Firaun birye nyabukce, elce Yusup biti nyabuk. “Ura, aning-aning nirya, ance laka nyapmasilam ning nirya ara, Allah arye anti, laka nyapdibkukba, laka kibuka nyapmasilama anya arye, yuk nang ara, mitik tonun arye kel nang unyak bukni, nun kanye ara, anda weik kel ap, ‘Deiyok asukum’ tenen, laka nyapmanto una ap, weika tuba ulamkile.
Daniel 2:47 - Eipomek47 Arebikopura, ninye deiyoknye Raja arye, Daniel biti nyabuk. “Dipkoprop nyapne. Ance si erelyam Allah ara, elda aning-aning nirya deice tam ulirye, aning nirya talilule. Elda Allah tonok ulule. Elcuk ninye deiyok nang nirya talilulba, sikda el amu tam unyake. Allah el tonok duknun ning nirya, laka kilina deiyoknye ulule. Elda, anti laka kibuka nyapdeipmakuk touk, ance akunum laka nyapmanilame.” Nebukadnesar birye, Daniel biti nyabuk. အခန်းကိုကြည့်ပါ။ |
Daniel 2:47
34 ပူးပေါင်းရင်းမြစ်များ
Aning akunum winibukopura, el melin nang ap, sik nirya tamubuka Elisa dam yayik. Naaman bira Elisa dam tikukce nyabuk. “Atalak ara, na akunum kel bikmane. Mutuku-mutuku nirya ara, Allah yuknye ton kum ulule. Allah ara, Israel mutuku noutamakuk ulule. El tonoka. Ati ara, dekna weik ning narye anti, dekena kum bukni, talye arepnukine,” Naaman birye nyabuk.
Aning atonun ton, Allah arye sik imam-imam nang, sikti, alye un ning arelule. Sikda, ‘Allah arye nun malye winin ning kum kipdeipnamsilʼ tenen, kam ning obuka, Allah arena ati deiyok nang ulamik bukni, Allah arye, sik dam yanuka, pia amu tamuk deiplyopura, talye bona talina kum nang unyaka atonun, yan ongon ning, el si ara sepatu, ongona kumce, alye dakdanuka banyake. Tonda, sikce ninye deiyok kibuka bunyak mikip weik nang ara, Allah arye sik dam yanuka doplirye, amu tam kililule. Winipyopura, Allah arye, sik mikip weik deiyok nang ati, talye nang atonun kililule.
Tonda, ninye arye, ‘Nun ni koproba aniʼ tenen, yuk talye ning ati, si erenyak ning nirya ara, nun ni Allah arye, atalye ning nirya deice tam ulirye, aning-aning yala nirya talibuka, pia mikip weiknye ulule. Dipkoprob Allah ara, el tonoka. Tonda, Allah arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti, pia telebe,’ nyabuka nyanamabe.
Aning atonun, deiyok koubuka, yuk mikip ulye ning nirya ara, nun ni koproba Allah Yahweh, elda sik deice tamuk ulula ati, Dipkoprob Deiyok Weik Ululnye bira, Allah el tonoka. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye, el tibuk si erebuka kina ati, ‘Naio nunce anti, pia telebe,’ nyabuka nyanamabe.
Yuk ninye im sirya, mutuku sirya, kekenamakak nyanamlumak ara, talye ati kume. Deiyok ara, Allah el si Yahweh, Weik Erenanye ulula atibuk, teleb kilinamabe. Yuk talye ning ap, Isa Mutuku Dongonye ap ati, ‘Nun ni koprop,’ tenekirye, ilil ubuka unyak bukni, Allah ara, aning-aning nirya deice tam ulirye, Weik Erenanye ulula anya arye, el tibuk, ilil weik upliba, el si pia erenamlume. Ara, talye ati kume. Isa si erenyaka ara, Allah el mikip atonun ning ton, kum winilule.
Anyapmasin yupu nirya ara, talye ati kum nyapsine. Deiyok ara, ani. Na Allah Yahweh, aning-aning nirya deice tam erebuka, Pia Mikip Weik Deiyoknye birye nyapsine. Narye, Babel mutuku nirya talibuka, ninye deiyoknye, Raja Nebukadnesar, Babel mutuku arye boyanyeba, anggun Tirus mutuku ululum nang ati, yanuka wareknamsiake. Ara, Raja mikip weiknye birye, el yin talin nang ap, tonda Kuda basam balye deice bukuka, ninye olbalammik yin talin nang ap, kereta perang deice bukuka, olban nang ap bobuka, sik Tirus mutuku nang ati, olyanganamsile. Elce yin talin nang, pia weik bobuka olyanamle.
