Ayub 9:20 - Eipomek

²⁰ Na kanye aryuk, nati, ‘Kume, nara malye una kumce, telebuk unune,’ tenelamtinye bukni, na sitang deice arye, nyanamne yupu deice arye, na malye un ning lak upliba, Allah arye nati, “Anda, dipkoprob malye unanye ulyame,’’ nyapnutue. Tonda, aning atonun, na kanye aryuk, ‘Kume, yuk nang arye nati, “El malye ubuk ning ara, ani-ani,” nyabuka, ‘Pia kum nyapnitinge,’ teneptinye bukni, nyaptinya babye, Allah ara, aning-aning eilulnye biti, elcuk, “An malye ulyam ning ara, ani-ani,” nyabuka laka nyaptuba, na malye ulamse ning ara, lak kipnutue.

Ayub 9:20 ပူးပေါင်းရင်းမြစ်များ

Ayub 1:1

Ninye tonok Us mutuku ulamuknye, el si ara, Ayub nyalamiknye bira, Allah ati, ‘Elda weik mambulnye’ tenen, Allah el siuk erelamukce, Allah nyapdeiamuk ninguk talibuka ulamukce, el tibuk moubuka tenelamukce, malye un ning dam arye batakuka, pia diksukumuk ulamuk.

Ayub 10:15

Narye akunum malye upnyopura, ikin ning na deice yaniliba, dolonamna ati, nara bicoe! Bukni, na kum malye upnya babye, mania kanye bobuka, kisok erebuka kum dipdekitinye. Aning kum bukni, ‘Seʼ tenen, kisok kanulongonuna deiyok ara, ikin weik na deice uk yaliba dolonirye, alye weik unulula atia.

Ayub 14:17

Aning kum bukni, minop talak malye winipnin yangalamse ning ap, wini talak malye wininye ning ap babye, ance aning namin kibuka lyepropnimince, amalye ning yukak donoknalame. Winipmanto ning ara, ninye arye malye ning karung pum bisik dongobikirye, tuku palibuka singnildongolamak tonun, na malye winin ning ati ara, namin kipnimince, lyepropnamnilamca.

Ayub 34:35

“Se, Ayub el nyalul yupu ara, moubuka tenina kumce, talye-talye yupu nyalule. Ayupu nyanmala ara, elce minop, ‘Aning nong ara, ani, ani,’ teneplirye, moubuka kum bikliryuk, talye yupu nyaltakalule.

Ayub 35:16

Winilyama ati ara, an Ayub biti nyapkine. Anda tuba-tuba talye yupu nyalyame. Dipkoprob ning ara, Ayub ance yupu weik tonun nyalyam ning nirya ara, moubuka kum tenepmincuk, talye yupu nyalyame. Ayupu nirya ara, Elihu birye Ayub biti, nyabuk.

Ayub 4:17

Aning arye nyapnuk yupu ara, ani. Allah el malye una pia kum aniryuk, pia telebnye ulul touk, tukwak ninye babye, el ulya atonun upting do? Kume, kum winiptinge. Allah arye tukwak ninye kwepdeiamsuka deiyoknye, pia telebnye ulya atonun, tukwak nang atonun upting do? Kume, aning ara kum winipmanto.

Ayub 9:15

Aning atonun, narye malye winin ning kum winyamtinya babye, nara kel weik bikina ap, mikip ap, kumnye ununa ati, narye Allah ati, yupu tamubuka kum nyaptinye. Elce nati, “Anda malye kipmalama ati, wenepnukine,” nyapnilyopura, narye tamubuka, “Naio, an kanye aryuk, nati bico tenepnimince, na malye winin ning niryada, kum ubuka kipnutum do?” nyabuka, moronamne. Ara, Allah elda, na yupu bokolina deiyoknye ulula atia.

Ayub 9:28

Winibuka nyaptinye bukni, winipnyopura, na ilil weik unulule. Deiyok ara ani. Na kele, Allah ance na Ayub biti, na wininun ning nirya elinilyama ati, ance, “Elda malye winilulnye,” nyabuka, ‘Weik tonun wenebuka opnamnilyamʼ tenen, kanye ikin unulule. Ati, arup nyapmanu yupu, tonap kum nyanamne.

Ayub 9:29

Yata ning ati, naryuk, “Nara telebnye unune,” nyabuka, talye nyapdatinye do? Aning nyaptinye babye, na kele, aminyan talak ara, Allah elce nati, “An malye ulyam ning ara, ani-ani,” nyabuka, laka aryuk nyapnuturye, wenebuka opnamnile. Ati ara, yata deiyok ati, pia pi dobuka tuba-tuba ikin pil donun do? Tonda, yata ati, ikin kanye bobuka, tuba ikinuk unun do? Narye pil donuna ara, dipkoprob nong kum upnamla ati nyapne.

Mazmur 130:3

Atonun, nun ni Allah Yahweh. Nun malye weik unyap ning nirya ati, ‘Aninye wenepnamne do?’ tenen, tuba kum tenenamsilame. Na nio ance nun malye wininyap ning tuba tenepsiminyopura, yatanye birye, an damak yanuka, kanye deibuka tiktu do? Kume, nun tukwak ninye nirya arye, ‘Se, Allah arye wenebuka opsilyak’ tenen, alye dakdanuka duknupdatibye. An damak, yanmanto kum uptibye.

