Dipkoprop ara, Allah arye nyabukba ulul kum danya? Anye birye malye yupu na deice deipmanilba, Allah el si Yahweh arye kanye imun ning arepnil ning ara, eiplirye bico tenepnilyopura, amalye ning nong pununa ati, teleb kipdeipnamnil do, kum do? Dina uk unamne. Pirildenilye ning punubuka Allah arye tamubuka teleb upnamnil ca, tenepne,” Raja Daud birye nyabuk.
Amos 5:15 - Eipomek15 Aning atouk, ‘Malye winin ning ara, nun like’ tenen, pia diksukumuk unamlume. Yata malye winin ning do nirya, malye ning nirya batakmunce, ‘Aning ara, nun like’ tenen, malye ning pia kum wininamlulume. Winibuka umunyopura, dinamlume. Winipmunyopura, nara, Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggunti, melinamsine. Telebuk winimunyopura, narye minopce wenebuka kum opsinirye, tuba tamubuka, tonap bico tenepsinyopura, Yusup el yala ninye ati, teleb updeipnamsine. Ara, anggun apu koproba, Yusup birye deiamukba, dadeipdanin yangalamika ani, wini talak babye ululum Israel ninye ati, na Allah Yahweh arye anggunti, bico tenesipnirye, melinamsine. အခန်းကိုကြည့်ပါ။ |
Amos 5:15
42 ပူးပေါင်းရင်းမြစ်များ
Raja Benhadad ap, el yin talen nang, sik yupa yuk-yuk ati, deiyok kibuka ulamik nang, mitik tonun tuba kam unmekce, sik Raja ati nyabik. “Yuk mutuku nang ara, nyapsik. ‘Sik Israel mutuku deiyok kibuka talinyak nang nirya ati ara, ninye yuk nang ati, bico tenenyak nang unyake,’ nyapsikba, kekebupe. Ati ara, nun deiyoknye ance, ‘Telebe,’ nyapsutumopura, nun adiparyuk malye kain karung ongobukaptibirye, basam turya atonun tapu ton, nun kisok deice kirikdongobuka ongobibyopura, Israel tam ninye, sik deiyoknye dam bitibiba, elce utenepnamsile. Ara, ‘Sik anang malye baju ongobuka, pitin kipmakce, na dam yanmaka ara, na amu tamukiba, talipnamna atia,’ tenepsutue. Tonda, winiptibya deice arye, nun deiyoknye, an babye kum opkutue, kum danya,” nyabuka bina morobik.
Israel ninye, sik yin talen nang nirya ara, Siria mutuku taleamuk ninye deiyoknye birye, yanuka obuka, sirya daknin balamikce, yin talen nang weik tonun, kum daneiyamuk anya arye, anoutam talak ara, Raja Yoahas el yin talibuka, kuda basam libuka bobana ati, tuku deice bikbik abuka ban ning, el si kereta kuda, aning deice tikuka, balamik yin nang ara, lima puluh (50) nanguk, tuba kam ulamik. Tonda, ninye olban talak ara, tuku bisik deice binarye, ninye ona ning, el si kereta kuda perang ara, sepuluh (10) tuba awamuk. Yuk ning nirya ara, pia kum danamuk. Tonda, Raja Yoahas, el yin talen nang yupa ara, sepuluh ribu (10.000) nanguk tuba ulamik. Sik yuk yin talen nang nirya ara, Samaria tam taleamuka deiyoknye, Raja Hazael birye obuka, sirya dakamuka deice arye, ninye arye, tuku sung-sunga yanilamaka atonun, ubuka omukce, sirya daklamukba, Israel tam yin talen nang ara, kum danin balamukce, mitik anunuk tuba kam ulamik.
