Atalak ara, Omri birye tonok mutuku kon dekuk. Amutuku kon dekna ara, dekna weik ning el si ara, perak uang deice arye, el ikin ara 70 kilo arebukba ninye si Semer dobuk. Amutuku kon mince taleamuknye si ara Semer. Omri amutuku kon 70 kilo perak arebukba, Semer dobuk. Omri birye amutuku deice aik weik dobukce, amutuku si ara, Samaria nyabuka sisibuk. Ara, ‘Amutuku taleamuknye el si teninamap’ tenen, Samaria nyabuka, sisibuk.
Amos 4:1 - Eipomek1 Allah arye nyabuk. Se, Samaria mutuku noutam umunye kilapu, kwalina weik kilapu ara, anggun nong kalimna ara, weik sapi basam nelamle touk ululume. Anggun mutuku si Basan mutuku kilapu ara, sapi basam kalimna weik ubuka nelamle touk, anggun babye nelulume. Anggunda, anggun akanye yapu ati nyalulume. ‘Anggun bimunce, anggur mek kanye wangalamak mek, pia yu ning boyasumunyeura, dinamabe,’ nyabuka, anggun akanye yapu ak, tuba-tuba morolulume. Tonda, talye bona utotoa talina kum nang ap, mikip kumce, mitang nang ap ati, aning-aning nirya, kum uamlye nang ati, weik arye patalye ninye nirya ap, ikin ning weik, sik nong deice delilulume. Tonda, sik bona utotoa talina kum ninye taleamice ning ara, ubula dolomunce, ikin pil dilulume. အခန်းကိုကြည့်ပါ။ |
Amos 4:1
49 ပူးပေါင်းရင်းမြစ်များ
Sikda, pia ikin weik unamaka deiyok ara ani. Ara, sik malye ulamik nang arye, talye bona utotoa talina kum nang nirya ati, obuka batakikce, sice bultakalamik. Abona talina kum nang arye domik asik nirya ara, sik malye ulamik nang arye, anyasik nirya alubula dopromik. Sikda anyasik kum domik bukni, ‘Nuncuk anyasik nirya taliptibyeʼ tenen, yuk nang arye domik aik nirya ubula dopromik.
Sik amalye wininyak nang aryuk, sik talye bona utotoa talina kum nang ati, “Nun banamap bisik ara, anggun ton abisik ara kum bitume. Anggunda kisikdoplulume!” nyabuka, yupu sekelongonyake. Ato ning weik tonun tuba winiyaka ati, sik bona utotoa talina kum unyak nang ara, ‘Sik yu nang arye, ikin weik ning, nun nong deice deipsicakʼ tenen, sik mutuku noutam ara batakuka, yukak bikirye, dungnubuka unyake.
Tonda, malye kanye bobikirye, anggunce, “Nun weik kel yupu arye nyapmunyeura, yuk nang nirya ati, malye kipnamabe. Sikda nun amu tamuk unamake,” nyabuka nyanyake. Tonda, sik kanye erepdakirye, “Nun kanye aryuk tenenyap yupu nirya ara, talye lukdanuka nyanamabe. Yata deiyoknye birye, ‘Ance aning ara, winiplyame, aning ara, pia kum winipnalame,’ nyabuka, yupu nyapdeipsutu do? Kume, nun kanye aryuk tenebupu touk unyabe,” nyabuka, maknya kintilanmakirye, nyanyake.
Tonda, na nio, sik yu ubikirye, nunti talye minin yupu weik nyakce nang ara, ‘Nun Israel yala nang unyap mutuku noutam ara, tuba kum unamak’ tenen, moropkine. Ati, ance anang ara, yupu pia sekenalame. Ati, sik anang arye, yuk nang ati, onyak nang nirya ara, ‘An Allah arye sikti, kanye imun weik ning, sik nong deice deipnalam’ tenen, moropkine na nio.
