Ayub 40:9 - Eipomek

⁹ Ayubo anda, na mikip weik unya atonun ulyam do? Tonda, na yupu nyapnyeba, weik liman nyalamle touk, an yupu ara aning atouk mikip weik arye nyaptum do?

Ayub 40:9 ပူးပေါင်းရင်းမြစ်များ

Ayub 23:6

Yata ati, Allah el mikip weik arye nati, “Anda malye ulyam ning ara ani, ani,” nyabuka, wenen yupu uk nyapnamnilam do? Aning ara, kume! Na kanye ara, ‘Allah arye bico tenepnuturye, dipkoprob na nyaptinye yupu nirya ara, Allah elce moubuka kekepnutue,’ tenepne.

Ayub 37:2

Se, anggun nirya ara, Allah arye nyalul yupu ara, anggun ton moubuka kekeplulume! Allah arye weik yupu deice nyapsilye talak ara, winipmanto ning ara, weik liman lelim weik nyalamle touk ulule. Alelim ara, Allah el si pum bisik arye, kutuka yangalula ati, elce nyalul yupu moubuka kekeplulume.

Ayub 9:4

Allah el kanye talima noutam nirya ara, pia kel weiknye ulule. Tonda, elda pia mikip weiknye ulula ati, ninye arye Allah ati, malye kanye kibikirye, ‘Elce nyalul ning dauplyeʼ tenen, Allah ati, malye kum kiptinge. Ninye arye, Allah ati malye kiptibyeʼ tenen, piriptinga babye, pia kum winiptinge. Ara anye kum winipmanto atia.

Mazmur 29:3

Allah Yahweh arye, nyalul yupu ara, weik laut mekwen deibuka, deice tam arye nyalule. Allah bira, mambul weik una ap, pia teleb una ap ululnye birye, laut mekwen noutam, el yupu weik tonun nyaplyopura, bebeya lakana ap, weik liman lelim ap, nyalamle touk, nyapliba kekenyake.

Mazmur 29:4

Allah Yahweh, el yupu mikip arye nyaplyopura, tukwak mutuku ninye, mutuku sirya, im sirya nirya unyak nang kekebikirye, ‘Se, Allah ara, pia mambul weiknye ulule. El urasin pia telebe,’ nyabikirye, elti, si erenamake.

Mazmur 89:10

Tonda, na ni Allah, ancuk tenepmunyopura, laut mekwen deibukce, mikip welelul bukni, ancuk kalikuka dilyame. Anya arye, ance tenepminye touk, mek langdibuka, pia weik arye langdipmalyane, ila tuba tamubuka, mitik kiplirye kololamle.

Mazmur 89:13

Tonda, Allah ancuk eitam ap, outam ap nirya, kwepdeiplume. Winipluma ati ara, Tabor mutuku unyak ninye ap, Hermon mutuku unyak ninye ap, nirya arye, antibuk kanye deibuka winilikinyake. Amutuku unyak ninye arye, mot nyabuka, an si atibuk erekinyake.

Mazmur 98:1

Nun nirya arye, nun ni Allah Yahweh, el si erena ati, winiryuk kanye bobuka, Mazmur yupu deice, mot nyan yupu uk nyanamabe. Deiyok ara, Allah elce, pia mikip weik ninye, dopmankum pil dolule. Tonda, Allah el pia mikip weik taruk, sirik tam ap, el pia diksukum koprop ulye mikip deice arye, elti, ‘Nun like, elda daupmalye,’ tenenyak nang nirya ara, obuka sirya dakalule.

Keluaran 15:6

Nun ni Yahweh, anang opmom tam ara, an taruk sirik tam pia mikip weik ubuka anya arye, telebuk ulyame. Allah an taruk sirik tam arye mal olan nang ati oplopmalam ning ara, weik mambule.

