Ayub 16:4 - Eipomek

⁴ Dipkoprob anggunda, na ikin unye touk winilamtum toura, anggunce nati nyanululum yupu nyapsitinye. Tonda, nara anggun atonun ulamtininye toura, Anggunce, wenen yupu nyalulum atonun nyapsitinye. Tonda, narye ‘Moubuka ikin unamak’ tenen, dipkoprob na kisok kwakdu-kwakdu nyapnirye, narye wenen yupu weika arye, anggun dam nyapdeipsitinye.”

Ayub 16:4 ပူးပေါင်းရင်းမြစ်များ

2 Raja-Raja 19:21

Nyabukopura, ayupu ton nyabuk. “Tonda, Allah el si Yahweh arye, ‘Asyur mutuku deiyoknye Sanherib birye, malye kibuka kum obisipnamkile. Na Yahweh arye, yupu akunum sekmane.’ Allah arye, nyapkile. Ara, el Sanherib biti ayupu ton nyapmanue,” Yesaya birye nyabuk. Allah arye, nyabuk. Yerusalem mutuku noutam unyak ninye arye, an Sanherib biti, akutubuka malye nyakinyake. Anti ara, ‘Anye nun like,’ tenenyake. Aning atonun, aminyan talak ilil upkiliba, ance bikbik abuka bindopnalam talak ara, Yerusalem mutuku noutam unyak kilapu nirya ara, anti, ‘Elda talinye, dauplye,’ tenepnamkiyake.

Ayub 16:5

“Bukni, anggunda na ikin unye touk ulamtum toura, na yupu nyan deice arye, anggun kanye pum nirya ara, teleb kibuka mikip kipdeipsitibye. Tonda, bico tenepsitinirye, na yupu nyan deice arye, anggunti, talima kwadipsitinya deice arye, pin-pin kipdeipsitinyeba, anggun kanye imun ning ara, kum datue.

Ayub 35:16

Winilyama ati ara, an Ayub biti nyapkine. Anda tuba-tuba talye yupu nyalyame. Dipkoprob ning ara, Ayub ance yupu weik tonun nyalyam ning nirya ara, moubuka kum tenepmincuk, talye yupu nyalyame. Ayupu nirya ara, Elihu birye Ayub biti, nyabuk.

Ayub 6:14

Anggun ton moubuka teniplulume! Yata nang do nirya, sik kayapu ikin weik unyak talak ara, adiparyuk binuka melilamak bukni, anggunda, ‘Anye bira, nunce meliptibye bukni, dabataknyabe. Anye pia kum melinamabe,’ tenepmalume. Aning atonun tenenyak nang ara, pia malye weik unyake. Anggunce awiniluluma deice arye, Allah ara, pia deice tam erebuka, aning-aning nirya talibuka, mikip pia weik ululnye biti, anggunce ilil kum usulule. Anggunda, el yupu ara, yaninauk ululume.

Mazmur 109:25

Bol malye kipmanilce, ikin kanye bobuka unmana ati, nati minin yupu nyaninyak nang arye, yep-yep nyanikirye, akutubuka, malye yupu nyaninyake. Sikda na dam yakirye, na nong eibikceura, ‘Se, elda pia bol malye akunum kipmal,’ tenebikirye, sik ngang, kwakdu-kwakdu nyabikirye, kanupdongobuka, ayupu nyaninyake.

Mazmur 22:7

Tonda, ninye nirya arye, na wininye ning ati, elininyakce, akutubuka nalininyake. Atonun, sikce si bam bol pum tam mur-murulakirye, ‘Elda talinye’ tenen, kisok kwakdu-kwakdu aninyake. Tonda, nati malye yupu weik nyaninyake.

Mazmur 22:8

Yuk ninye arye nyaninyake. “Nunce elti, mangkau kibuka batakipyeba, yata wiribuka unamle do? Anye birye, ‘Allah Yahweh elcuk lyepnamnile’ tenen, diba tenelula anya arye, Allah el siuk erelule. Winilula ati ara, Allah Yahweh arye, elti, kanye deibuka lyepnamle do, kum do? Elda Allah ati diba tenelulnye ati ara, nunda dinauk unamabe,” nyabuka nalininyake.

Mazmur 44:14

Sikce winipsika ati, nun dana-dana tam unyak nang nirya eipsikirye, nalibuka akutubuka, malye yupu weik nyasinyake. Diba, nun dana-dana tam unyak nang arye, ‘Israel yala nang ara, dauplye,’ nyabuka, nunti, akutubuka nalisinyake.

Amsal 10:19

Anggun nirya kanye mouplulume. Yupu weika arye nyapra bamunya deice arye, dipkoprob malye un ning ton, upra banamlume. Ara, ‘Talye yupu weik nyapra bamunya deice arye, malye winipmunyak’ tenen, nyapsine. Bukni yatanye do, ‘Na mangkau arye malye yupu nyapnyak’ tenen, el sitang moubuka kalikdalirye, nimalya arye nyalulnye bira, dipkoprob pia weik kelnye ulule.

Penghotbah 10:14

Winibuka unyak bukni, sik moubuka tenina kumce, walwal uk unyak nang ara, talye yupu pia weik tonun tuba-tuba nyanyaka ati, pia kum tunim nyanyake. Tonda, dipkoprob nyapsine. Aminyan doyanamle talak winipnamsil ning ara, yatanye birye laka nyapsutu do? Kume, ninye tukwak nang ara, aminyan doupnamle talak winipnamsil ning nirya ara, pia kel bikmanto kum unyaba ati, tonoknye babye, dipkoprob kum laka nyapsutue. Aning nirya ara, duknulamaka atonun ulula ati, nunce yuk nang ati, doupnamle talak winipnamsil ning ati, dipkoprob pia kum laka nyaptibye.