Bukni, aning-aning min kum kipdeipnamle talak ara, Siria tam mutuku talipnamle Raja birye, el kanye aryuk tenipnamle touk, aninguk wipnin banamle. Tonda, el talima eren deice arye, maknya kintiniplirye, nyanamle. “Kume nara, pia deice tam ulinye unune. Ninye arye si erenyak ning, dewa-dewa ap, ninye arye, ‘Nun ni koproba ani’ tenen, si erenyak talye ning nirya ap, tonda aning-aning nirya, deice tam erebuka ululnye, Allah Yahweh ara, na amu tamuk ulule. Ninye arye, si erenyak ning nirya ara, mambul kume. Na uk ara, mambul weiknye unune. Na tonok ara, weik deiyoknye unune,” nyapnamle. Utenepdalirye, el siuk weik tonun erenamle. Tonda, elce Allah Yahweh ati, pia malye-malye yupu weik tonun nyanamle. Ura, amutuku deiyoknye, Raja Siria bira, elce aning winipnamla ara, Allah arye, ‘Anye winipnamle,’ akunum tenyamuk touk ati, aning winipnin balamlya ani, Allah arye, ‘Atalak akunum,’ tenyamuk touk, akunum uplyopura, Raja malye weik ulamuka ati ara, Allah arye anye el deice, ikin weik ning deipnamle. Adeice arye, Allah el yu tenyamuk ning ara, sirya daknamle. Allah arye, akunum tenyamuk ning nirya ara, dipkoprob nong upnamle!
Bukni, Allah im deice ululnye birye, duknun ning nirya ara, elcuk talibuka ulirye, lak kilisulul ati, duknuna ning ap, aminyan talak winipnamle ning ap ati, elcuk lak lepkutue. Wini talak ara, weiknye Nebukadnesar, an kel biknamnilyame. Allah arye lengdar mana ning aripkuka deice arye, aminyan dowinipnamkil ning ati, akunum lak lepkuke. Ati ara, lengdar maplum ning ap, tonda, ‘Lengdar do, dipdip do?’ tenena deice, eiplum ning ap, nong ara, narye lak nyapnukine.” Daniel birye nyabuk.
Daniel birye, ninye deiyoknye, Raja Nebukadnesar biti, nyabuk. “Naio an mapmalumak arye, lengdar mapmalumce, lengdar deice eipmalum ning ara, dotalak winipnamle ning ati eiplume. Duknuna ning nong noutamak, lak lena deiyoknye Allah arye, dowinipnamle ning ati, an dam arepkuk bukni, moubuka kum kel biklume.
Nara, an pil donanye birye, duknuna yupu ati, lak nyapnukine. Ara, nara kel weiknye kume. ‘Nara weik kelnye unune, sik yuk nang nirya ara, mitik kel nang unyake,’ tenena deice arye, kum nyapnune. Bukni, ‘Ance lengdar maplum ning, nong kel kina ap, tonda an kanye talima pum tam tenelyam ning ap, moubuka kel kipnulyam’ tenen, aning-aning nirya, lak lena deiyoknye, Allah arye nyapnuk ning ara, lak nyapnukine,” Daniel birye, Nebukadnesar ati, nyabuk.
Na ni koproba Raja ninye deiyoknye, anda pia telebnye. Yuk ninye deiyok nang atonun kume. Yuk ninye deiyok nang daunyak bukni, anda sik nirya talibuka deice tam ulyame. Allah im deice kwepdeibukce, eitam ululnye birye, na ni anti, ‘Amutuku nirya taliplirye, mikip weik ap, weik mambul una ap, urasin pia teleb una ap unamle’ tenen, wipdeibkukba ulyame.
Wini talak ara, anggunce aning si erena ati, kintinipmalum do? Pong-pong ana, aning-aning nirya arye, lelim weik taplyopura, anggun nirya arye, aning si erena ati, akunum kintinipmalum do? Kintinipmamunce, aning ati si erepmunyopura, teleb uka. Bukni, anggunce, ‘Aning nun kum si erepnuyabe,’ tenepmunce, si kum erepmunyopura, anggun tapu koubuka, weik uku buk pakanmalyak noutam dongopnamsine. Uku buk pakanmalyak noutamak dongopmasinye talak ara, yata minop kwemdina ning ton aulamtopura, yanuka lyepsutu do? Pia kume.” Nebukadnesar birye, Daniel ap, el kwit capu, sik bitinye nang ap ati, nyabuk.
Winibukopura, Raja Nebukadnesar birye nyabuk. “Sadrak ap, Mesak ap, Abednego ap, sikce si erenyak Allah ati, ‘Telebe,’ nyabuka, si erepne. Sikce si erenyak Allah arye, el malaikat dopkwetepmalba, el pil don nang Sadrak ap, Mesak ap, Abednego ap lyepmala ati bikne. Sikda na nyapse yupu yanipnikce, sik tenepmeka ara, ‘Nun opsitinga babye, teleb uka. Ara, nun si erenyap Allah arye lyepnamsila atia,’ tenebik. Utenebika ati, na yupu yanibuka, sik Allah ati, diba tenebik.
