Ayub 32:8 - Eipomek

⁸ Bukni, wini talak ara, akunum bikmane. Ninye tukwak nang ara, keting tamun weik ulamaka deice arye, kel weik nang kum unyake. Dipkoprob ning ara, nun tukwak mutuku nang nirya ati, kel bikna deiyok ning aresululnye bira, Allah el uka. Elda weik erebuka deice tam ulirye, aning-aning nirya talilirye, elda Mikip Weik Deiyoknye ulula ati, el Pia Teleb, Lek Dip Kanye, el pia mikip ulye deice aryuk, weik kel bikna deiyok ning arisulule.

Ayub 32:8 ပူးပေါင်းရင်းမြစ်များ

Kejadian 41:38

Utenebikura, Firaun birye, el pil don nang nirya ati asipdeyuk. “Anggun ton teneipdelulume. Anye bira, Allah el Dib Kanye arye, el talima noutamak pil dolulue. Dana-dana tam nirya, ton pia epra bitibya babye, atonye ton eiptibye do? Na kanye ara, kum eiptibye,” nyabuk.

Kejadian 41:39

Firaun birye nyabukce, elce Yusup biti nyabuk. “Ura, aning-aning nirya, ance laka nyapmasilam ning nirya ara, Allah arye anti, laka nyapdibkukba, laka kibuka nyapmasilama anya arye, yuk nang ara, mitik tonun arye kel nang unyak bukni, nun kanye ara, anda weik kel ap, ‘Deiyok asukum’ tenen, laka nyapmanto una ap, weika tuba ulamkile.

1 Raja-Raja 3:12

Ati ara, an moropmalam atonun arepnamkine. Narye weik kel bikna deiyok ning ap, tonda ‘Teleb ning ani, malye ning ani,’ tenen, kel bikna deiyok ning ap arepnamkine. Winipkiniba an pil donalama ara, pia teleb unamle. Aminyan talak unamak nang ara, an pil donalama atonun kum donamake. Tonda, minop talak ulamik nang babye, an atonun kum ulamik. Anda pia teleb ubuka pil donamlama atia.

1 Raja-Raja 3:28

Aning winibuk ning ati, ninye arye nyanmekba, Israel ninye kekebikce utenebik. ‘Se, nun Raja Salomo wininmal ning ara, elcuk kum tenebuk. Nun ni Allah arye, weik kel kina deiyok ning arebukba, adeice arye Salomo birye, ‘Dipkoprop teleb winina ara ani, diksukum ning ara ani,’ akunum tenebukce, akilapu bitinye ati, yupu teleb ubuka bokipmale,’ tenen, kel kibik. Winibuka tenelamikce, ‘Se nun Raja Salomo bira pia weik mambulnye,’ tenelamikce ilil ulamuk.

1 Raja-Raja 4:29

Atalak noutamak nirya, Allah arye Salomo biti, kel bikna deiyok ning ap, ‘Aning ara, ani,’ tenepra bana deiyok ning ap, mikip arye bikda bana ap, pia weik arye arebukba, kel weik bikamuk.

1 Raja-Raja 5:9

Narye nyapdeipniba, na mapu arye Libanon mutuku welebikirye ayo webuka bobikirye, koulukuka yanamake. Koulukikirye weik laut mekwen kup-kup tam boyanamake. Winibikiba, ayo neika deibibirye, tapu arye koubipyopura, laut mekwen deice deibibiba, amekwen deice bobana ati, ance nyapmasilam ninguk ayo kirikuka delilbinamabe. Dopdeibibyopura, tapu yokikirya, ayo yuk-yuk lelebuka deibipyopura, an tam nang arye ayo dobuka bobinamake. Tonda, narye moropnukin ning ara, kekebuka melipnamnilame. Ara, na Raja deiyoknye ununa ati ara, na aik unyak ninye nirya ati, sik din ning kintinibuka arenamsilame. Akunum nyapkine,” nyabuk. Nyabukce, surat sekuka Raja Salomo dam dopdeibuk.

