Ayub 14:12 - Eipomek

¹² Nun ninye dibinyaba ara, atonun unyabe. Ara, dibipyopura, tuba tamubuka kam kum buktibye. Im tuba upnamle talak ara, akunum dipmakce nang ati, yuk nang arye tamubuka tonap kum elinamake. Im noutamak ulul ning nirya, kum uplyopura, diamikce ninye tamubuka kam buknamak bukni, aning min kum winipmalye talak ara, pia mabuka tunimanauk unamake.

Ayub 14:12 ပူးပေါင်းရင်းမြစ်များ

Ayub 3:13

“Adiparyuk, na nin deipnuk sum arye, diamtinye toura, tunim abuka damamtinye aka. Awinyamtinye toura, imun kanye na deice kum upnutue.

Ayub 30:23

Na kele. Ance na bobinuka dibin nang unyakak bobinamnilama atia. Kam unyak nang nirya dibikceba, ance bobinuka deililbalyamak uk, na babye bobinamnilame.

Ayub 7:21

Yata deiyok ati, ance na malye unun ning nirya ara, adiparyuk lyebuka kum lyepnutum do? Na malye wininun ning ara, ance kum kipdeipnutuma ati do? Na ikin weik unmana ati, minopce akunum dipniba, tuku palipnikcopura, ance nati enmaniminya babye, ance pia kum eipnamnilame. Ayupu nirya ara, Ayub birye nyabuk.

Ayub 7:9

Winipmanto ara, dua bum weik tonun tobuka banmalya ani, adiparyuk kum danalamle touk, ninye babye minopce dibinyabe. Aning atonun, akunum diplinye bira, tuku palibuka dongobikceba, akunum diamik nang unyaka, amutuku si ara, Sheol mutuku, amutuku dam arye akunum bilyopura, tamubuka kam un nang dam kum yatue.

Mazmur 102:26

Aning-aning kum uamuk talak ara, an akunum kam ulyama ati, ancuk, tukwak mutuku nirya kwelina ati, weik mikip arye, kwepdeiplumura, pia mikip weik ulula ati, wini talak babye, tuba aulule. Aning atonun, im noutam ap, im deice ap, amutuku noutam ulye ning nirya ap ara, ancuk kwepdeiplume. An taruk mikip deice aryuk, aning-aning nirya akunum kwepdeiplume.

Mazmur 90:5

Ance ninye isin arepsulum ning, tamubuka dopropsiminye talak ara, winipmanto ara, lengdar mabikirye, kanye nep-nep alamak atonun unyabe. Tonda, maning kwapu bongobuka, tikaplya ani, sesal selolamleto, nun ninye babye, lik tonok kam unmapya ani, adiparyuk dibinyabe.

Penghotbah 11:8

Yata nang do, sik nirya arye, pia kanye deibuka ukirye, ‘Telebe,’ nyanamake. Tonda, sik anang kan-kan arye, sik kam un talak, lo ton ap tabakuka arelula deice arye, keting tamun weik tonun unyak nang babye, sik kanye pia delinyake. Bukni, sik babye moubuka teninamake. Ara, anggun amutuku noutam kam tuba unamlum talak ara, yambul anun ton tupa aupmal bukni, dibikcopura, aminyan talak pia kunuknak unamlum talak ara, yupa pia weik, nukmanto kum unamle. Tonda, tuba kam unamlum talak anggun dam yanganamle ning nirya ara, talye nong kum upnamle ninguk yanganamsile. Winipmanto ara, kumanya mikip arye donmalirye baliba, tonoknye birye, ‘Akumanya talipnamneʼ tenen, mikip arye bikbik abuka bitua babye, akumanya ara, kum talipmanto ning ati, aning ara, nong pia kum upnamle. Talyeuk winilule.

