Amsal 7:1 - Eipomek

¹ Na mio, narye anti, “Wininamlyame,” nyalamkisirye, “Teleb una ara ani,” nyakunun yupu nirya ara, luba kina pia meme. An kanye talima pum tam arye, pia teninauk unamlyame.

Amsal 7:1 ပူးပေါင်းရင်းမြစ်များ

Ayub 22:22

Tonda, Allah arye, “Aning wininamlume, aning ara, pia kum wininamlume,” nyalilul yupu nirya ara, moubuka kekepmince, aning nirya ara, an talima noutam bopmince, oubuka biknalyame.

Amsal 1:8

Na mapu nirya ara, anggun ni yapu arye peteresikce yupu nirya ara, moubuka kekepmunce, talinamlulume. Aning atouk, anggun nin yapu arye, nyasinyak yupu nirya babye, moubuka kekepmunce, pia kum batakanamlulume. Ayupu nirya ara, talibuka unamlulume.

Amsal 10:14

Ninye ton pia weik kel bikna deiyok ninguk, talibuka unyak nang ara, teleb un ninguk unyakce, aning-aning nirya teleb kibuka, kel kibikirye, aninguk moubuka delinyake. Bukni, yatanye do, el talima malye un ninguk upliba, walwal arye talye-talye yupu weik nyaltakalulnye bira, aminyan talak saknamle. El ulul ning nirya, malye upra banamle. Bukni, malye un ninguk ululnye, el si bam bol pum tam arye, malye yupu uk panamliba nyalule.

Amsal 3:1

Se, na mapu, narye anggunti peterelamsise ning ara, luba kina meme. Narye, “Aning ara wininamlulume, aning ara kum wininamlulume,” nyapdeiamse ning nirya ara, anggun kanye talima noutam deipmunce, pia tuba tenebuka unamlume.

Amsal 4:21

Ayupu nirya ara, ance talye dobuka kum donokonamlyame. Bukni, an kanye talima pum tam pia moubuka delinamlyame. Ayupu nirya moubuka tenepmince, kalikelanamlyame.

Amsal 5:5

Sal arye talye-talye yolalamak kilapu ara, ninye dibikirye balamak sukumuk banyake. Akilapu banyak bisikuk dobolbanyak nang ara, akilapu ap, sik anang ap, neika uku din mutuku bisikuk banyake.

Amsal 6:20

Se, na mapuo. Na anggun ni birye yata wirin ning do nirya ati, ‘Aning ara wininamlulume, aning ara kum wininamlulume,’ nyapdeiamsise yupu ara, luba kina pia meme. Tonda, anggun nin yapu arye, yata wirin ning do nirya ati, ‘Aning ara wininamlulume, aning ara kum wininamlulume,’ nyalilamsik yupu ara, kum yaniptapnamlulume.

Amsal 6:35

Tonda, akilapu ap neika mabice nang arye, akilapu sik domikce nang ati, “Anti malye winipkisa ati ara, teleb ning weika arye arenamkine,” nyaptua babye, akil domlya deiyoknye birye, el yupu pia kum kekenamle. Akil deiyoknye birye, amalye winiplinye biti, ‘Optinye’ tenena uk unamle. Tonda, akilapu ap neika mabice nang, sik kayapu nang arye, akil deiyoknye binyak, ‘Pia teleb arin ning, pia weika arye arepkitibyeba, nun kwit bataktume,’ nyabuka moroptinga babye, akil deiyoknye birye, ayupu pia kum kekenamle. Kil talye ubula yolana ara, pia malye weik winina ati nyapsine. Raja Salomo birye nyabuk.

Lukas 11:28

Nyabukopura, Yesus arye akil ati tamubuka nyabuk. “Kume, yata ninye do nirya ara, Allah yupu moubuka kekebikirye, diba tenebuka, diksukumuk unyakce Allah ati dobolbanyak ninye ara, sikda pia mambule. Aninye ara, Allah arye teleb ulinamle,” Yesus arye nyabuk.