Raja Pekah bira, Israel tam ninye taleamuk talak ara, Samaria mutuku noutam ulamuk talak, Asyur mutuku ninye talibuka, ninye deiyok ulamuknye, Raja Tiglat-Piliter, elce, Naftali yala nang ulamik mutuku ap, Gilead yala nang ulamik mutuku ap, Galilea mutuku ap, malye kibukce, sik mutuku tuku nirya yanuka alupdobuk. Tonda, ‘Israel tam unyak ninye opnirye, sirya daknamne,’ tenebukce, sikti, olyayuk talak ara, elce alubuka doprobuk mutuku si, ton ning ara, ani. Ara, Iyon asik ap, Abel-Bet-Makha asik ap, Yanoah asik ap, Kedes asik ap, Hazeron asik ap, winibuka anyasik-anyasik ap, sik mutuku nirya ara, malye kibukce, binuka alupdobuk. Winibukce, amutuku-amutuku noutam ulamik ninye nirya ara, tomobuka tapu koubukabukce, ‘Sikda na ikin pil dipniba, na piluk donamniyakʼ tenen, Asyur mutuku wenen asik bobinuka deibuk.
Tonda Asyur mutuku ninye deiyoknye birye, yin talina deiyoknye biti nyalinmoba, nyapdeipmasil yupu nirya ara, Allah el si Yahweh arye, kekenmal do, kum do? Allah ara kam pia ulamlanye ulul bukni, Asyur mutuku weik deiyoknye birye, Allah elti, pia malye yupu nyabuka nalinmoke. Aning ara, Allah akunum kekepmalce bikmal do? Na kanye ara, ance el si erebuka el piluk dolyam Allah arye, amalye yupu kekeptopura, ‘Dipkoprop Asyur mutuku talibuka deiyoknye biti wenepnamlarya,’ tenepne. Na walwal bukni, Allah elda kele. Ati ara, ‘Allah el si Yahweh arye, wenen ning el nong deice deipnamimile. Tonda anye birye, bisibuka opsilyopura, Allah ati moronamsulum’ tenen, nyapkine. Tonda, opsiliba, mitik anun tuba kam unamak nang ati, ‘Allah arye, anang meliptue’ tenen, Nun ni Allah ati moropnamsulume. “Nun ni koproba Hizkia birye ayupu nyapdeipmalba, nunce nyapkiyabe,” nyabik.
Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu nirya ara, moubuka kekenye deice arye, moubuka tenepnirye, moubuka bikinune. Ati, an yupu nyasilye touk kum bukni, yuk kirikuka malye bisikuk balamak nang ara, na like. Yuk ninye arye, “Nun telebuk wininmabe,” nyaplobuka, malye ning wininyak ning nirya ati ara, na yu unulule.
Ati ara, yata nang do nirya, sikce, Allah Yahweh ati, ‘Nun ni koproba ani’ tenen, diba tenebuka, elti, kanye deipmunce, bico tenelulum nang nirya ara, anggun nirya arye, malye un ning nirya ati, anggunce, ‘Nun like’ tenenamlume. Allah el tibuk, anggun kanye talima, el deiceuk delinamlume. Allah arye, ‘Naʼ tenen nang, ‘Winibuka wininamak’ tenen, akunum wipdeiamsuk nang ati, “Aning ara, wininamlume. Aning ara, pia kum wininamlume. Winipmunyopura, narye anggunti, pia teleb kilinamsine,” nyapdeiamsuk yupu, moubuka talinyak nang ara, Allah arye, pia melibuka kalikisulule. Winilula ati, anggun mal olan nang ap, sik pia malye ning talibuka, wininyak nang ap ati, obuka sirya daklyopura, el ‘Naʼ tenen nang anggunti dobuka, teleb kipdeipnamsile.
Sik mapmeka, berekukopura, anyuku sum ara, Musa birye sik tuba kam unmek ninye, Israel ninye ati nyabuk. “Anggunda akunum weik malye winipmalum bukni, wini talak ara, ‘Anggun malye ning Allah arye namin kipnamsil do, kum do?’ tenen, Sinai mutuku welepnirye, Allah el si Yahweh ap epdanimnyopura, narye, ‘Anggun malye winin ning kilibuka namin kipnamsil’ tenen, aning pununa ati, Allah moropnamasine,” nyabuk.
