Ayub 27:14 - Eipomek

¹⁴ Malye unyak nang arye, sik mapu diamice bukni, yupa weik uptinga babye, sik ni yapu ara, mal olanak arye, obikceba dibinamake. Tonda, sik mapu yupa weik tonun deiptinga babye, anang sik din ara, tuba-tuba sukunamla ati, din pia panauk unamle. Sik din nirya ara, kum danamle.

Ayub 27:14 ပူးပေါင်းရင်းမြစ်များ

Ester 5:11

Bukmek talak ara, Haman birye erepdanuka kwalina yupu nyabukce, ayupu nyanmok. “Bona talina weik un ning ara, pia weik talenune. Tonda, na mapu deiamse nang ning ara, pia weik unyake. Tonda, Raja Ahasyweros birye nati weik arye ereipnukba, el amu tam yuk ninye deiyok nang weik daunyak bukni, nara sik deice tamnye unune. Weik sisin nang bulamak sukum nirya ara, talye bunyake, na uk ara, pia mikip weiknye unune. Sik nirya arye, nati ereipnikirye, kininyake.

Ayub 15:22

Sik amalye unyak nang ara, ‘Se, nun kuna noutam arye unyaba ati, nunti lyebuka dopropnamsilnye bira, pia kum yanamle. Asukumuk pia unamap’ tenen, pia tenenibikce, ilil ulule. Tonda, Allah arye, ‘Sik malye unyak nang, sik dekna ati ara, yu nang arye yanuka opnamak’ tenen, ‘Lo arepnyeba, dipkoprob anang ati olyanamake,’ tenesulul, tenenyake. Tonda, ‘Se, Allah arye nunti, aning akunum kintinip deipsuk ati, dipkoprob winipnamsil,’ tenenibirye, kanye imun bonyake.

Ayub 18:19

Allah arye, sik deiamik nang arye, deibikceba deipdanin banamak nang nirya ara, akunum kum kipdeiplirye, sirya daknamake. Ati, sik anang aik dobuka ulamikak ara, aminyan talak nirya noutam, tonoknye babye, tuba ton bataklirye, pia kum unamake. Winiplyopura, sik ulamik mutuku noutam nirya ara, anang pia kum danamaka atia.

Ayub 20:10

Min talak ara, sik malye ninguk winilamik nang ara, sikce aning-aning babye, talibuka una kum nang, talye bona utotoa talina kum nang arye talibuka ulamik ning nirya ara, amalye nang arye ubula dopromik. Sikce dopromik ning nirya ara, talilamikbuk, aminyan talak ara, sikce delilamik mapu arye aning nirya punubikirye, talye bona utotoa talina kum nang ati, tamubuka arenamake.

Ayub 4:11

Tonda, bai tam kus atonun ning, el si singa kus ati, Allah arye el din ning kum arepmalyeura, din patapliba, diplyopura, el mapu nirya ara, talye yuk-yuk dabanyake. Elifas birye nyabuk.

Mazmur 109:10

Tonda, aning ton tenenyake. Ara, ‘Daud birye deiamuk mapu, sik nirya arye, talinyak ning nirya, kum uptuba, amapu arye, ‘Dan mutuku binuka, winiptibye do?’ tenen, dana-dana tam nirya, talye banauk winitinge,’ tenebikirye, nyaninyake. Tonda, sikce utenesinyake. ‘Daud el mapu arye domik asik-asik nirya ara, yuk nang arye ulubuka, sice bukloptingce, Daud el mapu ati, amutuku noutam babye, dobuka dopkweptingura, bai mutuku binuka, uptinge,’ tenebikirye, nyaninyake.

Mazmur 109:13

Aninguk kum bukni, tonda sikce nati, ‘Daud birye deiamuk mapu nirya ap, sikce deiamikba, dadeipdanin yangalamik nang nirya babye, adiparyuk diptingura, kum datinge,’ tenebikirye, nyaninyake. El mapu nirya arye, akunum diamik mapu nirya ap, sik amapu nirya arye, deibikceba, dadeipdanin banamak mapu nirya ap, minop diptingce, kum datingura, Daud el yala ap, el si ap ara, pia kum upnamle. Ara, yuk nang arye, Daud el yala si, tuba kum tenenamake. ‘Daud el yala ap, el si ap, pia kum uptuba lubakinamake,’ tenebikirye, nyaninyake.

Lukas 23:29

Ara talye ati kum nyanmasine. Deiyok ara ani. Aminyan ikin upnamsil talak ara, ayupu nyanamlume. ‘Sik mapu kum deilikirye, you uk unyak kilapu ara, sikda telebe. Tonda, mapu moum dinina kum kilapu ap, sikda, teleb bukni, nun mapu akunum debupu kilapu ara, kum bik-bik abuka bitibye anye arye, ikin weik unyabe,’ nyanamlulume.

Ulangan 28:32

Anggunce deipnalum mapu nirya babye, anggun dinmamunye sukum aryuk dobuka, pera mutuku unyak ninye asik nang melibuka pil dona ati, arebikiba bobinamnyake. Winibikceura, asum-asum nirya ara, anggun mapu ati, ‘Se, nun mapu eiptibyeʼ tenen, enmamunyeba, asinguk dinamsile. Winibuka pia enamlum bukni, anggun mapu ara, kum eipnamlume. Tonda, anggun dam tamubuka, kum yanamsiake. Talyeuk enamlume. Anggun mitanguk unamluma anya arye, anggun mapu nirya bobinamyak talak ara, anggunce, ‘Se, yata winiptibye do?’ tenenauk unamlume.

Ulangan 28:41

Tonda, anggun mapu ap, kilmapu ap, deipnamlum bukni, anggun on nang arye yanuka opsikirye, anggun mapu nirya ara, dalubuka doropsikirye, sik pera mutuku noutam bobinuka, wenen aik dongolbikiba, anggun nirya ara, mapu kum deiamice nang atouk, kibuka unamlume.

1 Samuel 2:5

Minop talak arye, sik din weik uamukba, sik din weik tonun akunum dilamikba, boulamuk nang ara, wini talak sik din ton kum daneibukba, sikda din bulanguk ukirye, ‘Se, yata wiribuka diptibye do?’ tenen ati, yuk nang dam binuka, “Pil ton aruksumunba, pil doptibye deice arye, din ton dekuka diptibye do?” nyabuka, morolbanyake. Minop talak, yuk ninye ara, din patalamuk ninye ara, wini talak Allah arye, din ton weik arepliba, akunum, sik din ton weik tonun dibikiba bouplyopura, kanye deibikirye, darabuka unyake. Tonda, minop talak, el mi delina kumce, you uk ulamuk kil ara, akunum el mapu tekbarye deibuk ati, weik tonun kanye delilule! Bukni, minop talak yuk kilapu ton, sik mapu pia weik deiamik kilapu ara, wini talak ara, sik mapu ton, delina kum diparyuk unyaka anya arye, mi kum deipmanto ukirye, ‘Seʼ tenen, malye kanye bobuka unyake.