Ayub 14:1 - Eipomek

¹ Ayub birye Allah ati, nyabuka morobuk yupu ara, ani. Nun nin yapu arye, deipsice talak arye diprongobuka dotalak babye, mikip kum usulule. Tonda, ouku mitik tonun dem unamap talak ara, kanye ikin weik ning unmasilye diparyuk, minopce dibinyabe. Keting tamun pia weik arye kum unyabe. Tonda, kam unyap talak noutamak nirya ara, ikin ninguk yangasulule.

Ayub 14:1 ပူးပေါင်းရင်းမြစ်များ

Kejadian 3:17

Nyabukopura, Adam ati ayupu nyabuka wenebuk. “Ayo tonok ati, ‘Ayo duk dakuka dina meme,’ nyapkise bukni, an kil arye, nyapmaku yupu kekepmomce, ayo duk akunum dipmaruma ati ara, ayupu nyabuka wenepkene. Ance malye winipluma ati ara, narye nyapdeipniba, tukwak mutuku im sirya, mutuku sirya nirya supkina ati, ikin weik unamle. Kanye imun kanye bobuka, ikin pil weik donalama deice aryuk, tuku noutam arye panamle ninguk dinamlulume.

Kejadian 47:9

Asipdeyukura, Yakub birye, “Nara tukwak mutuku noutam balamse talak ara, keting tamun yupa weik 130 tahun akunum ulamsirye, wisi deipse. Na ulamse talak ara ikin uk ulamnuk bukni, na apu yapu ara keting tamun yupa pia weik ulamik. Nara mitik tonun uka,” nyabuk.

2 Raja-Raja 4:19

Ami el li koproba unmokak biyukce, talye karin arye, “Se na nie, na kisok ara, uk weik, dinmanile,” nyabuka, binuka engebukce, el li biti nyabuk. Winibukura, el li koproba kekebukce, el melinanye biti nyabuk. “Na mi bobuka, el lin dam bobilyame,” nyabuk.

Ayub 10:20

Ati se, na kam unamna ara, lo mitik tonun, ton ap unamne. Unmanya ani, keting tamun weik tonun kam kum unamne bukni, minopce dipnamnarya. Ati lo mitik tonun aunaman talak ara, ‘Ance na yuk bataknutumopura, winiryuk kanye bobuka, teleb aryuk uptinyeʼ tenen ati, moropkine.

Ayub 15:14

Anda moubuka tenipnalyame. Ance, ‘Nara, malye pia kum upse. Diksukum unanye unune,’ tenepdalum bukni, aning ara winipmanto. Kume, nun tukwak unyap nang tonoknye babye, malye kum wininyak do? Tonda Allah el dam yanuka, el si erena ati ara, talye nang arye deiamsik nang unyap nang arye, el dam talye lukdanuka yatibye do? Atonun, tukwak mutuku kilapu arye deilinsik nang unyaba ati, Allah arye, “Aning wininamlume, aning ara, pia kum wininamlume,” nyapdeiamsuk yupu ara, malye winina pia kum arye, diksukumuk wininyap do? Kume, nunce kum winiptibye. Ati, nun nirya arye, “Nunda teleb nang unyabe,” nyapmanto kume.

Ayub 25:4

Allah ara, pia mambul weiknye ulula ati, nun talye tukwak mutuku ninye adeksuka nirya ara, Allah el dam tikibirye, “Anggunda pia dipkoprob, pia teleb nanguk ululume. Narye nyasunun yupu nirya, moubuka talipmunce, dobolbanauk ululume,” nyapsutu do? Tukwak kilapu arye delinyak mapu unyaba ati, yatanye malye winina kumce, teleb leknye upturye, Allah el dam talye parapkapturye binuka uptu do? Kume, nun nirya ara, malye winina kum, pia diksukum ubuka, teleb ninguk kum unyabe. Nunda malye winin ninguk wininyabe.