Na Allah Yahweh arye, anggun nirya ati nyapsine. Anggunce, yuk nang sik dam ara, diksukum teleb piluk donamlume. Ara, narye, ‘Aning wininamlum. Aning ara, pia kum wininamlume,’ nyapdeipsise yupu atouk winibuka, pia diksukumuk wininamlume. Tonda, ninye yupu bokolin talak ara, dipkoprob sik winilamak touk bikmunce, teleb kibuka yupu nyapmunce, wenepnamlume. Talye-talye winina kume. Mikip unyak nang arye, anggun amu tamuk unyak nang ati, ikin ning, sik nong deice deibikcopura, anggun deiyok nang arye, aikin unyak nang ati, lobuka melipmunce, lyelinamlume. ‘Teleb mutuku noutamuk uptibyeʼ tenen, yuk mutuku arye, anggun mutuku yanuka, tikilyangan nang ap, tonda winiryuk nenmace nang ap, yuwak kilapu ati, ‘Sik ning alubuka doproptibyeʼ tenen, pia kum moronamlume. Tonda, ‘Anang ati, yanipdongobuka optibyeʼ tenen, sik dam ikin ning kum delinamlume. Tonda, yata nang do nirya, sikce deiyok kum ati, malye kum winipmace buk, anggun deiyok nang arye, anang ati, talye lukparabuka, kum opnamlume. Sikda, malye kum wininyak nang ati, amutuku noutam arye, ninye kum onamlume.
Aning nirya ara, urdem ati kum nyapsine. Na Allah Yahweh arye nyapsine. Anggun Israel yala ninye nirya ap, yuk mutuku ninye nirya ap ara, anggun nirya kanye deibuka mot senamlume. Ara, anggun Israel ninye ara, narye pia teleb kipdeipnamsina ati, kanye deibuka, mot senamlume. Tukwak mutuku noutamak ara, ninye yala-yala weik daunyak bukni, weik mambul yala ninye ara, na mapu Israel nang unyake. Ati, anggunda mutuku-mutuku nirya daululum ninye nirya ara, weik yupu deice arye, kanye deibuka nyanamlulume. “Nun ni Allah, anda Yahweh ulyame. Ance, minop talak arye wipdeiamlum ninye, ‘Sik Israel ninye ayala-yala nirya, ton tuba kam aunyak nang ara, lyepnamlam’ tenen, moropkiyabe.” Ati nyapsine, anggun yuk mutuku ulamlum ninye nirya ara, Israel ninye ati, kanye deipmunce, mot sebuka, sik Israel ninye ati, teleb kilinamlulume.
Ura, nara, Allah Yahweh, aning-aning nirya talibuka, deice tam erebuka, mikip weik ununye birye nyapsine. “Ara, anggun ninye deiyok nang, Raja-Raja nang arye, malye-malye winilulum ning ara, akunuma. Anggunce malye-malye winimunye ning ara, bataknululume! Se, sik Israel nang, anggun deiyok nango. Anggun amu tam unyak nang ati, olana ap, yu uplyeba yupu arye malye nyalulum ning ap, ikin ning, sik nong deice delilulum ning ap, awinilulum ning deice arye, sik kanye dakalsakasulule. Ati, aning nirya ara, adiparyuk bataknululume! Aning ara, batakmunce, pia teleb diksukum un ninguk wininamlume! Tonda, narye, ‘Wininamlume, aning ara, pia kum wininamlume,’ nyapsise touk, pia teleb ning ati wininamlume. Aning atonun, tuba-tuba ‘Naʼ tenen nang, sik tibuk, sik unamak tuku noutam arye, tuba kum yakalkwetenamlyame. Aning babye, bataknulyame! Nara, Allah Yahweh, aning-aning nirya talibuka, deice tam erebuka, mikip weik ununye birye, anggun ninye deiyok nang ati, akunum nyapsine.