Ati ara, narye nyapniba, im sirya, mutuku sirya nirya daunyakce, yupu yuk-yuk nyanyak ninye nirya ap, tonda yata yala ninye do, nirya babye, Sadrak, Mesak, Abednego ap, sikce si erenyak Allah ati, malye yupu nyapmunyopura, narye nyapniba, na amu tam yin nang arye, anggun opsikirye, nong ara, sekuka bataknamsiake. Tonda, anggun aik dakuka bataknamsiake. Ara, yuk nang arye, si erenyak ning arye, awinilye nang wenena ati, uku buk noutamak donokmanba, lyepdopmal atonun, yuk Allah ton pia kum ulule. Ati ara, nun nirya arye, sik si erenyak Allah, el si ati, malye yupu pia kum nyanamabe,” Babel mutuku ninye deiyoknye, Nebukadnesar birye nyabuk.
Anyapmap ning ara, Allah el pil don nang malaikat, nun diksukumuk unyap nang nirya, bulubuka, yupu talebuburye, nyabupu ning nyababe. Ati ara, ninye kam unamak nang, mutuku nirya arye, ‘Dipkoprop Allah aning-aning deice tam, Weik Erena Deiyoknye ululnye birye, nun nirya talipnamsile’ tenen, kel biknamake. Tonda, Allah elce tenelye touk, tukwak mutuku ninye deiyok nang kina ati, ‘Anye birye talipnamle’ tenen, wipdeipliba talinyake. Tonda, Allah arye, ‘Anye bira, talye bona utotoa talina kumnye ulul bukni, ereipnun,’ teneplirye, erelilule.” Nebukadnesar birye, nyabuk.
Allah arye nyapliba winipnamkile. Ara, Na nio, anda ninye unyakak arye yakuka. bai tam donokikiba, unamlame. Winipkikiba, talye kam ulamle ning ap, sik ap, neika kam unamlume. Atalak ara, sapi basam maning dilamak touk, an babye, aninguk maning dinamlyame. Winibuka unamlam talak nirya ara, keting tamun tekbarye (7) mapnalame. Winipnamlama deice arye, ‘Dipkoprop Allah aning-aning deice tam, Weik Erena Deiyoknye ululnye, aniryuk ninye nirya talipnamsile. Tonda, Allah elce tenelye touk, tukwak mutuku ninye deiyok nang kina ati, anye birye talipnamle’ tenen, wibuka deipliba talinyake. Allah arye, ikin ning deipnakila deiyok ara, arup nyapmakin ning, ‘Kel kipnamle’ tenen, winipnamakile.
“Anda ninye unyakak arye yakuka, bai tam donokikiba unamlame. Winipkicopura, talye kam ulamle ning ap, anggun neika kam unamlume. Atalak ara, sapi basam maning kwapu dilamak touk, an babye aninguk dinamlyame. Winibuka unamlam talak nirya ara, keting tamun tekbarye (7) mapnalame. Mapnalama deice arye, dipkoprob Allah aning-aning deice tam, Weik Erena Deiyok ululnye, elcuk ninye nirya talipnamsile. Tonda, Allah elce tenelye touk, tukwak mutuku ninye deiyok nang kina ati, ‘Anye birye talipnamle’ tenen, wipdeipliba talinyake. Allah arye ikin ning deipnamkila deiyok ara, arup nyapmakin ning, ‘Kel biknamle’ tenen, winipnamakile,” nyabuk.
Nyabukce, ayupu ton nyabuk. “Ara, urdem ati kum nyapkine. Na ni, an un dam ululnye tonok ton, Allah arye, anye dib kanye mikip weika arye arepliba, ululnye ton aulule. Anye bira, malye winina kumnye, diksukumuk ululnye aulule. Anye bira, an ni Raja Nebukadnesar, ninye deiyoknye ulamuk talak arye ereiamukba, ulamuknye tuba aulule. Anya arye el anye bira, el weik kel kiamuk ning ap, nong noutamak ulul ning kel kina ap ara, Allah el weik kel bikilul touk, ululnye aulule. An ni birye, Babel mutuku ulamik weik kel bikna nang nirya, sik deiyoknye kina ati, anye wipdeiamukba, ulamuknye tuba aulule. El amu tam ulamik nang ara, ani. Ara, Isa Mutuku Dongonye mikip deice arye aning-aning kel bikne nang ap, keting, wala, kurya weik kel bikamik nang ap, aminyan winipnamle ning laka len nang ap nirya, anye el amu tam ulamikbuk, elda sik deiyoknye ulamuknye aulule.”