Penghotbah 12:5

Winipnalam talak ara, an weik mutuku dup welebana ati ikin upkilirye, ilil weik unamkile. Tonda an nong ara wiring-waring apdanin bamince, ‘Saknyak’ tenen, ilil weik unamkile. Tonda, an kul potong papkilye talak ara, yo kita oplirye, kurulamle touk upnamkile. Winipkilyopura, sul kwising dipnulye talak pol tengelamle touk unamkile. Pia wisi daminyopura, ‘Aminyan talak winipnamne, aning winipnamne,’ tenen ning ara, kum tenenalame. Aning atonun, ‘Kil ap neika maptinimnye,’ kum tenenalame. Aning nirya akunum upsilyeba, nun nirya ninye dibikirye wekelbanyak mutuku binamabe. Winibibiba sik kam tuba unamak nang arye, nunti tenekirye, weik bisikak nirya engepnin banamake.

Yesaya 26:19

Nun ni Allah, an mapu koprop bukni, akunum min arye diamik nang ara, aminyan ance kam bukeipminba, kam unamake. Sik deiamik nang ara, akunum tuku palibuka wiamik bukni, sik nong ara, tamubuka kam buknamake! Tamubuka kam bukmunyopura, weik tonun kanye deipmunce, weik yupu weik tonun mot nyapnamlume! Winipmanto ara, mok purye tuku deice saklirye, dua pito weleplirye, dirina arye teleb ulilamle touk upnamle. Aning deiyok ara, Allah ance an mapu akunum diamik ara, tuba tamubuka, kam bukeipnalame.

Yesaya 51:6

Ati, anggun Israel yala nang nirya babye, tikuka im deice tam ap, tukwak mutuku ap, dipdenamlulume. Dipkoprop nyapsine. Im deice tam ulul ning nirya ara, kum danamle. Ara winipmanto ara, ninye arye weik uku deibikiba, im noutam welepmalya ani, adiparyuk kum danalamle touk, im deice tam wamlye ning nirya babye, kum dandopnamle. Tonda, tukwak mutuku ara, ninye arye wilamak baju wisi danamlirye, kwilikilsakalamle touk upnamle. Winiplyopura, tukwak mutuku noutam, mutuku sirya, im sirya nirya unyak nang nirya ara, talye suma adiparyuk dibilamak touk ubuka, dipnamake. Bukni, na Allah arye anggunti, lobuka lyepdopnamsin nang ara, min kum, kum danamle. Narye anggunti, lobuka lyepdopnamsin nang ara, pia ati aunamle. Aning ara, min kum, kum danmanto anya arye, pia sirya dakuka min kum, kum danamle.

Yesaya 65:17

Allah Yahweh arye, nyabuk. “Dipkoprop narye, im noutam ulul ning nirya ap, tukwak mutuku ulul ning nirya ara, winiryuk ning punubuka kwepdeipnamne. Winipyopura, minop upnin yangalamik ning nirya ara, kum kipdeipniba, ninye arye, luba kinamake. Tuba tonap kum teninamake.

Yesaya 66:22

Dipkoprob nyapsine. Narye winiryuk im kwepdeipnamne ning ap, tonda, winiryuk tukwak mutuku kwepdeipnamne ning ap, aning kwepdeipniba, pia aupnamle touk, ‘Naʼ tenen, nang, sik Israel nang, sik ap, sik si ap, anggunce deipmunba dadeipdanin binamak nang ap, nirya ara, na dam pia aunamlume. Anggunda, min kum kum danamlume! Na Allah Yahweh arye, ayupu nyapmasina anya arye, aning ara dipkoprob winipnyopda, nong upnamlarya!

Daniel 12:2

Tonda, atalak noutam aryuk, ninye weik tonun akunum diamikce nang babye, tamubuka kam buknamake. Ara diamikba, tuku palyamik nang ara, tuku pum tam arye kam buknamake. Kam bukikirye, ton tam nang ara, pia bola koplobuka, kam una deiyok ning dopropbikirye, tuba tamubuka bukikirye, kam kipman pia telebuk unamake. Bukni, ton tam nang ara, kanye imun weik ning doprobikirye, alye dakdanamake. Sikda, kanye imun weik ning doprobikirye, uku bisik bikirye, malye nyabuka ngalukikirye, pia engenauk unamake.

