Ayub 11:6 - Eipomek

⁶ Tonda, Allah ara, kel weiknye biti, ninye kum tenipmanto ning tenelule. Aning-aning nirya, nong noutam nirya ara, el akunum kel bikamuka ati, akunum kel bikilule. Ati an kanye moubuka unamlame. Allah el kel weik bikamuk ning ara, yala-yala nirya aupmala ati, nun tukwak nang arye, aning nirya moubuka kum kel biktibye. Ati ance aning moubuka tenipnulyame. Ance malye ulamlum ning nirya dengna ati, ikin weik dololamtum bukni, Allah arye an dengna ati, wenen ning mitik tonun arepliba, ikin yaliba dololyame.

Ayub 11:6 ပူးပေါင်းရင်းမြစ်များ

Esra 9:13

Ati na nio, nunce an yupu nyapdeiamsulum yupu akunum yanibuburye, malye weik ulamupuba, ance nun wenena ati, akunum ikin ning weik nun dam deiamsulume. Bukni, nun kele nun ni Allah, nun malye winilamupu ning ara, pia weik awamuk bukni, ance ikin ning nun deice deipsulum ning ara, mitik tonun areamsulume. Nun malye weik ulamupu touk, ance pia ikin weik ning kum deipsulume. Aning kum bukni, na ni ance nun akunum lyepropsulumba, nun Israel nang ara, mitik tonun ton tuba kam unyabe.

Ayub 11:5

Ancuk utenelyam bukni, Allah elcuk anti, aning atonun kum tenekulule. Nun kanye ara, ‘Se, Allah arye, an dam yanuka yupu nyapkutopura, telebe uka,’ tenenyabe. Nunda, ‘Aning ara, pia telebe,’ tenebabe.

Ayub 12:13

Bukni, kel weik bikna deiyok ning ap, nong noutam deiyok ning ap, mikip weik una ap ara, Allah el deice uk ulule. Tonda, Allah elcuk nun tukwak mutuku unyap nang ati, “Teleb winin ning ara, ani. Anggunce wininamlum ning, teleb ning ara ani, malye ning ara, ani,” nyabuka, kel weik bikamuknye bira, Allah el tonoka. Elcuk moubuka teniplirye, nyapsutue. Yuknye birye kume.

Ayub 15:11

Allah arye nun deice nyapliba melilyeba, kekebibirye, anti lak nyabibiyeba, an dam pin-pin kilisulul ning ara, anda yata deiyok ati, kum dololyam do? Allah el si deice arye arepsilyeba, talima lamapdongobuka ubirye, nunce yupu namin arye, anti lak nyakiyap yupu ara, yata ati kum dololyam do?

Ayub 15:5

Ayub an malye uminya deice arye, ance talye yupu nyalyame. Tonda, ‘Yuk nang ati, malye kilinamab’ tenen, nyanyak nang arye, tilila yupu nyalamak touk, an babye wini talak nyasilyame. Ati ara, ance atonun yupu nyaminye deice arye, malye ulyam ning ati, sikniltakalyame.

Ayub 15:8

Ayub anda, im deice Allah ap, malaikat nirya ap, wekmekak arye, ‘Aning-aning nirya ara, winipnamabe, winipnamabe,’ nyabuka, yupu talepmik talak ara, an ton kekebuka, yupu neika taleamlum do? Tonda, Ayub ance, ‘Tukwak mutuku aunyak nang kan-kan noutam arye, weik biknanye bira, na tonoka,’ tenelamlyam do?

Ayub 22:5

Dipkoprob ning ara, ani. Anda malye winin ning weik akunum winilyame. Ance malye-malye winiminye ning ap, malye pil dolyam ning ap, kum nukmanto ulula ati, aning ara, Allah arye anti, wenekulule. Na kanye ara, aning nirya ara, wini talak ikin weik ulyame.

Ayub 28:28

Allah arye, nun tukwak mutuku unyap nang nirya ati, nyasulule. “Dipkoprob, weik kel bikna deiyok ning ara, ani. Ara, anggun ni koproba Allah, el si Yahweh ati, ‘Se, elda pia mambule,’ tenepnulumce, nati ilil unamsile. Tonda, Allah arye, “Teleb winin ning ara, aniʼ tenen, kel bikin ning bukni, el nong noutam ara, ani. Ara, yata malye winin ning do nirya, anggunce aning bataklumce, anang dam arye kisik dakuka, yukak bimunyopura, kel weik nang unamlulume,” nyapdeipsuke. Ayupu nirya ara, Ayub birye, el kwit capu sik winilye nang ati nyabuk.

Ayub 33:12

Se, Ayub ance akanye tenebuka yupu nyalyam ning ara, walwal arye talye yupu nyalyame! Allah elda nun ninye atonunye kum ulule. Elda mikip weik ap, erebuka una apnye ulula ati, nun tukwak nang nirya ara, el amu tamuk unyabe.

Ayub 9:4

Allah el kanye talima noutam nirya ara, pia kel weiknye ulule. Tonda, elda pia mikip weiknye ulula ati, ninye arye Allah ati, malye kanye kibikirye, ‘Elce nyalul ning dauplyeʼ tenen, Allah ati, malye kum kiptinge. Ninye arye, Allah ati malye kiptibyeʼ tenen, piriptinga babye, pia kum winiptinge. Ara anye kum winipmanto atia.