Sik bona utotoa talin nang arye, bona utotoa talina kum ninye ati talinyakce, sik nong deice ikin ning delinyake. Tonda ninye talinyak ning ati, ‘Aminyan tamubuka punupnamkin’ tenen, tia dopropnamne ati, ‘Bon dopropnun,’ tenebuka morolulnye bira, elti, arelul deiyoknye birye, el deice tam unamle. Ninye arye sik patan ning ati, “Se, ance aning tia talak ati arepniminyopura, aminyan talak tamubuka arepnamkine,” nyabuka morobikceba, aning talina deiyoknye birye, sik morobice ning bokuka arelulnye birye, sik morona ninye deice tam ulirye, “Wininamlulume, wininamlulume,” nyabuka unamle. Sikda, el amu tamuk unyakce, talye pil melina ninye atonun unamake. Bokuka arena deiyoknye birye, sik ninye deiyoknye atonun unamle. ‘Abon ning tia dopropnamne ati, aminyan punupnamkine,’ tenebuka morolulnye, el amu tam unamle.
Yuk talak ton, narye pia bita dinmasiba, tukwak mutuku im sirya, mutuku sirya nirya ara, ton tam nang arye, yuk tam nang ati, pia ikin ning dobuka, sik nong deice delinyakba, aning ara imun kanye bobuka unyake. Aning nirya ara, teleb winina kum ning ati, moubuka tenipdese. Atenepse ning ara, pia kanye imun weik ning noutam unyak nang nirya, aning winipca deice arye, weik tonun engenyake. Malye kanye bobuka engenyak bukni, ikin weik unyak ning ara, yuk nang arye ton pia kum melinyake. Yuk nang nirya arye, ‘Aning ara, dauplyeʼ tenen, luba kina uk unyaka ati, anang ara tuba ikin kanye bobuka unyake. Ninye tonoknye babye ton, anang ati, kum melilirye, sik talima kum kwadilule. Tonda, sik mikip pia weik nang arye, yu weik ukirye, sik mitang nang dam yanuka, weik ikin ning, sik nong deice deibikceura, imun kanye bobuka unyak bukni, yuk nang arye, kum melinyaka ati, ‘Seʼ tenen, engana uk unyake.
Tonok mutuku noutam balamlumce, dipdebuka, mikip weik deiyoknye birye, sik talye bona utotoa kum nang nirya ati, sik nong deice ikin weik ning deiplirye, sik anang ati dopropnyopura, aning ara anggunce, ‘Seʼ tenen, Yata upmal do?’ tenen, kanye teniltona kume. Deiyok ara ani. Amalye ulamlye ninye deiyoknye, el deice tam ton, ninye deiyoknye yuknye ton aulule. Atonun, anye el deice tam babye, yuk deiyok nang ton daunyake. Sik nirya arye, amalye ulamlanye ulul ning nirya ara, elikirye akunum bikinyak bukni, sik nirya ara, ‘Yo dauplye,’ tenebikirye, luba kinyake. Ati, sik nirya ara malyeuk unyake.
Allah arye nyapdeibukba, nabi Yesaya birye sekeipsuk. Anggun bicoe, Israel yala ninye anggun umunye mutuku ara, Allah arye nyapliba, yu weik nang arye yanuka opsikirye, atu kiplopnamsiyaka ati, anggunda bicoe nyapsine. Anggunce weik asik dobuka ulamlum mutuku, Efraim mutuku kota noutam ara, sirya daknamake. Bukni, anggunda amutuku ululum nang ara, kanye wangalamak mek weik tonun, dimunye diparyuk, ‘Nun mutuku ara, urasin teleb kibuka aunamsile,’ tenelulum bukni, amutuku ara pia kum danamsile. Winipmanto ara, weik nang arye, bunga kita moupmalye ning dobuka, sik kisok deice deipmake bukni, dakalsaklamle atonun, anggun urasin teleb tenelulum mutuku babye, pia tuku telebak deice tam ulul bukni, aminyan akeit ning sesal lebuka, malye ulamle touk, anggun mutuku ara malye upnamsile. Ati anggunda bicoe. Anggun aik dolalum mutuku ara, teleb mutuku bukni, ninye nirya kanye wangalamak mek, weik tonun dilaluma deice arye, akunum malye winilulume.
