Daniel 8:2 - Eipomek2 Aning like bitinye talak, lengdar mapsirye eipse ning ara, ani. Na una ati dopropse mutuku ara, Persia mutuku noutam bukni, provinsi si ara, Elam unmase. Anoutam ara, Susan mutuku uk, lak kibukba eipse. Ara, Susan mutuku noutam tikmasirye, natikmase mekin, el si ara, Ulai mekin tikmase. အခန်းကိုကြည့်ပါ။ |
Daniel 8:2
24 ပူးပေါင်းရင်းမြစ်များ
Abram bira, Hebron mutuku binuka ulamuk talak ara, ton tam deiyok nang arye, yuk tam nang deiyok nang ati, yu ubukba olalamik. Sik ninye deiyok nang si ara, ani. Ara, Sinar mutuku taleamuknye, Amrafel ap, Elasar mutuku taleamuknye, Ariok ap, Elam mutuku taleamuknye, Kedolamer ap, Goyim mutuku taleamuknye, Tideal ap, sik nirya neika bulubukabikce, yuk mutuku nang ati olbiyik.
Hakailya el mi Nehemia bira, minopce Israel nang ulamikak, ulamuk bukni, sik Persia tam ninye arye, Israel nang sirya obikce, tapu koubuka sik mutuku Persia tam bobinamikba, Israel ninye keting tamun yupa weik, daulamika ani, aminyan talak Persia mutuku batakuka, tuba tamubuka, Yehuda tam noutamak yanuka ulamik. Nehemia birye nyabuk yupu ara ani. Nara, Persia mutuku taleamuknye Raja Artahsasta birye, Persia tam taleamukba, keting tamun yupa dua puluh tahun noutamak bukni, wala si ara, Kislew deice arye, sik mal olan nang kum yanmanto keil aik, amutuku si ara, Susan mutuku ulamse. Amutuku ulamse talak ara, na weit koprop tonok, el si ara Hanani birye, na dam yanuka nyapnuk.
Ninye deiyoknye Raja Ahasyweros birye, ‘Na talenun mutuku noutamak nirya ulamunye ninye, anggun kilapu ap, anggun mapu ap nirya ara, sik ni yapu nyanyak yupu, pia moubuka kekenamake. Urasin teleb wel kilapu nirya ara, na dam anyuk bobuka boyanganamnululume,’ nyabuka, surat sekuka dolilamukba, ayupu nyabuk touk, urasin teleb wel kilapu weika arye boyangalamikce, weik kota mutuku noutamak, Susan mutuku yanuka bulubuka delilyangalamik. Abulubuka deipmeka noutamak ara, Ester ton sik kan-kan noutam aunmok. Ester babye, ninye deiyoknye, Hegai el amu tam ulamuk. Ara, wel kilapu nirya melibuka kaliklamuk.
Raja Ahasyweros birye nyapdeibukba, Haman birye, asurat sekuka arebukba, sik surat arelbana ati, wipdeibik nang arye, asurat bobuka, sik minopce biyikce, amutuku noutamak nirya arelbalamik. Tonda, Persia mutuku weik deiyok mutuku, kota Susan noutamak ton, asurat lakak deibik. Akunum deibikopura, amutuku ninye deiyoknye, Raja Ahasyweros ap, el amu tam ninye deiyoknye, Haman ap ara, bukukapdikce, anggur mek weika arye dinmarik. Bukni, kota Susan mutuku noutamak ulamik ninye nirya ara, ayupu kekebika deice arye, amutuku noutamak nirya ara, ‘Se’ tenen, kanye bokoltonauk ubuk.
Raja arye nyabukura, Ratu Ester birye tamubuka nyabuk. “Kume, anyapmakinye bira, yuk mutuku ululnye kume. Ara, abukmalnye, Haman el uk ara, ninye ona ati, pia yu weiknye ulule. Ati ara, Haman elcuk na yala ninye nirya ati, ‘Lik,’ tenena ap, ‘Kum kibuka deiptinye,’ tenena apnye ulule,” Ester birye nyabuk. Akil arye nyabukura, Haman birye, Persia mutuku ninye deiyoknye Raja Ahasyweros ap, el kil Ratu Ester ap ati, ‘Se, yata wiripnunirak do?’ tenen, sik asok deice erebuka dilina ara, ilil pia weik ubuk.
