Tonda, ninye arye, ‘Nun ni koproba aniʼ tenen, yuk talye ning ati, si erenyak ning nirya ara, nun ni Allah arye, atalye ning nirya deice tam ulirye, aning-aning yala nirya talibuka, pia mikip weiknye ulule. Dipkoprob Allah ara, el tonoka. Tonda, Allah arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti, pia telebe,’ nyabuka nyanamabe.
Daniel 11:36 - Eipomek36 Bukni, aning-aning min kum kipdeipnamle talak ara, Siria tam mutuku talipnamle Raja birye, el kanye aryuk tenipnamle touk, aninguk wipnin banamle. Tonda, el talima eren deice arye, maknya kintiniplirye, nyanamle. “Kume nara, pia deice tam ulinye unune. Ninye arye si erenyak ning, dewa-dewa ap, ninye arye, ‘Nun ni koproba ani’ tenen, si erenyak talye ning nirya ap, tonda aning-aning nirya, deice tam erebuka ululnye, Allah Yahweh ara, na amu tamuk ulule. Ninye arye, si erenyak ning nirya ara, mambul kume. Na uk ara, mambul weiknye unune. Na tonok ara, weik deiyoknye unune,” nyapnamle. Utenepdalirye, el siuk weik tonun erenamle. Tonda, elce Allah Yahweh ati, pia malye-malye yupu weik tonun nyanamle. Ura, amutuku deiyoknye, Raja Siria bira, elce aning winipnamla ara, Allah arye, ‘Anye winipnamle,’ akunum tenyamuk touk ati, aning winipnin balamlya ani, Allah arye, ‘Atalak akunum,’ tenyamuk touk, akunum uplyopura, Raja malye weik ulamuka ati ara, Allah arye anye el deice, ikin weik ning deipnamle. Adeice arye, Allah el yu tenyamuk ning ara, sirya daknamle. Allah arye, akunum tenyamuk ning nirya ara, dipkoprob nong upnamle! အခန်းကိုကြည့်ပါ။ |
Daniel 11:36
47 ပူးပေါင်းရင်းမြစ်များ
Ninye kanye talima noutamak arye, ‘Aminyan talak ara, wininamabe, winibuka unamap ning ara ani,’ tenebikirye, sik kanye tenena weik unyake. Bukni, Allah Yahweh elce, ‘Wininamake,’ tenyamsuk touk, ubuka unyak ning ara, pia nong upnamle. Elce tenesilye ninguk, wininamlulume. Ninye arye tenenyak ninguk, tenebuka una pia kume. Allah elce tenelul ning ara, ninye arye kum bisinyake. Ara, winipmanto kume.
Diba, Allah Yahweh ara, im deice unyak yin talin malaikat nirya, sik deiyoknye ulula ati, elce ayupu nyapsile. “Tukwak mutuku sirya, im sirya nirya ara, amutuku-amutuku noutam unyak nang nirya ara, obuka sirya daknamne. Nara Allah, na si Yahweh aning-aning nirya talibuka, eitam erebuka, mikip weiknye unune. Narye tukwak mutuku nirya obuka, sirya daknirye, atu buklopnamne,” nyapsuke. Aning ara, Allah arye, ‘Winipnamne,’ tenebuk ning ati, pia kum bataktue. Dipkoprob winipnamle.
“Anggun tuba ilil kum unamsile,” nyapsin ning ara, talye ati kum nyapsine. Deiyok ara, na Allah arye, anggun Israel nang arye, malye weik ulamlum ning ati, na yu tenepsise ning ara, mitik tonunuk tuba upmal bukni, aminyan talak min kum upnamle. Sik Israel nang ati, yu ton tuba kum upnilyeura, na yu weik tuba aupnamnil ning ara, sik Asyur mutuku nang ati, sik nong deice deipnirye, anang nirya wenepnirye, obuka kum kipdeipnamne. Allah arye nyapsuke.
Allah arye nyabuk. Sik Asyur mutuku unyak nang ara, sikti, lo arepnyeura, sikce Israel nang ati, ikin ning deipnamsiyake! Na kayapu koproba, Israel nang arye, malye weik winilamik ati, lo arepnyeba, sikce anang olalbinamak bukni, aminyan talak ara, sik babye wenebuka opnamne. Wini talak ara, anggunda na talinun ning ara, tonda na ninye on kama atonun kipdeipniba, ‘Naʼ tenen nang, Israel nang ati opnamake. Ara, na yu weik upnilya ati derepnye nang ara, sik anang deice deipnamake.
