Amsal 20:3 - Eipomek

³ Moubuka kum teneplirye, talye kanye bobuka walwal deice uk ululnye bira, ‘Tuba walana uk uptibirye, olana uk uptibye’ tenen, malye yupu uk nyaltakalule. Bukni, pia weik kel nang arye, ‘Kanye talima dukdongobuka, neika una ara teleb uka,’ tenenyaka ati ara, yuk nang arye sikti, malye ubica babye, adiparyuk kum derenyake. ‘Yupu walana ap, ninye olana ap ara, na like,’ teneplirye, yukak kilolbalule. Ati ara, yuk ninye arye sik kel nang ati, kanye delinyake.

Amsal 20:3 ပူးပေါင်းရင်းမြစ်များ

Kejadian 13:7

Tonda, Abram el basam weilamik nang ap, Lot el basam weilamik nang ap arye, pia weik walalamik. Tonda, amutuku noutamak bukni, sik Kanaan yala nang ap, sik Peres yala nang ap, amutuku neika ansinibuka ulamik.

Kejadian 13:8

Sik tuku lo kum mitik anun ubuka anya arye, Abram birye, Lot biti nyabuk. “Amio, na ap, an ap, yu upsiliba, walana ara, bataknaname. Tonda, na basam wein nang ap, an basam wein nang ap, yupu si dalana ara bataktinge. Ura, nunda tonok yala nanguk unyam atia.

2 Raja-Raja 14:9

Bukni, Raja Yoas Israel tam taleamuknye birye, Yehuda tam taleamuknye Raja Amazia biti, adomon yupu tamubuka nyabuk. “Tonok talak ara, Libanon mutuku noutam ara, mutuku dam tamuk, mutmuta noutamak, mitik tatce ning arye, weik cang cemara yo ati, yupu nyapdeibukce, nyabuk. ‘Cemara yo, anda na deipse mi el dopnamle ati, an deiplum kilmu ara, na arepniminyeba, na mi arye, akil dopnamle,’ nyapdeibukce, morobuk. Morobuk bukni, atalak aryuk, yo mutmuta noutam ara, bai tam kam ulul ning arye, amitik tatce ning deice yanipdongobuka tikuk deice, aning malye kibuka, atu atonun kibukabukce, talye biyuke.” Domon yupu deice arye nyabuk. Nyabukopura, ayupu ton dukdongobuka nyabuk.

Amsal 14:17

Ninye ton minopce yu kanye bobice talak ara, tuba-tuba yuk nang ati, derena uk ululnye bira, malye winin ninguk taliplirye, dipkoprob malye un ning ap, walwal un ning ap uk, unamle. Aning atonun, elce yuk nang ati, tenepce arye tilila yupu nyaltakalulnye ulula ati, yuk nang nirya arye, ‘Anye bira, nun like,’ tenenyake.

Amsal 14:29

Weik kel bikamik nang arye, sik yupu nyapnuceura, ‘Nun kayapu nang ati, weik yupu arye talye nyanmapirye, derepnyap’ tenen, kabul nyapnuce talak ara, sik sitang moubuka kalikildakirye, yupu nimalye aryuk nyanyake. Bukni, walwal kanye bobuka malyeuk unyak nang ara, aning atonun kum unyake. Sikda, yupu kabul nyapnuce talak, moubuka tenena kumce, yupu talye-talye uk nyaltakanyak deice arye, minopce yu upliba, sik kayapu nang ati, wana ap, malye ulina ap, unyake.

Amsal 16:32

Nong mikip weik ululnye bira, mitik teleb ulul bukni, weik teleb ning ara nyapnusine. Yata nang do nirya, yu weik upmale bukni, ‘Na adiparyuk ninye wana yupu kum nyapnune. Bataknin banmanya ani, aminyan talak namin yupu uk nyapnamane,’ tenelulnye bira, weik teleb ulule. Yata ninye do nirya, sikce, ‘Kume, nuncuk wininmabirye, malye ubipyak’ tenen, moubuka tenipdekirye, sik bidamnye ati, kalikildanyak nang ara, pia teleb unyake. Tonda, yata mikip weiknye do nirya, elcuk yuk mutuku ninye arye, dolamik weik asik nirya uluplopturye, amutuku ninye nirya obuka daktua babye, aning ara mitik teleb ulule. Bukni, weik teleb ning ara, ‘Malye ubipyak’ tenen, moubuka tenipdekirye, sikce, sik bidamnye ati, kanye talima moubuka kalikildanyak nang uka.