Yesaya 45:9

Yata ninye do nirya, anggunce Allah ati malye yupu nyanyak nang ara, Allah arye oplopnamle. Ara, Allah el kwelina deiyoknye biti, ton nang arye, “Allah nun like. Anda yata ati aning wininamsilam do?” nyabuka batakanyak nang ara, Allah arye wenebuka opnamle. Allah arye nyabuk. “Sik utenenyak nang ara, winipmanto yupu nyapnune. Ara, kiri tuku arye, memebuka deipmace makau sakuka coplirye, amakau memena deiyoknye biti, ‘Anda yata ati winipnulum do?’ kum nyalul touk, tukwak ninye arye, anggun kwepdeiamsuknye, na Allah ati, wenena yupu kum nyapnitinge. Aning atonun, ninye taruk deice arye kiri tuku tilibuka mek makau kintinilinyak ning arye, ‘Anda, taruk talina kum kintinipmanilama ati, walwal arye winipmalam do?’ kum nyalamle touk, tukwak ninye arye, na Allah ati kum wenepnetenge.” Allah arye nyabuk.

Yesaya 52:10

Allah Yahweh arye ninye mutuku-mutuku nirya anggun dinak, el mikip laka kibuka kiklipdebuka, mikip weik pil dopliba eibikirye, kel biknamake. Pia malye ton winina kumnye birye, mikip weik donamle pil ara kum duknupnamle, laka kibuka pil dopliba elinamake. Ati, mutuku sirya im sirya, mutuku-mutuku nirya unyak ninye, nun ni Allah arye ninye lyen ning arepsiliba eibikirye, kel biknamake.

Yeremia 50:24

Se, anggun Babel mutuku ulamlum nango. Anggunda bicoe! Na Allah arye, “Ura, anggun Babel mutuku nang ara, na yupu akunum yanininyaka ati, wininyaka deice arye, anggun dengna ning, wenebuka arepnamsine,’ tenyamse. Winipmanto ara, ninye arye sik babye, wena wepmakca pum bisik, mana wekelbikceba youlamle touk, sik mangkau kanye arye, dabinuka wena wepmakca wekuka olalamak touk, narye anggunti, tapu weamsise ning ara, akunum wekuka youpdongopdalume. Aning ara, anggunce pia moubuka kum tenyamlum bukni, narye anggunti, wenen ning akunum kintinip deipsise ning ara, anggun nong deice akunum yanmale!

Yehezkiel 10:5

Malaikat urasin atonun ning, el si Kerub, pol dana-dana arye, lang-lang nyanmeka deice arye, weik lelim nyamukba, Allah el aik pum noutam babye, bai tam aik dam bukni, mitik pere sukum nirya babye, lelim weik nyanmokba kekepse. Alelim kekenmase ning ara, Allah Yahweh aning-aning nirya talibuka, Pia Mikip Weik ululnye birye, el yupu nyanmaliba, lelim nyalamle touk, nyamukba kekenmase.

1 Korintus 10:22

Anggun tukwak ninyeuk ululum bukni, ‘Nun mikip pia weik bukni, Allah el mikip mitik anunuk ulule,’ tenemunce winilulum do? Tonda, Yuk ning si erebuka dukdongobuka unyabbuk, Allah eipsilirye, ‘Se, na siuk ara, erepnitinge. Yata ati do?’ teneplirye, ‘Derepsutue’ tenen, winipnamap do? Aning ara, pia kume.

Yosua 4:24

Nyabukopura, Yosua birye, ayupu ton dukdongobuka nyabuk. “Allah arye, aning-aning nirya winibuka deiyok ara, nyapnusine. Ara, tukwak ninye mutuku sirya, im sirya nirya unyak ninye ara, ‘Se, Allah el si Yahweh, elda pia mikipnye’ tenen, kel biknamake. Tonda, Israel ninye nirya ara, sik ni Yahweh ati, ‘Se, elda pia weik mambule’ tenen, ‘El si erebikirye, ilil kanye tuba upnamle’ tenen, amambul pil dopsuke,” Yosua birye, Israel ninye ati nyabuk.