“Na ni Allah, an si Yahweh ati, an si erepkine. Na nio, Israel ninye ati pia kalikuka melisilyame. Nun deiyoknye an tonok ulyame. Im deice babye, tukwak mutuku babye, an atonunye ton pia kum ulule. Anda Allah tonoka. Anti pia tuba diba tenekinyak nang arye, yuk talye ning patana kumce, an nyalyam yupu moubuka talibikirye dobolbanyak nang ati ara, ance pia bico tenesilyame. An amu tam unyak nang ati, ‘Wininamsine,’ nyapdeiamsulum yupu ara, dipkoprob tuba winisilyame. Ati tukwak mutuku babye, im deice babye, an atonunye ton pia kum ulule.
Daniel 9:4 - Eipomek4 Na ni koproba, Allah el si Yahweh ati, moronmase ning ara, ani. “Na ni Allah, anda aning-aning nirya talebuka, deice tam erebuka, pia mikip weik deiyoknye ulyame. Ati ara, nun Israel ninye, nun malye wininyap ning ara, kunusa kum dopnune. Nun malye ning nirya ara, an dam lak nyabuka, lilipdeipkina arye moropkine. Ara dipkoprop, anda Allah, weik erebuka eitamnye, mikip weiknye ulyame. Tonda, ance, “Winipnamsine,” nyabuka, nyalin yupu nyapdeiamsulum ning ara, kum batakasilyame. Adiparyuk anyalisilyam touk, dipkoprob winisilyame. Ati ara, Allah antibuk, dib tenekinyak ninye ara, ance sikti, pia bico tenebuka melilyame. Amelilyam ninye ara, ance, “Aninguk wininamlulume. Aning ara, pia kum wininamlulume,” nyaplumba, ayupu moubuka talibuka wininyak ninye ati, melilyame. အခန်းကိုကြည့်ပါ။ |
Daniel 9:4
30 ပူးပေါင်းရင်းမြစ်များ
Akanye imun ning areptinyeura, yuk nang arye, ‘E, aninye ara, Allah Yahweh, el mapu unyake nyabuka, na mapu koprop sik Israel ninye, na si deice sinyak nang ara, sik kanye amu tam kebuka uptingura, nati, ‘Naio melibuka lyepsutume,’ nyabuka, pia moropnamnitinge. Tonda winiptingce, sikce malye unyak ning nirya dipkoprob bataknamake. Winiptingopura, na im deice ununak arye, sikce nati moronamniyak ning ara kekenamne. Akekelamnirye, sik malye unyak ning ati ara, narye namin kipnirye kilipnamne. Tonda, sik unamak mutuku nirya ara, pia tamubuka teleb kipdeipnamne.
Atalak ara, Esra birye, Allah si eren aik urasin tam binuka kanupdongobuka bukukce, “Se, dipkoprob nunda pia malye unyabe,” nyabuka, engebukce, Allah ati laka nyabuka morobuk. Israel nang noutam ara, sal babye, kilapu babye, tonda sik mapu babye, sik nirya ara, weik tonun bulubuka, Esra aunmoka dam, yanuka wekmeka ati, sik nirya anyaik damuk yanuka antanapdongobuka wekmek nang nirya ara, ‘Se, yata wiripnuyap do?’ tenen, mikip weik tonun engenmek.
Se, na ni Allah, im deice ulyamnye bira, anda kwelina mikip weiknye ulyame. Anti ara, ninye tukwak nang nirya arye, ‘Se, elda, weik mambule,’ tenekinyake. Ance, “Aning ara wininamlume, aning ara kum wininamlume,” nyapdeiamsulum yupu kekebuka ayupu atonun unyak nang ara, an deice uk sik kanye talima akunum deiamkike. Ati, ance nunti bico tenebuka, weik arye melisilyame. Ati ara, ance, “Na nyanye yupu moubuka kekepminyeura, narye winibuka melipnamsine,” nyabuka, nyalilamsulum yupu dipkoprob winisilyame. Tonok ning babye kum batakasilyame.
