Ura, sik Lewi yala nang aryuk, Allah Yahweh ap, ninye ap elana ati, tenda arye domik aik pum tam wilibuka kintinibikce, dobik aik pia teleb lek ning ap, tonda anyaik bai tam dana-dana ap, anyaik pum tam kalikin pil dona ati, melin pil don nang ap ati, kintinip deiamik ning nirya ara, pil talibuka dolamik touk, tuba donyake. Apil donyaka ara, imam Harun, elce deiamukba, dadeipdanin yangalamika ani, deibik nang arye, sik kayapu Lewi yala nang bukni, sik amu tam ulamik nang ati, “Winipnamlum, winipnamlum,” nyapdeiamik touk, sik Lewi yala nang arye, apil talibuka dolamik. Aning ara, Allah el si eren aik ati, minop talak kintinibuka sapi bol arye memebuka doltakne tenda aik domik ning babye, aminyan talak Salomo elda weik keil arye domuk aik babye, sik Lewi yala nang aryuk, apil talibuka dolamik touk, tuba donyake.
Bilangan 1:53 - Eipomek53 Sik Lewi yala nang tonok ara, na ap, ninye ap, eldana ati, tenda bol aik dobice, dana-dana tam, sik aik babye, antanap dongobuka donamake. Winibica deice arye, na ap, ninye ap, eldana aik ara, ‘Malye nang arye, malye ubicakʼ tenen, sik Lewi nang arye kalikinamake. Kalekinamak deice arye, sik yuk ninye ton, kum banamnyake. Winipmanto ara, yuk yala ninye ton, anyaik dam yacopura, na yu upnilirye, anggun Israel ninye nirya, anggun deiceuk, anggun wenena ati, ‘Ikin ning deipsinyakʼ tenen, nyapsine. အခန်းကိုကြည့်ပါ။ |
Bilangan 1:53
26 ပူးပေါင်းရင်းမြစ်များ
Anggunda, winilulum bukni, nun atam unyap nang ara, aning atouk, pia kum wininamabe. Nunce si erenyap Allah ara, yuknye ton kume. Nun ni koproba Allah, el si Yahweh ati, nun melibuka kaliksilinye, Allah Yahweh atibuk, el siuk erebibyakarye, el piluk donamabe. Tonda, winibipyeura, elti, pia ton kum batakanamabe. Nun kele, Allah arye nyapdeiamsuk touk, dipkoprob imam-imam nang ara, nun apu koproba, Harun elce deibukba, dadeipdanin yangalammika ani, yanuka deibik yala nang uka. Yuk yala nang ton kume. Winibikceura, sik Lewi yala nang ara, melibuka pil dona uk unamake.
Sik anang arye, asum-asum beren tam talak babye, inipnamalye talak babye, kum bataknamake. Sik siltong teleb nyan ning, el si dupa ap, tonda kam ning ap, obuka boyakaceba, ‘Allah arye, nun malye unyap ning, kum kibuka deipnamsilʼ tenen, Allah Yahweh el kina ati, tonda el siltong kekena ati, aning dobuka, uku dongonamake. Tonda, anang aryuk, minggu-minggu nirya ara, nena kum roti kwaning winiryuk memebuka, pia teleb meja deice deilin pil donamake. Atonun, asum-asum lukunyan noutam nirya ara, sik anang aryuk emas arye kintinibik weisa delinak ara, el yan tam arye awesa uku unamake. Unamak talak noutam nirya ara, nun nirya arye, Allah el si Yahweh arye, ‘Aning ara, wininamlume, aning ara pia kum wininamlume,’ nyapdeiamuk yupu nirya ara, pia moubuka tenibuka talipnamabe. Bukni, anggunce Allah ati, akunum batakalulume.
Nyabukce, ayupu ton nyabuk. “Nara Allah Yahweh, aning-aning nirya talinirye, im deice yin talin malaikat nirya, sik weik Deiyoknye unune. Nara mikip weiknye birye nyapsine. Anggun malye-malye ubuka, tilila yupu nyalulum nabi-nabi ati ara, weik arye wenebuka opnamsine. Winipmanto ara, sik lelamle ning arepneba denamlume. Tonda, ninye dipna deiyok ning ap, mek ap tabakuka arebikiba, dibikirye dibilamak touk, ninye dipna ning arepsinyopura, anggun dipnamlume. Wininamluma ara, talye ati kume. Ara, sik Yerusalem mutuku unyak tilila yupu nyanyak nabi-nabi nang arye, malye weik wininyaka deice arye, na mapu amutuku unyak Israel ninye nirya, aning eibuka kekebikirye, na batakuka, na si kum erepnikirye, pia malye ninguk wininyaka ati nyapsine.” Allah arye nyabuk.
