Tonda, narye akunum nyapdeipmasin yupu ara, adiparyuk winipnamlume. Anggunce, ‘Yo, aminyan talakuk ayupu laka nyalbinamabe,’ tenena pia kume. Adiparyuk, ayupu bobuka, minopce laka nyalbinamlume. Yata ning ati, talye tunim abuka, daulamepya ani, na talenun mutuku noutam ara, sik aninye arye, talye luparabuka malye kipdeipnamak do? Kume aning ara, kum winipmanto nyapne. Ati, na si deice arye, ayupu laka nyalbinamlume. Nyabuka ninye deiyoknye Raja Artasasta birye, ayupu nyabuka, surat deice arye nyabuka dopkwetebuk. Nyabukopura, asurat dobuka, Efrat mek dara tam binuka arebikopura, ninye deiyoknye, el si ara, Gubenur Rehum ap, el Sekretaris pil donanye, Simsai ap, sik kwitcapu nirya ap, akunum kekebikopura, adiparyuk sikce Yerusalem weik asik dam bikbik abuka biyik. Yerusalem mutuku noutam ulamik Israel yala nang ati, ayupu laka nyabik. “Persia mutuku talelul ninye deiyoknye, Raja Artasasta, el si deice arye nyapsiabe. Anggun adiparyuk, anyaik lipsisikuka pil dona bataklulume!” Ayupu nyabuka, weik tonun nyabikopura, Israel yala nang arye, ‘Se’ tenen, Yerusalem mutuku noutam domik asik lipsisikuka donmek pil ara, adiparyuk batakik.
Daniel 6:3 - Eipomek3 Akintinip deibuk mutuku, ‘Talinamak’ tenen, Gubenur wipdeibuk nang ap, sik kalikna ati, wipdeibuk nang nirya ap ara, aulamikce, mitik teleb ulamik bukni, Daniel tonok ara, kel weik kopropnye ulamuk. Ara, Daniel birye, pil pia teleb ubuka dolamuk ning ap, el pia diksukum ulamuk ning ap, adeice arye, pia teleb ulamukba, ninye deiyoknye, Raja Darius birye bikamuk. Daniel pia teleb ulamukba, ninye deiyoknye birye, ‘Na mutuku weik kalikna deiyoknye kina ati, Daniel wibuka deipniba unamle,’ tenebuk. အခန်းကိုကြည့်ပါ။ |
Daniel 6:3
12 ပူးပေါင်းရင်းမြစ်များ
Tonda, ‘Yerusalem mutuku nirya kalikuka dinamle’ tenen, na weit koproba Hanani wipdeipsiba, kalikna deiyoknye kibuk. Tonda, el melina ati, yuknye ton, el si Hanania ton wipdeipse. Anye bira, cang keil poka antanap dongobuka dolamikba, oldan nang kum yanmanto asik kalikna deiyoknye biti, ‘Benteng panglima, nyalamik atonun unamle’ tenen, wipdeipsiba, na weit koproba ati melilamuke. Ura Hanania wipdeipsa deiyok ara ani. Anye bira, Nun ni Koprop Allah ati, pia dib tenelamukce, Allah ati, ‘Elda pia mambule,’ tenelamukce, ilil ulamukba, dipkoprob diksukumnye ulamuk ati, wipdeipse. Yuk nang ara, mitik teleb ulamikce, Allah ati dib tenelamik bukni, elda pia dipkoprob dib tenebuka telebnye ulamuk. Ati el ap, na weit koproba ap arye, Yerusalem mutuku kalikna deiyok nang ulamdik.
Mordekai elda, Yahudi yalanye ati ara, elda weiknye buklirye, ninye deiyoknye Raja Ahasyweros, el amu tamnye ulamuk. Persia mutuku noutamak ara, yuk deiyok nang weik ton aulamik bukni, sik nirya ara, Mordekai el amu tam ulamikce, pil dolamik. Tonda, Yahudi yala ninye nirya arye, Mordekai biti, ‘Elda weik mambulnye ulule,’ tenelamikce, sik nirya arye, elti, si erelamik. Ara, talye ati kume. Mordekai elce mutuku nirya lyena ning ap, teleb kibuka una ning ap ati, pia pi dobuka, pil dolamuk. Haman ap, el aik ninye ap arye, Yahudi yala ninye ati, obuka sirya dakmanto ulamik talak ara, Mordekai birye yupu sekukce, aninye ati lyebuk. Ati, sik amutuku ninye nirya ap, sik ayala ninye donirye dadeipdanin yangalamik mutuku ninye nirya ap arye, Mordekai elti, pia weik arye si erelamik.