Amsal 17:14

Winipmanto ara, mek bisik wakibikirye, kukdeibikiba, mek mikip arye balamle atonun, ninye arye kabul deiyok koubuka, derelana unamak talak ara, adiparyuk, adeiyok ning ati, “Dauplye,” nyabuka batakaldongonamlulume. Opdanmanto unyak ninye ati, lyelina telebe. Kumopura, ninye arye derepdakirye, ayu yupu uk tuba nyapdanin, bakibuk weik upnin balyopura, sikce nyaldanamal ning ap, oldanamak ning ap ara, min kum kum daneipnamsile. Ati, yu upliba, deiyok koubice talak aryuk, lyelina telebe. Yu yupu tuba nyaldana kume. “Dauplye,” nyabuka, batakaldongonamlulume.

Amsal 18:6

Tonda, walwal kanye bobuka ululnye birye, tuba-tuba malye yupu weik nyalirye, amalye yupu canga arye, talye nyala deice arye, dipkoprob ninye ati, ninye wana yupu weik panalule. Winibuka ulya deice arye, el nyalye yupu kekenyak ninye arye, el wenena ati, weik arye onamake. Ara, talye ati kume. Deiyok ara, elce nyalul yupu nirya ara, malye yupu uk, nyalula anya arye, amutuku ninye arye, el wenena ati, yo kama arye, el nong deice onamake.

Amsal 19:11

Ninye ton weik kel bikna ning akunum kel bikamlinye bira, yuk ninye arye elti, malye upmacopura, elce minopce sikti, yu upliba, kum walule. Sik yuk ninye arye elti, malye ubikiba, elce namin kiplyeura, yuk teleb nang eibikirye, ‘Se, elda dipkoprob telebuk ulule,’ tenenamake.

Amsal 21:24

Ninye ton erepdanuka kwalibikirye, dinauk unyak nang ara, minopce talima erenyakce, ‘Malye winiptibye’ tenen, ilil pia kum kanye bobuka, weika arye malye winin ninguk unyake. ‘Winibibiba, ikin ning nun dam yanamsil do?’ pia kum tenenyake.

Amsal 26:17

Ninye ton yuk nang weik yupu nyabuka, oldanmakca noutamak binuka, “Anggunda yata deiyok ati nyaldanmalumce, oldanmalum do? Anggun bataklulume,” nyabuka, tabakuka binuka yupu nyanyak nang ara, pia walwal arye unyake. Ara, opdanmanto unyaka ati nyapne. Winipmanto ara, pia walwalnye birye, talye dabanmalirye, el kum talamlye kam bukni, talye daunmalye kam, el amul mikip arye talibuka lilolirye, akam arye si tolamle atonun, wininyake. Ati, deiyok kum bikmakiryuk, talye banmace talak ara, yuk nang arye yupu deice waldakirye, oldace talak ara, anang dam binuka, yupu tabakuka kum nyanamlulume. Yupu ton pia kum nyanamlulume.

Efesus 4:32

Amalye winin ning nirya akunum batakmunyopura, anggun nirya arye, yuk ninye nirya ati, bico tenebuka melilanauk unamlume. Wininamlum talak noutamak ara, yuk nang arye, anggunti,malye usinyak ning ati ara, ‘Dauplye,’ tenebuka, namin kinamlulume. Ara, Allah arye, anggun ap, Kristus ap, kanye talima dukdongopsuka deice arye, anggun malye winin ning nirya ara, kum kipdeipsukce, namin kisilya atonun, anggunce yuk nang ati, atonun wininamlulume. Na Paulus arye, nyapsine.

Yakobus 3:14

Bukni, anggun kanye talima noutamak ara, yuk nang ning asing eipmunce, ‘Aning nauk doproptinye’ tenen, patana ap, ‘Nauk erepnitinge’ tenen, patana ap awinipsilyopura, aning ati kanye deibuka, kwalina ap, maknya kintinilina ap, kum danamlulume. Tonda, aning awabsilyopura, kum dungnunamlulume.

Yakobus 4:1

Anggun yu upsiliba, walana ap, yupu deice malye yupu nyaldana ap ululuma ara, yata ning deiyok arye usulul do? Kume, teleb ning ap, malye ning ap, anggun talima noutam patatapsilyeura, teneluluma deice arye, anggun talima noutam anyak olalulume.