Ayub 15:25 - Eipomek

^25-26 Ura, aning nirya ara, talye ati kume. Deiyok ara ani. Sik malye ninguk talibuka unyak nang ara, Allah arye, ‘Aning wininamlume, aning ara pia kum wininamlume,’ nyapdeipsuk yupu, yaninauk ukirye, ‘Allah ara nun lik,’ tenenyake ati, Allah arye anang ati, weik wenepnamle. Anang ara, sik ilil tenena kum, malyeukirye, Allah Yahweh ara, aning-aning talibuka, Pia Mikip Weik Deiyoknye ulula ati, ‘Malye kibikirye, el batakuka, nun yuk unamabe’ tenen, Allah yaninauk unyake. Winipmanto ara, yin talinnye birye, el nong lelin ning, el si ara perisai, pia kat ning bopnirye, na mal olan nang, mikip weik uptinga babye, narye anang adiparyuk optinye,’ tenelul touk, pia walwal wininyake.

Ayub 15:25 ပူးပေါင်းရင်းမြစ်များ

Ayub 15:13

Winibuka teneminyopura, an kanye talima noutam arye Allah ati yu upkilye uplyeba, uaplirye, elti, ance malye yupu nyalyam do? An si bam bol arye, pia malye yupu nyabuka, Allah ati, malye kibuka, elce nyalul yupu nirya ara, yaniltaknauk ulyame. Aning nirya ara, yata ati do?

Ayub 15:24

Ati ara, winipmanto ara, ninye deiyoknye, el ap, el yin talin nang ap, mikip weik ukirye, yuk mutuku nang ati, ‘Anang ara, obuka sirya daknamap’ tenen, kintinibikirye, yuk mutuku nang dam yanura, amutuku nang arye, pia kanye imun kanye bobuka, lukdanuka ilil weik unyak touk, sik malye-malye unyak nang babye, atonun teninyake. Ara, ‘Se, dipkoprob aminyan talak ara, kanye imun nun dam yanamsile!’ tenen, ilil weik unyake.

Ayub 36:9

Winipnamak talak ara, Allah arye, sik anang ati, nyabuka laka nyalule. “Anggunce, malyeuk wininamlum ning deice arye, anggun wenena ati anyaik dongopsik bukni, dipkoprob ara, anggunce malye winilulum ning ara, ani-ani,” nyalule. Tonda, “Anggunce, na yupu yanilamlum ning ara, ani-ani,” nyabuka, laka nyanamle. Tonda, “Anggunda, mandipna kanye bopmunce, maknya kintinibuka kwalina deice arye, malye winiluluma ati, anggun dengna ati, anyaik akunum dongopsike. Ati aning moubuka tenipnamlume!” nyabuka wenenamle.

Ayub 9:4

Allah el kanye talima noutam nirya ara, pia kel weiknye ulule. Tonda, elda pia mikip weiknye ulula ati, ninye arye Allah ati, malye kanye kibikirye, ‘Elce nyalul ning dauplyeʼ tenen, Allah ati, malye kum kiptinge. Ninye arye, Allah ati malye kiptibyeʼ tenen, piriptinga babye, pia kum winiptinge. Ara anye kum winipmanto atia.

Mazmur 52:7

Bukni, nun ni Allah arye, anti, malye kipdeipkilirye, wenebuka opkilyeura, tamubuka kam bukmince, teleb kum unamlame. Tonda, yuk nang arye anti, ‘Elda telebnye ulamuk,’ kum nyanamkiake. Allah arye anti, mikip arye talipkilirye, an unamlamak arye bobinuka, bai tam deiplopnamkile! Diba, tukwak mutuku noutam bukni, kam tuba unyak nang kan-kan arye, tomobuka bobikilirye, deiplopnamkile. Ara Allah arye, an akunum opkilyeura, sik akunum diamik nang unyak sukumuk, an babye bobinuka, deiplopnamkile.

Mazmur 73:11

Sik akwalinyak ninye arye nyanyak yupu ara, ani. “Allah el im deice erebuka ulirye, aning nirya talibuka winilulnye bira, nun unyap ning nirya eibuka, bita kel kum kisulule. Im deiceuk ulula ati ara, “Yata wiribuka arye, nun wininyap ning eibuka, kel biksutu do?” nyabuka, malye yupu uk nyanyake.

