Ayub 2:11 - Eipomek

¹¹ Ayub bira,barye susu weik kanye imun ning talibukba, yuk nang arye, “Aik pia bukuk,” nyabikba, el kayapu winilye nang, sik si ara, Elifas Temam mutukunye ap, Bildad Sua mutukunye ap, tonda Zopar Nahama mutukunye ap, sik nirya adiparyuk, ‘Nun kwit aik pia bulyak bipyeba, el ap neika yupu talibibirye, kanye talima kwa dipnamap’ tenen, yupu talibikce, ‘Diba winipnuyabe,’ nyapdayikce, neika biyik.

Ayub 2:11 ပူးပေါင်းရင်းမြစ်များ

Kejadian 25:2

Dobukura, daulamdika ani, akil deiamuk mapu si ara, ani. Min yuma ara, Simran deibuk, aminyan deibuk mapu si ara, Yoksan ap, Medan ap, Midian ap, Isbak ap, deiamukce aminyan sirya koprop ara, Suah deibuk.

Kejadian 36:11

Elifas birye delilamuk mapu si ara, ani. Teman ap, Omar ap, Zefo ap, Gaetam ap, Kenas ap ulamik.

Kejadian 36:15

Esau birye delilamukba, ninye deiyok nang kibuka ulamik nang, sik si ara, ani. Esau birye, min yuma deiamuk mi, Elifas birye delilamuk mapu ara, weik deiyok nang kibuka ulamik. Sik si ara, Teman ap, Omar ap, Zefo ap, Kenas ap, ulamik.

Kejadian 36:34

Daulamuka ani Yobab dibukopura, Temanitnye el si ara Husyam, elce tikuka amutuku ninye deiyoknye ulamuk.

Kejadian 37:35

Atalak noutamak ara, Yakub birye minop deiamuk mapu ap, kilapu ap arye, ‘Nun ni koproba, el talima kwa dipnuyap’ tenen, el dam yanganmek bukni, Yakub birye kum kekebuk. Elce nyabuk. “Kume, mambul kanye bobuka, engenauk unmanya ani, aminyan talak dipnyopura, na mi dibukba, unmalyakuk, na babye amutuku binamne,” nyabuka malye nyanmokce, el mi Yusup biti, weik engelamuk.

1 Tawarikh 1:32

Abraham bira, kil bitinye domuk. Aminyan dobuk kil el si ara, Ketura ulamuk. Atalakuk, akil arye deibuk mapu sik si ara, ani. Zimram ap, Yoksan ap, Medan ap, Midian ap, Isybak ap, tonda Suah ap, deiamukak ulamik. Tonda, Yoksan bira, mapu bitinye deiamuk. Sik si ara, ani. Syeba ap, Dedan ap, deiamukak ulamdik.

1 Tawarikh 1:45

Aning ara, Yobab dibukura, Teman mutukunye, el si Husyandi, deiyok kibuka, amutuku taleamuk.

1 Tawarikh 7:22

Obikba, sik ni koproba Efraim birye, asum-asum nirya, el mapu akunum diamdika ati, tenilamukce, engana uk ulamuk. Winilamuk ning ara, el kayapu nang arye, sik kwet el melina ati, el kanye pin-pin kipdeibikba, el kanye teleb ubuk.

Ayub 11:1

Ura, Naama mutukunye, el si ara Zofar birye, ayupu nyabuk. “Ayub anda talye yupu ara, pia weik tonun nyalyama ati, ninye arye an nyaminye yupu nirya ati, talye kekebikirye, tunim abuka unamak do? Aning ara, sikce tamubuka kum nyanamkiak do? Dipkoprob ara, ance yupu weik nyalyama ati, nunce an nyaminye yupu ati, adiparyuk diba tenenamap do? Kume, teleb ning ara, ninye arye, “Kume, elce nyanmasil yupu deiyok ara, ani,” nyabuka nyaptingopura, ance nyapsilam yupu diba teneptibye. “Talye diba kum tenepkitibye, nyapne,” nyabuk. Nyabukce, ayupu ton dukdongobuka nyabuk.