Ayub 25:5

Allah el kanye ara, ‘Narye kwepdeiamse wala, el dirina ara, mitik tonunuk ulule. Tonda, narye kwepdeiamse kurya babye, sik dirina ara, mitik kunukunauk ulule,’ tenelule. Adirina nirya ati, Allah arye, ‘Sik dirina ara, pia teleb kume. Tonda aning nirya ara, pia teleb, lek ning kum ulule,’ tenelula ati, el dam ara, aning nirya kum yanuka uptue. Ati ara, nun talye tukwak unyap ninye ara, malye ning winina kum, pia teleb lek nang kum unyaba ati, el dam binuka kum uptibye. Kume, na kanye ara, tukwak mutuku kilapu arye delinyak ninye nirya ara, malye winina kum, pia teleb lek nang ton kum unyake. Sikda talye ku ap, tonda kuluma ap unmake,’ tenesulule, tenepne. Allah elce tenesilya ara, dipkoprob un ning ton pia kum unyabe. Bildad elce ayupu nyabuk.

Ayub 5:7

Winipmanto ara, weik uku dinmalirye, uku mikip deice arye sing-singa welelamle tonun, ikin ning nirya ara, yukak arye ton kum panabuka yangalule. Kanye imun ning ara, ninye tukwak nang dam ara, kum batakasulule. Nun nin yapu deipsice talak arye, deiya koubuka, kam unyap talak noutamak nirya ara, ikin ning nun damak yangasiliba dolonyabe. Nun babye ninye adiparyuk malye winibibyeba, kanye imun ning ara, nun nong deice uk yangasulule.

Ayub 7:1

Ayub birye nyabuk yupu ara, ani. Sik ninye arye, sik kanye aryuk, ‘Aning ara winiptibyeʼ tenen, pia pi dobuka wininyap ning ara, winipmanto kum upmasilibuk wininyabe. Nun tukwak mutuku noutam, kam una ara, ikin weike. Winipmanto ara, ikin pil dolamak nang arye, ikin piluk dokiba, imun kanye bobuka ulamak touk, nun tukwak nang nirya babye, ikin pil dobikiba, ‘Yo bok dolon sum ara, minop winiptue,’ tenelamak touk unyabe.

Ayub 7:6

Na kam unye talak ara, ‘Baju win nang arye, baju win ning deibuka, minop wilongolamaka atonun, minop adiparyuk dipnamnarya,’ tenenune. ‘Wininamne, wininamne,’ tenena ap, ‘Se, winiptinyopura, telebuk uptinye,’ tenena ap, pia kumce, ‘Talye unun ning ara, adiparyuk, sirya daktue,’ teninauk unirye, malye kanye bobuka, engenauk unune.

Ayub 8:9

Deiyok ara ani. Ara, nun atalak kam unyap nang nirya ara, nun ni yapu arye, winiryuk talak deipsikba, unamabe. Tonda, nunda tukwak mutuku unamap talak ara, kanya like tonok talak arye yanaplya ani, adiparyuk tuba tunim nyalamla atonun unyabe. Ara, nun kam una ara, lo pia weik tonun kum unamabe. Ati ara, aning-aning weik tonun, moubuka kel kum bikinyabe.

Ayub 9:25

Na Ayub, na kam tuba unamne talak ara, sik winina kumce, pia minop winipnin balamlya ani, akunum sirya dakalongonauk ulule. Winipmanto ara, minopce bikbik abuka balamnanye atonun ulule. Aning atonun, na kam unun talak nirya ara, teleb ning ton na dam ton kum yanganulule. Na kam unye talak lo ara, akunum minopce sirya daknin balule.

Mazmur 39:5

Ara, ‘Se, na ni Allah Yahweh, yata talak ton kam unamne do? Na kam unamna talakk ara, ouku weik tonun ton, lo unamne do, mitik tonunuk do? Bukni, nun tukwak nang ara, keting tamun mitik tonun dem kam unyaba ati, ance aning lake nyapniminba, moubuka biknirye, telebuk wininamne.

Mazmur 39:6

Na kele, ance nati, ‘Anye bira, keting tamun mitik tonun dem kam unamle,’ akunum tenepnulume. Ati ara, na kam unamne keting tamun nuktinyopura, mitik tonunuk kipnamle. Tonda, ance teneplum ning ara, ‘Ninye tukwak unyak talak ara, pia mitik tonun kam unyake,’ tenesilyame. Winipmanto ara, ninye tukwak nang nirya, kam unyap keting tamun ara, tonok ulule. Ninye isin ara, mok puru yo bok deice palipmalya miklamle touk ulule. Pia mitik tonun dem ulule.