Mordekai birye, ‘Winibuka surat seknamlyame,’ nyabuka, akunum laka nyabukopura, Raja dam batakuka, elti, arebuk aik tamubuka biyuk. Atalak aniryuk ninye deiyoknye Mordekai amutuku noutamak, ninye deiyok nang sik ongolamik urasin pia teleb baju ongobuk. Abaju el yala ara, dekna weik mirin ning ap, kurun baju ap ongobuk. Tonda, urasin pia teleb un ning, ninye deiyok nang sik kisok deice kalubuka kilamik ning, el si ara mahkota, dekna weik kat ning el si emas, pia teleb ning arye, memebik ning ap, ongopmokce biyuk. Winibuka biyuk ning ara, kota Susan mutuku noutamak ulamik ninye, sik kanye pia teleb ubukba, elti, weik arye si erebuka unmekce, kwalya kwalibuka dibik.
Mapmeka berekukopura, tanggal empat belas (14), wala si Adar deice arye, kota Susan mutuku noutamak ulamik Yahudi yala ninye nirya ara, bulubuka Susan mutuku noutamakuk ulamik nang yupa pia weik, 300 nang oplobik. Ara, ‘Haman nyapsuk touk, Yahudi yala ninye obuka sirya daknamabe,’ tenelamik nang ati, oplobik. Winibuka ninye yupa weika arye 300 nang tabakuka obik bukni, anang arye talilamik ning nirya ara, kum dalubuka doprobik.
Aning nirya lakak upnamle talak ara, Allah ara, aning-aning nirya talibuka, mikip weik ululnye birye, el taruk bibiklirye, tupa ton ap bitinye talak deice, Israel yala nang taliplirye, el mapu koproba lyeplirye, sik dana-dana tam unamakak arye, sik mutuku tamubuka bobanamle. Ara, Asyur mutuku ap, Mesir mutuku ap, Patros mutuku noutam ap, Sudan mutuku ap, Elam mutuku ap, Babel mutuku ap, Hamat mutuku ap, tonda weik laut mekwen lilun ap, daunyak mutuku, pia lowak ap, tuba ton aunamak Israel nang ara, tamubuka, sik mutuku koproba, noutam bobanamle.
Na Yesaya lengdar mana deice arye eipse ning ara, na ilil upnuke. Alengdar mapsa deice eipse ning ara, yuk mutuku yu nang arye, Babel mutuku nang ara dobuka, sik mal olan nang deice deipnamaka ati eipse. Ton nang arye, yuk nang ati, tenebuka arye tilila yupu nyalamik touk, atalak ara, tuba tenen arye tilila yupu nyanamake. Alengdar mapsa ning ara, ton tam nang arye, yuk mutuku nang ati, sik bona nirya ara, ubula dolamik touk, atalak babye yakirye, ton mutuku nang talinyak bona nirya alubuka dopropnamake. Aning nirya ara, wininmokak eipse. Tonda, Elam amutuku ara yin nang yakirye, Babel mutuku nang olyanamake. Tonda Madai amutuku yin nang yakirye, Babel mutuku nang yanuka, warikuka opnamake. Ara, Babel mutuku nang arye, yuk mutuku nang nirya, ikin ning sik nong deice delilyeba, kanye ikin ulamuka ati, Allah arye Babel nang ati, sik mitang kipdeipnamle.
Ara, atalak ara, keting tamun yupa weik, yupa tonok kepdopnye pamubarye (tiga puluh tahun 30) ubuk. Dumu wala arye, like pamu sum (tanggal 5) ubuk sum ara, Atalak ara, Babel mutuku ninye deiyoknye, Sisinanye Nebukadnesar ap, el yin talin nang ap arye, Israel ninye tongobuka tapu koubikce, Babel mutuku bobinamsikba, daulamua ani, keting tamun pamubarye, akunum kibukopura, mek si Kebar mek lelun unmase. Ara, na Yehezkiel ap, Babel mutuku nang arye, yuk Israel ninye bobuka delilbalamik ninye ap, Kebar mek lilunak unmapu. Atalak ara, Allah arye, im deice bublan kukibukba, weik mambul ning ton, laka kipsukba, narye eipse.
