Ati ara, Yudea tam taleamuka ninye deiyoknye Raja Yosafat birye, taleamuk mutuku ulamik nang nirya ara, pia teleb aryuk talima lamabuka teleb arye ulamik. Sik ap yuk mutuku nang ap ton kum oldalamik. Ara urdem arye kume. Yosafat birye si erelamuk Allah arye, talima lamabuka una deiyok ning arebukce, lo arebukba, Yosafat birye taleamukak ulamik mutuku nirya ara, Allah arye meilyamukba, teleb ulamik.
Ayub 11:19 - Eipomek19 Atalak ara, an tunim abuka mapminyopura, an mal pina ati, yuk-yuk ning nirya ati, ton ilil pia kum unamkile. Winipminyebuk, yuk nang nirya, yakirye, “Naio, melipsilyame!” nyabuka, an dam yanuka moropnamkiake. Tonda, anti si erepnamkiake. အခန်းကိုကြည့်ပါ။ |
Ayub 11:19
17 ပူးပေါင်းရင်းမြစ်များ
Tonda atalak ara, anda tunim abuka telebuk winimince, ‘Aminyan talak ara, teleb ninguk, na dam yanamlame. Aning ton, aning ton winipnamnarya,’ tenena uk unalama ati, tenina pia kum unalame. Allah arye melipkiliba, el amu tamuk unalama ati, ilil pia kum unamlame. Winimince, teleb aryuk kanye lamapdongobuka unalame.
Yata nang do nirya, pia beren tam koprop arye bukuka, pil donmaca ani, iniplya babye, talye pil atibuk donamake. Tonda, atonun tonoknye ton, ‘Na din ning dopropnamne’ tenen, tonok sum, pia pi dobuka, donmalya babye, talye atibuk donamle. Deiyok ara, sik ni Allah Yahweh arye sikti, din ning ayala-yala nirya aresulule. Allah arye nun ninye nirya, akunum kwepdeipsuka anya arye, elce nunti, bico tenepsilirye, nun patapsilye touk, arenamsile. Allah Yahweh arye, nun ninye nirya ati, bico tenepsilirye, nun mana ati, lo arepsiliba, manyabe. Winisilya ati ara, Allah ati kum dib tenebibirye, pia pi dobuka, talye piluk doltakana kume. ‘Allah arye melisilya deice aryuk unyabe,’ tenebuka pil donamabe.
Ancuk meliniminya deice arye, nara pin-pin kanye bonirye, kanye deibuka unune. Talya daunyak nang arye, wa wina lin li noutam arye, lin nin gandum do, anggur mek din ning do, aning-aning weik arye, libicopura, pia kanye deibuka unyake. Bunki, sikda mitik tonun dem, narye anti weika arye, kanye deibuka unune.
Diba, an tam nang ap, an mutuku ap ati, tuba-tuba kum tenipminyopura, nun mutuku weik ninye deiyoknye, Raja arye anti, ‘Se, elda pia urasin teleb kil ulule,’ teneplirye, pia kanye deilinamkulule. Tonda, nun mutuku ninye deiyoknye, Raja birye, elce anti, ‘Winipnalame, aning ara, pia kum winipnalame, ‘nyabuka, talipkilirye, an yupu lipsisikuka bokolina deiyoknye ukulule. Ati ara, ance el si erebuka kina ati, kutam tuku dipdongobuka, kanupdongopmince, si erebuka kinalame!
Ninye nirya arye, sik ninye deiyok nang damak pia piribuka yakirye, ‘Se, aweik nang ara, nunti kanye deipsitingce, teleb ubuka melipsiting,’ tenebikirye, pia pi dobuka pirilenyake. Aning atonun, ninye kanye talima arye, ‘Se, aning ara pia mambul ning’ tenen, pataplye ning ara, dobuka, yuk nang ati, bico tenebuka talye arelulnye, el damuk ninye weik arye yanganamake. Ara, talye ati kume. ‘Anye bira kanye deipsuturye, nunti, e aninye ara, na kayapu nang unyake, tenebuka melinamsil’ tenen, anye biti, kanye deibuka inilonyake.
Winipnyeura, Siria mutuku noutam unyak mutuku nirya ara, ninye ton kum unamake. Pia ati bataknamake. Winibikirye, asukum ara ninye arye kam ning domba totoa weinak kipnamake. Akam ning unamakak ara, ninye tonoknye yalirye kum yanuka yakwetepnamle ati, adomba basam ap, kambing basam ap ara asukumuk mabikirye ilil kum unamle.
