Bilangan 22:1 - Eipomek

¹ Israel ninye bisik balamika ani, Kanaan tam noutamak bukni, Moab mutuku noutamak weik lyu mutuku biyik. Abiyikce, sik doltakna aik binuka dobik. Amutuku ara, Yordan mek atam ara, weik asik dolamik mutuku, el si ara, Yeriko mutuku dam binuka dobik. Yeriko mutuku otam, amutuku binuka, atalak ara, Yordan mek kup-kup, sik doltakna aik binuka dobik.

Bilangan 22:1 ပူးပေါင်းရင်းမြစ်များ

Yeremia 40:11

Aning mitik tonun, atalak noutam ara, yuk Yehuda tam ulamik nang bukni, Babel mutuku nang arye, Yehuda tam olyayik talak ara, sikce, ‘Se, Babel tam nang arye, yata wiripnamsiak do?’ tenen, ilil ubukba, bai sakuka, yuk-yuk mutuku datikilbanyak nang ton, ayupu kekebik. Ara, Yudea mutuku nang bukni, ilil ubukba, Moab mutuku ap, Edom mutuku ap, Amon mutuku ap, tonda yuk mutuku-mutuku nirya, dabinuka ulamik nang ap, sik nirya arye, ayupu kekelamik. Ara, yuk nang arye, “Kume, Raja Babel birye, Yehuda tam tuba kam unyak bona utotoa talina kum nang ati, Safan birye deibuknye Ahikam, elce deibuknye, el si Gedalya, ‘Elda sik Gubenur unamleʼ tenen, akunum Gubenur kipdeibikba, talibuka ulule,” nyalamikak, kekelamik.

Bilangan 21:20

Bamot mutuku tia mapmeka ani, amutuku arye batakuka, bisik banmeka ani, Moab nang mutuku lu uamukak biyik. Amutuku ara, weik arye bukamuk mutuku el si ara, Pisga mutuku aryuk welebikce, weik pata mutuku ton eibik. Apata mutuku noutam ara, ninye ton pia kum ulamik. Yo ap malmalya dem ulamuk.

Bilangan 26:3

Nyabukura, Musa ap, Eleasar ap, sikce Allah nyamuk touk winiprik. Ara, sik Israel nang nirya, Moab mutuku tam, weik lu uamuk mutuku unmek talak ara, anang nirya nukikce, sik si sekuka deibik. Ara, Yordan mek koubuka, otam Yeriko mutuku bukni, Moab mutuku luak bulubuka unmikak, Musa ap, Eleasar ap, sikce nyaprik.

Bilangan 31:12

Adalubuka doprobik ning nirya ara, Musa ap, imamnye el mi Eleasar ap, tonda Israel ninye sik ninye weik deiyok-deiyok ulamik ninye nirya ap, sik talye daulamik Israel ninye ap, sik nirya bulubuka aunmek damuk, sik doprobik ning nirya bobuka yayik. Atalak ara, Israel ninye, sik doltakna aik dobuka unmek mutuku ara, Moab mutuku lu ak, Yordan mek piridipna bukni, Yeriko mutuku uk dam binuka unmek.

Bilangan 32:19

Ati ara, nunce nun kayapu nang ati, Yordan mek koubuka otam keting kumulban tam mutuku tuku ton arepnamalamak ara, atuku mitik tonun babye, ton kum dopropnamabe. Deiyok ara, ance nun talibuka una ati tuku ara, Yordan mek koubuka atam, keting panalyangan tam akunum arepsuluma ati, asukumuk unamabe. Sik Ruben yala nang ap, Kat yala nang ap arye, Musa ati nyabik.

Bilangan 34:15

Sik anang pia ati talibuka unamak mutuku tuku ara, Yordan mek duman arye dipdongobuka, otam keting kumulban tam balamle bukni, Yordan mek koubuka keting panalyangan tam bukni, Yeriko mutuku dam tuku arebupu ning talibuka unamake.

Bilangan 35:1

Moab mutuku lu tam bukni, Yordan mek lilkwa Yeriko mutuku dam unmek talak ara, Allah Yahweh arye Musa biti nyabuk.

