Ayub 34:10 - Eipomek

¹⁰ Ati, anggun kel weik biklum nang ara, na Elihu birye nyapnusin yupu ara, moubuka kekepnululume! Aning-aning nirya, deice tam erebuka, talilul Weik Mikip Deiyoknye Allah ara, malye ning ton winilul do? Kume, ara kum winiptue. Diba Allah arye malye winin ning, tonok ning babye, pia kum talibuka winilule.

Ayub 34:10 ပူးပေါင်းရင်းမြစ်များ

Kejadian 18:25

Se, na nio, sik teleb wininyak nang ap, malye wininyak ninye ap, likina kumce, talye mangkau arye, oltakana ara, kum winipnalam darebe. Yata deiyok ati, teleb ninye ap, malye ninye ap atonunuk winipnamalam do, tenepne. Tukwak mutuku im sirya, mutuku sirya nirya unyak nang ati, Yupu Bokolina Deiyoknye birye, diksukum ning kum winipnamalam do? Na kanye ara, telebuk winipnalame,” nyabuk.

2 Samuel 22:31

Tonda, Allah an tenelyam bisik ara, pia teleb bisikuka. Ance ninye ati, ‘Wininamlyame, abisikuk banalyame,’ nyasilyam ning ara, teleb bisikuka. Malye ning tonok babye kum ulule. Tonda, an Yahweh arye, nyasilyam yupu ara, pia dipkoprob uka. Malye ning tonok babye, kum ulule. Tonda, yin talin nang arye, ‘Mal dobikiba, biksilyak’ tenen, kelapye dobuka, lelildongolamak tonun, ninye nirya ikin uplye talak nirya ara, ‘Allah elcuk melibuka kalikinamsil’ tenen, antibuk dib tenebibya deice arye, ance teleb ubuka melisilyame. Winisiminba, malye ning, nun dam ton kum yanuka, kum winipsutue.

2 Tawarikh 19:7

“Ati ara, ayupu bokuka nyanamlum talak ara, Allah el si Yahweh ati, ilil tenalume. ‘Aning ara, winipnuyap do, yuk ning winipnuyap do, kum do?’ tenen, moubuka teininamlume. Deiyok ara, nun deiyoknye Allah el si Yahweh aryuk, yuk nang nirya ati, dipkoprob sik ulamikce touk yupu lipsisikuka bokolilule. Ton tam nang ati, ‘Na kanye deipne,’ tenebuka, yuk tam nang ati, ‘Aning ara na like,’ tenena kumce, atouk teleb kibuka yupu bokolilule. Elce ninye mutuku sirya, im sirya nirya ati, malye kum kilule. Tonda, ‘Aning ara, na like,’ tenena kumce, ton tam nang ati, ikin kipdeiplirye, ton dana tam nang ati, cakman ning kum arelule. Moul ning dolona kumce, ninye nirya ulamikce touk tenebuka, yupu lipsisikuka bokolilule. Sikda, el tonok apil talebuka donamluma ati, sik babye, el ulye touk kibuka, teleb yupu lipsisikuka bokolin pil dona deiyok ning talebuka, pil teleb don nang unamlume,” nyabuk.

Ayub 34:12

Pia dipkoprob yupu nyapsine. Aning-aning nirya deice tam erebuka, aning nirya talilula, Mikip Weik Deiyoknye Allah ara, malye ning ton pia kum ulule. Kume, ara kum winiptue. Diba Allah arye malye winin ning, tonok ning babye, pia kum talibuka winilula ati, nun malye un ning ati, ninye yupu nyalin talak babye, Allah arye talye yupu pia kum nyaltakalule. Diksukum ubuka, teleb yupu nyalisulule.

Ayub 34:34

Winibuka nyaptum bukni, na kanye ara, anggun kanye pum tam arye tenibuka, kel weik bikinyak nang ap, tonda kel weik bikina deice arye, nong noutam moubuka tenebikirye, kel bikinyak nang nirya ap, narye anti nyapnukin yupu ara, kekebicak arye, bikinyake. Kel bikikcopura, sikce nyapnamake.

Ayub 36:23

Yate tonye birye, Allah ati, “Anda winibuka-winibuka unamlame. Teleb ning ara, ani. Abisikuk banamlame,” nyabuka, Allah ati petereptu do? Aning atouk, yatanye birye, Allah ati, “Ance malye winiplum ning ara ani,” nyabuka, weneptu do? Kume, ninye arye kum winiptinge.

Ayub 37:23

Dipkoprob nun ni Allah elda, pia deice tam erebuka, aning-aning nirya talibuka, mikip weiknye ulule. Nun tukwak mutuku nang arye, ‘Se, Allah el weiknye ululak binuka eiptinyeʼ tenen, pia eptibya babye, Allah el dam ara, nunce binmanto kum usulule. Allah elda pia diksukum telebuk ulule. Elda mikip weiknye ulirye, ninye tukwak nang ati, yupu bokosulul bukni, talye yupu nyaltakana kum bukni, pia diksukum kibuka yupu nyasulule. Allah elce nun tukwak mutuku unyap nang ati, deiyok kum upmalye ning ati, ton ikin ning ara, nun deice ton pia kum delisulule. Diksukum un ning ara, pia kum batakalule.