“Na Allah Yahweh arye, anggun Israel ninye ati nyapsine. Israel ninye sikce na si ereninyaknye bira, pia diksukum pia Teleb koprop Unanye unune. Narye anggun kwepdeiamsisirye, tuba kalikuka melisunune. Mesir mutuku ninye wa wiamikirye libuka delinyak ning ap, tonda, Etiopia mutuku ninye sik dekna ati, kintinibuka delinyak ning ap, Syeba mutuku ninye sik cang arye nenyak ninye, sik bon-bona ap weik tonun arelyanganamsiake. Amutuku nang ap, sik talinyak ning nirya ara, anggun dam boyakiba anggun diamuk dopropnamlume. Winipmunce, sik aninye ara taruk balye tam bisik dobuka tapu koubikiba, sikda anggun Israel ninye uk dobolyanamsiake. Sik anang nirya anggun dam yakirye, anggun si erena ati, urasin kanupdongopnamake. Sikce, ‘Allah el tonok ulirye, sik Israel ninye pia melilul’ tenen, kel bikikirye, ‘Sikce nun kum onamsil,’ tenena ati, moronamsiake. ‘Israel nang arye si erenyak Allah ara, pia dipkopropnye ulule. Yuk Allah ton kum ulule,’ nyanamake.” Allah arye nyabuk.
Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.
Winipnamne talak ara, dana-dana tam mutuku noutam, nati walwal tenepnikirye, nati diba kum tenebikirye, na kum bikinamniyak nang ara, tuba ton ap, ‘Naʼ tenen, nang dam yanuka obikirye, sik bona nirya, alubuka kum dopropnamake. Aninguk kum bukni, tonda, yuk talye bai tam ara, yu weik kam ulul ning arye, yanuka kum obuka, ‘Naʼ tenen, nang kum dinamake. Atalak ara, ‘Naʼ tenen, nang nirya ara, pia teleb kanyeuk bobuka unamake. Ton ninye arye, ton ninye ati, pia ilil kum kilinamake. Kanye deibuka, neikauk unamake.
Anggun unamlum mutuku nirya ara, narye melibuka kaleksiniba, pia telebuk unamlume. Amutuku noutam, pia teleb kibuka umunce, talye mangkau asa manamlume. ‘Se, yata ning arye do, yata mutuku nang arye, yanuka opnusiak do?’ tenen, ilil pia kum unamsile. Tonda, yuk talye bai tam yu ulamlye kam ning ara, ninye opmanto kum ulye ning nirya ara, bai basam do, yu kwatima do, yu weik kuse harimau do, aning nirya ara, anggun mutuku noutam arye dopropnirye, kum kipdeipniba, anggun dam kum olyanamsile. Aning atonun, naryuk melibuka kaleksiniba, yuk mutuku yu nang nirya arye, parang ya donogobikirye, ‘Sik Israel nang opnuyapʼ tenen, anggun mutuku noutam kum olyanganamsiake. Narye kaleksiniba, mal olan nang ton pia kum olyanamsiake.
Ton tam ninye arye, yuk tam ninye ati, kum olanamake. Bukni, sik nirya yuk-yuk kam unamak talak ara, neika dukdongobuka, tonok kanye bobuka, telebuk unamake. Aunamak talak ara, anggur tapu duk wa ap ara, yo duk wa ap, sikce sik bidamnye wa wiamice, mutuku noutamuk bukikirye, talye kanye bobuka unamake. Atalak unamak ninye nirya ara, ilil asa arye, kum unamake. Yuk mutuku ninye arye, yuk mutuku ninye ati, ilil kanye kum bonamake. Alaka nyapmasin ning nirya ara, na Allah Yahweh arye, im deice yin talibuka unyak malaikat nirya, sik weik deiyoknye unirye, nyalin yupu nyapmasina ati, aning nirya dipkoprob nong upnamle. Nara, mikip weiknye birye, aning nirya teleb kibuka delinamna ati nyapsine.
Tukwak mutuku sirya, im sirya nirya noutam, malye un ninguk talibuka, wininyak nang ati, yu weik arye wenebuka opnirye, sirya daknamne. Bukni, anggun tuba kam unamlum Israel nang ara, mitik tonun tuba aunmace nang ara, tonap tamubuka, malye un ning, kum wininamlume. Yata nang do, sik aninye arye, tonap tilila yupu nyana kumce, malye kum kilinamake. Tonda, sikce talye yupu nyana ap, tenepce nyan yupu ap, kwinisa don yupu ap ara, sikce pia kum nyanamake. Sik teleb unamak Israel nang ara, yuk nang ap kanye deibuka, neika teleb aryuk, tunim abuka unamake. Wini talak arye dipdongobuka, doyanamle talak nirya ara, sikda yuk nang ati ton, ilil pia kum unamle.
Sik yuk nang arye, “Nunda, dipkoprop Yahudi yala ninye, Allah el mapu kopropa unyabe,” nyabuka, talye nyaltakalamak bukni, dipkoprop ara, anang ara, Isa Mutuku Dongonye arye talilulba, el siuk erenyake. Aninye ara, tilila yupu nyana ninyeuk unyaka anya arye, na mikip deice nyapniba, amalye nang arye, sik yan dam gutam tuku dipdongobuka bunamake. Winibicopura, anggun Piladelpia mutuku diba tenelulum ninye ati, “Kume, anggun Piladelpia nang ati ara, dipkoprop Allah weik arye bico tenebuka melisulule,” nyabuka lakak nyapnamake.
ကြော်ငြာတွေ