Winibukopura, Daniel birye, Babel mutuku ninye deiyoknye biti morobuk. “Naio, an amu tam pil dona ati, ‘Babel mutuku nirya talibikirye, melibuka pil donamkiyak’ tenen, na kayapu Sadrak ap, Mesak ap, Abednego ap, sik ton ninye deiyok nang kina ati, erepdeiptume,” nyabuka morobuk. Aning moropmok touk, Nebukadnesar kekebukce, anang winilye ton wipdeibukba, el amu tam pil talibuka dolamikce, weik nang ulamik. Daniel el tonok ara, Babel mutuku ninye deiyoknye ulamuk aik, weik aik pum tam weik pil talibuka, Babel mutuku ninye deiyoknye, Nebukadnesar el dam ulamuk.
Yoel birye nyabuk. Nun ni koproba Allah arye nunti, bico tenesulul ning ara, yatanye birye, ton biktua kume. Allah elcuk teneplirye, ‘Aninye wenebuka opnune,’ tenebuk ning ara, batakturye, ‘Aning ara, kum winipnune,’ teneptu do? Bico tenepsuturye, namin kipnamsil do? Winiplirye, Allah elcuk tamubuka, weika arye anggun dam teleb ulinamsil do? Nun walwal bukni, ‘Winipsutu’ tenen ati, anggun nirya arye, Allah el si erena ati, anggur mek ap, gandum ap bobuka, arelyanamnulume.
Bukni, pia teleb ning ara, diksukum teleb ubuka winin ninguk talibuka unamlume. Na patapnil ning ara, weik mek mikip arye balamle atonun, teleb winin ninguk, diksukumuk winimumnyeura, kanye delinamsine. Tonda, mek lilun talyeuk balamle atonun, anggunce tilila yupu nyana kumce, ‘Malye winipmalinye bira, malye winipmale,’ nyabuka, yupu bokolinamlulume. Teleb wininmalinye biti ara, ‘Teleb wininmale,’ nyabuka, yupu lipsisikuka bokolinmalulume. Winipmunya deice arye, telebuk ubuka, pil donamlume. Aning ara, batakana kum bukni, mek lia bukuka balamle atonun unamlulume. Winipmunyopura, narye anggunti, kanye delinamsine. Na Allah arye nyapsine.
Ati ara, anggun Israel ninye nirya ara, tonap tuba tamubuka, na Allah Yahweh damuk yanamlulume. Yamunyopura, anggun pia tuba kamuk unamlum bukni, na dam tamubuka kum yamunyopura, Allah na yu ara, uku dilamle atonun unulula ati, anggun apu koprop, Yusup arye deiamukba, dadeipdanin yangalamik nang, anggun Israel yala ninye nirya, sirya daknamsine. Winipmanto ara, uku dibuka sirya daklamle touk, anggun wenena ati, kum daneipnamsine. Tonda, Betel mutuku unyak nang babye, auku arye diplirye, sirya daknamle. Adinamle uku ara, yatanye birye tangap dongopturye, aninye lyeptu do? Pia kuma ati, ‘Allah arye wenepsilyak’ tenen, nyapsine ati, anggun kanye mouplulume, nyapsine.
Anggun ton tenipdelulume. Winipmanto ara, kuda basam arye mutuku deice keil tace belyamtuak bikbik abuka bitu do? Tonda, weik laut mekwen deibuk noutam ara, ninye arye sapi basam bobuka, tapu kiriktingba, sapi basam batingce, pil dopting do? Kume, anggun kele, aning nirya ara, kum winipmanto ning anya arye, pia walwal nang aryuk, ato yupu nyaptinge. Bukni, anggunce diksukumuk umunye nang ara, tamubuka yu nang atonun ubuka delilyame. Winimunye deice arye, ninye weik dibinyake. Aning atonun, diksukumuk uptum toura, ninye weik kanye deibuka telebuk upting bukni, anggun malye weik ululuma deice arye, yuk ninye ati, malye kililuluma arye, mambul kanye bobuka, malye yupu nyabuka, engenyake. Teleb ning ara, anggunce tamubuka malye winililulume.