Mazmur 143:2

Na nio, tukwak mutuku noutam kam tuba unyap nang nirya ara, pia diksukumuk kum unyaba ati, yatanye birye, ‘Nara telebnye unune,’ tenepturye, an dam talye mangkau asa, yanuka tiktu do? Kume, aning ara, kum winipmanto. Nara, an amu tam unirye, an piluk donuna ati, ‘Ance na malye wininun ning ati, namin kipnutumopura, aminyan talak ara, yupu lipsisikuka bokeipnimince, kum wenepnamnilam’ tenen, moropkine na nio.

Amsal 10:19

Anggun nirya kanye mouplulume. Yupu weika arye nyapra bamunya deice arye, dipkoprob malye un ning ton, upra banamlume. Ara, ‘Talye yupu weik nyapra bamunya deice arye, malye winipmunyak’ tenen, nyapsine. Bukni yatanye do, ‘Na mangkau arye malye yupu nyapnyak’ tenen, el sitang moubuka kalikdalirye, nimalya arye nyalulnye bira, dipkoprob pia weik kelnye ulule.

Amsal 17:20

Yatanye do nirya, tilila ninguk talibuka ulirye, talye yupu nyalulnye bira, el pil donamle ning nirya ara, nong ton pia kum unamle. Ikin ning weik, el damuk yanganamle. Aning atonun, yatanye do nirya, kanye kwalibuka ululnye bira, el pil donamle ning nirya ara, nong ton pia kum unamle. El dam ara, weik kanye imun ning aning-aning nirya weik yangaliba, el nong deice saknamle.

Yesaya 6:5

Winibukba narye nyapse. ‘Se, bicoe. Nara daopnutuba, diptinye. Aning ara, talye ati kum nyapne. Deiyok ara, pia mambul ning eipman bukni, nara malye yupu nyananye unune. Tonda, na unye mutuku noutam neika unyap ninye nirya babye, malye yupu uk nyapdabirye, malyeuk unyabe. Wininyap bukni, na malinye birye, na asing arye pia mambulnye elinmane. Na malye ning aunilye bukni, aning-aning deice tam ulirye, ninye deiyok talibuka ululnye, Weik Raja akunum eipmane. Ara, aning-aning nirya talilirye, im deice yin talin malaikat nirya, sik weik deiyoknye ulirye, weik erena ap, mikip weik ap ululnye, Allah el si Yahweh akunum eipmana ati, na dipnamne,’ nyapse.

Lukas 10:29

Yesus arye nyabuk bukni, anye bira, ‘Yesus arye nati, el malye ulule,’ tenepmanila ati, ‘Na malye wininye ning kum biknilirye, telebnye uk, tenepnunile’ tenen, ayupu tamubuka nyabuk. “Yo, deiyok ara, Allah yupu deice arye, ‘Anggun bidamang unyak nang,’ nyalulul ara, dipkoprop ara yatato nang ati nyalul do? Yata nang ati bico tenebuka kanye deipnamne do? Yata nang ati, melinamne do?” nyabuka asipdeyuk.

Lukas 16:15

Wininmekura, Yesus arye aFarisi nang ati ayupu nyabuk. “Anggun Farisi nang ara, ‘Yuk nang arye malye nang tenepsicak’ tenen, anggun malye winimunye ning duknumunce, nong bol deiceuk teleb pil dolulum bukni, anggun kanye talima noutamak tenebuka duknulum ning ara, malye ning weik tuba aupmalye ning ara, Allah arye kel biksulule. Tuku ak ninye arye, ‘Aning ara mambul’ tenen, pataplibuk kanye delinyak ning ara, Allah aning ati, el kanye ara, ‘Aning ara pia malye, tenebuka like,’ tenelule.

1 Timotius 6:5

Wininyak deice arye, kanye deibuka teleb ubuka neiktoto una pia kum arye, malye teneldana ap, waldana ap, oldana ap, wininyake. Awininyak ninye ara, sik kanye talima pia malye ubuka anya arye, dipkoprop moubuka kum teneptinge. Allah el dipkoprop yupu batakuka yaninyaka ati ara, wini talak ara, teleb ning kum teneptinge. Deiyok ara, sikce. Tonda, anang sik malye tenenyaka ara, ‘Allah yupu dobuka yuk nang ati peterebibyopura, aminyan ara, yuk nang arye yo bok arepsikce deice arye bona weik talin nang mapu unamabe,’ tenenyake.

Yakobus 3:2

Nun nirya arye, ‘Na malye kum upnun do?’ tenen, winilebyebuk, mankau arye aning-aning yala yuk-yuk, malye wininyabe. Tonoknye birye, el nyalye yupu noutam nirya ara, tonok malye ning babye, kum nyaplyopura, anye bira dipkoprop diksukumnye winilule. Anye bira, el nyalye yupu nirya, moubuka teneplirye, teleb ninguk nyalul touk, el nong ap, el winin ning nirya ap ati, ‘Malye winipnyak’ tenen, moubuka kalikilalule.