Daniel 2:37 - Eipomek37 Na ni koproba Raja ninye deiyoknye, anda pia telebnye. Yuk ninye deiyok nang atonun kume. Yuk ninye deiyok nang daunyak bukni, anda sik nirya talibuka deice tam ulyame. Allah im deice kwepdeibukce, eitam ululnye birye, na ni anti, ‘Amutuku nirya taliplirye, mikip weik ap, weik mambul una ap, urasin pia teleb una ap unamle’ tenen, wipdeibkukba ulyame. အခန်းကိုကြည့်ပါ။ |
Daniel 2:37
32 ပူးပေါင်းရင်းမြစ်များ
Babel mutuku ninye deiyoknye, el si Ewil-Merodakh birye, Yehuda yala ninye sik Raja Yoyakim biti, bico tenebukce, teleb yupu nyalamuk. Winilamuk talak ara, yuk Raja nang ton, sik ap, Babel mutuku noutamak ulamik bukni, aRajanye birye, sik ayuk Raja nang nirya ati ara, ‘Sikda mitik mambul uka,’ tenelamuk. Bukni, Raja Babel, el si Ewil-Merodakh birye, Yoyakim biti, ‘Elda mambul weiknye,’ tenelamuka ati, teleb bulamak ning arebuk. Arebukopura, el Babel tam ninye nirya ati, nyabuk. “Anye Yoyakim bira, weik arye, si erenamlume. Yuk mutuku deiyok nang, nun mutuku noutamak daunyak bukni, sikti, ara, mitik anun aryuk kinamlume,” nyapdeibuk.
Nara Raja Kores, Persia mutuku ninye deiyoknye birye, “Winipnamlume,” nyapsine. Ara, aning-aning ap, im noutam ap, im alip deice tam ap, aning nirya deiyoknye, im deice ululnye Allah Yahweh arye, nati, amutuku tukwak nang, sik deiyoknye kina ati, wipdeipnukce, nara Allah el pil dona ati, “Yerusalem mutuku bukni, Yehuda tam talipnalame,” nyapnuke. Nyapnukce, “Aning ati ara, Yehuda tam noutam bukni, weik asik, el si Yerusalem mutuku noutam arye, nara Allah, na si eren aik ara, asukumuk dopnamnilyame,” nyapdeipne. Tonda, Allah arye nati, “Aning ati ara, Allah Yahweh arye, ‘Anang ara, na nang unyake,’ tenyamuk touk, an mutuku noutam akunum unyak nang ara, adiparyuk Yerusalem mutuku uk, tamubuka binamake. Winibikceba, sik ni koproba Allah, el si Yahweh arye, Yerusalem mutuku tamubuka binamak nang nirya ati, pia tuba kalikinamsile. Elcuk sik ap tonpa binamake,” nyapdeipnuka ati, anggun Israel ninye nirya ara, adiparyuk dabinamlume. Raja Kores birye nyapdeibukce, surat sekeibuk.
Persia mutuku ninye deiyoknye, Raja Kores birye sekeiamuk yupu ara, ani. Kume im deice ap, tukwak ap nirya talibuka ulul Allah, el si Yahweh arye nyapnuke. “Pemerintah Raja Persia mutuku talibuka ulyamnye, ance ayupu kel biknulyame. Yata mutuku do nirya, tukwak mutuku noutam unyak ninye deiyok nang nirya ap, sikce talinyak ning nirya ara, an taruk deice deipkine. Narye anti akunum wipdeipkine. Deiyok ara, Yehuda yala nang anggun tam noutamak bukni, Yerusalem mutuku noutamak ara, Allah na si eren aik dopnamnulume.