Ati ara, wini talak ara nun Israel nang arye malye winilamububa, ance pil weik dolamsulumce, lyelolamsulum ning ara, ‘Aning ara mambul kume. Aning ara, daopnyake’ tenen, kum bataknamsilyame. Malye winilamupu buk, ance ikin ning delilamsulum ning ara, tuba tenenamsilyame. Ara, nun wini talak unyap nang ikin usilye ning ap, nun ninye deiyok talibuka ulamik Raja nang ati, ikin ulamuk ning ap, nun yupu bokolina deiyok nang ati, ikin ulamik ning ap, an si eren aik pum tam pil dona deiyok nang ap ati, ikin ulamik ning ap, an yupu lak nyana deiyok nang ati, ikin ulamuk ning ap, nun apu yapu ati ikin ulamuk ning ap, tuba tenenamsilyame. Ura an mapu nirya ati, ikin ulamuk ning nirya ara, ‘Aning nirya ara mambul kume,’ kum tenenamsilyame. Sik Asyur mutuku ninye deiyok nang arye, nunti talibuka, ikin ning nun nong deice delilamsikce, anirye dipdongobuka, wini talak babye ikin usulul ning ati, ‘Aning ara ikin kum tenenamsilyam’ tenen, morokinyabe. Nun ni Allah, anda mikip weiknye ulyame. Tonda, anda aning-aning deice tam ululnye ulyame. Tonda, yuk weik ning aupmalebuk, anda weik mambulnye tonok ulyame. Yuk ning nirya ara, mitik mambul uka. Ance bico tenelamsulum deice arye, “Bico tenesununa anya arye, winibuka wininamsine,” nyapdeiamsulum ning nirya ara, dipkoprob winilyame. Tonok ning babye kum batakasilyame. Ance pia tuba melisilyame. Ati nun ikin usulul ning ara, tenepsimince, melinamsilame na nio.
Winibuka, ikin weik ulamsa ani, kum winipmanto ulamse talak ara, “Akunuma, na malye wininye ning nirya, tuba kum duknunamne. Na malye wininun ning ara, ani, ani,” nyabuka, an dam lakak arye, laka nyapkise. Narye, “Malye wininun ning nirya, na ni Allah Yahweh, el dam anyuk, laka nyanamne. Aning nirya ton kum duknunamne. El ti yaniptapnirye, elce nyanilye yupu, kum kekenuna ara ani,” nyabuka, lakak arye nyapse. An dam laka nyapkisiba, anda kekepnulumce, na malye winilamse ning nirya, kilibuka kum kipdeipnulume. Winipnuluma ati, aminyan talak nirya ara, ance nati, ‘Ance malye winilamlum ning ara, ani,’ nyabuka, kum wenepnamnilyame. Akunum teleb kipdeipnuluma ati, aning tuba kum tenenamlyame. (Sela)
“Yata nang do nirya, sikce, ‘Allah elda nun like,’ tenenyak nang, pia wenenamne bukni, nati kanye deibuka, narye sikti, ‘Aning ara, wininamlulume. Aning ara, kum wininamlulume,’ nyabuka, nyanye yupu diba tenebuka kekebikirye, ayupu talibuka dobolbanyak nang ati ara, bico tenepnirye, pia melinamsine. Ato ninye ara, pia kum bataknamne. Pia melinauk unamsine,” Allah arye nyabuk.
Ance moubuka, ‘Se, nara, Allah Yahweh dam malye winilamse,’ tenepnulyame. Tonda, Na ni koproba Allah arye nyapdeiamuk yupu, kum kekelamse,’ tenepmince, na damuk yanamlame. Tonda, an babye, ‘Se, na ni Allah ati, kum si erelamsirye batakuka, weik yo tikamuka amu tam balamsirye, yuk mutuku nang arye, si erelamik isa ati, “Na deiyok ning,” nyabuka, atalye ning si erelamsirye, na ni Allah ance nati, “Aning-aning wininamlyame,” nyapdeiamnulum ning ara, akunum yanyamse,’ tenepnalame. Ayupu ara, na Allah Yahweh arye, akunum nyapdeipmasina ati, aning nirya ara, dipkoprob upnamle.
Ance, nun apu yapu ati, atam tuku nirya areplumba, amutuku wekuka, talibikce ulamik. Bukni, sik anang arye, amutuku tuku dobuka, unyak talak ara, ance, sikti, “Aning-aning talibuka, unamlume. Aning ara, pia kum wininamlume,” nyapdeiamsulum ning ara, aning nirya kum talibuka ulamik. Tonda, ance, “Aning-aning wininamlume. Teleb winina ara, ani,” nyapdeiamlum ning ara, kum talibuka winilamik. Tonok ning babye, teleb kibuka kum winilamik. Sikce malye-malye weik winilamika ati ara, ance sik anang deice, ikin weik ning ap, kanye imun ning ap, nirya dopdeipminba, sik deice yalyeba dolokirye, imun kanye bobuka unyake.
Ayupu nyapdeibukba, Daniel kekebuk. Kekebukopura, adiparyuk tamubuka, el ulamuk aik biyukce, asum-asum nirya ulamuk touk, el im aik jendela kukuk. Ara, Yerusalem tam botcamik jendela ara, kukeibukce, el Allah si erelamuk touk, gutam tuku dipdongobuka, Allah morobukce, Allah el si erena ati, mot sebuk. Ara, Allah yupu mot sebuka winililamuk touk, asum babye atonun, Allah ati, teleb abuka kinmok.