Ayub 12:13

Bukni, kel weik bikna deiyok ning ap, nong noutam deiyok ning ap, mikip weik una ap ara, Allah el deice uk ulule. Tonda, Allah elcuk nun tukwak mutuku unyap nang ati, “Teleb winin ning ara, ani. Anggunce wininamlum ning, teleb ning ara ani, malye ning ara, ani,” nyabuka, kel weik bikamuknye bira, Allah el tonoka. Elcuk moubuka teniplirye, nyapsutue. Yuknye birye kume.

Ayub 12:16

Allah elda, mikip weik deiyok ning nirya ap, kel weik bikna deiyok ning ap ara, elcuk talilule. Elda pia mikip weiknye ulule. Elda, kel weik bikamuknye ulule. Yuk nang ton kume. Ati ara, Allah elcuk, malye kilule! Ninye arye, tilila yupu nyanyak nang babye, talye yupu nyakiba, sik yupu kekenyak nang babye, Allah elcuk anang deice tam ulula ati, sik nirya talilule.

Ayub 27:3

Na dipkoprob nyapne. Allah el Pia Teleb, Lek Dip Kanye arye, na isin arepnuka deice arye, kam tuba unune. Na nong kam tuba unamne talak nirya ara, na si bambol deice arye tilila yupu ton kum nyanamne. Tonda, na si tang deice arye, talye yupu ton kum nyanamne.

Ayub 33:16

Ato talak ara, Allah elce, ‘Na nyapne yupu, sik ninye arye kekepnuniakʼ tenen, nun amul pakuka deipsilirye, “Wininmaluma ara, bataklulume! Kum batakmunyeura, narye obuka sirya danamsine,” nyabuka, nun dam wenen yupu nyaplyeba kekebikirye, sirya dakanyabe.

Ayub 33:4

Nara, Allah el Lek Dip Kanye arye, akunum kintinip deipnuke. Tonda, winipnukba, weik arye erebuka, aning-aning nirya talibuka, mikip weik ulya deiyoknye Allah ara elcuk, el mikip weik isin arye, na nong noutam isin arepnuka deice arye, kam unune.

Ayub 35:11

Sikce ton, “Se, Allah anda, tukwak mutuku noutam talye kam unyak ning yala-yala nirya ap, im noutam lakuka banyak maka ap, kanye bona kum ninguk arelyam bukni, nun ninye ara, kel weik bikna deiyok ning akunum aresilyame. Nunda, ikin unmaba ati, ancuk yanuka melipsilyame!” nyabuka, Allah ati kum moronyake.

Ayub 38:36

Ninye kanye noutamak arye, ‘Diksukum una ati,’ tenebikirye, kel kina ap, una ap deiyok ning ara, yatanye birye arelul do? Atonun, ninye kanye noutamak arye, ‘Deiyok ani’ tenena deiyok ning ara, yatanye birye arelul do?

Amsal 2:6

Anyapmasina ara, talye ati kume. Deiyok ara, pia weik kel bikna deiyok ning ara, Allah Yahweh elcuk aresulule. Winibuka arisilye ning ara, ‘Teleb una ani, malye winina ani’ tenen, moubuka kel bikna deiyok ning aresulule. Elce kel bikna deiyok ning ap, moubuka tenena deiyok ning ap, ninye nong deice arisiliba, dib tenebuka kel kinyabe.

Amsal 20:27

Winipmanto ning ara, ninye arye weisa ubikiba, sik ning wangamlirye, saklamle ning nirya, lakak upliba teleb kibuka eibikirye, dolonyake. Aning atonun, nun ni Allah Yahweh arye, ninye talima pum tam, malye winibuka duknulamice ning nirya eibuka, kel kilula anya arye, aning nirya ara, lakak uk ulule. Ninye talima pum tam arye malye kibuka duknunyak ning nirya ara, Allah ati kum duknuptinge. Allah Yahweh arye ninye talima pum tam ulul ning nirya elilule.