Telebe, nara, Raja Artahsasta birye, asurat sekeipkine. Yuk mutuku nirya talinyak Raja deiyok nang daunyak bukni, na mikip weik anya arye, anggun deice tam unune. Nara, mikip weik deiyoknye Raja unune. Narye, an Esra biti, asurat sekeipkine. Im deice talibuka ulul Allah ara, elce, “Wininamlume,” nyamuk yupu nirya ara, Esra ance Allah el yupu peterena uk ulyamnye, tonda Allah el aik pum tam pil dolyamnye biti, “Telebe,” nyapkine.
Tonda, ‘Yata ning arye melipnutu do?’ tenen, ‘Yuk nang ati, ikin ning, sik nong deice deipnyopura, sikce namin kin yo bok weik arepnitinga deice arye, aning melipnamnile,’ tenena kume. Atonun, ‘E, yuk nang, sik bona, ‘Naʼ tenen delinyak sukum weknirye, aning nirya ubula dopropnyopura, aning nirya arye melipnamnile,’ tenena kume. Tonda, aning atonun, aminyan talak sik bona weik upnin baliba, bona talin nang umunyopura, ‘E, na yo bok ap, bona ap, weik aupmanilba, talinuna deice arye, bona talinanye akunum ununa ati, aning arye melibuka lyelonamnile,’ tenena pia kume.
Ninye deiyok kibuka, talinyak nang Raja-Raja nang nirya ara, narye pia weik kel bikna deiyok ning, sikti, arepnyopura, adeice arye, sik amu tam unyak ninye nirya ati, teleb kibuka talinyake. Narye pia weik kel bikna deiyok ning aresununa deice arye, yuk deiyok pil talibuka, donyak nang nirya babye, moubuka tenebikirye, sik amu tam ninye ati, “Teleb kilin ning ara ani, malye winina ning ara ani. Aning ara, wininamlulume, aning ara pia kum wininamlum,” nyabikirye, mem yupu ap, wenena yupu ap, teleb ninguk sekelinyakce, talisinyake.
Anggun Kasdim mutuku ululum nang nirya ara, yupu nyana kumce, tunim abuka pia unyakak binuka buklulume! Ara, anggun Babel mutuku nang nirya ati ara, yuk mutuku-mutuku nirya unyak nang arye anggunti, ‘Se, sikda pia telebe unyake. Urasin pia teleb wel kilapu atonun unyake. Sikda, ninye deiyok kilapu atonun unyaka anya arye, yuk mutuku-mutuku nirya sikce talisinyake,’ nyabuka, anggunti si erelamsik bukni, atalak arye dipdongobuka, do unamle talak nirya ara, anggunti ayupu ton pia kum nyapnamake.
Ara, talye ati kum nyapkine. Deiyok ara, Allah Yahweh mikip weik ulirye, im deice yin talin malaikat, sik deiyoknye ulule. Anggun Israel nang nirya arye, el siuk erenamlume. Na Allah arye nyapmasina ara, akunuma. ‘Israel yala nang nirya, ski dam ara, ikin ning bukni, kat weik ning besi arye akunum kintinibuka, sik deice deipmasine. Winipnamna deiyok ara, ani. Winipnyeba, sik Israel nang ap, yuk-yuk mutuku unyak nang ap ara, Babel mutuku ninye deiyok kibuka taleamuknye, Raja Nebukadnesar, el amu tamuk ulamukce, el ikin pil dobuka, talya uk donamlume. Aninguk kum bukni, tonda, tukwak kam ulye ning, bai tam talye daulamle ning nirya babye, aning nirya dobuka, Raja Nebukadnesar el damuk, akunum arepmance deipmane. Elcuk aning nirya talinamle,’ nyabuka, ‘Na Allah arye, akunum nyapsine,’ nyabuk. Nabi Yeremia birye, Allah nyadeibuk yupu lak nyabuk.