Lukas 8:15

Anang ara wininyak bukni, yuk ninye ara, yala doknin banmokura, mirin tukwak sakukura, duk weik arye moubukce, yupa pia weik seratus moubuka touk, unyake. Sik kanye talima ara pia teleb nang anya arye, Allah yupu kekebikirye, diba tenebiceura, ikin ning awablyeura, batakna kum aryuk, pia talibuka wininyake. Allah yupu diba tenebuka, kanye deibuka pia dololamak ninye ara, Allah el pil weik arye donyake. Yesus arye el mapu ati nyabuk.

Yohanes 14:23

Asipdeyukura, Yesus arye nyabuk. “Na ti diba tenebikirye, kanye talima deipnikcopura, aninye dipkoprop na yupu kekepnikirye, anyuk talibuka dobolbanamake. Na yupu pia talibuka diksukumuk unyak talak noutamak nirya ara, na Ni Koprop Allah arye sikti, bico tenebuka melinamle. Winiplirye, na ni Allah ap, na ap, aninye sik un dam yanimirye, aninye ap kanye talima dukdongobuka neika unamabe.

Yohanes 15:20

Nyabukce, ayupu dukdongobuka nyabuk. Na akunum nyapdeiyamsise yupu ara, tuba tenenamlulume. Ara, talye pil melin ninye ara, mitik mambul bukni, sik deiyok nang ara, weik mambul unyake. Yuk nang arye deiyok nang ati wininyak atonun, adeiyok nang sik amu tam unyak ninye ati ara, atonun wininamake. Ati, na talye kum nyapsine. Sik malye nang arye, nati, malye yupu nyabuka na nong deice ikin ning weik delilamnike. Aning atonun, anggunda na amu tam ululum ninye ati ara, malye nang arye anggunti, ‘Anang ara, nun lik’ tenen, malye yupu nyabuka, ikin ning anggun nong deice delinamsiake. Bukni, na yupu kekebuka dobolbalamak ninye ara, anggun na mapu nyalulum yupu babye, kekebuka dobolbanamake. Na yupu kum kekenyak ninye ara, anggun na mapu nyalulum yupu babye kum kekepnamake.

Ulangan 11:28

Aning atonun bukni, malye winipmanto ning ara, anggun si erelulum Allah, anggun ni koproba Allah Yahweh arye nyapdeipsuk yupu, moubuka kum talipmunce, aning batakuka, talye ning isa si, kum bikamlum ning, yuk mutuku nang arye si erenyak ning ati, ‘Aning ara, nun deiyoknye,’ nyabuka, atalye ning ati, si erepmunyopura, adeice Allah arye, anggun dam supsiliba, ikin ning anggun dam yaliba, kanye imun unamsile. Tonda, supsilya deice arye, malye ninguk dopropnamlume. Ayupu ara, akunum nyapmasine.” Musa birye, sik Israel nang ati, nyabuk. Nyabukopura, ayupu ton dukdongobuka nyabuk.

Wahyu 1:3

Abuku noutamak laka nyapsise ning nirya, nong upnamle talak akunum dam yanmasila ati, ninye kekenamakak abuku dobuka, aminyan wininamle ning ati, lakak laka nyanyak ninye ara, Allah arye melilyeba, kanye deibuka telebuk unamak. Tonda, ayupu nyanyakba, kekebikirye, ayupu nyasilye touk diba tenebuka, talibuka dobolbanamak ninye babye, Allah arye meliliba, kanye deibuka telebuk unamake. Anyapnusin yupu nirya, nong upnamsil talak dam akunum upmasila ati, na Yohanes arye nyapsine.

Wahyu 22:9

Winipse bukni, amalaikatnye birye nyapnuke. “Na ti si erena kume. An ap, Allah ati diba tenelamikce, Allah el yupu laka nyanyak nabi-nabi nang, an du yapu atonun ninye ap, abuku noutamak seknulam yupu talibuka unamak ninye nirya ap, anggunce Allah el amu tam bukuka, el piluk dolulume. Anggunce winilamlum touk, na babye Allah el piluk donuna ati ara, nati si kum erepnunilam bukni, Allah eltibuk kibuka, el siuk pia erenamlulume,” nyapnuke.