Ayub 13:4

Bukni, anggun na dam yanmalum nang nirya ara, anggunce yuk nang ati, tilila yupu nyalulumba, sikce dipkoprob ning ara, moubuka kum bikinyake. Winipmanto, sikda, kweten nang unyak bukni, uk din nang kum kwetelinyake. Pia wal-waluk unyake. Anggunda, aning atonun winilulume.

Ayub 15:1

Ura, Teman mutuku tam ulamuknye, el si ara Elifas birye, Ayub biti tamubuka nyabuk yupu ara ani. Ayub anda weik bikamik nang arye nyalamik yupu atonun yupu kum nyalyame. Weik bikna nang arye, talye-talye yupu pia kum nyanyak bukni, ance nyasilyam yupu ara, pia nong kum yupu, talye-talye nyasilyame. Weik bikna nang arye, ‘Sik malye kipnyak’ tenen, yupu sekelana ati nyanyak yupu, nong dipkoprob ulule. Tonda deiyok abuke. Bukni, ance aning atonun kum nyalyame. Winipmanto ara, kumanya mikip arye talye pu nyaplyeba, kum balamle touk nyalyame. Tonda, nun mutuku noutam bukni, keting panalyangan tam arye, pia buppu kumanya pu nyaplyeba, aning-aning nirya sesal seplirye, kum kidanalamle touk, nong kum upnamle yupu nyasilyame.

Ayub 16:20

“Atalak ara, na kwitcapu nang koproba arye nati, ‘Kume el Ayub bira, dipkoprob malye weik winilamuka ati, Allah arye wenelule. ‘Aning ara, mereukuka ikin weik ulule’ tenen, yap-yap nyabuka akutubuka, nalininyake. Wininikceba, na asok erebuka, Allah ati, ‘Melipnilyame’, nyabuka, engena deice arye, na asing meka weik sakanilirye, Allah ati pia moronune.

Ayub 18:1

Ura, Suah mutukunye, el si Bildad birye, tamubuka Ayub biti, nyabuk. Ayubo, yata barye talak ton, ance, ‘Yata yupu ton tabakuka nyaptinye do?’ tenen, tuba nyanauk unamlam do? Dan talak an yupu nyabuka, sirya daknamlam do? Atalak ara, min anda, ‘Dipkoprob ara, dan do?’ tenen, pia moubuka tenipnulyame. Tonda, tunim abuka ulamince, nun nyapkipye yupu, ance moubuka kekepnamsilyame.

Ayub 19:19

Na kayapu koprop, narye sikti, bico tenelamse nang arye, na ikin weik wamnuk talak arye, deiyok koubuka, wini talak babye, nati ton bico kum tenenikirye, ‘Anye bira nun lik’ tenen, yuk tam kibuka banyake. Sikce natibuk, yanininyake.

Ayub 19:21

Se na kayapu, Allah el yu na deice deipnukura, pia imun kanye bobuka unune. Winyamnukba, na kayapu ati nyalamse. “Amapo. Anggunce nati, bico tenepnululume,” nyabuka nyalamse.

Ayub 4:1

Ayub birye, nyabukba, mutuku si Teman mutukunye, Elifas birye tamubuka nyabuk.

Ayub 42:11

Ayub birye, el kayapu nang, sik malye yupu nyalilamik ning ati, Allah akunum morobukopura, anang winilye ati, telebuk kipdeibuk. Aning akunum ubukopura, atalak ara, Ayub el kwit capu ap, el weit kilapu ap, el kayapu nang ap, el tam ninye ap, el bulamuk ninye ap, anang nirya ara, minop ulamik touk, el dam bulubuka yayik. Yayikura, weik kwalina yubukabikce, el aik wekuka neika dilamik. Atalak ara, elti, tuba teninmekce, ‘Nun kwit ikin ning dopromuknye’ tenen, el kanye talima kwa dibuka unmek. Ara, talye ati kume. Allah Yahweh arye, weik pirilen ning, Ayub deice deiamuka ati unmek. Tonda, sikce el melina ati, uang yo bok dekna weik ning tonok ap, tonda el taruk dukdongon ning, dekna weik ning emas arye, memamik ning ap ara, Ayub biti arebik.