Ara, na nyanun yupu laka nyan pil deiyok nang, sik nabi-nabi nang babye nyanyak yupu ara, tilila yupu deice aryuk nyanyake. Narye kum nyapdeipse yupu bukni, sikcuk, ‘Allah arye, ayupu nyapsukba, nyapsiabe,’ nyabuka, tilila nyanyake. Aninguk kum bukni, sik tilila yupu nyanyak nabi-nabi nang, sik kanye aryuk, ‘Winipnamlume, winipnalume,’ nyanyaka deice arye, na si eren aik pum tam pil dona deiyok nang, sik imam-imam nang arye, pil dokirye, na mapu Israel nang talibikirye, sik nong deice, ikin ning weik delinyake. Aning-aning nirya ara, dipkoprob malye ulul bukni, na mapu sik Israel nang, awinina ati, kanye deibuka winilulume. Winilulum bukni, anggun nirya kanye mouplulume! Aminyan sirya daknamle talak akunum dam uplyeura, anggunda yata wiripnamlum do?
Atalak ara, Musa birye, Harun el mapu bitinye nang tuba kam unmarik nang ara, sik si Eleasar ap, Itamar ap, tonda Harun ap, sik nirya ati, nyabuk. “Ura, nun Israel nang arye, nun kwitcapu nang dibikiba, winilamap touk kum winipnamlume. Ara, sikda, anggun kwitcapu, adipmarak nang bitinye engena ati, winirumce, ‘Seʼ tenen, malye kanye dobuka, anggun ongomunye baju kwilikmunce, kum engennamlume. Tonda, anggun potong kona kumce, batakmunyeba, kum duk mounamsile. Anyapmasin ning ara, talye ati kum nyapsine. Deiyok ara, anggun kayapu nang arye, pia malye ning winipmarik ati, Allah arye wenebuka obuka ati, anggunce na nyapman yupu kum kekepmunyopura, anggun winilye ap, Israel nang nirya ap, nun nirya babye, adiparyuk dipnamabe. Tonda, anggunce na nyapmasin yupu kum kekepmunyopura, Allah Yahweh arye nun Israel nang nirya ati, yu tenepnamsile. Bukni, anggun yala nang ap, sik yuk Israel nang yala-yala nirya ara, sik adipmarak nang ati, ‘Seʼ tenen, malye kanye bobuka ukirye, engena ara telebe uka. Adipmarak nang ara, talye kum dipmarak bukni, Allah Yahweh arye, uku dopkwepmalba, dipmala deice arye dipmarake.
Tonda, Allah arye nyapdeibuk. “Sik Lewi yala nang ara, yin talin nang kum unamak bukni, na ap, ninye ap, eldana aik ap, anyaik pum tam unamle ning ap ara, kintinilil bilulume. Anyaik ning nirya ati, kalekinamlume,” nyapnamrurume. Tonda, sik anang pil ara, na si erena ati dolamik aik dona ap, anyaik noutam un ning nirya ap ati, kintinilin nang unamlume. Anggun Israel ninye, ton mutuku batakuka, yuk mutuku binamlum talak ara, sik Lewi yala nang arye, anyaik ap, anyaik pum tam unamle ning ap, kintinipmunce, aning nirya dopmunce, bobinamlume. Tonda, sik Lewi yala nang aryuk, Allah si eren aik dam ara, anggun tenda aik dobuka, antanap dongopnamlume. Allah arye nyapdeipsuke,” nyabuka, laka nyanamrume.