Min talak ara, an kanye pum tam arye, ‘Kume, nara im deice welepnirye, na bunak ara, Allah arye weik arye erebuka, alip tam tikilye kurya deiamuk ning, aning deice tam bukamne. Na Raja kina ati bun ning, el si tahkta, im deice deipnirye, aning nirya deice tamuk bunamnarya. Tonda, dabu tam, (arah utara) bukni, weik mutuku weik bukuk mutuku kon deice, el si Sapon mutuku, pia mambul dewa-dewa bukikce,’ yupu talinyakak ara, ‘Na babye asukumuk buknamnarya!’ tenelamlume!
Aninguk kum bukni, an kanye pum tam arye, aning ton tenelamlume. ‘Dua ara, im noutam ulule bukni, nara erebuka, alip tam bukni, eitam ton unamne ati, dua deice welepnamne. Winipnirye, Allah arye aning-aning nirya deice tam erebuka ulirye, Mikip Weiknye ulul touk, na babye atonun unamnarya!’ tenelamlume.
Dipkoprop minop talak ara, Allah arye Asyur mutuku ninye deiyoknye, Raja Asyur biti, ‘Anye opnirye, el nong dobuka uku dongona ati ara, akunum kintinip deiamuk. Dipkoprop aninye deiyoknye Raja Asyur mutuku nang ati, auku dinamlak akunum kintinip deiamuk. Asukum ara, tuku pum palibuk ning ap, uku dinamlak pala ap, el uku dan yo toubuka deibuk ning ap, akunum weik tonun kintinip deibuk. Aning nirya akunum kintinip deibuka anya arye, atalak ara, Allah Yahweh el yu deice arye, el si mikip arye pong nyapliba, pito weik tonun welepmalya deice arye, auku seklyopura, uku buk weik tonun dinamle.
Nyabukce ayupu ton nyabuk. “Aning-aning nirya min kum kwepdeiamse talak arye, ‘Sirya talak ara, aning winipnamle,’ nyabuka laka nyapdeiamse. Tonda, minop talak arye do unamle talak ati, ‘Aminyan talak ara aning ton wininamle’ tenen, moubuka tenelamsirye kintinip deiamse ning ara, laka nyapdeiamse. Ati na tenepsirye ‘Aning ara winipnamle,’ nyapdeiamse ning ara, ton kum bataknamne. Anirya tenelamse touk dukdongopnamle. Tonda, na kanye deipsirye, ‘Winipnamne’ tenyamse ning ara, adiparyuk dipkoprob nong upnamle, kum bataknamne.”
Tonda, anggunce, amutuku isa el si ara, Molok, teleb minyak mek ap, tonda, ‘Nun nong deice likibyeba, tong teleb nyapnamsil’ tenen, tong teleb nyan mek ap, weika arye bobimunce, binuka sik nong deice likdeiplumce Molok si eremunce, talye yolalulume. Tonda, anggunce, ‘Yata isa ton si ereptipyeba, melipsutu do?’ tenen, ninye dopdeiplumba, pia pera mutuku unyak nang dam ati, yupu nyalbalamikce, morolamik. Aninguk kum bukni, sik, ‘Min diamik nang bobanyakak, Sheol mutuku, yuk isa ton aunyak do? Sikce ton melipsiting do?’ tenen, morolamlumba, asing keten nang arye ton dililamik.
“Se, anda ninye sirika arye deipkiknye, ance Tirus mutuku ninye deiyoknye biti, laka nyapnulyame. Ara, “Nara Allah Yahweh, aning-aning nirya talibuka, deice tam erebuka, weik erebuka mikip ununye birye, nyapdeipnun yupu ara, ninye deiyoknye Tirus mutuku Raja ati, ayupu laka nyapnulyame. Ara, Tirus mutuku Raja anda, an kanye pum tam erepluma deice arye, nyaplume. Nara, Allah atonunye unune. Narye weik laut mekwen noutam, mekwen dana-dana tam antanap dongobuk mutuku, pulau deice tikniba, talye ninye arye, na si erenamniyake,’ teneplumce, nyapmalum ning ara, talye yupu deice arye nyaplume. Bukni, dipkoprob ning ara, anda, Allah atonunye pia kume, anda talye tukwaknye dem ulyame. Aning moubuka tenipnulyame.