Ninye weik kel bikamikce nang arye, weik kel kibuka unyaka deice arye, yupu nyan talak ara, yupu canga arye kum nyanyake. Yupu bumang uk nyanyak bukni, sikce nyanyak yupu ara, weik kel bikne ninguk nyanyake. Aning atonun, weik kel kinyak nang ara, sik yupu nyapnuce talak ara, ‘Malye yupu nyapmap do, ara teleb yupu nyapnamap do?’ tenenmakirye, nyabice talak ara, tenipdekirye, nimalye arye nyanyake. Yuk nang arye sikti, malye updeipnamak babye, minopce derena uk kum unyake. Sik kel nang arye, ‘Nun kayapu ati, derebibyap’ tenen, sik nyanyak yupu moubuka kalikildanyake. Sik talima teleb unyak nang anya arye, namin yupu aryuk nyanyake.
Anggun ton elilulum do? Ninye ton el pil aning-aning nirya pia teleb kibuka pil dolulnye eipmunyopura, moubuka dinamlulume. Anye bira, aminyan talak, ninye deiyok nang, sik Raja nang melilana ati, weik mambul pil dobuka unamle. El pil ara, pia teleb kibuka pil dolula anya arye, talye daunyak ninye ati, sik amu tam ulirye, sikti, pil kum donamle. Aning kum bukni, sik ninye deiyok Raja nang ati, sik aik pil talibuka donamle.
“Anye bira, pia kum winipmanto ning, kel weiknye koproba ulule. Ara, Allah el Dib Kanye mikip arebuk deice arye, nong noutamak weik kel bikin ning ap, lengdar mapmace ning nong laka nyananye ap, duknun ning lak lenanye ap, tonda, ninye ikin kanye bopmace ning nirya ati, lipsisikilinanye ulule. Anye el si ara, Daniel nyalamik bukni, an ni birye elti, winiryuk si dobuk ara, Beltasar nyabukba nyanyake. Wini talak ara, ance anye yukupminba yalirye, asekukak eiplum ning, nong laka nyapnukile.” Ayupu nirya ara, Raja Beltasar el kil arye nyabukba, Raja kekebuk.
Ura, Belsiyasar bira Isa Mutuku Dongonye si erelamuknye ulamuka anya arye, elce nyabuk. “Narye kekekiniba, ‘Elda Isa kanya mikip weik langdibukak ululnye,’ nyakinyakak kekeknunune. ‘Adeice arye weik kel kina deiyok ning ap, nong noutamak weik kel kin ning ap, weik ululnye,’ nyakinyakak kekeknunune,” nyabuk.
Winibukopura, ninye deiyoknye, yupu mikip asa arye nyabuk. “Kasdim mutuku nang, ara keting, wala, kurya kel weik bikin nang ap, aminyan winipnamle ning, lak lena deiyok nang ap, Isa Mutuku Dongonye mikip deice ninye winipmanto kum pil donyak nang ap, yukupmunba, na dam bulubuka yanunyake,” nyabuk. Nyabukura, sik anang nirya bulubuka yayikopura, ninye deiyoknye birye, sik anang nirya ati, nyabuk. “Anggunce, asekmal ning yinipmunce, el nong laka nyapnamnulume. Yatanye birye, ‘Deiyok ara, ani,’ teneplirye, na kel kina ati, laka nyapnamanilanye bira, narye el kina ati, dekna ning pia teleb baju, cang ning ap, kwerya ngang ongolamak ning karakna emas ap, arepnamne. Arepnirye, weiknye kina ati, anye erepdeipnamane. Na ninye deiyoknye ununa atonun, na amu tam deiyok kinanye unamla ati, erepdeipnamne. Ara, na amu tam bukni, weiknye kinanye unamle,” nyabuk.
Ance Allah ati, deiyok koubuka moropmamu talak ara, Allah adiparyuk akunum kekepmakila ati ara, elce winipnamle ning ara, anti lak nyalyakine. Deiyok ara, Allah arye anti, weik arye kanye deipkuka atia. Ati ara, narye nyapnukin yupu ara, an moubuka kekepnunilyame. Narye an lengdar maplum ning, lak lepkiniba, el nong kel biknulame,” malaikat Gabriel birye, Daniel biti nyabuk.