Mazmur 73:9

Sik anang arye, yupu nyanyaka ara, “Im deice ulul ning ap, Allah ap ara, talye ninguk ulule. Aning nirya ara, mambul kum bukni, nunda weik mambul unyabe. Tonda, tukwak mutuku ulul ning nirya ara, nun bidamang ning uka,” nyabikirye, yuk ninye nirya ati, “Sikda malye ninye uk unyake,” nyabuka, malye yupu nyalbanyake.

Keluaran 9:17

Ura, anda pia dobuka, talima erena uk upkiliba, ‘Aninye batakniba, kum binuyake,’ tuba tenemince, malye ulyame.

Yesaya 27:4

Narye awa noutam mutmuta do, takce-takce ning do, ton panaptopura, narye, aning yakuka kum kipdeipnamne. Ara, ninye olbana atonun ubuka, aning ara narye aning seklopnirye, wibuka uku dongopniba, dibuka kum danamle.

Yesaya 45:9

Yata ninye do nirya, anggunce Allah ati malye yupu nyanyak nang ara, Allah arye oplopnamle. Ara, Allah el kwelina deiyoknye biti, ton nang arye, “Allah nun like. Anda yata ati aning wininamsilam do?” nyabuka batakanyak nang ara, Allah arye wenebuka opnamle. Allah arye nyabuk. “Sik utenenyak nang ara, winipmanto yupu nyapnune. Ara, kiri tuku arye, memebuka deipmace makau sakuka coplirye, amakau memena deiyoknye biti, ‘Anda yata ati winipnulum do?’ kum nyalul touk, tukwak ninye arye, anggun kwepdeiamsuknye, na Allah ati, wenena yupu kum nyapnitinge. Aning atonun, ninye taruk deice arye kiri tuku tilibuka mek makau kintinilinyak ning arye, ‘Anda, taruk talina kum kintinipmanilama ati, walwal arye winipmalam do?’ kum nyalamle touk, tukwak ninye arye, na Allah ati kum wenepnetenge.” Allah arye nyabuk.

Yeremia 36:29

Tonda, na Allah Yahweh arye, Yehuda tam talilul ninye deiyoknye, Raja Yoyakim biti, nyapnamkin yupu babye seknulyame. Ayupu ara, ani. Na Allah Yahweh arye nyapkine. Narye, Yeremia dam mambul yupu nyamsiba, elce Baruk dam nyapdeibukura, sekamuk yupu ara, ance mandipna kanye bobuka, akunum uku daplume. Ara, ‘Abuku dobuka, uku dapnyopura, Allah arye derepnamnil do, kum do?’ tenena kum arye, talye lukparabuka, uku daplume. Tonda ance, ‘Yata deiyok ning ati, Allah arye abuku noutamak ara, Babel mutuku deiyok kibuka taleamuknye biti, mikip arepneba, Yehuda mutuku unyak ninye nirya ap, sik weinyak ning ayala-yala nirya ap, obuka, sirya daknamake,’ nyapsuk do? ‘Aning ara, na like,’ nyaplumce, abuku dobuka, uku daplume.

Yeremia 48:26

Allah Yahweh arye nyabuk, “Tonda, sik Moab mutuku nang nirya ara, yu mek dibikiba, kanye wangalamak touk, upnamake. Aning deiyok ara, anggunce na Yahweh dam ati, maknya kintinibuka kwalilamikce, malye kililalamike. Ati, sik Moab nang ara, wenebuka amu tam deipniba, sik dukna dukmacakuk bongop-bongop binamake. Wininmakiba, yuk nang arye eibikcopura, Moab nang ati, akutunamake.

Yeremia 50:24

Se, anggun Babel mutuku ulamlum nango. Anggunda bicoe! Na Allah arye, “Ura, anggun Babel mutuku nang ara, na yupu akunum yanininyaka ati, wininyaka deice arye, anggun dengna ning, wenebuka arepnamsine,’ tenyamse. Winipmanto ara, ninye arye sik babye, wena wepmakca pum bisik, mana wekelbikceba youlamle touk, sik mangkau kanye arye, dabinuka wena wepmakca wekuka olalamak touk, narye anggunti, tapu weamsise ning ara, akunum wekuka youpdongopdalume. Aning ara, anggunce pia moubuka kum tenyamlum bukni, narye anggunti, wenen ning akunum kintinip deipsise ning ara, anggun nong deice akunum yanmale!

Daniel 5:20

“Bukni, el kanye talima erebuka, keil kisok deibuka, erepdayukce, kwalibuka deice arye, weik nang bulamak kursi deice arye, tuku tam kibuk. Winibuk talak ara, elti, si erelamik ning ap, el taleamuk ning ap, anirya ara, Allah arye doprobukba, pia kum dayuk.