Ayub 8:3

Allah ara, ninye wenena ati, talye-talye ubuka, tilila yupu deice arye bokeipsilirye, wenesulul do? Tonda, aning-aning deice tam erebuka, pia mikip weiknye birye, diksukumuk ululnye ulula ati, el Allah arye, ninye wenesulul talak ara, pia kwalin bisik banmalirye, wenesulul do? Kume, aning ara, kum winipmanto. Deiyok ara, elda malye winin ning ton pia kum ululnye biti, pia diksukumuk ulule.

Mazmur 145:17

Allah Yahweh, ance tenebuka, winiminye ning nirya ara, pia diksukumuk winilyame. Malye winin ning tonok babye, pia kum winilyame. Ninye nirya sik wininyak atonun, moubuka tenemince, diksukum yupu uk, nyabuka lipsisikuka bokolisilyame. Tonda, tukwak ninye nirya ap, kam ulul ning nirya ap, Allah ance kwepdeialum ning nirya ati, Allah ance pil dosilyame. Winisiminye ning nirya ara, ance pia bico tenesiminya deice arye, teleb ubuka pil domince, melisilyame.

Mazmur 92:15

Sik diksukum wininyak nang ara, wisi akunum dayikce, telebuk winikirye, sikce talibuka dolamak pil nirya babye, nong upnamle. Winipmanto ara, teleb yo koubikiba, teleb kibuka palamle touk, yo imbik ulamle touk, anang babye, tuba teleb winina ap, mikip una ap, unyake.

Amsal 15:32

Ninye ton yuk nang arye wenebuka peterena yupu ap, lipsisikuka peterena yupu ap, nyabice talak, sikce ayupu moubuka kum kekenyakce, melibuka kum dobolbanyak ninye ara, dipkoprob sik bidamnye ati kum kalikildanyake anya arye, wininyaka deice arye, sik diamuk malye ulilanyake. Wininyak bukni, yata ninye do nirya, yuk nang arye wenebuka peterenyak yupu ati, kanye deibikirye, moubuka kekenyak ninye ara, weik kel bikna deiyok ning ton, weik tabakuka kel kipnin banamake.

Amsal 6:32

Ninye ton sik kayapu domikce kilapu ap, neika malamice nang ara, pia walwal ninye unyak touk unyake. Yatanye birye do nirya, sikce yuk nang domikce kilapu neika mabice nang ara, sikce, sik bidamnye ati, ititildanyake.

Yeremia 12:1

Na Yeremia birye, tenenun ning nyapnukine. Na ni Allah Yahweh, narye anti, ‘Aning ara, yata deiyok ati uple do?’ tenen, na malye kanye bopnyopura, anti morokiniba, ance tuba-tuba teleb ubuka, diksukum ning nyanilyame. Bukni, na kum bikinun ning ara, anti asipdenukine. Ara, yata deiyok ati, sik malye wininyak nang ara, sik wininyak ning nirya ara, nong tuba kiliba, telebuk unyak do? Tonda, yata ati, diksukum koprop kum wininyakce, malye ninguk talibuka wininyak nang ara, sik dam ikin ning yalyeba, kum dolonyak do?

Zefanya 3:5

Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.

Roma 9:14

Ura, na kwit capu. Arup nyapmasin yupu aupsuka ati ara, nunce yata yupu nyaptibye do? Nun tukwak nang arye, “Se, Allah arye tenelye touk, ton nang ati kanye delilul bukni, yuk nang ara batakalule. Ati nunce Allah ati, malye ulule,” nyabuka, malye nyaptibye do? Kume, Allah arye malye kum winipmantonye anya arye, aning kum nyaptibye.

Ulangan 32:4

Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.

Yakobus 1:13

Yata nang do nirya, sik kanye malye tenena deice arye, ‘Aning winiptinye se’ tenen, patasilyeba, kanye talima lilosulul talak ara, “E, ara Allah arye, ‘Malye upnul do?’ tenen, na kanye talima lilonulirye, winilenmanile,” kum nyanamlulume. Ayupu kum nyanamlulume deiyok ara, Allah elda malye un ning nirya ara, kum patalula anya arye, malye ning deice arye, el kanye kum lilopdetue. Malye ning arye elti, kum winipdetue. Tonda, Allah arye ninye nirya ati, ‘Malye uptinge’ tenen, malye ning deice arye, sik talima kum lilosululce, ‘Se amalye ning doptinge,’ kum tenelule, tonda kum asilesulule.