Ayub 4:9 - Eipomek

⁹ Sik malye upmace nang ati ara, Allah el yu uplyopura, si pito pupliba, adiparyuk obuka sirya dakalule. Allah arye amalye nang ati, yu weik uplyopura, kam kum unyake, adiparyuk opliba dibinyake.

Ayub 4:9 ပူးပေါင်းရင်းမြစ်များ

2 Raja-Raja 19:7

Tonda na nyapnusin yupu ara, moubuka kekeplulume. Na Allah arye, Asyur mutuku deiyoknye, el talima noutam ara, el kanye tamupdeipnirye pil dopnyopura, aminyan talak yupu lak nyabikiba, kekeplyopura, el mutuku tamubuka binamle. Akunum tamubuka bilyopura, el mutuku noutam ara, narye arepneba, yuk nang arye, parang ya bobikirye, anye oplopnamake. Allah arye, nyapmakile,’ nyabuka lak nyalbilulume,” nabi Yesaya birye nyabuk.

Ayub 1:19

Awininmak bukni, talye karin arye, mok ap, mek ap kum ati, buppu weik arye ninye kum ulamik mutuku tam arye, weik kumanya ton yanmokce, anyaik dana-dana nirya yanuka donmalce ulupmalce, an mapu ap, kilmapu ap nirya, teikuka obuka sirya dakmale. Winipmalarye, na tonok batakmanilba, na ni anti nyalyakine,” nyabuk.

Ayub 15:30

Dipkoproba, sik amalye unyak nang nirya ara, dipnamake. Dibikcopura, min diplamik nang unyakak ara, kunukak arye kisadakuka, pia yukak kum binmanto unamake. Tonda, winipmanto, weik uku dilamlirye, yo ap, ayo yating ap ara, uku arye pia diplyeba, kum danalamle touk, anang ap, sikce deiamik mapu ap, sik mapu silip nirya ap ara, uku buk arye dibuka, sirya daknamle. Ara, Allah arye sik wenena ati, el si mikip arye, sik anang nirya ara, kum kipdeipnalame.

Ayub 40:11

Anda Ayubo, na mikip weiknye unya atonun ulamtum toura, an yu ukilye ning ara, ance yu tenelyam nang, sik deice deipnulyame. Ara, kanye talima erelan nang, sik deice deipnalame. Winipminya deice arye, sik tenenyak ning ara, batakuka, amu tamuk unamake.

Ayub 40:13

Winiptumopura, adiparyuk amalye nang nirya obuka, tuku pum dongobuka weiptum do? Winiptuma deice arye, sik anang nirya ninye diamikce nang unyakak, bobinuka deiptum do?

Mazmur 18:15

Atalak ara, Allah ance, weik bebeya weik tonun im tam arye dopkweteplumba, anti, ‘Allah bira, nun lik ati, el yupu pia kum kekenamabe,’ tenekinyak nang nirya ara, aning eibika deice arye, ilil weik ubukba, sikda dana-dana tam nirya, bikbik abuka bindobik. Allah ance bebeya weik dokweteplum ning ara, uku dilul touk ulamle mal atonun ubuka ati, atalak ara anti, ‘Allah ara nun lik,’ tenen, an yupu pia kum kekekinyak nang arye, ilil weik ubukba, dana-dana tam nirya bikbik abuka bindobike.

Keluaran 15:10

Utenepsik bukni, ance weik kumanya mikip puplumba, weik laut mekwen arye aninye siknibukce dibuk. Winibukba, ikin ning, besi ning kitibuka mekwen dongobikiba, weik laut pum bisik wekelamle touk, aninye nirya mekwen wekikba, mikip weik mekwen arye dibuka siknibuke.

Keluaran 15:8

An si pito arye, weik laut mekwen puplumba, amekwen nirya ceprobukce, dana-dana kiprobuk. Dana-dana tam kibuka tikilbiyukba, aik abilinga kat ulamle atonun winibuk. Ara, laut mekwen noutamak bukni, mikuka kat kibukak arye. Winibukba nun anoutam bisikuk yapue.

Yesaya 11:4

Aning kum bukni, elce bona utotoa talina kum ninye ap, mikip kum ninye ap ati, el diksukum ulye deice arye, yupu lipsisikuka bokolinamle. Bona weik talin nang arye, talye bona utotoa talina kum ninye ati, yaniltanyakba, bona kum ninye arye, ‘Se yata wiriptibye do?’ tenen, malye kanye bobuka moronyak ninye ati, pia telebuk ulinamle. Winipmanto ning ara, kama mikip asa arye, tuku deice olamak touk, sik malye wininyak ninye ati, weneplirye oplopnamle. Malye winibuka ulamikce ninye ara, el yupu nyanamla deice arye, wenebuka oplopnamle.

Yesaya 30:33

Dipkoprop minop talak ara, Allah arye Asyur mutuku ninye deiyoknye, Raja Asyur biti, ‘Anye opnirye, el nong dobuka uku dongona ati ara, akunum kintinip deiamuk. Dipkoprop aninye deiyoknye Raja Asyur mutuku nang ati, auku dinamlak akunum kintinip deiamuk. Asukum ara, tuku pum palibuk ning ap, uku dinamlak pala ap, el uku dan yo toubuka deibuk ning ap, akunum weik tonun kintinip deibuk. Aning nirya akunum kintinip deibuka anya arye, atalak ara, Allah Yahweh el yu deice arye, el si mikip arye pong nyapliba, pito weik tonun welepmalya deice arye, auku seklyopura, uku buk weik tonun dinamle.

Yesaya 40:7

Winipmanto ara, talye palamle mutmuta ap, maning ap, talye palamle ket-keta ning ayala-ayala nirya ap ara, kita popmalya ani, Allah Yahweh arye keting arepliba, keting deiplirye tin upliba, kolubuka saklamle atonun, tukwak ninye babye kam ulamica ani, minopce dibikirye, kum unyake.

2 Tesalonika 2:8

Allah arye wipdeibuknye, amalye ning siknibuknye bira, dobuka yukak deiplyopura, atalak aryuk, duknulirye, Allah el winin ning nirya ati, Yaniltana Deiyoknye lak kipnamle. Winibuka daulamlye bukni, aminyan ara, nun Deiyoknye Yesus arye, el nyapnamle yupu deice arye, amalinye biti, malye kibuka opnamle bukni, Yesus elda erepdopnamle. Tonda, Yesus el pia teleb ubuka dirina weik yanamle deice arye, amalye winina deiyoknye biti, oplirye, kum daneipnamle.

Wahyu 2:16

Aning babye pia malye ati, aning nirya batakuka donga tamubuka, diksukumuk unamlulume. Kumopura, narye anggun dam minopce batakdongopnyopura, na si bam bol pum belepnuk parang ya arye, atilila yupu talibuka dobolbanyak ninye ati, oplopnirye malye kipnamne.”