yahweh arye, asiltong teleb ning kekepnyopura, na kanye pia teleb kinamnile. Winipnyeura, uku diplirye, kin-kin tong teleb ning ara, na damak welebiliba, na Allah Yahweh kekenirye, kanye delinamsine.
Winibikceura, an adiparyuk, sik aning taruk deice arye, aroti kwaning nirya ap, yim domba basam kalimna ap nirya, talimakca ning ara, dopropnalyame. Doropminye ning ara, ‘Na arena ati, keil pala tablakuka, kintinibuka deiplumakuk, uku dongolyanamlyame,’ nyapsiba, kitinilumak el si mesba damak boyamince, ayangabuka deibik keil deice, uku dinmalye damak dongopnulyame. Winipminyeura, uku deiplyeba, siltong teleb welepliba, na Allah Yahweh kekepnirye, kanye teleb kinamnile.
Allah arye bico tenyamnukce nati, ‘Apil donamle’ tenen, wibuka deiamnukce, pil dona deiyok ning areamanuk ning ara, laka nyapnusine. Ara, ‘Paulus ara, Kristus el pil melinanye ulirye, Allah el si erena aik pum tam talibuka, pil dona deiyok nang, imam arye Allah el yupu peterenyak touk, Paulus babye ninye lyena ati, Allah el laka teleb ninye lyen yupu dobuka, Yahudi yala kum ninye unyak mutuku peterelbinamle’ tenen, Allah arye wibuka deipnuke. Yahudi yala kum ninye unyak mutuku noutamak dopreipnuka deiyok ara, ani. Ara, ‘Allah El Dib Kanye arye, Yahudi yala ninye kum bukni, diba tenenamak ninye nirya ati, teleb kiplirye, Allah el na tenen ninye unamak’ tenena ati, wipdeipnamle. ‘Aninye wibuka delinamla deice, Allah arye sikti, kanye delinamle’ tenen, Allah arye na Paulus ati, wibuka deipnuk. Ura, minop talak, Allah el si kina ati, kam ning obuka Allah ati arilbalamikba, Allah arye aninye ati, kanye delilamuk touk, Allah El Dib Kanye arye, Yahudi yala kum ninye ati, wiplirye, akunum teleb kiplyopura, Allah arye sik Yahudi yala kum ninye ati, el kanye delinamle.
Allah ati, “Telebe,” pia nyanune. Ara, ton tam ninye arye, ton tam ninye ati obisibikirye, anang tomobikirye, kanye deibuka, lubuka, anang bolbalamak touk, nun Ni Koprop Allah arye, nun nirya ati, akunum talisulule. Talisiliba, ‘Yesus Kristus, el amu tam unamak ninye, elce bobaliba, sikda el aminyan tam yangakirye, ninye nirya eipnamak’ tenen, Allah arye nun dib tenenyap ninye dopropsukce, Kristus el amu tam akunum deipsuke. Teleb kita ning arye tong teleb ning balibuk, ninye kekelamak touk, Allah arye menekuka balirye, nunda el aminyan tam yangapyopura, elce melisilyeba, nun ap, Yesus ap talima dukdongobuka unyaba deice arye, ninye mutuku-mutuku nirya eipsikirye, Kristus ati kel bikinyake.
Anyapmasin yupu ara, talye ati kum nyapne. Deiyok ara, Allah arye, aning-aning nirya, min kum kwepdeiamuk talak ara, nunti wepdeipsukce, winibuka tenyamsuke. Ara, ‘Anang ara, Kristus ap, kanye talima dukdongopniba, el deiceuk ucopura, na Allah arye, sikti, tenenamne talak nirya ara, anang ara malye winina kumce pia diksukum nang unyak,’ tenenamsine. Ara, Kristus arye, pil dopsuk deice aryuk tenenamsila ati, ‘Anang ara, pia diksukum un ninyeuk unyake,’ tenenamsile. Tonda, yata nang arye do, nunti, “Anang ara, sik malye winin ning ani, ani,” nyabuka, Allah ati kum nyapsitinge. Aning nyapmasin touk, Allah arye nunti, ‘Wininamake,’ tenyamsukce wipdeiyamsuke.
Anggunce dopdeipnulumba, weik arye akunum dopropse. Aninguk kum bukni, tonda anggunce Epafroditus areplumba, elce dobuka boyanuk ning akunum dopropse ati, na patapnuk ninguk kum bukni, weika tonap, dopropse ning ara, akunum moubuka aupmanile. Nunce Allah arena ati, el kanye deililul ning, kam ning obuka aribibirye, nintong teleb ning uku dongobibiba, nintong arye Allah ulyak welelamle atouk, anggun urdem aryuk arepnulum ning ara, atong teleb ning atouk ulule. Anggunce winilamlum ning ati ara, Allah arye kanye deilisulule.
Allah ap, ninye ap, dana-dana ansinilina deiyok nang nirya ara, wibuka deibikcopura, Allah el si erena ati, teleb arin ning ap, tonda, ‘Ninye malye winin ning kum kipdeipnusil’ tenen, kam ning obuka arilbalamak ning ap, Allah ati arinyake. Aning ati ara, na nyapmasinye, nun ap Allah ap Ansinilina Deiyoknye babye, elce Allah ati, arepmanto ning ton ubuk.
Deiyok ara, anggun ni koproba Allah Yahweh, el si erena ati, kam ning opnarye, uku dongonak ara, pala weik keil aryuk boyamunce, memepdeipnamlume. Bukni, akeil el urasin teleb una ati ara, besi ning lingkis arye, kum memepnamlume. Ining ning obuka, uku dongonak, akunum memep deipmunyopura, adeiceuk anggun ni koproba Allah, el si Yahweh si erena ati, yanuka uku dongolyanganamlume.
ကြော်ငြာတွေ