Anggun malye ululum nang ara, Allah arye wenepnamsila ati, anggunda bico. Ara, anggunce, anggun aik akunum doplum bukni, yuk talye kankan nang arye domik ning ara, anggunce dekna ap, alubuka dolona ap arye, doproplumce, anggun ninguk weika arye, tabakuka delilulume. Atonun, anggun wa tuku akunum aubuk bukni, yuk nang arye wilamak wa tuku ton, alubuka doproplum nang ara, malye winilulume. Angguncuk, sik yuk nang talilamik ning ap, ulamik mutuku ap nirya ara, akunum doproplumba, anang yukak bendobikura, angguncuk amutuku talibuka, anggun yuk aunmamlume. Winilulum ning ara, malye weik winiplume. Allah arye nyabuk.
Tonda, sikce nyanyake. “Anggun ton yalulume! Nun ap, kanye wangalamak yu mek doprobipyeura, amek weik anun neika dinamabe! Anggun ton yalulume! Nun ap, anggun ap arye, yu weik anggur mek dobuka, dinamabe. ‘Dilamepya ani, akunum boupsilyopura, teleb kanye bobuka unamabe,’ tenena kume. Tonda, mapmapya bereklyopura, ambusum abapye, awininmap touk winipnamabe. Arup ara, mitik teleb upmasil bukni, ambusum ara, pia teleb weik sum yanamala ati, ambusum ara, kanye weik deibuka, telebuk unamabe!” nyabuka nyalanyake. Allah arye, sik Israel yala deiyok nang ati nyabuk.
Na Allah arye anggun Israel ninye ati nyapsine. Anggunce nati, ‘Elce melipnamsil’ tenen, din dina kumce si tebuka umunce, teleb winipmunyopura, aning ara, mitik teleb bukni, dipkoprob pia teleb unamlum tenepse ning ara atia. Mikip nang arye yuk talye nang ati, deiyok kum wamlibuk, yu ubikirye tapu koubuka delinyak ninye ara, ‘Anang ati bico tenepmunce anang loltakanamlum’ tenen nyapsise. Tonda aninye ara deiyok kum wamliba, rantai tapu arye tapu koubuka, wenena aik dongonyak ninye ati, ‘Anang ati bico tenepmunce, loltakanamlum’ tenen, nyapsise. Tonda mutuku-mutuku nirya talibuka unyak weik deiyok nang arye, sik amu tam nang nong deice ikin ning delinyak ning ara, kum danaipmunce, aninye ati lobuka melipnamlulume. Winipmunyopura, na Allah arye anggunti kanye delinamsine. Talye kanye deibuka, din dina kumce si tebuka una ara kume.
Allah arye, ayupu ton nyabuk. Se anggun Babel mutuku nango, anggunda bicoe. Deiyok ara, anggunda na mapu koproba, ‘Naʼ tenyamse nang, sik Israel yala nang nirya ara, angguncuk oplumce, alubuka doproplum ning ara, ikin ning weik, anggun nong deice delilalume. Winiplum talak ara, sapi basam mi arye, bikbik abuka merkabang dolirye, kanye deibuka, maning kapu dam binuka dilamle touk, winilamlume. Aning atonun, anggunda yim basam kuda arye, teleb kanye boplirye, orbinuka, ayanuka, talye bikbik abuka balamle touk, winilamlume.
Winipmunyopura, sik amutuku yin talin nang nirya ara, adiparyuk obuka, sirya daknamlume! Min talak ara, weik yim sapi basam, mikip weik ulamle touk ulamik bukni, wini talak ara, ayin nang nirya opmunce, anang nirya ara, kum kipdeipnamlume. Ura, sik Babel mutuku yin talin nang nirya ara, bicoe! Sik wenebuka ona sum, akunum dam upmala ati, anggunce adiparyuk opmunce, kum daneipnamlume!