Dipkoprop Allah Yahweh elda, Weik Erena Deiyoknye, aning-aning nirya talibuka, deice tam ulule. Winilula anya arye, Allah elce, ‘Aning nirya ara, winipnamne,’ nyabuka, el yupu lak nyan nang, ‘Nabi-nabi arye kekepnamak’ tenen, lak nyaliba kekenyake. Sikda, el amu tam pil don nang unyake. Allah arye, sik dam lak kum nyapdeiamturye, el pil dolye ning nirya, talye mangkau kibuka kum pil dolule. ‘Winipnamna arye,’ nyabuka, laka nyaliba, nabi nang akunum kekebiceura, Allah arye apil dolule.
Anggunce Allah yupu lak kibuka peterepmunyopura, dib tenena kum ninye, ayupu kekebikca deice arye, sik talima noutamak malye winibuka, dungnulamice ning ara, laka upliba, kisok talipdanuka malye kanye bobikirye, “Se, Allah ara, aninye sik talima noutamak dipkoprop ulule. Bukni, nunda malye ninye tuba unyabe,” nyabuka, Allah ati, dib tenebikirye, el si erenamake. Na Paulus arye, nyapsine.
Ara, talye ati kume. Deiyok ara ani. Anggun ni koproba Allah, el si ara Yahweh bira, el tonok ulule. Yuk Allah ton kum ulule. Aning-aning nirya ap, ninye nirya ap, aning-aning nirya ap ara, pia el Allah atonun kum unyake. Allah ara, aning-aning nirya talibuka ululce, aning-aning babye, yuk ninye deiyok nang babye, el amu tamuk unyake. Allah ara, mikip weik deiyoknye ulirye, ninye nirya babye, aning-aning nirya babye, elcuk talilule. Ninye nirya arye elti, ‘Se elda pia mambule,’ tenenyake. Tonda, ninye urasin kum elilulce, kanye talima kum wililule. Tonda, ninye urasin elilulce, ‘Bon ninguk arepnicopura, doproptinye,’ kum tenelule. El kanye talima diksukumnye biti, kanye delilirye, yupu bokolilule. Allah ara, pia telebnye ulule. Allah elda, malye ning tonoknye babye pia kum winilule.
Yesus tukwak mutuku tamubuka yanamla ara, Allah arye el tenyamuk touk, atalak akunum uplyopura, Yesus lake kibuka yanamle. Nun ni Allah bira, pia telepuk ulirye, ati, tukwak ninye nirya arye, el siuk erebikirye, elti, ‘Anda pia telebuk ulyame,’ nyanamyake. El tonok aryuk aning-aning nirya, pia Mikip Weik Deiyoknye ulirye, aning nirya deice tam ulule. Yuk weik ninye deiyok nang, sisin nang, Raja nang aunyak bukni, elda sik deice tam Mikip Weik Raja ulule. Ninye deiyok nang yala weik daunyak bukni, sik nirya ara, el amutamuk unyake. El tonok ara, sik nirya ap, isa mer ap, aning-aning nirya ap, pia deice tam ulirye, pia Mikip Weik Deiyoknye ulule.
Kume, nun ni koproba Allah ara, dipkoprob aning-aning nirya erebuka, deice tam mikip weiknye ulule. Allah Yahweh, eluk ulule. Yuk mikip ulul ning nirya ara, el amu tamuk ulule. Yuk ninye arye, talye si erenyak ning nirya ara, talye dem ulul bukni, elda, mikip weiknye erebuka, im deice tam ulirye, aning-aning nirya elcuk talisulule. Elda, aning-aning nirya, kel kilula ati, dipkoprob el kele. Nunda, yata tenebibirye, mesba ara moupdeipmap do? Aning babye, Allah elce akunum bikmasile. Ati ara, nun patapsil ning ara, nun tenepmapce, mesba memepmap ning ara, anggun babye akunum bikmalume. Winipmanto ara, anggunce nunti, ‘Kume, anang ara, amesba dopmaka ara, sik mining kanye aryuk,’ tenebuka memepdeipmake. Deiyok ara, Allah Yahweh, el yupu yanina ati winipmake. Sik Gad yala nang ap, Ruben yala nang ap, Manasye yala nang ap arye, ‘Yuk talye ning si erenamakʼ tenen, ‘Mesbah kintinipnamak,’ tenepmasulume. Bukni, atenepmalum ning ara, dipkoprob winipmatibyopura, wini talak aryuk nun wenena ati, angguncuk oplopsutume. Akumopura, Allah arye nunti, wenebuka oplopsutuura, wini talak babye, nunce, ‘Aning ara, teleb uka,’ teneptibye.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.
ကြော်ငြာတွေ