Yesaya 37:22

Na Allah Yahweh arye, anye Raja Sanherib biti nyapne yupu ara, ani. Yerusalem mutuku weik asik noutam unyak nang ara, winipmanto mi delina kum kilapu atonun unyake. Se, an Raja Saheribo, anti, ‘Elda bicoe. Talinye ulula anya arye daupmalye,’ nyabuka, nalipkikirye, akutukinyake.

Yeremia 18:16

Wininyaka deice arye, amutuku noutamak unyak ninye arye, sik mutuku ak, malye kipdeipmake. Sik mutuku akunum malye kipdeibicopura, yuk mutuku ninye nirya eibikirye, ‘Se, sik aninye ap, sik unyak mutuku ap ara, pia malyeuk ulule,’ nyabuka nalenamake. Tonda, amutuku banamak ninye nirya arye, amutuku malye kipdeipniba, oldemuk danamle ning, eibikirye, ilil upliba, kisok borom-borom anamake.

Yeremia 48:27

Aninguk kum bukni, minop talak ara, anggun Moab mutuku nang arye, Israel mutuku ulamik nang ati, akutulamlume. Tonda, sik Israel nang arye, ubula kum dolamikce, ubula don nang ap, neika kum ulamik bukni, sik Moab mutuku nang arye, Israel nang ati, akutulamlumce, malye yupu nyana ap, yep-yep ana yupu ap, minin yupu ap, nyalamlume.

Ratapan 2:15

Yuk nang arye, Yerusalem mutuku asik dobuka ulamlum nang ati, sik amutuku bisik baceura, anggunce malye nyabuka, taruk bokuka, akutusinyake. Ara, “Allah arye, sik wenena ati, ikin ning, sik nong deice deibuka ati, ikin kanye bobuka unyake,” nyabuka, akutubuka malye nyasinyake. Sik abisik banyak nang arye, aning eipsikirye, sik kisok kwakdu-kwakdu nyabikirye, malye yupu nyasinyake. Ara, “Aton dipdelulume! Yerusalem mutuku asik ara, min talak pia urasin teleb mutuku ulamukba, ninye mutuku-mutuku nirya arye, ‘Se, amutuku ara, pia teleb ati, kanye deibabe,’ nyabuka ngaluklamik. Bukni, wini talak eibab mutuku ara, dipkoprob amutuku do?’ nyabuka, nyek-nyek nyabuka nalikirye, akutusinyake.

Zefanya 2:15

Minop talak, Niniwe mutuku noutam ara, ninye weik bulubikce, weik asik dobuka ulamikce, maknya kintinipdanuka ulamik. Sikce nyalalamik, “Kume, nunda, pia teleb aryuk unyabe. Nunda, pia dakeiam asa unyabe. Yuk mutuku nang nirya ara, kum olyanganamsiaka ati, nunda amutuku nun yuk unyabe. Nunda pia weik asik dobupa atonun, yuk mutuku nang nirya ara, nun teleb weik asik atonun ton, kum doptinge,” nyabuka nyalalamik. Winibuka nyalalamik bukni, amutuku pia teleb asik weik awamuk ning ara, wini talak ara, dan sukum ton ulul do? Niniwe mutuku weik asik domika ara, wini talak akunum kum dayuke. Talya bai tam kam ulamle ning, yala-yala nirya, ilil tenena kumce, talye mangkau arye, amutuku bulubuka wekelbikirye, dikdik senyake. Yata nang do nirya, amutuku bisik banamak nang ara, asik oldem ubuka ati, amutuku eibikirye, ‘Se, amutuku ulamik nang, yata deiyok ati, Allah arye, obuka sirya dakuk do?’ tenen, ilil upnamle. Allah arye, ayupu nirya nyabuk.

Matius 7:12

Allah arye, “Wininamlulume, aning ara kum wininamlulume,” nyapdeibukba, Musa arye mem yupu sekeipsuk yupu ap, Allah yupu laka nyalamik nabi nang arye seklamik yupu ap, weike seklamik bukni, yupu deiyok pia weik mambul ning ara, ani. Anggun winimunye ning winamlum talak nirya ara, ‘Se, yuk nang arye nati, teleb ubuka winibuka winipnitinge,’ tenemunye touk, anggun babye, yuk nang ati, aning atonun teleb ubuka wininamlulume. Yesus arye nyabuk.

Roma 12:15

Sik kanye deibuka pin-pin asa arye unyak ninye ati ara, anggun ap neika kanye deibukap unamlulume. Sik imun kanye dobuka engenyak ninye ati ara, anggun ap neika engebuka unamlume.

1 Korintus 12:26

Winibuka kwepdeipsuka anya arye, nun nong noutamak kwepdeipsuk ning tonok ning ton, uk disilyebuk do, opsilyebuk do, winipsilyopura, nun nong nirya, uk disilyeba unyabe. Aning atonun, nun nong noutamak bukni, yuk tam ning ati, “Se, aning ara, urasin pia telebe,” nyapsikcopura, nun nong nirya ati, kanye deibuka unyabe.