Aminyan talak ara, Yerusalem mutuku noutam nirya unyak nang arye nyanamake. “Se, sik Babel mutuku nang arye, nunti, adiparyuk malye kibuka, sice buklopmasiake. Tonda, Babel mutuku talibuka, ninye deiyoknye Raja Babel birye, obuka, sirya dakmasile. Winipmanto ara, weik laut pum tam ikan arye, mitik ikan obuka diplirye, sirya daklamle touk, nun Yerusalem mutuku ninye nirya, akunum obuka sirya dakmasile. Nun mutuku noutam teleb uamuk ning nirya, alubuka doprobukce, kum kipdeipmasile. Winipmanto ning ton, weik yu kam arye, pia weik ning arye, mitik kam ning obuka dilamle touk, Yerusalem mutuku nirya ara, kunum dipmasile. El mun pum tam arye, amutuku noutam teleb ning nirya ara, dopropnamle bukni, elce, ‘Na like, teneple ning ara, dukuka batakmasile.”
Allah el mikip weik arye, aning-aning talibuka, deice tam erebuka, mikip weik ululnye birye, Yerusalem mutuku nang, sik mal olana deiyok talibuka wininyak nang ati, akunum nyapdeibuk. “Anggun yamunce, yo nirya ara, yanuka webuka bataknamlume. Tonda, Yerusalem mutuku, weik asik dobuka unyakce, cang weik keil poka domikak nirya ara, tuku palibuka deipmunyeba, langdilya deice arye, welebuka bimunce, Yerusalem mutuku unyak nang dam, binuka opnamlume. Na Allah arye, sik Yerusalem mutuku noutam unyak nang ati, wenepnamne. Ara, amutuku unyak nang, sikce, yuk nang ati, pia malye kibuka, akunum ikin ning delinyaka atia.
Tonda, anggun amutuku ululum ninye arye, ninye asik nang ap, yuk pera mutuku arye amutuku yanganamak ninye ap, kwaknan mapu ap, youwak kilapu ap, sik nong deice, ikin ning kum delinamlume. Aninye nirya ati, diksukumuk wininamlume. Tonda, malye winin ning kum winipmakibuk, ‘Anye bira malye winipmale,’ nyabuka, minina yupu nyapmunce, anang kum onamlume. Yuk ninye talye oltakana pia meme. Tonda kwemdina ara, Isa Mutuku Dongonye ap, ninye arye puturubuka delinyak ning ap, talye-talye ning nirya ap ati, ‘Nun deiyok ning ulula anya arye, aning si erenamabe,’ nyabuka, amutuku noutamak umunce, si kum erenamlume. Awinimunya deice arye, anggunce, anggun bidamnye ati, malye kililalulume.
Tonda, yuk bona utotoa talina kum nang arye, anye bira el yo bok do, yuk ning do, tia talak ati doprobikirye, sik patan ning dekuka doprobikirye, dabolamica talak ara, elce sik nong deice, ikin ning weik delilule. Tonda yuk nang ati, ikin pil arukulule. Tia talak ati, el ning doprobikirye, ‘Aminyan talak ara, dipkoprob aning tamubuka arepnamniakce, tenepnamsil’ tenen, el ning dekna pununa ati, areamice ning ara, amalye ululnye birye, ubula dololule. Sikce el ning, tia talak ati dopromice ning, tuba tamubuka arebicopura, elce sik ning tamubuka kum arelule. Tonda, amalye ululnye bira, yuk nang, sik ning talye ubula dololule. Tonda, yuk nang din patana ap, baju kum ati, nong banang una ap, ulamice talak ara, elce melibuka kum arelule. Tonda, anye birye, amutuku unyak Israel ninye arye, Isa Mutuku Dongonye si erebikirye, ‘Nun ni yapu ukirye, melinamsiyak’ tenen, aisa urasin atonun ubuka memamice ning ati, el asing dilamlirye, ‘Aning ara, nati melinamnile,’ tenelule. Atonye bira, pia malye weik ulule. Ati, na Allah arye, ‘Aning ara, na pia like,’ tenenun ninguk, winilule.