Ati, atalak ara, dabu mutuku tam ninye deiyoknye, arah utara tam, Siria mutuku talipnamle Raja ara, yuk tam nang nirya arye, elti, kum obuka sirya danamake. El ap, el yin talin nang ap, sikcuk sik yuk mutuku nang nirya obikirye, sik unyak mutuku nirya ara, alubuka doprobikirye, Raja Siria teneplye touk ubuka, talye karin wipnin banamlarya. Winipnamla ati ara, sik Israel nang, urasin pia teleb mutuku noutam ululumak nirya ara, anye birye alubuka doproplirye, elcuk talipnamle. Tonok mutuku babye kum bataknamle. Amutuku-amutuku nirya talipnamle.
Bukni, aning-aning min kume, kum danamle talak ara, Raja, el si ereipnamlanye bira, Siria mutuku ninye deiyoknye, el apu yapu nang ap, el li yapu ap arye, si erelamik ning nirya babye, ‘Sikda mambule,’ tenena kumce, aning babye, sik si kum erenamle. Aning nirya ara, yaninauk unamle. Atonun, kilapu arye si erenamak isa babye, ‘Elda mambul pia kume,’ tenena deice arye, atalye isa el si babye, kum erenamle. Raja birye aning-aning nirya ara, si ton kum erenamle. El dem atibuk, ‘Nara weik mambulnye, Allah unune,’ tenepdalirye, maknya kintininamle. Ati, el siuk erelanamle.
Asipdeyukura, tonye bira, urasin teleb baju, el si lenan baju ongopmoknye bira, elda amek pu tam tikmoknye birye, el taruk bitinye im deice tam erebukce, yupu ton nyabuk. Atalak na kekenmasiba nyabuk ning ara, ani. “Kam deiyoknye Allah, Pia Kam Unamlanye, el si deice arye, dipkoprob yupu nyapkine. Aning eipmap ning nirya ara, dipkoprob nong upnamlarya. Awininmal ning nirya ara, keting tamun tiga setengah tahun deice arye winipnamle. Allah el mapu ati, yu nang arye, sik deice ikin ning boyanuka deibikca ati, olanauk ulamikca ani, sirya akunum winibikcopura, adinmalamba, kanye imun weik ning wininmal ning ara, atalakuk winibuka sirya daknamle,” nyabukba kekepse.
Arebikopura, ninye deiyoknye Raja arye, Daniel biti nyabuk. “Dipkoprop nyapne. Ance si erelyam Allah ara, elda aning-aning nirya deice tam ulirye, aning nirya talilule. Elda Allah tonok ulule. Elcuk ninye deiyok nang nirya talilulba, sikda el amu tam unyake. Allah el tonok duknun ning nirya, laka kilina deiyoknye ulule. Elda, anti laka kibuka nyapdeipmakuk touk, ance akunum laka nyapmanilame.” Nebukadnesar birye, Daniel biti nyabuk.
“Ninye tukwak mutuku unyap ninye nirya ara, weik konop nang ton, kum unyabe. Kume, an mikip atonun nang ton, kume. Allah ancuk, an pil don nang, malaikat taliplum ning babye, tonda ninye tukwak mutuku nirya taliplum ning babye, an tenelyam touk ulyame. Ati ara, yatanye birye ton, an mikip yanipkutu do? Tonda yatanye birye, wenena atonun an winipminya ati, ‘An yata deiyok ati winipmalam do?’ nyabuka, asipdekutu do? Pia kume.” Nebukadnesar birye nyabuk.
“Winyamuka ati, ninye ayala-ayala nirya ap, yupu yuk-yuk nyalamik ninye nirya ap, elilamikce elti, weik ilil ulamukba, yok sirim talilamuk. Ara, talye ati kume. Elce, ‘Opnun’ tenepne nang ara, atalak aniryuk, obuka bataklamuk. Tonda, ‘Kum opnune,’ tenepne nang ara, kum olamuk. Tonda, ‘Lyepropnun,’ tenepne nang ara, lyelolamuk. ‘Ereipnun,’ tenepne nang ara, erelilamuk. ‘Amu tam kipdeipnun,’ tenepne nang ara, amu tam kililamuk.”