Penghotbah 2:26

Tonda, Allah ati diba tenebuka ululnye bira, Allah arye, Winipnamake,’ tenelul touk winiplinye tonok, Allah el kanye deiplirye melilule. Ara, Allah arye, atonye tonok, weik kel bikna deiyok ning babye, moubuka teneplirye, teleb kibuka pil don kel bikina babye, tonda teleb un ning babye, kanye delina deiyok ning babye, aning nirya ara arelule. Bukni, Allah elti, diba kum teneplirye, malye un ning tuba ululnye bira, Allah arye ikin uning arelule. Ara, atonye birye, ikin pil dolamlirye, bona tonok imun kanye bobuka, ikin unmalibuk pil doplirye, aning nirya bulubuka delilule. Bukni, anye bira, adeililul ning ara, aminyan talak Allah arye dobuka, elti, diba tenelulnye uk tabakuka arelule. Allah ati, diba tenena kumce, ikin pil dolamlinye bira, aning nirya kum arenamle. Ati, na kanye ara, ninye tukwak nang tonok ikin kanye bobuka pil donyap ning nirya ara, talye-talye atibuk pil donyabe. Aminyan doupnamle talak ara, dipkoprob nong teleb kibuka kum upnamlarya. Winipmanto ara, kumanya dolamlyak, ninye arye, ‘bikbik abuka bibirye, kum mikip taliptibyeʼ tenen, ulamak touk unyabe tenepne. Peterena Deiyoknye birye nyabuk.

Yesaya 28:26

Wa wina deiyok nang arye, teleb kibuka wa koun ning ap, yala dokmanto ning ap ara, weik kel arye pil donyake. Deiyok ara, wa tuku wina deiyoknye birye, el si erelul Allah, elce anye akunum, ‘Winipnamlam, aning ton winipnamlam,’ nyabuka peterlya anya arye, anye birye apil talibuka, teleb kibuka pil dolule.

Daniel 1:17

Tonda, adumbarye wel nang ati, Allah arye kanye deibukce, weik kel bikna deiyok ning ap, Babel mutuku yupu deice sekamik ning yinin ning ap, arebukba kel kilamik. Daniel biti ara, lengdar mana deiyok ning arebukba, lengdar deice arye, winipman ning, lak nyananye ulamuk.

Daniel 2:21

Allah ancuk wini talak ara, ‘Winipnamle’ tenen, kintinilisilyame. Tonda, ‘Atalak ara, aning li upnamle’ tenen, kintinilisilyame. Ancuk minop talak, deice tam erebuka ulamikce nang ara, dobuka amu kipdeipmince, sik ulamica ning pununa ati, winiryuk ning wibuka, erelilyamnye bira, an uka. Tonda, weik kel kina deiyok ning ap, nong noutamak kel bikna ning arelyamnye bira, Allah anuk ulyame.” Daniel birye, nyabuk.

1 Korintus 12:8

Allah El Dib Kanye arye, tonoknye biti, Allah el ulul ning ap, el laka teleb yupu deiyok noutamak ning ap laka nyana deiyok ning ariliba, anye bira weik kelnye ulule. Yuknye ati ara, Allah El Dib Kanye melipliba, Allah el yupu kekeplinye bira, “Ayupu nong noutamak ara, ani. Ati winibuka unamabe,” nyabuka, nyalina Deiyoknye usulule.

2 Timotius 3:16

Allah yupu seklamika nirya ara, Allah elcuk nyalilamukbuk, sik kanye noutamak kekelamikce yupu seklamik. Allah elcuk, ayupu nirya nyalilamuka anya arye, el yupu dopropbibirye, ninye peterena ap, malye ubiceura, “Malye upmaluma ara, ani,” nyabuka, wenena ap, amalye upnin bana ara, “Aning batakuka teleb winina ara, ani,” nyabuka lipsisikuka peterena ap, tonda, “Malye winin ning nirya batakuka, Allah yupu nyalye touk diksukum winina ara, ani,” nyabuka peterena ap, anirya ara, Allah yupu deice dopropbibirye, apil-apil nirya teleb ubuka donyabe.

Yakobus 1:5

Anggun kan-kan noutamak arye, yata nang do nirya, teleb una ati, weik kele deiyok ning kum upmasilyopura, Allah ati moronamlume. Sikce sik pataplye touk, Allah ati morobice nang ara, wenena kum arye talye urdem weika arye arilule anya arye, Allah arye dipkoprop arenamsile.