Bilangan 17:2 - Eipomek

² Ance Israel nang ati nyapminba, sikce kama dua belas nirya arepnamkinyake. Akama ara, Israel ninye kan-kan bukni, sik yala yuk-yuk aunyak touk, tonda sik apu yapu nang, yuk-yuk daunyak touk. ubuka nukmince, 12 kama dopropnulyame. Sik yala yuk-yuk, deiyok kibuka taleamikce nang arye, akama arepnamkinyake. Akama arepkikiba, ance akama bol deice, sik si seknamlyame. Israel ninye yala yuk-yuk, deiyok kibuka talibik nang, sik siuk sekenamlyame.

Bilangan 17:2 ပူးပေါင်းရင်းမြစ်များ

Kejadian 49:10

Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.

2 Tawarikh 31:17

Tonda, adin ning bokuka arena deiyok nang arye, sik imam nang arye deipdanin, yanamik nang yuk-yuk, ninye si seken buku noutam seklamik touk ubuka, aimam nang ap, sik mapu silip ap ati, bokuka arelamik. Tonda aning atonun ton, sik Lewi yala nang, keting tamun duapuluh tahun (20) eitam kiamne nang, apil talebuka dolamik nang ati, ton bokuka arelamik. Ara, minop talak arye, “Ayupa ara, apil talebuka donamlume. Ayupa ara, apiluk talebuka donamlume,” nyabuka, pil deiyok areamik touk kibuka, taleamikce dolamik nang babye ati, aning bokuka arelamik.

Mazmur 110:2

Allah Yahweh arye na deiyoknye ati nyabuk. Ance Sion mutuku talibuka uminye buk, narye mikip tonap arepkiniba, amutuku arye diprongobuka, otam mutuku nirya, ancuk talinamlame. Ance talinalam mutuku nirya ara, pala pia weik mutuku upliba, an oldan ninye, sik unyak mutuku babye, ancuk talimince, sik ninye deiyoknye unalame.

Mazmur 125:3

Tonda, anggun ninye deiyok nang ara, sik pia malye wininyak Raja-Raja nang nirya babye, pia asukumuk, sik kama talibuka, kum unamake. Ara, Allah arye, “Na yupu uk talibikirye, pia diksukumuk wininyak nang ati, ‘Amutuku tuku ara, arenamsine,’ nyabuka, nyalin yupu deice arye, akunum nyabuka arepsuka atia. Ati ara, nuncuk, amutuku tuku pia talinamabe. Amutuku arepnamsila deiyok ara, ‘Amutuku dobuka, sik diksukum wininyak nang, kum areplyopura, sikce teleb winin ning ap, na yupu ap yanipnikirye, ‘Malye winin ninguk wininamap’ tenen, sik taruk bibikikirye, ‘Malye winin ninguk, talibuka wininamabe,’ tenenyaka ati, nyapne.

Keluaran 30:26

Asiltong teleb minyak akunum memebuka deipmunyopura, anggunce aning dobuka, ‘Aning ara, Allah el ninguk unamleʼ tenen, na si erena ati, ninye ap, na ap, eldana ati aik ara, tenda bola aik deice likdeipnamlume. Aning atonun, na Allah arye Musa biti, ‘Sik Israel ninye ara, aning ara, wininamake, aning ara, pia kum wininamake,’ nyapdeipse yupu dobuka, peti marikna el si Peti Perjanjian pum tam dongoplum ning, Pia Teleb Lek Aik noutam deipmunyopura, amarikna deice, aminyak mek likdeipnamlume.

Keluaran 4:17

Ati ara, ance akama bobuka balamince, ninye kum winipmanto ning winilaminba, ninye nirya kel biknamake. Ara, Israel ninye arye, ‘Kume, Allah arye pil dosulule,’ tenepnamak atia,” Allah arye Musa biti nyabuk.

Keluaran 4:2

Nyabuk buk, Allah el si Yahweh arye tamubuka, Musa biti nyabuk. “An taruk talipmalama ara, yata ning upmakil do?” nyabuka asipdeyukbuk, Musa birye, “Ara kama uk talipmane,” nyabuk.