Winiprikopura, Musa birye, Harun biti nyabuk. “An uku sekuka, siltong teleb nyan ning dongolyam emas piring dobuka, Allah arena ati, kam ning obuka, uku dongonak, el si mesba dam arye, uku sekmamuak arye, uku dopropnalyame. Uku dopmince, emas piring deice deipminba, uku diplyopura, siltong teleb nyan ning, el si ara, duba uku dongopnulyame. Winipmince, aning uku diplyopura, uku dipmalye ninguk, minop boyanuka, sik Israel ninye unmakak dam bobimince, ‘Allah arye, sik malye unmangu ning kiliplirye, kum kipdeipnamleʼ tenen ati, binuka uku sekmince, sik pununa ati, pil dopnulyame. Aning ara, minop winipnulyame. Ara, talye ati kum nyapkine. Deiyok ara, Allah Yahweh el yu, pia weik upliba, mambul weik uk deiyok ning ton arepsiliba, uk weik dinamsile,” Musa birye, Harun biti nyabuk.
Anggun Lewi yala nango, tenipdelulume. Israel ninye si erenyak Allah ara, elce anggun Lewi yala nang ati, akunum wipdeipsuke. Ara, ‘Sik Lewi yala nang ara, Israel ninye kan-kan arye wipniba, na si eren aik, na ap, ninye ap, eldana ati ulye aik, pum tam wekikirye, sik Israel ninye ati melipnamake. Anyaik mambul weik pil don nang ati, sik dem donamakeʼ tenen, wipsuka ara, ‘Aning ara, mambul weik,’ kum tenepmalumce, amalye yupu nyanmalum do? Anggunce tenepmalum ara, ‘Apil ara, mitik ning anya,’ tenepmalumce, malye nyanmalum do?
Winibikopura, Musa birye, akama obarye (12) nirya ara, boyanuka, Allah Yahweh ap, ninye ap eldana ati, domikce, Allah arye, “Aning ara, wininamlume. Aning ara, pia kum wininamlume,” nyapdeiamukce, areamuk ning, Musa birye, keil pala deice sekdeiamuk yupu, boyanuka marikna pum libuka deiamuk ning, amarikna dam yanuka deibuk.
Israel ninye yala yuk-yuk nang, sik akunum minop menekuka bacopura, anoutam ara, sik Lewi yala nang, sik aminyan dukdongobuka banamnyake. Ara, sik Lewi yala nang arye, Allah ap, ninye ap, eldana ati dolamak tenda aik ara, sik ayala nang aryuk bobanamnyake. Allah arye, “Sik Israel yala ninye aik nirya, dopnamlum noutam ara, sik Lewi yala ninye dem, sik asik koproba dobikirye, na si eren aik dana-dana tam doupnamnyake,” nyapdeiamuk touk, aninguk winilamik. Tonda, sik bisik balamikce talak ara, yuk-yuk aik dolamik touk winilamikce, anyaik-anyaik nirya, atonun dopnin balamik. Sik bisik ban talak ara, sik yupa yuk-yuk ulamik touk, sik bikilin ning ikamik ning ati, elilamikce, abisikuk balamik.
Ninye si, Lael deibuk mi Elyasap birye, Gerson yala nang si sekikce, ulamik ninye talibuka, sik ninye deiyoknye ulamuk. Israel ninye, sik Allah si erena ap, Allah ap, ninye ap, eldana ati, tia ati dolamik tenda aik balye tam ara, keting kumun tamuk, sik Gerson yala nang arye, asukum sik aik dobuka ulamik.
Musa ap, Harun ap, sik mapu nirya ara, Allah el si eren aik pum tam dobuka, delilamik bukni, anyaik urasin tam keting panalyangan tamuk binuka, asik dobuka ulamik. Sik anang ara, Israel ninye ati, Allah el si erena ap, el si erena ati arelamik ning, pil don talak kintinina deiyok nang ulamik. Ara, Allah el pia teleb lek aik noutam bikilina ati, pil don nang ulamik. Tonda, sik yuk talye daulamikce nang arye, anyaik wekelbikirye, ‘Sik winilamikce ning eibicakʼ tenen, anyaik noutam binang ara, sik anang arye opnaba, dibilamik.