Aninguk kum bukni, yuk nang, anggun Yerusalem mutuku ululum nang kan-kan arye, “Ninye opdeipsululume,’’ nyabuka, dekenyak uang arebikceba doprobikirye, ninye ton onyake. Tonda, yuk nang arye, yo bok patan nang ati, “Anggun yo bok tia arepnusiap, bukni, min yuma ara, winibuka yo bok ton tabakuka arepnamnilyame,” nyabuka arinyake. Winyamikca ani, anye el uang kum upmalye buk, tamubuka min kum areptu talak ara, ila tamubuka, anggunce “Ati, wini talak aryuk, yo bok ton ap, weika tabakuka areplulume,” nyabuka, mikip arye moronyake. Tonda, anggun yala nang atibuk, “Uang ton arepsilyame. Kum arepsiminyopura, ikin ning weik, anggun nong deice arenamsine,” nyabuka, mikip arye moronyake. Winiluluma deice arye, anggun nirya arye, na Allah ati, akunum lubakinululume. Nara Allah Yahweh, aning-aning nirya deice tam erebuka, Pia Mikip Weik Deiyoknye ununye birye akunum nyapsine.
Aninguk kum bukni, sik Israel nang unyak mutuku noutam, ninye deiyok kibuka, taleamikce ulamik touk, tuba unyak deiyok nang babye, pia malye weik wininyake. Winipmanto, bai tam ulamle yu kam arye, ulamle ning obuka, si tobuka dilamle touk, unyake. Ara, sikce ‘Se, nunda yo bok pia weik ton doproptibnye’ tenen, malye winina ap, tilila yupu nyana ap, ninye ona ap, ikin ning dobuka, yuk nang nong deice delina ap, wininyaka deice arye, ubula dolokirye, bona talin nang unyake.
Tonda, anggun Israel mutuku noutam ululum nang arye, amalye winin ning ton winilulume. Ara, ton nang arye, ‘Bona talibuka unamapʼ tenebikirye, yuk nang ati, ‘Anggun adiparyuk, yo bok weik arepsilyame. Kum arepsiminyeura, ikin ning weik, anggun nong deice delinamsiabe,ʼ nyabuka, ubula aryuk uang weik dolonyake. Tonda, sik anang ara, talye yupu deice nyaplobikirye, yuk nang talinyak ning ubula dolonyake. Sikce, bona pia kum talinyak nang, talye kankan unyak nang ati, melipting bukni, aning kumce, anggun deice ikin ning deibuka, daralongona deice arye, yo bok ton ubula dolonyake. Tonda, karin mutuku arye yanuka, ninye asik nang ara, sik Israel mutuku noutam unyak nang ati, ‘Anggun adiparyuk, yo bok weik arepsululume. Kum arepsumunyeura, ikin ning weik, sik nong deice deilinamsiabe,ʼ nyabuka, ubula aryuk uang weik dolonyake. Sik anang ara, ninye asik nanguk unyaka ati, yata yupu ton nyaptingba, sik ning tamubuka dopropting do? Kume, aning ara pia kum winipmanto.
Tonda, anggun Yerusalem mutuku ululum nang ara, anggun ni yapu ap, anggun nin yapu ap ati, ‘Telebe,’ nyabuka, sik yupu kum kekemunce, sikti kum kanye delilulume. Tonda, ninye asik nang, yuk karin mutuku arye yanuka, anggun mutuku noutam, sik ap neika ululum nang ati, ikin ning weik, sik nong deice delilulumba, ‘Seʼ tenen, imun kanye bobuka unyake. Tonda youwak kilapu ap, sik ni yapu dibikba kwaknamne mapu yanuka unyak mapu ap ara, anggun dam unyak buk, talye yupu nyaplopmunce, kum melilulume. Batakalulume.