Bilangan 36:13

Ayupu nirya ara, Allah el si Yahweh arye, Musa keken dam nyapdeibukba, Musa birye sik Israel ninye nirya sik kekena ati, “Aning winibuka-winibuka unamlume. Aning ara pia kum wininamlume,” nyabuka laka nyabuk. Ayupu nyabuk talak, sik Israel ninye nirya ara, luh weik mutuku, el si Moab mutuku noutam bukni, Yordan mek lilkwa, mutuku si Yeriko mutuku weik asik dolamikce, ulamikak binuka, laka nyabuk.

Ulangan 1:5

Ati ara, Yordan mek otam keting panalyangan tam noutamak bukni, mutuku si Moab mutuku noutamak, Musa birye ayupu nyabuk. Musa birye nyabuk ara, Allah arye Musa biti, ‘Aning winipnamlulume. Aning ara, pia kum wininamlulume,’ nyapdeiamuk yupu ap, peterelamuk yupu ap nirya, laka nyabuk.

Ulangan 3:8

Atalak aryuk nunce ninye deiyok nang bitinye arye, talibuka ulamdik mutuku nirya alubuka doprobupu. Ara, Yordan mek koubuka keting panalyangan noutam bukni, Yordan mek duman tam ap, anyapce ubuka, Arnon mek duman arye dipdongobuka, deice tam mutuku dabu tam (ara utara) weik mutuku dup, el si Hermon mutuku dam, atam nirya dopromubu.

Ulangan 34:1

Musa bira, weik lu mutuku noutamak, mutuku si Moab mutuku batakukabukce, yuk mutuku si Nebo mutuku dup welebuk. Nebo mutuku dup bukni, mutuku dup pia deice tam ara, asukum si ati, Pisga mutuku nyalamik. Pisga mutuku dup welebuk. Pisga mutuku dup ara, Yordan mekin bukni, keting panalyangan tam ulule. Asik si Yeriko mutuku ara, ninye asik weik domikak, Yordan mekin otam keting wekelbalamle tam ulule. Pisga mutuku dup arye, keting wekelbalamle tam ara, ninye asik dolamikak Yeriko mutuku elinyake. Amutuku deice akunum welebukopura, Allah arye, Musa biti nyabuk. “Ura, narye arepnamsin mutuku nirya ara, keting wekelbalamle tam, otam oupmala atia. Omutuku nirya dipdelyame,” nyabuk. Nyabukura, Musa birye, Nebo mutuku dup deice bukni, otam eibuk mutuku ara, ani. Ara, utam ara, Laut Garam mekwen aubuk bukni, amekwen deice tam mutuku si, Gilead mutuku tam eibuk. Abukni, pia dipdongobuka itam mutuku, pera tonun Galilea mekwen deice tam bukni, ninye asik dolamik mutuku si ara, Dan mutuku ton eibuk. Amutuku nirya eibuk.

Ulangan 34:8

Musa dibukopura, Israel ninye arye, Musa el dibuk ning ati, Moab mutuku noutam bulubuka, like yupa tonok kepdopnye pamubarye (30) sum noutamak nirya arye, Israel ninye nirya bulubuka engelamik. Atalak engelamika ani, like yupa tonok kepdopnye pamubarye (30) sum akunum kibukopura, batakik. Sikce Musa biti engelamik ning ara, sirya batakik.

Yosua 3:16

Winibukopura, mek deice yaribuka balamuk ning ara, baprongobukba, itam arye yangalamuk mek ara, eitam mutuku kilbiyuk. Mutuku si Adam bukni, ton mutuku si ara, Sartan mutuku dam ara, pia cang weik tonun tikukabukce, asukumuk tunim abuk. Winibukura, ton ning ara, utam mek ara, mekwen si ara, Garam Laut mekwen dam balamuk mek ara, bokukabukce, outam kilon, eitam kilon kibuk. Amek nirya ceprobukba, Israel nang nirya, amek balamuk bisik bukni, mikdopmok deice uk, keting yangan tam arye, Yordan mek koubuka, otam keting wekelbalamle tam, Yeriko mutuku tam biyik.