“Nara, el kisok yang uamuk ning atibuk, pia dinmasirye, ‘Aning ara, yata deiyok ati ulul do?’ tenenmase talak ara, talye karin arye, akisok yang 10 noutamak arye, mitik yang tonok ton welebuk. Amitik yang welebukopura, min yuma upmok yang winilinye ning nirya luksakuk. Winibuk talak ara, mitik yang welebuk ning ara, ninye asing atonun, ubuk. El si bam bol arye, yupu nyabuk ning ara, erepdanuka, kwalilan yupu atonun nyabukba, kekepse.”
“Narye anti, yupu ton laka nyapnukine. Ara, aminyan talak, sirya daknamle talak ara, ance arup eipmalam ning nirya ati, Allah el yu upliba, wininmale ning ati, laka nyapnukine. An lengdar deice arye winipmauba, eipmamu ning ara, Allah arye, ‘Atalak ani,’ tenyamuk touk, aminyan sirya daknamle talak wininmale ning ati eipmalame,” nyapnuk.
Natikuka dinmaseba, ayim domba basam ara, timur tam ap, barat tam ap, selatan tam ap, tonda utara tam ap, bikbik abuka banmok talak ara, el kisok urasin ara, yang erepdeibukce, banmokbuk eipse. Adomba bikbik abuka banmok talak ara, yuk kam ulamle ning arye, ton yanuka kum opmanto ubik. El mikip weik upmoka ati, el urasin tam ara, yuk sapi ato ning nirya ara, tikman kumto ubik. Adomba el mikip arye, ‘Winipnune. Aning ton oplopnunʼ tenepmanto ning ara, ton kumce, awininmok ning ara, ‘Na siuk erepnune,’ tenebukce, maknya kintinina deice banmokba, yuk kam ulamla ato ning do, yuk nang do nirya, el tenepmok touk ara, lyepdanmanto kum ubikba, aning ton eipse.
Nyapnukopura, adiparyuk dukdongobuka ayupu ton nyabuk. “Narye, ‘Anda domba wein nang arye, talinyak pil don ning dopnamlame,’ nyapmakina deiyok ara, lakakilina ati nyapmakine. Bukni deiyok ara ani. Ara, wini talak ara, narye na domba basam weina deiyoknye ton wipdeipnamne. Anye kintinibuka wipdeipnaman bukni, anye bira, elce wangamlye domba basam ati, awangamseʼ tenen, pia moubuka bikna kumce, kum elbalule. Tonda, domba basam dipmanto ulul ning ara, elce, ‘Seʼ tenen, kum melibuka lyelule. Tonda, suse dilamliba, dila wamne domba basam ati, elce moubuka obat kum arelule. Tonda, domba basam tuba kam ulul ning ara, tuba teleb kibuka, sik din kum arelule. Aning nirya ara, teleb pil kum dolul bukni, elce, akunum nong teleb nelamle domba basam, meta weik ulul ning ara, elce adomba obuka diplayak arye, sirya daknamle. Adomba sik yan kala babye, kwinilolule. Anong nena teleb basam ara, obukaplirye, el yan kala taruk kala nirya ara, kwinilolule.
Na Yesus ara, na tenepnye touk tonok pil babye, na yuk kum donune. Na ni koprop arye nyanilye touk, kekepnirye yupu bokolisunune. Na aryuk kanye delinun ninguk tenebuka, pil kum donune. Aning kum bukni, na dopdeipnuknye, el kanye delilul ning uk, el tenelul touk wininune. Aninguk wininuna anya arye, yupu bokolisununa nirya ara, dipkoprop teleb kibuka diksukumuk yupu bokolisunune.” Yesus arye nyabuk.