Yehezkiel 19:14

Tonda, uku arye anggur tapu dilamuk talak ara, anggur tapu yo noutam arye, deiyok koubuka, uku arye dilamukce, sirya daklamuk. Winilamuk talak ara, anggur tapu deiyok ap, noutam ap, taruk ap, duk nirya ara, uku arye dibuka sirya dakuk. Winibuka ati ara, wini talak ara, sik ninye deiyok nang arye, teleb kama ton, kum memebuka taliptinge. Ara, teleb kat yo arye, kama memeptingba, Raja arye taliptu ura, ninye eibikirye, ‘E, el Rajanye bira, weik pala mutuku talilula ati, el kerajaan talibuka, ulul ning bikilina ati, akama dopmala atia,’ kum nyapnamake. Deiyok nang arye, sik kama bobana ati, kama ton kum memepmanto unyake. Ati ara, nyapmasin yupu nirya ara, amutuku noutam ululum Israel nang nirya arye, ninye dibice talak engelamlum touk, wini talak babye, engena ap, ikin kanye bobuka una deice arye, kanye ikin mot, pia tuba-tuba nyanamlume. Yeheskiel birye, sik Israel nang ati, nyabuk.

Yehezkiel 21:10

Aya ara, akunum kitibuka deipse ning, narye atam nang nirya opnamne. Tonda, narye aya ara, akunum kitibuka deipse ati, aya dopropnyopura, el si ara perereng ablirye, mile daklamle atonun upnamle. Na kayapu nirya, wenen ning yanamle ning ati, anggunda teleb kanye kum bobuka unamlume. Minop talak ara, anggun malye winilamlum ning ati, winipmanto ara, talye yo taruk arye bokuka wenepsise bukni, anggunda, ‘Deiyok aning ara, mambul kume, dauplye,’ tenelamlumce, bikamlumcuk, ulamlume. Aning deice arye, moubuka kum bikamlume.

Yehezkiel 21:13

Aning ara, talye ati kum nyapsine. Deiyok ara, ani. Anggun moubuka tenipnamlulume! Winipmanto ning ara, talye yo taruk arye, butuku palamle bukni, ‘Aning ara, dauplye, nun malye winin ning kum bataknuyabeʼ teneplumce, biknulumura, aning deice arye, aminyan talak ara, anggun wenena ati, weik kanye imun ning ton, tabakuka kum arepnamsin do? Kume, dipkoprob narye ‘Naʼ tenen, nang, na mapu koproba ululum bukni, anggun Israel nang ati, weik ikin ning arye winipdenamsine. Narye anggun deice, weik ikin ning deipnyeba, doropnamlume. Aning ara, na Allah Yahweh, aning-aning deice tam erebuka, Pia Mikip Weik Ununye birye, akunum nyapdeipsin ati, aning ara, dipkoprob nong kum upnamle.

Mika 7:14

Nabi Mika birye, Allah ati morobuk. Se, na ni Allah Yahweh, ance an mapu koproba, Israel ninye nirya ati, wibuka deiamlumce, an mapu atonun ulamupu. Ati, ance sikti, bico tenebuka, pia moubuka kalikinamlame. Winipmanto ara, domba basam weina deiyok nang arye, sik domba basam pia teleb kibuka kaliklamak touk, ance nunti, kalikuka melinamsilame. Ara, ‘Nun Israel ninye ara, pia bai mutuku noutam atonun unyap bukni, ance lyepsimince, pia telebak deipnamsilam’ tenen, moropkine. ‘Lyepsimince, nun unamap sukum ara, pia sukulamle tuku ubuk mutuku binuka, talibuka uptibye’ tenen, moropkine. Tonda minop talak, Allah ance pia teleb mutuku, Gilead mutuku ap, Basan mutuku ap, nun Israel ninye nun apu yapu ati areamlumba, ulamik mutuku atonun, pia telebak arepsiminyeba, ‘Pia teleb mutuku noutamak unamap’ tenen, moropkine. ‘Pia teleb mutuku arepsiminyeba, nun din ning ara, weika arye dobuka dinamap’ tenen, moropkine.

Bilangan 17:1

Allah el si Yahweh arye, Musa biti nyabuk.

Bilangan 17:3

Tonda, Lewi yala nang, sik kama deice ton, ance Harun el si sekenamlyame. Aning atonun, Israel ninye yala yuk-yuk aunyakce, deiyok kibuka talibik nang aunyak touk, sik kama memebuka arepkikcopura, akama deice, sik si yuk-yuk sekdeipmince, kintinipnamlyame.

Bilangan 7:1

Musa birye, Allah Yahweh ap, ninye ap eldana ati, dolamak tenda aik akunum kintinip deibukce, sirya dakuk talak ara, anyaik ap, anyaik noutam uamuk ning ap, pil don ning nirya ara, siltong teleb minyak mek arye, aning deice nirya likilina ati, pil dobuk. Tonda kam ning oyakceba, uku dongona ati, kintinip deibik ning, el si mesba deice ap, amesba deice deilin ning nirya ara, teleb mek minyak arye likdeibukce, apil nirya dobuk. Apil dobuka deiyok ara, Aik ap, aning-aning nirya ara, Allah el ninguk pia unamleʼ tenen, apil dobuk.