Mazmur 103:10

Diba, nun malye wininyap ning ati ara, talye mangkau kibuka wenepsuturye, obuka kum kipdeipsutue. El nyasilye yupu yaniltanauk, wininyap ning nirya dekna ati, weik ikin ning, nun nong deice deipsutu bukni, aning babye kum winisulule. Bico tenebuka melisulule. Amalye un ning nirya, malye winilamap atonun, kum wenesulule.

Mazmur 25:14

Yata nang do nirya, Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu, moubuka talibikirye, aninguk dobolbanyak nang ara, Allah Yahweh arye anang ati, weik tonun bico teneplirye, kanye delinamle. Winiplyopura, Allah arye, ‘Wininamsine, wininamsine. Tonda, winibuka teleb kilinamsine,’ nyabuka, nyalin yupu deice arye, nyasilye ning nirya ara, anang ati laka nyapliba, bikinyake.

Ratapan 3:22

Nara, ton ap tenenun ning ara ani. Ara, Allah elce tuba nunti pia bico tenesulule. Tonda, Allah elce nunti, “Winipnamsine, anggunce na yupu talibuka upmunyeura, narye anggunti winibuka-winibuka teleb kipdeipnamsine,” nyabuka, nyalin yupu deice arye nyapdeipsuk ning nirya ara, kum bataknamle. Aning nirya dipkoprob nong upnamle. Allah arye, ‘Na tenen nang ati ara, tuba telebuk kipdeipnamsine,ʼ tenesulul ning ara, min kum winipmanto. Aning ara, pia ati aunamle.

Daniel 2:28

Bukni, Allah im deice ululnye birye, duknun ning nirya ara, elcuk talibuka ulirye, lak kilisulul ati, duknuna ning ap, aminyan talak winipnamle ning ap ati, elcuk lak lepkutue. Wini talak ara, weiknye Nebukadnesar, an kel biknamnilyame. Allah arye lengdar mana ning aripkuka deice arye, aminyan dowinipnamkil ning ati, akunum lak lepkuke. Ati ara, lengdar maplum ning ap, tonda, ‘Lengdar do, dipdip do?’ tenena deice, eiplum ning ap, nong ara, narye lak nyapnukine.” Daniel birye nyabuk.

Daniel 2:47

Arebikopura, ninye deiyoknye Raja arye, Daniel biti nyabuk. “Dipkoprop nyapne. Ance si erelyam Allah ara, elda aning-aning nirya deice tam ulirye, aning nirya talilule. Elda Allah tonok ulule. Elcuk ninye deiyok nang nirya talilulba, sikda el amu tam unyake. Allah el tonok duknun ning nirya, laka kilina deiyoknye ulule. Elda, anti laka kibuka nyapdeipmakuk touk, ance akunum laka nyapmanilame.” Nebukadnesar birye, Daniel biti nyabuk.

Matius 13:35

Domon yupu deice aryuk peterenmok ning ara, Allah yupu laka nyananye, nabinye nyalamuk touk upnamuka ati, peterelamuk. Nabi Asap arye nyalamuk yupu ara, ani. ‘Allah arye, “Na peterenamne talak ara, domon yupu ap, winipmanto yupu ap adeice aryuk peterenamne. Allah arye aning-aning nirya kintinipdeibuk talak, aniryuk dipdongobuka anoutam talak nirya, Allah arye duknyamuk ning nirya ara, wini talak ara, laka kibuka nyanamne,” nyabuk.’ (Mazmur 78:2) Ayupu ara, Mazmur yupu noutamak, nabi Asap arye, nyalamuk.

Efesus 3:5

Allah arye, Kristus arepsukopura, elce pil dopsuka deice arye kintinipsuk ning ara, minop talak ulamik ninye nirya ati, lak akarye, kum nyalamuk arye, kum biklamik. Bukni wini talak ara, Allah el yupu dobuka peterelbana ati, deiyok kouna, deiyok Rasul nang ap, el yupu laka nyabuka peterena ati nabi-nabi nang ap ati, Allah El Dib Kanye arye, ayupu nirya lak akarye, nyaliba, anang nirya moubuka kel bikinyake. Adeiyok nang nirya ara, Allah arye, wipdeiyamuka anya arye, sikda malye winina kumce, pia pung diksukum nang unyake.

Ulangan 29:29

Tonda, yata barye yala ning nirya ara, nun ni koproba Allah Yahweh, ‘Elcuk aning winiptinyeʼ tenen, bikilul. Bukni, aning ara, nun kum bikinyabe. Ara duknuning ulule. Allah Yahweh elcuk bikilule. Bukni, Allah elce nunti, “Anggunda, aning ara, wininamlume. Aning ara, pia talibuka kum wininamlume,” nyapdeiamuk ning ara, nun ap, nunce deibibiba, deipdanin banamak nang deice, akunum nyapdeiamsuke. Ati ara, nun nirya arye, aninguk talibuka wininamabe.” Musa birye, sik Israel nang ati nyabuk.