Ayub 37:19 - Eipomek

¹⁹ Allah arye nunti wenebuka, yupu bokeipnamsil talak ara, el dam nyan yupu ara, ance nunti, “Ayupu tamubuka nyapminyopura, kekepnululume,” nyabuka, peterepsutum do? Nunce, ‘Atalak ara, yata yupu nyaptibyeba, kekepsutu do?’ tenen, pia kum bikupu. Aning nirya ara, nunce kum biktibye ati, aning kum laka nyaptibye. Na kanye ara, an babye, aning nirya pia kum teniptume.

Ayub 37:19 ပူးပေါင်းရင်းမြစ်များ

Ayub 12:3

Na kanye tenipmana ara, ‘Anggunce, angun bidamnye ati, talima erepdamunce, aning teniluluma ati nyapsine. Bukni, dipkoprob ning ara, na babye, kelnye ton unune. Tonda, anggun kel bikna ap, moubuka tenipmunce, aning nirya moubuka, kel bikna ap ulamluma atonun, na babye kelnye unune. Anggunce, arup nyapmanulum ning nirya ara, nun kam unyap nang nirya arye, akunum kel bikamupa ati, nun nirya ara, aning akunum tenenyabe.

Ayub 13:3

Bukni, na weik patanulul ning ara, ‘Allah dam nyaptinyeʼ tenen, patapnile. Allah pia deice tam erebuka, aning-aning nirya talibuka, pia mikip weiknye ulula ati, ‘El dam ara, “Na ikin unulul ning ara, yata ati na dam yanmanil do?” nyabuka, na yupu nyaptinye,’ tenenune.

Ayub 13:6

Ati ara, wini talak narye tenenun ning ap, nyapnusin yupu ap ara, moubuka kekepnamlulume. Na patanulul ning ara, anggunce na nyapsinye yupu moubuka biknamlume.

Ayub 26:14

Bukni, aning-aning nirya laka nyapmakin ning ara, mikip weik aulul bukni, ‘Allah el mikip arye pil dolul ning ara, akunum,’ tenena kume. Aning nirya ara, mitik tonunuk nyapmane. Nun ninye arye, Allah el winilye ning ara, mitik tonunuk kel bikinyabe. Winipmanto ara, Allah arye winilul ning ara, ninye arye, nun amul pum tam ara, mur-muran yupu uk nyasinyak ning atonun ulule. Nunce elinyap ning ara, Allah el mikip weik ulye ning kel bikina ati, laka kililule. Weik ning ara, kum laka nyapmanto. Allah elda, pia mikip weik arye winilul ning ara, nunce kum kel biktibye.

Ayub 37:20

Narye Allah el dam binuka mania kanye boptinirye, elti, “Naio wini talak ara, naryuk yupu nyapnukina ati, kekepnilyame!” nyabuka, bin moroptinye do? Kume. Tonda, yata tonye birye, Allah ati, “Naio, ance adiparyuk, nati obukapnimince, sice buklopnilyame!” nyabuka, moroptu do? Aning babye pia kume. Nun ninye tukwak nang nirya arye, ‘Aning nyaptinyeʼ tenen, pia kum patalamsuke. Aning babye kum winipmanto ning nyapkine.

Ayub 38:2

Ayub, nara Allah moubuka tenepnirye, kel bikna ning nirya weik deiyoknye ununa anya arye, anda yata tonye birye, yata ati asipdenutum do? Narye anti, laka nyalikiniba, ‘Elda walwal arye nyalula,’ nyabuka, mandipna kanye bobuka, nyapnutum do? Anda dipkoprob walwalnye anya arye, kel kum bikamincuk, talye nong una kum, yupu uk nyanilyame.

Ayub 40:4

“Se, na nio, nara sik walwal nang arye nyalamak yupu atonun nyapmane. Dipkoprob nara malye ununye ati, ‘Arup nyapmakin yupu ara, kum nyapmakitine,’ tenepne. Ati ara, ‘Tonap malye yupu nyapnyak’ tenen, na si bambol amupdogobuka unamne.

Ayub 42:3

Allah ance nati, asipdenulum ning ara, ani. “Dan mandipnanye birye, na nyanye yupu ati, malye kibuka bisipnutu do? Tonda, yatanye birye, moubuka kum tenipdeturye, ‘Allah yata ati winibuk do?’ nyabuka, wenen yupu atonun yupu, talye nyaplopnutu do?” nyabuka asipdenulume. Winira na bikmane. Na nyanmanu yupu ara, moubuka tenina kumce, nyapmanu. Anyapmanu ning ara, weik ikin ning ati ara, na ap, yuk nang ap, pia kum kel bikmanto ning nyapmanu. Ati, na dipkoprop, moubuka tenina kumce, walwal asa arye, nyapmanue.

Ayub 9:14

Aning nirya ara, Allah arye mikip pia weik tonun akunum ulula ati, Allah arye nati, asipdenilyopura, narye yupu ton tamubuka kum nyaptinye. Tonda, narye, ‘Yupu teleb ning pia moubuka tenipnirye, nyapnamne,’ teneptinya babye, dipkoprob Allah ati, narye kum tamubuka nyaptinye.

Mazmur 139:6

Allah ance tenebuka, biklyam ning ara, narye aning nirya, kum tenebuka kel kipmanto unune. Allah an tenelyam ning, ‘Kel biktinye’ tenen, tenipdetinya babye, dipkoprob pia kum kel biktinye.

Mazmur 73:22

Winibuka ulamse talak ara, na ni Allah an dam ara, nara pia walwalnye atonun kibuka ulamse. Tonda, talye bai tam kam ulul ning, moubuka kum tenepmanto ulamak touk kibuka, an dam ulamse. Kanye bona kum unyak ninye atonun, ulamse.

Roma 8:26

Ikin upsilya babye, kanye deibuka dinauk ulamap touk, nun mitang usiliba, mambul kanye bobuka unyap talak noutamak nirya ara, Allah El Dib Kanye arye melisulule. Ikin usilye talak, ‘Allah morona ara, teleb ning ani’ tenen, moubuka tenebibirye, kum kel kinyap bukni, nun melina ati, Allah El Dib Kanye arye melibuka Allah morosulule. Elce nun melina ati, imun kanye bobuka morosilye ning ara, ninye yupu deice arye laka kum nyaptibye. Nun melina ati ninye kum nyapmanto yupu deice arye, teleb ubuka morosulule.

1 Korintus 13:12

Ayupu nyapmasina ara, deiyok ani. Mek kwen pum bisik dipdekirye, sik mining urasinuk yalyopura, kanya eibikirye, mitik teleb ubuka elilamak touk, wini talak ara, aning-aning nirya mitik anun kanya atonun elinyabe. Bukni, ninye epdanduka miningdam epdakirye, pia teleb ubuka urasin laka elilamak touk, aminyan sirya talak ara, aning-aning nirya lakak aryuk eibibirye, teleb ubuka nong noutamak ning moubuka kel kipnamabe. Wini talak ara, mitik anun bikamse, ton ning ara, kum bikamse bukni, Allah arye nati, na wininye ning ap, tenenun ning nirya ap, teleb ubuka kel bikinilye touk, aminyan sirya talak ara, na babye aning-aning nirya, moubuka kel bikuka unamne.

1 Yohanes 3:2

Na kayapu na kanye deipsine. Wini talak ara, Allah el mapu unyabe. Aminyan nun nonge unamaba ara, min kum laka nyapsike. Bukni, nun kele. Yesus el yanamle talak ara, el nong babye, el ulul ning babye, dipkoprop ulye touk eipnamaba ati, nun babye el ulye touk unamabe.