Nyabuka moropsebuk, Allah Yahweh arye, ‘Winibuka wenepnamsine’ tenen, kintinip deibukce, laka kipdeibuk ning ara, batakuk. Allah arye tamubuka tenibukce, ‘Aning ara, tuba kum winipnamne’ tenen, batakuk. Batakukce, tuba tamubuka nati nyapnuke. “Narye ‘Israel ninye wenena ati winipnamne,’ tenepse ning ara, kum winipnamane,” nyapnuk.
Mek liya yo, laut mekwen akunum noutam wekmanto unmokopura, mekwen deice mek lia yo bobana deiyoknye birye, Yunus mapmokak biyuk. Asukum biyukce, nyabuk. “Mok piriripna arye, nun pirinmasil ning ara, kel bikmalamcuk, mapmalam ning ara, yata ati do? Wini talak aniryuk buklyame! Bukmince, an si erelyam Allah ati, moropminba, eipsilirye, ‘Na mapu oplyak’ tenen, bico tenepsuturye, melipsutuba, kum dipnuyap do, lyepnamsil do? Nun walwal bukni, utenenmaba ning ati, ance elti, adiparyuk moropnulyame,” nyabuk.
Winipnamap ning ara, nun walwal bukni, Allah arye, ‘Opnamne,’ nyapdeiamsuk ning ara, ‘El kanye tamupliba, el yu, nun nong deice deipnamsil do, kum do?’ tenenmabe. ‘Bico tenepsuturye, yu kanye weik bosilye ning ara, batakturye, lyepsetue’ tenen, nyanmabe. Namin kipsuturye, lyepsilyopura, nun kum dipnamabe,” nyabuk. Niniwe mutuku weik deiyoknye birye, ayupu nyabuka dopdeibukba, el taleamuk nang nirya kekebik.
Allah Yahweh arye, ayupu tonap dukdongobuka nyabuk. Se, na mapu koproba Israel ninye, anggunda weika arye wenebuka opsiniba, ninye weika arye dipnamlum bukni, anggun kan-kan ara, ninye mitik tonunuk batakdongopsiniba, kam tuba unamlum ninye ara, narye lyepsinirye, bulubuka tonok mutuku noutam deipnamsine. Winipmanto ara, domba basam weina deiyok nang arye, sik domba basam dobuka, tonokak bulubuka deibikirye, poka pum tam dobuka dongolamak touk, narye anggunti, aning atonun winipnamsine. Winipsinyopura, winipmanto ning ara, domba basam ara, teleb maning palamlyak binuka deibikiba, kanye deibikirye, maning dilamak touk, narye lyepdopsinyopura, teleb kipdeipsiniba, unamlume. Aminyan talak ara, anggun unamlum mutuku tam ara, ninye yala weik kipdeipsiniba, yupa pia weik upra banamake. Yupa weik ubikirye, amutuku noutamuk, kanye deibuka, pin-pin asa arye unamake.
Anggunda, teleb arye diksukumuk ubuka winitum bukni, sikce diksukum kanye tenibuka, pil donyak nang ati, ‘Nun like’ tenen, yu weik usulule. Atonun, teleb winina babye, ‘Nun like’ tenen, batakalulume. Utenemuyopura, pia malye pil talibuka dolulume. Adeice arye winipmanto ara, na mapu koproba, Israel yala ninye nirya ati, anggunce kam tuba unmacebuk, anggun bol deice ning nirya kolulume. Atonun, sik yok deice ulamle bol nirya koplobuka, tup likuka dololulume.