Raja Babel, el si Nebukadnesar, el ap, el yin talin nang ap, sik deiyok nang nirya ap, yuk-yuk ninye yala ulamik nang ap, yuk-yuk Raja nang ap, ura, Babel mutuku ninye deiyoknye, Raja arye taleamukba, el amu tam melibuka olyanamik nang nirya ara, sik nirya arye, mikip kipdeibikba, Yerusalem weik asik ulamik nang ap, amutuku dana-dana tam asik dolamikce, ulamik nang ati, ‘Opnamabʼ tenen, yanuka warikik. Atalak ara, Allah Yahweh arye, na nabi Yeremia dam yanuka, ayupu nyapdeipnuk. Ayupu ara ani.
Anyapmasin yupu nirya ara, talye ati kum nyapsine. Deiyok ara, ani. Na Allah Yahweh, aning-aning nirya deice tam erebuka, Pia Mikip Weik Deiyoknye birye nyapsine. Narye, Babel mutuku nirya talibuka, ninye deiyoknye, Raja Nebukadnesar, Babel mutuku arye boyanyeba, anggun Tirus mutuku ululum nang ati, yanuka wareknamsiake. Ara, Raja mikip weiknye birye, el yin talin nang ap, tonda Kuda basam balye deice bukuka, ninye olbalammik yin talin nang ap, kereta perang deice bukuka, olban nang ap bobuka, sik Tirus mutuku nang ati, olyanganamsile. Elce yin talin nang, pia weik bobuka olyanamle.
Tonda, Allah arye nyapdeibukba, Yoyakim Yehuda yala ninye, sik ninye deiyoknye, talibuka ulamuk mutuku nirya, yanuka warikikce, obuka sirya dakik. Obikopura, Allah yupu aik pum tam deiamuk bona weik, yanuka doprobike. Winibikopura, Allah el si eren aik deiamuk ning, weik tam tonap, ninye ap bobukabikce, Babel mutuku bobiyikce, amutuku noutamak bukni, mutuku si Sinear mutuku noutamak, Nebukadnesar, Isa Mutuku Dongonye si erelamuk aik pum tam, binuka deibik. Deibik aik ara, aisa el mem ning delilamuk aik deibik.
Daniel birye, Nebukadnesar ati nyabuk. “Wini talak ara, an lengdar deice arye winipmokba, eiplum ning ara, laka nyapnukine. Ara, tonok ning ton, ninye arye ninye urasin atonun puturubuka delinyak ning, el si ara, patung eiplume. Apatung ara, pia urasin teleb ap, mil weik ap kibuka, pung deice arye, erebuka tikmok. Erebuka timokce, bol deice malmalya panmokba, eipluma deice arye, ilil upkuke.
Nyabukopura, ayupu ton dukdongobuka nyabuk. “Atalak ara, aweik deiyoknye birye, im sirya, mutuku sirya nirya talinamle bukni, atalak noutamak ara, Allah aning-aning nirya, pia talibuka im deice ululnye birye, yuk weik Deiyoknye erepdeipnamle. Anye birye talinamle ning nirya ara, el Kerajaan nyalamak ning, pia aupnamle. El ti ara, yuk mutuku ninye nirya arye, talibuka el obuka malye kum kiptinge. Tonda, elce talinamle mutuku ap, ninye ap, yuk deiyok nang arye kum taliptinge. Aweik Deiyoknye birye, yuk ninye deiyok nang ap, yuk mutuku nirya ap, malye kipnamle. Bukni, yuk mutuku nang arye, elti, kum malye kipnamake. Elda pia tuba unamle.”
Aning lake nyabukba, Daniel el si ton Beltsasar, el ton akunum kekebuk. Kekebukce, nyapmok ning ara, kanye imun ning anya arye, ilil ubuk. Ilil ubukba, aninye deiyoknye birye, Daniel, ara el si ton Beltsasar biti nyabuk. “Na lengdar mapsa ning, nong lak lena ati, anda talima daksakuka, ilil una meme,” nyabuk. Nyabukba, Beltsasar birye tamubuka nyabuk, “Naio. Se, alengdar mapmalam ning, an mal olan nang deice upnamtu ning ati, mapmatumopura, ara teleb bukni, an bidamnye ati, lengdar mapdeipdanmalame. Ati, kanye ikin upnamkile.