Atalak ara, dabinuka wangapdayik domba basam nirya ara, elbinamne. Tonda, ‘Seʼ tenen, kanye teniplirye, daulye ning babye, boyanamne. Tonda, suse dilamle ning ara, boyanirye, kitibuka kwetepnamne. Uk dilamlye ning babye, boyanirye, kwetepnamne. Bukni, meta teleb domba basam ap, mikip weik domba basam ap nirya ara, oplopnirye, kum kilinamne. ‘Winipnamne,’ tenyamse ning ara, naryuk, adomba basam weina deiyoknye unirye, pia teleb kibuka weinamnarya!
Amaka ap, abai tam kam ulamle ning ap, yakirye, mambul weik ulamik nang, sik nong dinamake. Ara, mal olana kel weik nang ap, pia mikip weik ulamik yin talilamik nang ap, tukwak mutuku ninye deiyok kiamikce nang, yuk-yuk talilamik deiyok nang ap, sik deiamikba, sik nong tup ap, tonda anang sik ining ap, yanuka dipnamake. Winipmanto ara, adiamik nang, sik nong dinamak ning ara, yim kambing basam ap, domba basam mapu ap, kambing basam ap, sapi basam ap, tonda, Basan mutuku pia bita teleb sukum arye weinyak domba ara, nong weik unyak ning atonun ubuka dinamake.
Tonda, sik malye winin nang aryuk, na mapu koproba, ‘Naʼ tenen, ninye Israel nang malye kibikce, tapu koubuka, sik wenen aik binuka deiamikce, win ning, el si ara undi, pil dopna arye, ‘Awena aik unyak nang kan-kan ara, yatanye dopropnamal do?’ tenen, winilelamikce, aninye dobuka, weik ikin pil aruklamikba, talye piluk dolamik. Winilamikce, wel nang doprobikce, ‘Talye-talye yolan kilapu dopropnun’ tenen, akilapu dekna ati, akilapu sik deiyok nang ati, dekna ning arelamik. Aning atonun, Israel yala wel kilapu doprobikce, yuk nang ati arebikba, yo bok dobukapna arye, sikce ayo bok deice arye, yu mek dekuka dilamik. Winibuka pia malye weik winilamika ati, amutuku-amutuku ninye weik arye wenepnamne. Allah arye nyabuk.
Allah arye Israel ninye ati nyapdeibukba, Amos kekebukce, sekuk yupu ara ani. “Na Allah Yahweh arye, ‘Anggun Israel ninye ati wenepnamsin’ tenen, nyapsin yupu ara, moubuka kekeplulume. Se, Israel ninye anggunda, Mesir mutuku ulalumba, na Allah Yahweh arye dobuka boyanamsise. Ati, na Allah Yahweh arye, anggun Israel ninye nirya ati, awenen yupu nyapsine.
Tonda, winipmanto ning ara, moubuka tenipdelulume. Anggun kele, ninye bitinye nang arye, neiktoto barudake. Ara, sik abitinye nang ara, ‘Nun winipnamaname. Bisikuk neika binamaname,’ nyabuka, laka kum nyapdanmarikiryuk, tonok bisikuk barudak do? Kume, ‘Nun bitinye ara, abisikuk binuname,’ nyabuka, neika kum nyapdatiringopura, neika tonok bisikuk kum bitiringe. (Aning atouk, anggun ap, na ap, tonok kanye uk, kum boptipyopura, neika kum uptibye.) Allah arye nyapdeibukba, Amos birye kekebuk.
Atonun anggunce talye bona utotoa talina kum ninye ati, ‘Sikda talye ninye unyake’ tenen, yanipdongobuka, sik gandum talye dalubuka dololulume. Sik ning ap, sik uang yo bok ap, ubula weik dololuluma anya arye, pia malye winilulume. Wininululuma ati ara, anggun aning winilulum ning ara, pia teleb keil arye dolalum aik ara, aminyan talak ara, anyaik pum tam, pia kum unamlume. Ara, anggun bidamnye arye, urasin pia teleb ubuka dolalum asik ara, anyasik pia kum unamlume, nyapsine. Tonda, anggun bidamnye mikip deice arye, wa wibuka koululum anggur duk moulamle tapu ara, duk dakmunce, aduk teikuka, anggur mek kwebuka kum dinamlume.