Ara, talye ati kume. Deiyok ara ani. Anggun ni koproba Allah, el si ara Yahweh bira, el tonok ulule. Yuk Allah ton kum ulule. Aning-aning nirya ap, ninye nirya ap, aning-aning nirya ap ara, pia el Allah atonun kum unyake. Allah ara, aning-aning nirya talibuka ululce, aning-aning babye, yuk ninye deiyok nang babye, el amu tamuk unyake. Allah ara, mikip weik deiyoknye ulirye, ninye nirya babye, aning-aning nirya babye, elcuk talilule. Ninye nirya arye elti, ‘Se elda pia mambule,’ tenenyake. Tonda, ninye urasin kum elilulce, kanye talima kum wililule. Tonda, ninye urasin elilulce, ‘Bon ninguk arepnicopura, doproptinye,’ kum tenelule. El kanye talima diksukumnye biti, kanye delilirye, yupu bokolilule. Allah ara, pia telebnye ulule. Allah elda, malye ning tonoknye babye pia kum winilule.
Yata nang arye do nirya, sikce ayupu atonun, tilila yupu nyabuka, peterepsicopura, dib kum tenenamlulume. Talye kum nyapsiabe. Anyapnusin ning aminyan kum winipmalye talak ara, Yesus arye, tamubuka tukwak dolyanamsil talak ara, kum upmale. Min winipnamle ning ara, ani. Aminyan talak ara, ninye pia weik mutuku-mutuku nirya arye, Allah ap, Allah el winin ning nirya ap ati, sik lik uplya ati, pia batakuka yanipnamake. Winibice talak ara, ‘Allah ati, malye kipnamne’ tenen, Allah el winin ning nirya ati, Yanina Deiyoknye lakak erebuka tiknamle. Allah arye anye biti, ‘Weik arye wenebuka opnamne,’ akunum tenebuke.
Allah el winin ning Yanina Deiyoknye birye, ninye mutuku-mutuku nirya, ‘Nun deiyok ning’ tenen, Allah atonun si sisibuka, si erenyak ning nirya ati ara, elce yanilule. Elce, Allah winin ning nirya ati ara, ‘Na aryuk deice tam unirye, aning nirya ara, na amutamuk upnamle’ tenen, elce el bidamnye ati, erepdanamle. Aninguk kume, anggun Yahudi yala ninye arye, Allah el si erena ati, weik mambul deiyok aik dolulum ning ara, anye birye anyaik wekuka, ‘Ninye mutuku-mutuku nirya kekenamak’ tenen, “Nara, Allah unune,” nyabuka, elce el bidamnye siuk erelilanamle.
Allah arye wipdeibuknye, amalye ning siknibuknye bira, dobuka yukak deiplyopura, atalak aryuk, duknulirye, Allah el winin ning nirya ati, Yaniltana Deiyoknye lak kipnamle. Winibuka daulamlye bukni, aminyan ara, nun Deiyoknye Yesus arye, el nyapnamle yupu deice arye, amalinye biti, malye kibuka opnamle bukni, Yesus elda erepdopnamle. Tonda, Yesus el pia teleb ubuka dirina weik yanamle deice arye, amalye winina deiyoknye biti, oplirye, kum daneipnamle.
Kume, nun ni koproba Allah ara, dipkoprob aning-aning nirya erebuka, deice tam mikip weiknye ulule. Allah Yahweh, eluk ulule. Yuk mikip ulul ning nirya ara, el amu tamuk ulule. Yuk ninye arye, talye si erenyak ning nirya ara, talye dem ulul bukni, elda, mikip weiknye erebuka, im deice tam ulirye, aning-aning nirya elcuk talisulule. Elda, aning-aning nirya, kel kilula ati, dipkoprob el kele. Nunda, yata tenebibirye, mesba ara moupdeipmap do? Aning babye, Allah elce akunum bikmasile. Ati ara, nun patapsil ning ara, nun tenepmapce, mesba memepmap ning ara, anggun babye akunum bikmalume. Winipmanto ara, anggunce nunti, ‘Kume, anang ara, amesba dopmaka ara, sik mining kanye aryuk,’ tenebuka memepdeipmake. Deiyok ara, Allah Yahweh, el yupu yanina ati winipmake. Sik Gad yala nang ap, Ruben yala nang ap, Manasye yala nang ap arye, ‘Yuk talye ning si erenamakʼ tenen, ‘Mesbah kintinipnamak,’ tenepmasulume. Bukni, atenepmalum ning ara, dipkoprob winipmatibyopura, wini talak aryuk nun wenena ati, angguncuk oplopsutume. Akumopura, Allah arye nunti, wenebuka oplopsutuura, wini talak babye, nunce, ‘Aning ara, teleb uka,’ teneptibye.