Daniel 5:23

Anda, Allah im deice ululnye dinmakukak arye, malya kibuka kanye erepdalumce, Allah ati, ‘Na like’ tenen, yaniltalamlume. Winilamlumce, Allah el si eren aik pum tam, deiamikbuk, boyanamik ning, emas arye memebuka deiamik mek makau ara, ance nyaplumba, an mutuku talibuka unyak deiyok ninye ap, an kilapu ap, an tam kili sal ap, sik nirya ara, amakau arye anggur mek kwebuka dinmalume. Winipmalumce, anggun si erelulum minop kwemdina ning, emas ap, perak ap, tembaga ap, yuk kat ning yo ap, keil ap kintinibuka deiamik ning, Isa Mutuku Dongonye urasin atonun ning ara, sik si nyabuka erepmalumce, mot nyanmalum talak ara, ‘Allah dinmasile,’ tenepmalume. Anggunce, Isa Mutuku Dongonye si erelulum minop kwemdina ning ara, asing arye, ton kum elinyake. Tonda, amul arye kum kekebuka, kel bikinyake. Allah aniryuk, dibin ning babye, kam un ning babye, elcuk, ‘Wininamak’ tenen, kintinibuka deibuknye ulul bukni, atalak ara, ance Allah ati, telebe nyabuka, si kum erepmalume. Tonda, Allah aryuk an kam unamlam ning nirya ara, kintinibuka delikulule. Awinikilye ning nirya ara, ance moubuka kum kel kilaluma ati nyapkine.

Imamat 26:23

Narye, aning nirya akunum wenebuka asipdesinye buk, anggunce tuba kum kekepnulumce, mandipna kanye tuba bopmunce, nati tuba malyeuk winimunyopura, tonda nati, ‘Elda nun like,’ tenepnumunce, na yupu tuba yanipnumunyopura, narye anggunti wenenamsine.

Maleaki 3:13

Allah Yahweh arye nyabuk. “Teleb kipdeipnamsine,” nyapsin bukni, dipkoprob anggunce nati, malye yupu weik nyanululume. Bukni, anggunce nyalulum diparyuk, tamubuka nyanululume. “Kume, nunce Allah an dam ara, yata malye yupu nyakinyap do?” nyabuka asilenululume.

Rasul 12:1

Atalak ara, amutuku weiknye deiyoknye, el si ara, Herodes, elce deiyok kibuk akarye, Yesus dib tenebik nang tonok-tonok ati, ikin ning sik nong deice deililamuk.

Rasul 12:23

Anang arye nyanmekbuk, Herodes arye, ‘Kume, na teleb unmana ara, na mikip deice aryuk unune,’ tenebukce, Allah si kum erebuka ati, adiparyuk im deice Allah melinanye birye malaikat arye Herodes ati, uk ning aribukura, kuluma weika arye el deiplyu potokukura, minopce dibuk.

Rasul 9:5

Kekebukce Saulus arye nyabuk. “Naio, an yatanye birye nyapnilam do?” nyabuka asipdeyuk. Asipdeyukura, Yesus im deice arye, ninye yupu atonun arye ayupu ton nyabuk. “Ance ikin ning nati deliniminya ara, Yesus natia,” nyabuk.

1 Samuel 6:6

Tonda, tenipdelulume. Anggunce anyapmasin ning ton, kum winipmunce, mandipna kanye bopmunyopura, min talak Mesir mutuku taleamuknye, Firaun ap, el taleamuk ninye nirya ara, sikce Allah yupu kekena kumce, mandipna kanye bobikura, sik dam yata wiryamuk do? Allah arye, kanye imun ning, sik nong deice deiamuk touk, anggun Pilistin mutuku ululum ninye babye, atonun winipnamsil do? Aning ara, luba kipmunyake. Allah arye, sik Mesir mutuku ninye ap, sik deiyoknye Firaun ap ati, weik tonun wenebukba, ninye weik dibik. Ton ning ara, ikin ning weik, sik nong deice deibukba, sikda imun kanye weik bobuka ulamikce, ikin kanye weik bolamik. Winilamika ani, aminyan talak ara, Mesir mutuku, sik deiyok nang arye, Israel ninye nirya batakikba, adiparyuk bindobik. Aning nirya ara, anggun Pilistin ninye ton, kum biklum do?