Allah arye nyapliba winipnamkile. Ara, Na nio, anda ninye unyakak arye yakuka. bai tam donokikiba, unamlame. Winipkikiba, talye kam ulamle ning ap, sik ap, neika kam unamlume. Atalak ara, sapi basam maning dilamak touk, an babye, aninguk maning dinamlyame. Winibuka unamlam talak nirya ara, keting tamun tekbarye (7) mapnalame. Winipnamlama deice arye, ‘Dipkoprop Allah aning-aning deice tam, Weik Erena Deiyoknye ululnye, aniryuk ninye nirya talipnamsile. Tonda, Allah elce tenelye touk, tukwak mutuku ninye deiyok nang kina ati, anye birye talipnamle’ tenen, wibuka deipliba talinyake. Allah arye, ikin ning deipnakila deiyok ara, arup nyapmakin ning, ‘Kel kipnamle’ tenen, winipnamakile.
“Anda ninye unyakak arye yakuka, bai tam donokikiba unamlame. Winipkicopura, talye kam ulamle ning ap, anggun neika kam unamlume. Atalak ara, sapi basam maning kwapu dilamak touk, an babye aninguk dinamlyame. Winibuka unamlam talak nirya ara, keting tamun tekbarye (7) mapnalame. Mapnalama deice arye, dipkoprob Allah aning-aning deice tam, Weik Erena Deiyok ululnye, elcuk ninye nirya talipnamsile. Tonda, Allah elce tenelye touk, tukwak mutuku ninye deiyok nang kina ati, ‘Anye birye talipnamle’ tenen, wipdeipliba talinyake. Allah arye ikin ning deipnamkila deiyok ara, arup nyapmakin ning, ‘Kel biknamle’ tenen, winipnamakile,” nyabuk.
Anyapdeiamuk touk, keting tamun tekbarye akunum mabukopura, Nebukadnesar Allah ati morobukba, el kanye ara, ninye kanye bolamak atonun tamubuka, arebukba doprobuk. Doprobukce, Allah ati morobuk. “Se, na ni Allah, ance teleb kel kin ning arepmanilame. Winipmanilama ati, narye an kam pia unamlamnye, siuk erepkinirye, antibuk kinamkine. Na ni Allah, anda ninye deiyoknye Raja umince, taliplum ning nirya ara, pia kam tuba aupnamle. An babye, pia kam unamlame. Aning nirya ara, pia kume kum danamle,” nyabuka morobuk.
Tonda, Allah aning-aning nirya talibuka deice tam, Pia Mikip Weik erena deiyoknye birye, an ni koproba Nebukadnesar biti, ‘Ninye deiyoknye unamle’ tenen, erepdeiamuke. Erepdeiamukce, an ni koproba Nebukadnesar biti, ninye deiyok nang nirya, aulamika deice tam deiamukba, ulamuk. Tonda, an ni koproba si ara, yuk mutuku nang nirya arye, kel bikamik. Tonda, el tibuk si erebuka, kilamikce winilamik.”
Winibukba, pia minop talak donirye, Kam Ulamuka ani, Pia Tuba Kam Unamle Deiyoknye, abukmoknye birye, el anye bira, Ninye Mi Atonunye ati, weik mambul ning weik arebuk. Elti arebuk ning ara, ani. Ara, ‘El mikip weik arye, aning-aning nirya talinamle’ tenen, deiyok ning ap, weik dirina ap arebuk. Tonda, ninye im sirya, mutuku sirya nirya ap, aminyan winipnamle ning nirya ap, ‘Elcuk tenelye touk unamle’ tenen, deiyok ning ton arebuk. Tonda, anyarepnya deice arye, ninye ayala-ayala nirya ap, yupu yuk-yuk nyanyak nang nirya ap, tonda im sirya, mutuku sirya nirya unyak ninye nirya arye, ‘El siuk erenamak’ tenen, adeiyok ning ton dobuka, Ninye Mi Atonunye biti arebuk. Tonda, el anye mikip weik arye talinamle ning ap, talibuka pia unamle ning ap nirya ara, ninye yuk nang arye, pia kum kum kipdeipnamake. Elce aning nirya talinamla ara, apia unamle.” Daniel birye nyabuk.