Lo tonap kum upnamsil bukni, tekbarye malaikat siryanye birye, el terompet nyapnulye talak noutamak ara, Allah arye, ‘Wininamne’ tenen, minop talak akunum tenyamuk bukni, duknyamuk ning ara, pil moubuka doplirye, sirya daknamle. Allah el pil don nang, ara el yupu laka len nang, sik nabi-nabi nang ati, “Na tenyamse ning sirya daknamne,” nyabuka laka nyalamuk touk, winira nong upmale,” nyabuka amalaikat arye nyabuk.
‘Akil tomopnune’ tenen, bik-bik abuka biyukba, Allah arye akil ati, weik Bib maka pol atonun bitinye arebuk. Allah arye akil ati maka pol aribuka deiyok ara, ‘Akil el kalikna ati, mok ap, ninye ap, kum ulul mutuku noutamak kintinipdeiamsak mutuku lakuka bituba, anoutamak ara keting tamun winilye ap, tonok keting tamun noutamak ap, deice unamle,’ tenebuk. Allah arye, akil kalikuka melinamna deice arye, ‘Isa Mutuku Dongonye arye kum optue,’ tenebukce, Allah arye akil ati, Bib maka pol atonun bitinye aribuk.
Mem Kwatima Urasin Atonye birye, laut mekwen kup-kup ak tikilbiyukba, na Yohanes arye eipse ning ara nyapnusine. Ara, laut mekwen noutamak arye, malye ulina ning, weik ning kam ulul ning kutukuka tikilyayuk. Aning el urasin ara laka nyapnune. El kisok ara tekbarye ubuk bukni, el kisok kalun ning, el si ara mahkota yuk-yuk uamuk ning ara, taku barye 10 ubuk. Tonda, el kisok tekbarye asok deice ara, si lakak ubuk. Asi sekuka deiamukba, lakak uamuk ning ara, ninye arye amalinye biti, el si siptingopura, Allah kekepturye, ‘Na like’ tenen, yu weik uptue. Amalinye el si nirya ara, Allah yanina yupu ulula ati nyapne.
“Winibuka unamake deiyok ara, ani. Ara sikda pia malye wininyak bukni, Allah arye, ‘Wininamme,’ tenyamse ning ara, sik talima pum tam dongopnyopura, sik 10 ninye deiyok nang arye, sik mikip ap, sik talinyak ning nirya ap, Malye Kam Ululnye deice deibicopura, elce amutuku nirya talibuka unamle. Unamla deice arye, ‘Na tenyamse pil nirya akunum dopnamniyake. Akunum dopnicopura, narye, bita merekuka,’ tenenamne. Narye, ‘Aminyan sirya talak unamle ning ara ani,’ nyabuka lak nyalamse yupu nirya, nong akunum uplyopura, narye amalye deiyoknye babye oplopnamne. Allah arye tenelule.” Amalaikat arye na Yohanes ati aning nirya laka nyapnuke.
Amalaikat arye ayupu nyapnukba, Allah El Dib Kanye talipnuka deice arye, amalaikat arye dopropnukce, yukak bobenuk. Ara, mek ap, ninye ap pia kumak bobinukba, aning eipse. Eipse ning ara, nyapnune. Ara, pia malye kam ulul ning, el nong ara ining bi uamuk ning bukmokak, eipse. Amalye kam ulul ning el nong bol deice nirya ara, si sekamuk ning lak kibuk. Ninye arye asi nirya nyaptingba, Allah kekepturye, ‘Na like’ tenen, yu uptue. Ara, Allah el si yanina yupu ubuka ati nyapne. Asi nirya ara, Allah el yanina ati aning nong bol deice sekuka deiyamuk. Akam ning ara, el kisok tekbarye ubuk bukni, el kisok deice ara, sapi basam yang atonun ning sepuluh (10) ubuk. Malye Kam Ulul Ning balye tam ara, ninye nirya biklamikce, talye yolalamik kil bukmokak, eipse.
ကြော်ငြာတွေ