Ayub 42:7

Ara, Allah el si Yahweh arye, Ayub biti akunum nyabukopura, Allah Yahweh arye tamubuka, mutuku si ara, Teman mutukunye, el si Elifas biti nyabuk. “Narye an ap, an kayapu ninye bitinye ap, anggun nirya ati, yu kanye bopsine. Ara, anggunce na dam nyapnulum yupu ara, teleb yupu ton kum nyapnulume. Na wininye touk, kum bukni, nati tilila yupu nyapnulume. Na pil donanye Ayub birye, diksukum yupu nyanmok yupu atonun, anggun babye atonun, yupu kum nyapnulume.

Ayub 42:9

Allah el si Yahweh arye, ayupu akunum nyabukopura, mutuku si Teman mutukunye, Elifas ap, mutuku si Suah mutukunye, Bildad ap, mutuku si Naama mutukunye Zofar ap, sik nirya, Allah arye ‘Winipnamalume,’ nyapmok touk winibik. Winibikopura, Ayub birye Allah Yahweh ati, moropbukba, Allah kekebukce, awinilye nang ati, sik malye yupu nyamik ning ati, lyebuka malye una klilibukce, kum daneibuk.

Ayub 6:14

Anggun ton moubuka teniplulume! Yata nang do nirya, sik kayapu ikin weik unyak talak ara, adiparyuk binuka melilamak bukni, anggunda, ‘Anye bira, nunce meliptibye bukni, dabataknyabe. Anye pia kum melinamabe,’ tenepmalume. Aning atonun tenenyak nang ara, pia malye weik unyake. Anggunce awiniluluma deice arye, Allah ara, pia deice tam erebuka, aning-aning nirya talibuka, mikip pia weik ululnye biti, anggunce ilil kum usulule. Anggunda, el yupu ara, yaninauk ululume.

Ayub 6:19

Aning atonun, sik Syeba mutuku unyak nang ap, Tema mutuku unyak nang ap arye, ‘Dengna weik ning dobuka, otam dekelbinamapʼ tenen, sik keledai basam deice bukuka banmalyeba, ‘Mek dan sukum arye kwebuka diptibye do?’ tenen, enmakirye, ‘Amek ara, ton diptibye,’ tenen, kanye deibuka banyake.

Ayub 8:1

Suah mutukunye, el si ara Bildad, elce, Ayub biti nyabuk. “Yata talak arye, anda ayupu tuba nyapnamlam do? An nyanmalam yupu ara, kum mikip dolamle yupu atonun nyalyame. Anyapmalam yupu ara, talye nyaltakalyama atia.

Amsal 17:17

Ninye tonoknye ton, dipkoprob el ka biti, ‘Na kwit,’ tenebuka, kanye deipdanuka ulamdice nang ara, sik ikin uplye talak ap, yuk nang arye, ikin ning deibice talak nirya ara, “Kum batakdananame,” nyabuka ulamdake. Ati ikin uplyopura, sik anang bitinye ara, dipkoprob melilana uk ulamdake. Aning atonun, nun kwit capu koprop ap, nun du yapu koprop ap ara, tonok mun pum tam arye, deiamsik nang unyaka anya arye, yata talak do nirya ara, melilana uk unyake.

Amsal 18:24

Ton nang ara, “E, nun ap neika dukdongobuka unamabe,” nyabuka, nalina yupu nyanyak bukni, sik ap neika unyak ninye ati, pia malyeuk ulinyake. Sik ap neika unyak ninye sik dam ara, ikin ning pia weik arye yanganamle. Ton nang ara, “E, nun ap neika dukdongobuka unamabe,” nyabuka nyanyak bukni, anang ap neika unamak ninye ara, telebuk unamake. Ara, anang ap, sik kayapu nang ap, pia teleb ubuka melilana uk unamake. Anang arye, sik neika unyak ninye ati, ‘Anang ara, nun du weit atonun unyake,’ tenenyaka anya arye, kanye deibikirye, sik ap neika dukdongobuka unyak ninye ati, teleb ulinyake.