Aninye lyena deiyoknye, akunum yanuka kutukuka tiklyopura, Allah Yahweh el mikip weik anye el nong deice deipliba, el mapu nirya ati taliplirye, kalikuka meliliba, teleb ubuka unamake. Allah Yahweh el si ara, weik mambul si ulule. Ati, atalak ara, aweik ninye lyena deiyoknye birye, Allah el si mikip deice arye, Israel yala ninye nirya melinamle. Winipmanto ara, domba basam weina deiyok nang arye, sik domba basam ati, teleb din ning arebikirye, teleb arye weilamak touk, anye birye Israel ninye nirya ati, pia teleb kibuka mikip arye, kalikuka melinamle. Winiplyopura, sik nirya kanye lamapdongobuka ubikirye, teleb kanye bobuka unamake. Ara, urdem ati kume. Deiyok ara, aninye deiyoknye bira pia mikip weik unamla ati, im sirya, mutuku sirya ap, tukwak mutuku, im sirya, mutuku sirya nirya unyak ninye, anye eibikirye kibikcopura, el anye biti, ‘Se, elda dipkoprob mambul weiknye ulule’ tenen, elti, si erenamake. Ati, elce talinamle Israel ninye nirya ara, teleb kanye bobuka, pia lamapdongobuka unamake. Deiyok ara, elce talinamsila atia.
Se, anggun amutuku noutam ululum nang kan-kan arye, anggun kanye amu tam kibuka ululum nango, anggun adiparyuk, Allah Yahweh el dam tamubuka yalulume. Tonda Allah arye, ‘Aning ara, wininamlume, bukni aning ara, pia kum wininamlume,’ nyabuk ning, talibuka winilulum nang ara, tamubuka Allah dam yamunce, Allah elce tenelul touk, winipnamlume. Tonda, ‘Atalak ara, nun ni Allah arye, yata nyapnamsil do?’ tenen, Allah dam tamubuka yamumce, moubuka kekedenamlume. Ara, kanye lamapdongobuka, Allah dam yamunce, kanye erelana kum aryuk, namin kanye bonamlume. Tonda, Allah arye, ‘Wininamlume, wininamlume. Diksukum winin ning ara, ani, aninguk talibuka, telebuk wininamlume,’ nyabuka laka nyapdeiamsuk yupu kekebuka, aninguk talibuka, telebuk wininamlume. Winipmunyopura, Allah Yahweh el yu, ‘Anggun Israel nang deice deipnamsin,’ tenebuk sum ara, anggun telebuk winilulum nang deice, ‘Bico tenepsuturye, wenen ning kum arepnamsil do? Arepnamsil do?’ tenena atia. Bukni, el kanye ara, nun walwale.
Aning nirya akunum winipnyeba, na mapu anggun nirya arye eipmunce, kel biknamlume. Ara, sik telebuk unyak nang ara, sik urasin laka upliba, eibuka kel biknamlume. Aning atonun, malye ninguk talibuka unyak nang babye, sik urasin laka upliba, eibuka kel biknamlume. Ara, na si erepnikirye, na amu tam unyakce, na piluk donyak nang ap, tonda na si kum ereninyak nang ap ati, narye yupu lipsisikuka bokeipnamsin talakuk, eibuka kel biknamlume. Na Allah Yahweh arye nyapsine.” Allah arye nyabuk.
Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.
Sik malye ninguk tenebuka, malye wininyak ninye ara, sik kanye tenen ning noutamak arye, Allah el winilul ning nirya ati, yanibikirye, batakanauk unyaka ati nyapsine. Aninye ara, Allah arye ninye ati, “Teleb kibuka un ninguk wininamlulume,” nyabuka laka nyasilye yupu nirya ara, kum kekebikirye, el nyasilye yupu amu tam kum unyake. Malye ninguk tenenyak ninye ara, Allah el yupu kum kekepmanto unyake. Aninye ara, Allah el amu tam bukuka kum dobol binmanto unyake.
Na kwit Gaiuso, malye winin ning ara dipdemince, leibuka yukak unamlyame. Malye winin nang arye winilamak touk, anda pia kum wininamlyame. Malye winin ning kum bukni, teleb winin ninguk eibuka aninguk wininamlyame. Yata nang do nirya, teleb ubuka funguk wininyak ninye ara, Allah ap, ansinibuka unyakce, Allah el mapu unyake. Sik malye-malye wininyak ninye ara, Allah ati moubuka kum kel kiyamika ati, el winilul ning moubuka kum tenenyake. Tonda, diba kum tenenyake, nyapne.
ကြော်ငြာတွေ