Tonda, Elam mutuku yin talin nang ap, sik amutuku ulamik nang babye, min arye ninye olanak arye obikba dipneura, weilamikak, asukumuk yayikce aunyake. Asukum manyaka dana-dana tam, dukdongobuka deipmekak, diamik nang ton, asukumuk unyake. Sik anang nirya ara, mal olanmeka ani, obikura diamik. Sik nirya ara, Allah ati diba tenena kum nang ati, deiamikba, asukumuk Sheol mutuku yayik. Sik Elam mutuku diamik nang ara, tuku palibuka wiamik bukni, sikda pia malye-malye weik ulamik nang ati, Sheol mutuku pia amu noutam binuka deiamik. Sik anang kam tuba ulamik talak ara, amutuku-amutuku noutam ulamikce, yuk ulamik nang ati, yu kibuka, malye weik ulamika ati, sik dana-dana tam ulamik nang nirya ara, sik anang ati, ilil pia weik ulamukba, sik nong sirim talilamuk. Bukni, sik yuk nang mal olanak arye opniura, dipnarye, wekelbalamikakuk, Sheol mutuku biyik. Ati ara, Elam mutuku nang ap, amutuku akunum min arye yayik nang ap, sik nirya babye, alye dakdayik.
Amekin tikmasirye dinmase talak ara, Ulai mekin piridipna dam ara, yim domba basam ton, el kisok deice, cang taice ning, ara, yang bitinye belepmokba eipse. Bukni, yang tonok ning ara, cang weik ubuk bukni, yuk yang ara, mitik touk ubukba eipse. Ton yang ara, mitik cang ubuk ning ara, min yuma belebukba eipse. Bukni, aminyan talak belebuk cang weik yang, akunum uamuk ning ara, aminyan belebuka tikukba eipse.
Birik talak ara, Allah el si Yahweh adiparyuk sik bitinye ati nyabuk. Kekenurume! Anggun noutamak nara Yahweh, na yupu laka nyalulnye ton aulyopura, el kel kina ati, kum mapmalye talak ara, el kanye talima noutamak laka nyaniba kekelule. Tonda, lengdar maplya deice arye, na wininye ning laka nyaniba, eibuka kel bikilule. Tonda, kum mamlye talak bukni, mambul yupu nyapnyopura, kekenulule. Tonda, yuk talye nang nirya ara, aning nirya kum eibuka kel biksiting bukni, narye arepneba, na pil donye birye mambul ning dilyalirye, narye elti, na yupu laka nyalinune.
Minop talak ara, Allah arye nun apu yapu nang ati, yupu nyalamuk ning ara, elce nyalamukba, el yupu laka nyalamik nang, sik nabi-nabi nang kekelamikce, nun apu yapu nang ati, laka nyalamik. Allah arye, el yupu laka nyalamik nang deice laka nyabuka nyalamsuk ning ara, like yupa weik ap, pil yala yupa weik ap dolamuka deice arye, laka nyalamsuke.
Atalak ara, lengdar deice elilamap touk eipse ning ara nyapnune. Sik kuda deice bukuka kintinipmek ninye, sik urasin laka nyapnune. Sik taram deice ting atonun ning ongobik ning ara, ining bi ap, mirin ap, poron ap dayuk. Sik kuda basam ara, sik nong ara, kuda basam atonun kibuk bukni, akuda basam kisok ara, weik yu kuse, el si ara singa kus, urasin atonun ubukba, eipse. Akuda nirya si bam bol pum tam arye, uku buk ap, tulum ap, keil lyein tin pia weik ning ap, welebukba eipse. Aning nirya winibuka deice arye, sikin tong atonun weik arye nyanmokba, kekepse.
ကြော်ငြာတွေ