Amsal 27:10

Tonda, anggun kayapu nang koprop ap, anggun ni yapu, sik kayapu nang ap ati, pia luba kum kinamlulume. Anang ara, pia kum batakanamlulume. Deiyok ara ani. Aminyan talak anggun patapsilye ning kum upliba, ikin weik upsilyopura, anggunce anggun kwit capu silip koprop ati, “Se, anggunce melipsutume,” nyabuka, kum moronamlume. Ikin upsilye talak ara, nun du weit pera mutuku ulamicopura, sik damak morolbitibye bukni, pia teleb ning ara, nun ap neika mining damak ulamice nang ati, moroldanamabe. Teleb ning ara ani. Ati ara, anggunce utenenamlululme. ‘Nun babye mining damak unyak nang ara weik mambule. Nun kwit capu silip koprop ara, mambul bukni, sikda pera mutuku unyak ninye anya arye, sik damak kum morolbinamabe,’ tenenamlulume.

Yesaya 51:19

Anggun deice ara, kanye imun weik ning deiyok bitinye ara, akunum anggun dam yanuka, anggunti weik ikin arye teiknamsile. Ara, mal olan deice arye, anggun Yerusalem mutuku nang ara, akunum malye kibuka, sung-sunga buklopnamsiyake. Tonda, anggun mutuku noutam unyak nang ara, din patana weik talak kibukba, dopropmalume. Winibuka ikin weik ulamlum bukni, yata mutuku nang arye, anggunti, bico upliba, yanuka melipnamsiyak do? Yata mutuku nang arye yanuka, anggun melipnamsiyak do? Kume, narye yuk mutuku nang dopropniba, anggun dam kum yanuka melipnamsiyake.

Yeremia 49:7

Nara, Allah Yahweh arye, im deice yin talin malaikat nirya ara, sik deiyoknye ununa ati, mikip weiknye unune. Narye, anggun Edom tam ululum nang ati, ayupu nyapsine. Edom tam bukni, weik asik Teman mutuku unyak nang arye, moubuka kum tenebikirye weik kel deice nyapmanto yupu ara, akunum kum ubukba, min nyanyaka ara yata ati do? Tonda, ‘Moubuka tenebikirye, namin aryuk pil donamabeʼ tenen, teleb un yupu uk nyanyak deiyok nang ara, sik mutuku tuba kum unyak do? Sik weik kel bikamika deice arye nyalamik yupu nirya ara, akunum kum upmal do?

Obaja 1:9

Se, anggunda bicoe! Edom mutuku noutam, weik asik domlum ning, Teman mutuku babye, amutuku noutam ninye on nang, sik yin talin nang nirya babye, ilil pia weik uplyeura, kum winipmanto upnamaka ati, narye anang nirya, obuka sirya daknamne. Ati ara, anggun apu koproba Esau birye, deiamukba, dadeipdanin yangalamik nang, Edom mutuku unyak yin talin nang nirya ap, talye daunyak nang nirya ap ara, mal olakirye obikiba, sik nirya dipnamake. Na Allah arye nyapsine.

Roma 12:15

Sik kanye deibuka pin-pin asa arye unyak ninye ati ara, anggun ap neika kanye deibukap unamlulume. Sik imun kanye dobuka engenyak ninye ati ara, anggun ap neika engebuka unamlume.

1 Korintus 12:26

Winibuka kwepdeipsuka anya arye, nun nong noutamak kwepdeipsuk ning tonok ning ton, uk disilyebuk do, opsilyebuk do, winipsilyopura, nun nong nirya, uk disilyeba unyabe. Aning atonun, nun nong noutamak bukni, yuk tam ning ati, “Se, aning ara, urasin pia telebe,” nyapsikcopura, nun nong nirya ati, kanye deibuka unyabe.

Ibrani 13:3

Tonda, sik diba tenebika ati, tapu koubuka wenena aik dongobikura, wenena aik tuba daunyak ninye ati, luba kina kume. Aninye ati, tuba tenebuka melinamlulume. Aning atonun, yuk nang diba tenebika ati, malye nang arye ikin ning weik, sik nong deice delinyakba, malye kanye bobuka, ikin asa unyak ninye ara, tuba tenebuka melinamlulume. Atalak noutamak nirya ara, ‘Se, yu nang arye nun babye ati, tapu koubuka wenena aik dongopsicopura, anang sik kanye imun kanye bobuka unmak touk, nun babye atonun winipsicak’ tenen, wenen aik tuba daunyak nang ati, bico tenebuka melinamlulume.