Mazmur 51:5

Na nyapmakin yupu ara, talye ati kum nyapne. Na malye winipse ning ara, narye akunum kel kipmana ati, laka arye, lak nyapkine. Tonda, na malye wininun ning ara, pia tuba tenenauk ununa anya arye, mambul kanye bonune.

Mazmur 89:47

Na ni Allah Yahweh, yata barye talak nirya arye, na dam arye leibuka yukak kipropnalam do? Ance nati, yata talak karin ton nirya, duknupnamnilam do? Tonda, yata talak karin ton nirya, an yu ara, uku buk dilamle touk kibuka, na deice deipniminba, dinamnil do?

Penghotbah 2:17

Aning nirya tenipdesa ati ara, utenepse. ‘Se, na kam ununa ara deiyok ton kum ati, tukwak mutuku ulye ning nirya ara na like. Talye tonok unune, yuk ton kume. Aunun ning nirya ara, doyanamle talak ara, kanye kum deipnamnil ati, tonda deiyok kum upnamla ati, pia talye atibuk unune. Winipmanto ara, kumanya dopnin balamle ning atie, ninye arye, ‘Aning doptaliptinyeʼ tenen, pirilamak atonun unune. Aning ara na like,’ tenepse.

Penghotbah 2:23

Tukwak nang nirya ara, yata yala pil don ning nirya ara, sikda, ‘Nong teleb kipnamsilarya tenebikirye sik kam tuba ulamikce talak arye, mikip arye pil donyaka deice arye, sik anang nong deice, uk dina ap, ikin un ning ap, kanye ikin kilina uk unyake. Tonda, sik anang lukunyan talak mapmacak babye, pia kum maluk unyake. ‘Na pil dopmana ara, teleb upnamle do? Talye pil doplopnamne do?’ tenen, tuba teninauk unyake. Na tenepmana ara, ‘Aning nirya ara, talye tonok ulule. Do upnamle talak ara, dipkoprob nong teleb kibuka kum upnamle,’ tenepne.

Yeremia 20:18

Se, yata deiyok ati, nara na nin birye deiamnuk do? Na deiamnukba, ‘Ikin ning weik dololirye, imun kanye bobuka, ikin ninguk unamle’ tenen, deiamnuk do? Tonda, na kam unun talak nirya ara, malye kanye bobuka unirye, kwang dakna deiceuk wininamne do?” nyabuka, Yeremia arye, malye kanye bobukce, engebuka nyabuk.

Matius 11:11

Yesus arye nyabukopura, ayupu ton dukdongobuka nyabuk. “Aning ati ara, na dipkoprop nyapsine. Minop danerye dipdongobuka wini talak nirya, kilapu nirya arye delilamik mapu nirya ara, mitik mambul ulamik bukni, diba tenenyak ninye mek dongolululnye Yohanesuk ara, weik mambulnye ulule. Yuk nang nirya ara, el atonun, mambul kum unyake. Bukni, ninye mek dongolamuknye Yohanes ati ara, Allah el kanye ara, ‘Elda, mitik mambule,’ tenelule. Ara, nara Ninye Lyena Deiyoknye tukwak mutuku min kum yase talak bukni, na yangana ati, Yohanes arye na lak nyalinanye ulula ati, elda weik mambulnye ulule. Anyapmasin bukni, wini talak arye dipdongobuka dounamle talak nirya ara, Allah arye ninye weik lyeplirye, sik talima talinamle talak wekenamak nang noutamak ara, yuk nang arye aninye nirya ati, ‘Weik mambule,’ pia kum tenenyake. ‘Anang ara, weik mambule,’ kum tenenyak bukni, na dipkoprop nyapsine. Allah el kanye ara, ‘Im deice welepnamak nang nirya ara, weik mambule unyake. Yohanes ara mitik mambul uka,’ tenelule. ‘Yohanes ara, teleb pil dolul bukni, elda mitik mambule,’ tenelule. Deiyok ara, tukwak pil donyak nang ara, mitik mambul bukni, im deice welebana ara, weik mambul ati nyapsine.” Yesus arye nyabuk.