Sikda, yuk pera mutuku nang ati, ‘Melipnamsiakʼ tenen, dengna ap, teleb ning ara, weik tonun binuka arenyak bukni, wini talak ara, narye anang nirya bulukapnirye, tonokak deipnirye, sik anang ati wenepnamne. Wenepnamne talak ara, pia una kum bukni, adiparyuk sik yuk-yuk mutuku ninye deiyok Raja nang ap, sik amu tam deiyok-deiyok nang ap arye, ‘Nunti dengna weik tonun arelyanganamsulume,’ nyabuka, ikin ning, sik Israel nang deice deibikcopura, sikda, ‘Se, yata wiriptibye do?’ tenen, kanye imun weik bobikirye unamake. Deiyok ara, aminyan talak, Asyur mutuku ninye deiyoknye Raja arye, sikti, ‘Dengna weik arelyanganamlume,’ nyaplirye, sikti, ikin weik deipnamla atia.
‘Malye upnamak do?’ tenen, ‘Weik ikin winilden ning kum arepnamsilam’ tenen, moropkiyabe. Aning kum bukni, tonda, Pia Malye Uning Deiyoknye, ara Isa Mutuku Dongonye arye, ‘Malye ulisulul anya arye, malye winibibyak’ tenen, ‘Ance kalikuka disimince melinamsilam’ tenen, moropkiyabe. Ayupu nyabuka, Allah moronamlulume. Yesus arye el yupu kekenmek nang ati nyabuk. Nyabukce ayupu tonap nyabuk.
Nyabukba, Yesus arye tamubuka nyabuk. “An dem aryuk yupu weik nyapnutuma babye, nong kum uptu bukni, Allah arye na ona ati, lo ap, deiyok ap akunum arepkil ati, ayupu nyapminba, winipnamniyake. Bukni, ‘Opnuyak’ tenen, nati ninye yupu delilbinmoknye bira, elce pia malye winipmoa ara, weik mambule. An Pilatus arye malye winipnilam ning ara, mitikto malyeuka,” Yesus arye nyabuk.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.
“Se, nun ni Allah, anda nun Weik Deiyoknye usilyame. Aning-aning nirya ara, ance, ‘Winibuka, winibuka kwepdeibuka deipnamne,’ tenyamlum touk, adiparyuk kwepdeiamlumba, aning nirya ulule. Aning ati ara, an tonok ara pia telebuk ulyame. Telebe nyana yupu ap, si erena yupu ap, si kina ning ap, mikip kilina yupu ap, anirya ara, an deiceuk delinyabe. Ancuk aning nirya talibuka pia unamlame.” Sik 24 wisi deiyok nang arye Allah ati nyanyake. Na Yohanes arye nyapsine.
Weik yupu deice arye senmek mot ara, ani. “Domba Mi Atonye obiknye bira, pia telebuk ulula anya arye, aning-aning nirya doplirye, talinamle ara, pia telebe uka. Yata ninye do, yata kam un ning do nirya arye, el tonok ati kibuka, el siuk weik arye erenamake. Sik nirya arye elti, ‘An tonok ara weik mikip ap, weik ning nirya ap, weik kel bikna deiyok ning nirya ap, bona uto-utoa talin ning dekna weik ning nirya ap, an deiceuk unamkile. Anda, el si erena ning nirya ara, an deiceuk unamkile.’ Anda pia telebe, nyabuka,” el si erenmekce, mot senmekak kekepse.
ကြော်ငြာတွေ