Matius 24:35

Im deice tam ulye ning nirya ap, tukwak tam ulye ning nirya ap ara, kum danamle bukni, na nyasinye yupu nirya ara, tonok babye ton kum, kum danamle. Pia aupnamle. Na yupu nyasinye touk dipkoprop nong upnamle. Yesus arye nyabuk.

Rasul 3:21

Minop talak arye, Allah el aminyan winipnamuk ning laka nyalamik nang, el yupu uk kekebuka, el piluk dobuka, pia teleb-teleb kibuka dolamik nang ara, sik nabi nang arye nyalamik yupu deice Allah arye, ‘Aning-aning minop ning nirya ati, tuba punubukapnirye, winiryuk ninguk kintinipnirye arepnamsine,’ nyalilamuk. Anyalilamuk ning min kum winipmalye talak ara, Yesus im deiceuk pia ulamlya ani, anyalilamuk ning kintinibuka delin talak akunum uplyopura, Allah arye Yesus dopkwetepnamle.

Roma 8:20

Pia minop talak, deiyok kouamuk talak ara, aning-aning nirya ap, dipna ap, lyuna ap, malye winina ap, kum uamuk. Bukni, wini talak ara, tukwak mutuku ulul ning aning-aning nirya ara, dipna ap, lyuna ap, malye winina ap noutam akuk ulule. Tukwak mutuku ulul ning nirya ara, talyauk ulule. Nong kum upnamle ninguk ulule. Ulula deiyok ara, Allah arye tukwak ulul ning nirya wenena ati, malye yupu nyabuka wibukba, talyauk ulule.

Efesus 5:14

Yata ning do nirya, dirinarye aning deice deipliba, lak akuk ulule. Laka upliba, moubuka kel biktibirye, ‘Aning teleb ning, aning ara, malye ning’ tenen, bikinyabe. Aning ati ara, ayupu ton nyanyabe. “Amio, an diplumnye bira kam buklyame. Kristus el dirinarye, teleb kipdeipnamkile.”

2 Peterus 3:7

Allah arye ayupu nyapdeibukura, aning ubuk touk, Allah el yupu nyabuka deice arye, wini talak ulul im ap, tukwak ap, tonda im ap, tukwak ap noutamak ulul ning nirya ara, tenebuka tenepce deibuka kalikilule. Aning-aning nirya ara, tenebuka tenepce deibuka kalikilamlya ani, apia daulamlye bukni, Allah teneplye talak arye, elti, yaniptabuka, pia malye winin nang ati, yupu bokeiplirye, wenebuka oploplyopura, kum ubuka daneipnamle. Atalak aryuk, wini talak tukwak mutuku ap, im noutam ulul ning nirya ap ara, Allah teneplye talak arye, el yupu nyaplibuk uku arye dipnamle. Allah arye, ‘Na tenepse talakuk, aning nirya kum ubuka deipnamne,’ tenelula anya arye, aning ara wini talak ati, talye tenebuka tenepce deibuka kalikilule.

Wahyu 20:11

Aning nirya eipsopura, aning ton eipse. Ara, weik ninye deiyoknye kurun ning deice bunlulak eipse. Ara, pia weik kurun bun ning ap, aning deice bukmoknye ap eipse. Anye laka ubukba, im ap, im noutamak ulul ning nirya ap, tukwak ap, tukwak mutuku noutamak ulul ning nirya ap, aweik deiyoknye dam kum yanmanto ati ara, aning nirya kum dayukba eipse.

Wahyu 21:1

Anirya eipsopura, aminyan eipse ning ton laka nyapnune. Ara, minop talak tukwak mutuku uamuk ning nirya ap, im deice ap akunum kum dayuk ati, dinmasiba, Allah arye tukwak mutuku tam winiryuk kwepdeibuk ning ap, im deice winiryuk kwepdeibuk ning ap, eipse. Tonda, minop arye deiamuk laut mekwen nirya kum dayukura, winiryuk ning ton kum kwepdeibuk.