Tonda, sik Israel nang, sik aik damuk daunmek nang arye, dopropnamaka ning noutam arye, mitik tonun ton bokuka deipmamunye babye, lima puluh (50) auplyeura, anoutam arye tonok ninguk dopropnulyame. Ara, Midian mutuku ninye malye kipmalumce, sik teleb ning dalubuka, boyanamlum ninye ap, sapi basam ap, keledai basam ap, domba basam ap, tonda kambing basam ap kintinibuka deipnulyame. Akintinipmamlum ning nirya ara, adiparyuk dopmunce, sik Lewi yala nang arye, na Allah Yahweh, na si eren ati tenda aik, noutam arye pil dokirye, kalikinyak nang ati, aning bokuka kintinibuka, Lewi yala nang ati arepnulyame. Allah Yahweh arye, Musa ati nyapdeibuk.
Ura, mal olana kum bukni, talye aik dam daulamik Israel nang ati ara, Musa birye arepmok ning ara, tonap tamubuka doprobuk. Ara ninye babye, tonda sikce weilamik kam ning, yala-yala nirya babye, aning arye lima puluh (50) aupmok ning nirya noutam arye, tonok ninguk doprobuk. Adoprobuk ning nirya ara, Allah el si erena ati, sapi bol arye doltakna tenda aik domikce, anyaik pum tam pil dona deiyok nang, sik Lewi yala nang ati arebuk. Aning ara, Allah arye Musa biti, “Winipnamlyame,” nyabuk touk arebuk.
Aninguk kum bukni, tonda sik Lewi yala nang ara, na Allah arye dobuka, sik imam nang, ara Harun ap, el mapu ap, sikti, arepne. Ara, sik Lewi yala nang ara, Israel ninye kan-kan unyak bukni, sikak wipdeipne. Ara, na ap, ninye ap, el dan aik pum tamuk talibuka, pil donamniyake. Tonda, sikcuk Israel ninye malye ubikce nang ati, ‘Allah arye wenebuka oplyak ati, namin kibuka meliplirye, aning nirya kum kipdeiptue,’ tenebuka, na dam yakirye, moronamniyake. Winipnikcopura, Israel ninye mangkau arye, na si eren aik dam yatumopura, adiparyuk opnamsitinye bukni, aning kumce, luba kipnamne. Aning ara, sik Lewi yala nang arye, pil donamaka deice arye, Israel ninye arye malye unamak ning ara, namin kibuka melipnamnarya. Sik wenena ati, mambul weikuk boyanuka, sik dam kum deipnamne. Sikda wenebuka kum opnamne.
Ara, yuk ninye arye kanye deibuka, “Peterepsilyame,” nyanyak talak babye, lik uplibuk, “Peterena nun lik,” nyanyak talak babye, anda, ‘Yata tenepnuniak do?’ tenena kum arye, ‘Allah yupu peterepnaman’ tenen, kintinilinauk unamlame. Malye upmakce talak ara, ance, “Aning bataklulume, teleb una ara, ani,” nyabuka lipsisikuka peterenamlyame. Tuba malye unyak ninye ati, “Aning ara, meme. Bataklulume,” nyabuka, yupu sekenamlyame. Teleb akunum wininyak nang ati, “E, aning ara, telebe, aning ara, pia atonun wininamlulume,” nyabuka, sik kanye moulinamlyame. Anyapmakin pil donamlam talak nirya noutam arye, pia moubuka tenepmince, Allah el yupu nyasilye touk, teleb ubuka peterenamlyame. Tonda, aninye nirya ati, minopce wana ap, lik una ap kum bukni, nimalye aryuk peterenamlyame.
Bukni, asum ara, sik Bet-Semes mutuku nang nirya arye, ton nang ara, Allah Yahweh arye, “Aning ara, wininamlume, aning ara, winina pia meme,” nyapdeiamukce, sekuka areamukba, sik Israel nang arye, Nyalin Yupu Marikna yo peti, el si ara, Peti Perjanjian pum deiamik, noutamuk binuka dinmek. Awinibik ning ara, pia winipmanto kum ning, pia mem ning ati, sikce apeti pum dilendenmek talak ara, Allah Yahweh yu ubukba, elce sik wenena ati, sik ap, sik mapu ap, ara tujuh puluh nang (70) obuka kum danaibuk. Allah Yahweh arye, kanye imun ning dobuka, sik deice deibukba, awinibuk ning ati ara, amutuku noutam ulamik nang nirya arye, ‘Seʼ tenen, weik tonun engenmekce, imun kanye bobuka unmek.