Aning nirya eipsa ati, narye Allah ati moropse. Allah Yahweh elda aning-aning nirya talibuka, deice tam weik eren ululnye birye, ‘Winipnamne,’ tenelye touk ulula ati ara, elti, moropse. Ara, ‘Allah bico teneplirye, bico upliba, nun Israel ninye ati lyepnamsil’ tenen, moropse. Amoronmase talak ara, ikin kanye bopmasa anya arye, malye kain baju ongopsirye, na din dina kumce, si tebuka unmasirye, Allah atibuk, “ ‘Aning ara, winipsilyak’ tenen, lyepsilyame,” nyabuka moronmasirye, ikin kanye bopmasa ati, uku sice deice bukmase.
Na kayapo, nun kele. Nunce Allah ati diba tenebuka, nun kanye el deiceuk delinyap ninye nirya ati ara, yata winin ning do nirya, ikin usilye ning babye, kanam usilye ning babye, Allah arye awinisilye ning nirya dobuka, nunti teleb kilisulule. Ikin ning usilye talak babye, kanam usilye talak babye, atalak nirya ara, Allah arye pil dobuka melisilya deice arye teleb ulisulule. Winibuka melisilye nang ara, talye nang ati kum bukni, Allah arye, ‘Na mapu ubikirye, na tenyamse pil teleb kibuka donamake’ tenen, yukusilirye, wibuka deilisilye ninye ati nyapsine.
Bukni, yata nang do nirya, ninye nirya arye natibuk, ‘Allah elda, nun ni koproba ululeʼ tenen, nati kanye deipnikirye, na nyalinye yupu kekebikirye, aninguk talibuka nimalye arye, na amu tamuk upnin banamak nang nirya ara, pia kum bataknamne. Sik anang ara, batakna kumce, pia bico tenepnirye, melinauk usinirye, pia teleb kipdeipnamsine. Tonda, ‘Naʼ tenen, nang arye deibikiba, dadeipdanin banamak nang nirya ara, yupa pia weik nukman kumto, beribu-ribu otalak unamak nang ati, bico tenepnirye, pia telebuk kipdeipnamsine.
Musa arye ayupu yabukce, ayupu ton nyabuk. “Ura, anggun ni koproba Allah, el si Yahweh arye anggunti, ‘Aning ara, wininamlulume. Aning ara, pia kum wininamlulume,’ nyapdeipsilye yupu ara, kum bataknamlulume. Pia tuba kekepmunce, winipmunyopura, Allah arye anggun apu yapu ati, ‘Aning arepnamsine,’ nyalilamuk touk, anggun babye, aning arepnamsile. Ara, anggunti, dipkoprob tuba bico tenesilya atia.”
Aning ati, anggunce mutuku-mutuku nirya unyak ninye ati, eipmunce ilil upsiliba, yok sirim talina kume. Anggun ni koproba Allah Yahweh ara, anggun noutamak aulirye mikip weik ap, weik mambulnye ulula anya arye, anggun ilil una meme. Allah elda, weik mambulnye. Elda aning-aning nirya talibuka ululnye biti, ninye tukwak nang nirya arye, elti, ilil ulule.
“Ati ara, anggun adiparyuk moubuka teneipdemunce, kel kipnamlulume. Pia tenenamlulume. Allah el si ara Yahweh, anggun ni koproba Allah, el tonok ulule. Yuk ton kume. Allah arye nyalilamuk yupu nirya ara, dipkoprob ulule. El nyalisilye yupu ara, tonok ning ara, kum batakalule. Yata ninye do nirya, sikce el deiceuk, sik kanye deibikirye, elce, ‘Aning wininamlulume,’ nyabuka nyasilye yupu, moubuka talibicopura, Allah arye sikti, tuba-tuba melilule. Elce sikti, ‘Wininamsine,’ nyalisulul yupu nirya ara, tonok ning babye kum bataknamle. Nirya awininamle. Ato ninye ati ara, sikce mapu deibikiba, dadeipdanin, banamak nang yupa ara, pia kum nukmanto, pia weik upre balamlya babye, pia melinamle. Sikce, mapu deibikiba, dadeipdanin banamak ninye yupa ara, ninye nel punun nang, generasi yupa weik, seribu kali lipat upre banamak ninye ati ara, Allah arye pia melinamle. Kum bataknamsile.”
Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.
Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?
ကြော်ငြာတွေ