Allah arye nyabukba, Amos birye kekebuka sekuk yupu. Se, Sion mutuku noutam umunce, ‘Nunda telebuk ubuka unyabe’ tenen, talye kanye bobuka ululum ninye ara, bicoe nyapsine. Tonda, sik Samaria mutuku deice ukirye, ‘Ikin ning nun dam kum yatue’ tenen, teleb kanye bobuka, umunye ninye babye, anggun bicoe. Anggun nirya ara, malye umunye bukni, ‘Nunda teleb unyabe,’ tenelulum ning ara, Allah arye wenepsilirye, anggun deice ikin ning deipnamsila ati, anggunda bicoe. Sik Samaria mutuku nang ara, talye nang kume. Israel ninye nirya arye, sik si akunum kel bikamik. Tonda, Israel ninye nirya arye, ‘Nun ni yapu arye, kalikuka melinamsiyak’ tenen, sikti, kanye deibuka dikirye, ‘Nun melipsilyame,’ nyabuka moronyake. Bukni, sik nirya ara, bicoe nyapne.
Tonda aning atonun, anggun mek dina ati, anggur mek ara, mek makau arye kwepmunyeba, langdiplyopura, weik arye dilulume. Tonda, anggun nong bol deice, pia teleb una ati, nintong teleb mek likilalulume. Talye kanye bobuka, aning nirya winilulum bukni, Israel ninye nirya malye wininyak ning ati, mambul kanye bobuka ulamtum bukni, aning ara, pia kum tenelulume. Anggunce, ‘Se, nun apu koproba, Yusup birye deiamukba, dadeipdanin yangalamikce, nun dam unyak Israel ninye ara, yata ning deiyok ati, malye ulilanyak do?’ pia kum tenelulume.
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Aning akunum winibikura, sik Israel nang ara, ila tamubuka yayikce, eitam bukamuk mutuku, ‘Basan mutuku dam binamabe’ tenen, amukutu lu bisik banmek. Banmek bukni, winibik talak ara, Basan mutuku taleamuka deiyoknye, el si Og, el yin talin nang ap, sik nirya arye, Israel nang, Eterai mutuku unmeka ati, ‘Warekuka opnuyab?’ tenen, Basan mutuku tam arye, Eterai mutuku yayikce, Israel nang, sik yin talin nang ati, warikike.
Nyabukabukce, ayupu ton nyabuk. “Talye pil dona ati, bona utotoa kum nang ara, aning-aning babye, nirya kum nang ati, pia dobuka delina meme. Tonda, sik pil dopmace buk, sik pil dona ati, yo bok adiparyuk kum arepmunya deice arye, sik nong deice, ikin ning kum delinamlulume. Anyapmasina ara, anggun mutuku koproba nang, Israel ninye do, yuk mutuku arye tikilyangan nang do? Tonok mutuku arye aik, neika ululum nang nirya ati nyapsine. Bona utotoa kum ninye arye, ‘Pil dopneba, yo bok arepnamniake,’ tenebikirye, pil dopsicopura, anang ati, ‘Dauplye’ tenen, ikin ning, sik nong deice delina meme. Sik dekna ning, adiparyuk arepnamlulume.
Tonda, anggunce deibuka, pil domunce, tuku deice koulalum ning nirya ara, anggun kum bikamlum nang, yuk pera mutuku arye yangan nang yakirye, yanuka anggun wa tuku nirya doropnamsiake. Bukni, anggun ning ara, ton kum dopropnalume. Tonda, yuk nang arye yu uplyeura, anggun dam tuba-tuba ikin ning delinamsiake. Anggun ti, olbisinauk wininamsiake.
ကြော်ငြာတွေ